Ọdaphan Jọn

6 Ịphen phọ reten kụ a Jizọs ạḅeeny Ọphiiny Ạbazi phọ ạ Gạlili ọbobo ạ Tạịbiriạs. 2 Kụ aḍiboom aḍita awe ụdaph ghan ni nyọdi, loor ịiḍaany phọ bịdi rọmiin bọ dị ọdi raḍighi ookonhom awe phọ. 3 Kụ a Jizọs ạsiiny ạnyu ẹeḅaraph ạrol ude r’ạbumatuan phọ ọdi. 4 Mem mọ ọpo phọ, Ẹyaal Ọphel Otenhe phọ ạbuo a Ju phọ role ghan bọ mẹkpul. 5 A Jizọs rophogh rọmhiin ḍiboom aḍita awe phọ rotu bọ ọteeny ọdi, kụ apuru Filip mọ: “Yira koko ẹghen ạ brẹd dị awe phọ ạbuen phọ kole?” 6 Ọdi apuru ḍipuru phọ ạḍien phọ ọdegh a Filip ophogh, loor esi dị ọdi alegheri ni ịpe ọdi rạwa bọ oḍighi phọ. 7 Kụ a Filip ạphagharanhaan nyọdi mọ: “Ạ brẹd ịyal okuron a dinerạị* bịn káleeny bịdi ghạlhamo ụngo ghan tọrobo ọnyo ạbidi ẹnum ẹnum.” 8 Kụ oniin ạmatuan ọdi dị oghol mọ Ạndru, umor phọ ạ Sạịmọn Pita, ạḅenhi nyọdi mọ: 9 “Ọbam ọony odi ni sịen dị ạpham oogh iiḅoghoḍi ạ brẹd dị oḍighinhom bạli r’ịyal ịbam ina. Kụolo ịphẹn phọ kesi ḍighen, esi awe dị olheeny ịduon?”

10 Kụ a Jizọs ạḅem mọ: “Ịḅenhi awe phọ ọrolhoghu ude.” Kụ awe phọ ọrolhoghu loor ịduon atuboom ạroogho ạrol bọ ni esi phọ. Kụ alhephiri ạnmuny dị ọrol sịphe phọ koḍighi ni 5,000. 11 Kụ a Jizọs ạsighe ạ brẹd phọ, kụ ạngo Ẹnhaan ḍịseph, kụ adiemhi bụphe ọrolhoghu bọ sịphe phọ; ọdi ạsighe ni kẹn ịyal phọ ịbam ina phọ aḍighi iginha phọ, kụ awe phọ ọsighe ịpe kẹgbaanyan bọ bịdi. 12 Bịdi rolhe ẹpherogh, kụ ọdi ạḅenhi bụmatuan phọ ọdi mọ: “Iikpomhoghi ipoḍi phọ esugha bọ, ọbo ịyaar kepe ghan bọ.” 13 Kụ bịdi ookpomhoghi ipoḍi oogh iiḅoghoḍi ạ brẹd ạ bạli phọ awe phọ olhe bọ osugheeny, kụ emuza 12 ạrigiel.

14 Awe phọ rọmhiin ịiḍaany phọ ọdi aḍighi bọ, kụ omhiigh ọḅem mọ: “Ọkar agey ọphon kụ Oyil phọ ọḅem bọ mọ katu sịen aḅirinhi phọ.” 15 A Jizọs rolhegheri mọ bịdi rọwa oru osiph ọdi oḍighi uwo ẹmha, kụ oginha ọdi ạḅua ạḅilhe ạghi ẹpe ẹeḅaraph phọ.

16 Rẹteeny dulhe, kụ ạbumatuan phọ ọdi ọghi ẹpe ọphiiny ạbazi phọ, 17 kụ oḍigh oghuugh onyeenhe Kạpạnịọm. Mem mọ ọpo phọ mekpereghian, kụ a Jizọs kőru ọteeny bịdi. 18 Kụ ọphiiny phọ mamhiigh kẹn ratuḅuan loor esi dị ọgbagara oghim rakim. 19 Kụolo bịdi rọzoghi ịzoghi dị keḍighi ni ịraar ọbobo inya ạ mạịl,* kụ bịdi ọmhiin Jizọs dị marelhe ạnyu ạmuum mọ ratuman oghuugh phọ, kụ aruugu asiph bịdi. 20 Kụolo ọdi ạḅenhi bịdi mọ: “Mị ni; kékiilhaan!” 21 Kụ olhoghi ạbidi ạḅaal li ọsaany ọdi sịphe oghuugh phọ, kụ íbia bịn osul ẹpe bịdi rọki bọ.

22 Ḍio phọ etum bọ pạ, aḍita awe phọ ọrol bọ ọphoripho ạga ọphiiny ạbazi phọ ụ́miin oghuugh ẹpe phọ. Ọbam oghuugh ạrol ghan ni ẹpe phọ, kụolo a Jizọs óḍigh aani oghuugh phọ r’ạbumatuan phọ ọdi, loor esi dị oginha ạbumatuan phọ ọdi kụ ụḅua. 23 Kụ arughuugh dị ẹḍua Tạịbiriạs retu isul li esi dị etuman sịphe bịdi ọrol bọ olhe ạ brẹd phọ mem mọ Uwo Ẹmhoogh phọ mạngo bọ Ẹnhaan ḍịseph phọ. 24 Kụ aḍita awe phọ rọmhiin mọ a Jizọs r’ạbumatuan phọ ọdi úlo ẹpe phọ, kụ oḍiku rughuugh ạbidi ọghi Kạpạnịọm ọwa a Jizọs.

25 Bịdi rọmhiin nyọdi ọphoripho ạga ọphiiny ạbazi phọ kụ opuru mọ: “Rạbạị, nạ uru ẹphen phọ pụr amem?” 26 Kụ a Jizọs ạphagharanhaan bịdi mọ: “Mị ạkar rịḅenhi ghan inyinha mọ, nyinha ị́tuan ịiḍaany phọ nyinha ẹmhiin bọ kụ rịwa bọ ịmhi, nyinha ịtuan ạ brẹd phọ nyinha elhe bọ ịpherogh inyinha. 27 Kẹ́tuan ghan eḍien phọ ẹpe kẹḅor bọ kụ ekumuan, ịtuan ghụn ẹpe kẹ́ḅor bọ ḅịlhe kẹngo bọ ghuḍum k’agee-pọ, ẹpe Ọony phọ oye kịngo bọ inyinha; loor esi dị ọphon kụ ẹdi Ọde phọ, Ẹnhaan r’aloor, mạviilhom elhegh phọ ọdi mọ ạḅeraan ni nyịnho.”

28 Kụ bịdi opuru nyọdi mọ: “Ẹwa mọ yoor uḍighi eeghe orue oḍighi iiḍighi phọ ịpe ẹḅeraan bọ Ẹnhaan?” 29 Kụ a Jizọs ạphagharanhaan bịdi mọ: “Oḍighi dị ạḅeraan Ẹnhaan dị nyinha keḍighi pọ ọmhoogh omheeraam ọghi esi ọpo ọdi arom bọ.” 30 Kụ bịdi ọḅenhi nyọdi mọ: “Ịghen ịiḍaany kụ ẹdi nạ kaḍighi, pịdi yoor ọmiin omheeraam nyịnha? Nạ kaḍighi eeghe? 31 Ạburude ạburude phọ ayira ulhe ghan mạna ẹpe ẹdala phọ, ịdipho ọge bọ mọ: ‘Ọdi ạngo bịdi ạ brẹd dị ạḅua k’ạke kụ aru mọ bịdi olhe.’” 32 Kụ a Jizọs ạḅenhi bịdi mọ: “Mị ạkar rịḅenhi ghan inyinha mọ, a Mozis inyinha ị́ngo ạ brẹd dị ạḅua k’ạke kụ aru, kụolo Ọde phọ ạmhi rịngo ghan inyinha ọkar ạ brẹd phọ ạḅua bọ k’ạke kụ aru. 33 Ạ brẹd phọ Ẹnhaan pọ ọpo ạḅua bọ k’ạke phọ aru, kụ rạngo bọ ghuḍum aḅirinhi phọ.” 34 Kụ bịdi ọḅenhi nyọdi mọ: “Uwo Ẹmhoogh, ụngo ghan iyoor ạ brẹd phọ ọphon phọ.”

35 Kụ a Jizọs ạḅenhi bịdi mọ: “Mị kụ ạ brẹd aghuḍum mọ. Tọrobo oye lọ aru ụteeny ịmhi ọkoony kásiph ghan mụn, kụ oye lọ ạmhoogh omheeraam aru esi ạmhi ạmuum kạ́pu mụn ni bịn. 36 Kụolo ịduon mị mịḅenhi bọ ni inyinha, nyinha mịmhiin ni ịmhi kụolo nyinha ịmhi ímheeraam. 37 Oomo ạbuphe Ọde phọ ụngo bọ ịmhi kotu ni ụteeny ịmhi, kụ mị káporogh ni bịn ọpo aru bọ ụteeny ịmhi; 38 ịdi eḍighi bọ mị ụḅua ẹpe k’ạke phọ aru oḍighi ogbi ọpo urom bọ ịmhi, kóḍighi ogbi ạmhi. 39 Ọphon kụ ogbi ọpo urom bọ ịmhi, mọ mị kútoph r’oniin esi oomo ạbuphe ọdi mụngo bọ ịmhi, kụolo mọ mị uḅerion bịdi ḍio phọ esughanham bọ ọmhan phọ. 40 Ọphon kụ ogbi Ọde phọ ạmhi, mọ tọrobo oye dị ạsighe Ọony phọ kụ ạḅilhe ạmhoogh omheeraam ạghi esi ọdi ạmhoogh ghuḍum k’agee-pọ, kụ mị kaḅeton ni oye phọ ḍio phọ esughanham bọ ọmhan phọ.”

41 Kụ ạbuo a Ju phọ omhiigh ogumhom ọdi loor ịduon ạḅem bọ mọ: “Mị kụ ạ brẹd phọ ạḅua bọ k’ạke aru.” 42 Kụ bịdi omhiigh ọḅem mọ: “Ọphon phọ ká Jizọs ọony phọ a Josẹf, ọphon yira olhegheri bọ ni ọde r’onhiin phọ ọdi? Uḍighi ika kụ rạḅem bọ nyịidipho mọ, ‘Mị ụḅua k’ạke kụ aru’?” 43 Kụ a Jizọs ạḅenhi bịdi mọ: “Kégum mụn sịphe igbo phọ anyinha. 44 Oye ólho dị katue atu ụteeny ịmhi emuton dị Ọde phọ urom bọ ịmhi kụ aḍur nyọdi, kụ mị kaḅeton ni oye phọ ḍio phọ esughanham bọ ọmhan phọ. 45 Ọge ni sịphe ịge Ariil phọ mọ: ‘A Jehova* kụ kạtughemhi oomo ạbidi.’ Tọrobo oye dị alher rụru ạngo Ọde phọ kụ ạtuugha esi ọdi ratu ghan ni kụteeny ịmhi. 46 Oye ólho dị mạmhiin ghan Ọde phọ, emuton ọpo ạḅua bọ kạ Ẹnhaan kụ aru; ọphon phọ kụ mạmhiin ghan Ọde phọ. 47 Mị ạkar rịḅenhi ghan inyinha mọ tọrobo ọpo amheeraam bọ kạmoogh ni ghuḍum k’agee-pọ.

48 “Mị kụ ạ brẹd aghuḍum mọ. 49 Ạburude ạburude phọ anyinha ulhe ni mạna ẹpe ẹdala phọ kụolo umhuughu ni. 50 Kụolo ọphon kụ ạ brẹd phọ ạḅua bọ ẹpe k’ạke aru, kụ tọrobo oye lọ alhe kámugh. 51 Mị kụ ạ brẹd aghuḍum mọ ạḅua bọ ẹpe k’ạke aru. Oye dị alhe ạ brẹd phọ ọphon phọ kạtol li k’agee-pọ; ọkar ọghaaph, ạ brẹd phọ mị kạngo bọ pọ iphulhupul phọ ạmhi pịdi awe aḅirinhi phọ ọmoogh ghuḍum.”

52 Kụ ạbuo a Ju phọ omhiigh ọogbaghanhaan ịsiphe igbo phọ ạbidi mọ: “Ika kụ ịdi oye phọ ọphon phọ kụngo bọ iyira iphulhupul phọ ọdi mọ ạany?” 53 Kụ a Jizọs ạḅenhi bịdi mọ: “Mị ạkar rịḅenhi ghan inyinha mọ, emuton lọ nyinha ạany iphulhupul Ọony phọ oye ẹḅilhe ẹphughol ịḅaal phọ ọdi, nyinha kẹ́moogh ghuḍum. 54 Tọrobo oye lọ ạany iphulhupul phọ ạmhi ạḅilhe ạphughol ịḅaal phọ ạmhi kạmoogh ni ghuḍum k’agee-pọ, kụ mị kaḅeton ni oye phọ ḍio phọ esughanham bọ ọmhan phọ; 55 ịdi eḍighi bọ iphulhupul phọ ạmhi ọkar eḍien kụ ịḅaal phọ ạmhi ọkar amiim. 56 Tọrobo oye lọ ạany iphulhupul phọ ạmhi ạḅilhe ạphughol ịḅaal phọ ạmhi kạkiom ni ghisigh ạḅoph r’ạmhi, kụ mị ạḅoph r’ọdi. 57 Ịdipho Ọde phọ odi ghan bọ urom bọ ịmhi kụ mị ạmhoogh bọ ghuḍum loor esi Ọde phọ, kụ ẹdi oye lọ ạany iphulhupul phọ ạmhi kạmoogh aani ghuḍum loor esi ạmhi. 58 Ọphon kụ ạ brẹd phọ ạḅua bọ k’ạke aru. Ọ́rol ịdipho ọpo ạburude ạburude phọ anyinha olhe bọ kụ omhuughu bọ ni. Tọrobo oye lọ alhe ạ brẹd phọ ọphon phọ kạtol k’agee-pọ.” 59 Ọdi ạghaaph rạraar phọ ịphen phọ mem dị odi obughotu* ẹpe Kạpạnịọm rạtughemhi.

60 Mem mọ awe phọ ọnhaghan bọ ịphen phọ, ịbadi ạbumatuan ọdi ụḅem ghan mọ: “Ọghaaph phọ ọphon phọ ragbirighaany ni ọnhaghan; yoor ụ́wa ọnhaghan!” 61 Kụolo a Jizọs alhegheri ni mọ ạbumatuan phọ ọdi rogum ni ịlo ịphen phọ, kụ apuru mọ: “Ịphen phọ redughe omheeraam mọ anyinha* ḍụghum? 62 Kọkaaph ika eru mạar dị nyinha ẹmhiin dị Ọony phọ oye raḅula ẹpe k’ạke phọ ọdi ạrol ghan bọ? 63 Uwaloor phọ kụ rạngo ghan ghuḍum; iphulhupul phọ ị́moogh mạar oḍighinhom. Ạraraar phọ ịphen phọ mị mịḅenhi bọ inyinha ịḅua esi uwaloor iigbia phọ kụ eru kụ rẹngo ghan ghuḍum. 64 Kụolo buniin anyinha edi ni dị úmeeraam.” A Jizọs alhegheri ni k’emhiighom mọ bụphe úmeeraam bọ r’ọpo kabool bọ nyọdi. 65 Ọdi ạḅilhe ạḅem mọ: “Pọ kụ ịyaar phọ mị ịḅenhi bọ inyinha mọ, oye ólho dị katue atu ụteeny ịmhi emuton dị Ọde phọ kụ amheera mọ aru.”

66 Loor ịduon phọ, ịbadi ạbumatuan ọdi uḅula ni ophorogh rạraar phọ bịdi mọwilhe bọ bịn ụ́daph ghan mụn nyọdi. 67 Kụ a Jizọs apuru Ḍioph rạ Ịyal phọ mọ: “Nyinha rẹwa ọḍua aani ḍụghum?” 68 Kụ ạ Sạịmọn Pita ạphagharanhaan mọ: “Uwo Ẹmhoogh, yoor kọḍua kụ ọki ọteeny ạnhian? Nạ kụ rạkaaph ghan rạraar dị kẹngo we ghuḍum k’agee-pọ. 69 Yoor momheeraam ọḅilhe otu olegheri mọ nạ kụ Oye Iigbia phọ Ẹnhaan arom bọ.” 70 Kụ a Jizọs ạphagharanhaan bịdi mọ: “Tọ mị kụ ụmhagh bọ ni ḍioph r’ịyal phọ anyinha? Kụolo oniin ọnyo anyinha aḍighi uwo iḅoroghom.”* 71 Ọkar ọghaaph, ọdi ạghaaph ghan ịlo a Judas Ọony phọ ạ Sạịmọn Iskạrịọt, ịdi eḍighi bọ ọphon phọ kụ kabool bọ nyọdi, ghạlhamo r’ịdụon aḍighi bọ ni oniin sịphe a Ḍioph rạ Ịyal phọ.