Ọdaphan Jọn

7 Ịphen phọ reten kụ a Jizọs ạghiom ghisigh ạḅua ghan ekpisi ạgba ekpisi ẹpe Gạlili, ịdi eḍighi bọ ọdi ọ́wa oḍighi ịduon phọ ẹpe Judia, loor esi dị ạbuo a Ju phọ ụwa ghan reten oghiigh ọdi. 2 Kụolo mem mọ ọpo phọ, Ẹyaal Arogbogo phọ ạbuo a Ju phọ role ghan bọ mẹkpul. 3 Kụ abumor phọ ọdi ọḅenhi nyọdi mọ: “Ḍụa ẹphen phọ ạghi ẹpe Judia, pịdi ạbumatuan phọ ạna ọmiin rạraar phọ nạ raḍighi bọ. 4 Oye dị rạwa mọ awe olhegheri nyọdi ráḍighi ghan rạraar esi ịbooghian. Nạ raḍighi bọ ni rạraar phọ ịphen phọ, pọ ḍighi aḅirinhi phọ ọmhiin.” 5 Ọkar ọghaaph, abumor phọ ọdi ụ́moogh omheeraam ụki esi ọdi. 6 Kụ a Jizọs ạḅenhi bịdi mọ: “Amem mọ ạmhi kẹ̋teeny, kụolo nyinha etue ni ẹki tọrobo amem lọ nyinha rẹwa. 7 Aḅirinhi phọ ụ́moogh ịyaar ọtuan ọlhogh anyinha ḍien, kụolo ụlhogh ịmhi ḍien loor esi dị mị rạkaaph ghan ịpe eru bọ ịne, mọ iiḍighi phọ ạbidi ị́nighe. 8 Ịki ghan ẹyaal phọ; mị kạ́ki kụ, loor esi dị amem mọ ạmhi kẹ̋teeny.” 9 Kụ ọdi ạḅenhi bọ bịdi rạraar phọ ịphen phọ ạmhan, ạghiom ni ghisigh ạrol Gạlili.

10 Abumor phọ ọdi rọghi ẹpe ẹyaal phọ, kụ ọdi ạghi aani, kụolo óḍighi ịdi awe kọmiin nyọdi. 11 Kụ ạbuo a Ju phọ omhiigh ọwa ọdi ẹpe role bọ ẹyaal phọ kụ opuru ghan mọ: “Odi ẹghen oye phọ ọpo phọ?” 12 Aḍita awe phọ uupholha ghan ni ọghaaph ịlo ọdi. Buniin ụḅem ghan mọ: “Ọdi ogey oye ni.” Kụ bụnhon ọḅem ghan mọ: “Ọdi kógey oye. Raakelheghi ghan ḍita awe phọ.” 13 Ọkar agey, oye órue ghan ọghaaph ịlo ọdi esi ogbo loor oghiilhaan ạbuo a Ju phọ.

14 Ephu inya aḍughul otu reten egbi k’amem mọ omhiigh bọ olhe ẹyaal phọ, kụ a Jizọs ạghi sịphe otu ịiḅereghi phọ amhiigh ọtughemhi. 15 Ịphen phọ iḍighi ni iikia esi ạbuo a Ju phọ, kụ ọḅem ghan mọ: “Oye phọ ọphon phọ ạmhoogh ika olhegheri ịyaar phọ ọphon ịlo Ịge Iigbia phọ mem dị k’ekulha kọ̋tuugha ghan ẹpe aruutu ịtuugha phọ?”* 16 Kụ a Jizọs ạphagharanhaan bịdi mọ: “Ạraraar phọ mị rạtughemhi ghan bọ kị́lo ạmhi, ịlo ọpo urom bọ ịmhi. 17 Eru mạar dị oye rạwa oḍighi ogbi Ẹnhaan, pọ kalegheri ni mụghumo ịphen mị rạtughemhi bọ ịḅua ni esi Ẹnhaan kụ eru ọbobo mị rạatughian ghan ịlo ạmhi bịn kạghaaph. 18 Tọrobo oye dị rạatughian ghan ịlo ọdi bịn kạghaaph pọ rạwa ghan eghuan ẹlo ọdi; kụolo oye dị rạwa ghan eghuan ọpo arom bọ nyọdi, pọ oye dị rạkaaph ghan ịdi eru ịne, kụ ekeeny eḍighinhom ịyaar ílo loor ọdi. 19 Tọ a Mozis kụ ịngo inyinha Olhogh phọ? Kụolo r’oniin ọnyo anyinha dị rạdaph Olhogh phọ ólho. Uḍighi ika kụ nyinha rẹwa bọ oghiigh ạmhi?” 20 Kụ aḍita awe phọ ọphagharanhaan mọ: “Ọkaraph uwaloor odi ni loor ạna. Ạnhian kụ rạwa bọ oghiigh ạna?” 21 Kụ a Jizọs ạḅenhi bịdi mọ: “Mị aḍighi eniin ịyaar bịn, kụ eḍighi iikia esi oomo anyinha. 22 Esi ịduon phọ ịitughian ịphen phọ: a Mozis ạḅem mọ iḍunha ghan, kụolo ímiigh mem a Mozis, imhiigh ni k’amem ạburude ạburude phọ anyinha, kụ nyinha reḍun ghan ni oye ḍio ophooghian. 23 Eḍighi mạar dị ọtuan mọ kụ́ka Olhogh phọ a Mozis kụ roḍun ghan ni oye ḍio ophooghian, uḍighi ika kụ nyinha ịghagham bọ ịmhi olhoghi iboom loor ịduon mị aakonhom bọ oye aḍume ḍio ophooghian phọ? 24 Képogh mụn oye ạnyu r’ạnyu bịn esoph ọoruen ẹngo, kpạripe ghụn isoph ghan ọoruen dị aaleeny ghisigh Ẹnhaan.”

25 Kụ buniin ạbuphe orugh bọ sịphe Jeruselem omhiigh ọḅem mọ: “Tọ ọphon kụ oye phọ bịdi rọwa ghan bọ reten oghiigh phọ? 26 Kụolo ịmiin! ọdi amite esi ogbo rạkaaph ghan rạghaaph, kụ bịdi ụ́ḅenhi nyọdi ịyaar. Ịdipho ịlo kọḅem mọ ạbuo ịtooghi phọ mọkaraghi olegheri mọ ọphon kụ ạ Krạịst phọ nụun? 27 Yira olegheri ni ekpisi phọ oye phọ ọphon phọ ạḅua bọ aru; kụolo mem dị ạ Krạịst phọ aru, oye kálegheri ekpisi phọ ọdi ạḅua bọ aru.” 28 A Jizọs odi ni rạtughemhi sịphe otu ịiḅereghi phọ, kụ ạḅem mọ: “Nyinha ilhegheri ni ịmhi r’ekpisi phọ mị ạḅua bọ aru. Kụ mị kụ úsopha ẹlo ạmhi bịn utu, kụolo Ọpo urom bọ ịmhi oye dị odi ghan ni, kụ nyinha ílegheri nyọdi. 29 Mị alegheri ni nyọdi, loor esi dị mị ọmeera enye ọdi, kụ Ọdi kụ urom ịmhi.” 30 Bịdi umhiigh ni ọwa areten osiph ọdi, kụolo oye órue osiph nyọdi, loor esi dị amem mọ ọdi kẹ̋teeny. 31 Tọrobo ịpe ẹrol bọ, ịbadi sịphe aḍita awe phọ ụmhoogh ni omheeraam ọghi esi ọdi, kụ ọḅem ghan mọ: “Ạ Krạịst phọ aru, kaḍighi ni ịiḍaany dị epu ịphen oye phọ ọphon phọ ḍụghum?”

32 Ạbuo ạ Fạrisi phọ ụnhaghan ni dị aḍita awe phọ rọkaaph ịphen phọ ịlo ọdi ude ude, kụ aruwo ẹmhu ạbupinyon rịkia phọ r’ạbuo ạ Fạrisi phọ orom bukoriom otu ịiḅereghi phọ mọ ọghi ọsiph nyọdi. 33 Kụ a Jizọs ạḅenhi bịdi mọ: “Mị kạḅilhe ni ạtol r’anyinha ephurukpu amem kụ mị agbi oḅula ọteeny Ọpo urom bọ ịmhi. 34 Nyinha kịwa ni ịmhi, kụolo nyinha ịmhi kị́mhiin, kụ ẹpe mị rạki bọ nyinha kétue etu.” 35 Esi ịduon phọ, ạbuo a Ju phọ ụghaaph ghan sịphe igbo phọ ạbidi mọ: “Oye phọ ọphon phọ rạwa ọghi ẹghen kụ ạḅem bọ mọ yira kótue ọmiin nyịnho? Ọdi rạwa ọghi ọteeny ạbuo a Ju phọ ọsaraany bọ igbo ạbuo a Gris phọ kụ ọtughemhi bụo a Gris phọ ḍụghum? 36 Eeghe kụ ẹmhu ịpe ọdi ạḅem bọ mọ, ‘Nyinha kịwa ni ịmhi kụolo nyinha ịmhi kị́mhiin, kụ ẹpe mị rạki bọ nyinha kétue etu’?”

37 Ḍigbogh aḍio ẹyaal phọ, ḍio phọ esughanham bọ ọmhan, a Jizọs ạmheera ni kụ ạghaaph r’ẹḍogh dị ẹghi ạnyu mọ: “Eḍighi mạar dị ạmuum rạpu oye, pọ aru ụteeny ịmhi ạphughol mụum. 38 Kụ tọrobo oye lọ ạmhoogh omheeraam aru esi ạmhi, ịdipho ịge iigbia phọ mẹghaaph bọ: ‘Arokol ạmuum aghuḍum kẹḍua ni olhoghi aloor ọdi ekilhogh emiteghu.’” 39 Kụolo ọdi ạghaaph ghan ịphen phọ ịlo uwaloor iigbia phọ, bụphe ọmhoogh bọ omheeraam ọghi esi ọdi kọmoogh bọ mọony amem; ịdi eḍighi bọ mem mọ ọpo phọ kọ̋ngo we uwaloor iigbia phọ, loor esi dị kőghuenhi Jizọs. 40 Buniin sịphe aḍita awe phọ dị ọnhaghan ikpo ọnhu phọ ịphen phọ umhiigh ni ọḅem mọ: “Ọkar agey, ọphon kụ Oyil phọ.” 41 Bụnhon ụḅem ghan mọ: “Ọphon kụ ạ Krạịst phọ.” Kụolo buniin mọ: “Ạ Krạịst phọ ḍịen kạḍua Gạlili kụ atu? 42 Ịge iigbia phọ ị́ḅem ḍịen mọ ạ Krạịst phọ kạḍua igbo ạnmuny a Devid kụ atu ḅịlhe mọ kaḍighi ọlo ạ Bẹtẹlẹhẹm, ẹmha phọ a Devid?” 43 Kụ amadia amite ni igbo aḍita awe phọ loor ẹmhu ọdi. 44 Buniin ạbidi ụwa ghan osiph ọdi, kụolo oye órue osiph nyọdi.

45 Abukoriom mọ roḅula kụ aruwo ẹmhu ạbupinyon rịkia phọ r’ạbuo ạ Fạrisi phọ opuru bịdi mọ: “Uḍighi ika kụ nyinha ị́pam bọ nyọdi itumhom?” 46 Kụ abukoriom mọ ọphagharanhaan mọ: “K’ekulha oye kọ̋ghaaph ghan rạraar ịdipho.” 47 Kụ ạbuo ạ Fạrisi phọ ọḅem mọ: “Ọdi miikelheghi aani inyinha ḍụghum? 48 Nyinha mẹmhiin ni ọtooghia ọbobo ọnyo ạ Fạrisi dị ạmhoogh omheeraam ạghi esi ọdi ḍụghum? 49 Aḍita awe phọ ạbuen phọ úlegheri bọ Olhogh phọ ạwe dị mosu ọnhu.” 50 A Nikodimọs phọ ạghi bọ aphogh Jizọs kụ aḍighi aani bọ oniin ọnyo ạbidi, apuru bịdi mọ: 51 “Olhogh phọ ayira ọ́ḅem ḍịen mọ tụtu kosophonhaan oye ọoruen ọphur ghan ọnhaghan ọnhu oye phọ, olhegheri ịyaar phọ ọdi aḍighi bọ?” 52 Kụ bịdi ọphagharanhaan nyọdi mọ: “Nạ maḍighi aani ọlo ạ Gạlili ḍụghum? Kịa ạwaaghi bịn nạ kạmiin ni mọ esi ílo dị ẹghaaph mọ oyil kạḍua Gạlili amite.”*