Ọdaphan Ịpe ạ Mạtiu Ạge Bọ
3 Amem mọ ạ Jọn Oḍiinyeom Mụum mọ amhiigh bọ ogbeelhom adom mọ Ẹnhaan ẹpe ẹdala phọ a Judia iru ni ẹteeny, 2 kụ ạḅem ghan mọ: “Ikiton, loor esi dị Ọmhar k’ạke phọ matuman sịen.” 3 Ọkar ọghaaph, ọphon kụ ẹdi oyil phọ Ạịzạyạ ạghaaph bọ ịlo ọdi mọ: “Ụnhaghan ni ẹḍogh dị ẹlo ghan ẹpe ẹdala phọ mọ: ‘Iikolhobian eten phọ a Jehova!* Iselhe yogh reten phọ ọdi.’” 4 Ạ Jọn ạkpolhoghian ghan ạsuoma asuphuuph ạ kạmẹl r’okuughaam esin dị oḍighinhom ozu ẹnham. Igurubia* r’ẹnhuum aḍiowo kụ iḍighi ghan eḍien ọdi. 5 Kụ awe phọ a Jeruselem r’oomo a Judia r’oomo ạramha phọ ekitonhom bọ Ọphiiny phọ ạ Jọdạn ọghi ghan ọteeny nyọdi, 6 kụ ọghaaph ghan ịkaraph phọ ạbidi omiteom, kụ ọdi aḍiinye ghan bịdi mụum sịphe Ọphiiny phọ ạ Jọdạn.
7 Mem mọ ọdi ạmhiin bọ ịbadi ạbuo ạ Fạrisi rạ Sạdusi phọ dị rotu ẹpe ọdi raḍiinye bọ we mụum mọ, ọdi ạḅenhi bịdi mọ: “Nyinha ạnmuny ạsiḅom, ạnhian kụ ịphur inyinha rụru oghiil ọḍua esi ạghelhe phọ ratu bọ? 8 Imiigh omhuum iimhumha dị eḍeenhaan mọ nyinha mekiton. 9 Kẹ́etughian ọḅem mọ, ‘Ebrạhạm kụ ọde ayoor.’ Loor esi dị mị rịḅenhi ghan inyinha mọ Ẹnhaan katue ni amiteom nmụny sịen asighiigh phọ ịphen phọ ạngo Ebrạhạm. 10 Ịduon rọkaaph bọ moseere akubu sịphe azin oreeny phọ. Esi ịduon phọ tọrobo oreeny lọ rámuum igey iimhumha, koler ri oguom nịan. 11 Ẹlo ạmhi, mị riḍiinye ghan inyinha mụum loor esi ịduon nyinha mekiton bọ, kụolo ọpo odi bọ ọmhan ạmhi ratu upu ni ịmhi, kụ rokoro ọdi bịn mị ụ́man ọkporion. Ọdi kiḍiinyeom inyinha uwaloor iigbia r’ạnian. 12 Ọdi ạpam ni ọsalham mọ ọdi, kụ kạḅaalhamhi ni esi phọ ọdi rạtol ghan bọ kạsal rạraar phọ, kụ ọdi aakpomhoghi wit phọ ạlogh ẹpe otu phọ roseere ghan bọ rạraar phọ, kụolo roopho phọ ọdi kaguom nịan dị kótue oḍime.”
13 Kụ a Jizọs ạḅua ẹpe Gạlili aru ạteeny Jọn ẹpe Ọphiiny phọ ạ Jọdạn, pịdi aḍiinye nyọdi mụum. 14 Kụolo ạ Jọn ạwa okikima ọdi, kụ ạḅem mọ: “Nạ kụ ụkpe ghụn oḍiinye ạmhi mụum, kụ nạ ạḅilhe atu dị mị kụ kaḍiinye nyịnha.” 15 Kụ a Jizọs ạḅenhi nyọdi mọ: “Ọwilhe ịdipho edi bọ, ịphen kụ ịkpe omite pịdi yira otue omuneni oomo ịpe Ẹnhaan rạwa bọ.” Bịn ọdi ạwilhe okikima ọdi. 16 A Jizọs ramite bọ sịphe ạmuum mọ oḍiinye bọ nyọdi bịn; ạsike phọ eghunyonhu kụ ạ Jọn ạmhiin dị uwaloor phọ Ẹnhaan rasoorom nyọdi ịdipho okuru ghọzo. 17 Kụ ẹḍogh ịḅa kẹn ni ẹpe k’ạke phọ mọ: “Ọphon kụ Ọony phọ ạmhi mị ạphomhoghian bọ, eḍighinhom ịyaar phọ ọdi ịḅeraan ni ịmhi iboom.”