Ọdaphan Ịpe ạ Mạtiu Ạge Bọ
9 Kụ ọdi aḍigh oghuugh ạḅeeny ọphiiny ạbazi phọ ạghi ẹmha ọdi. 2 Kụ ọsighe oruomonhaan nyọdi oye dị ariisi aloor emhuughu dị ọmhuneeny ẹmhinha. Kụ a Jizọs rọmhiin omheeraam mọ ạbidi, kụ ạḅenhi oye phọ aloor phọ ị́nighe bọ mọ: “Kpọ oḅio, mọony ạmhi! Mọsar ịkaraph ạna ọwilhenhaan nyịnha.” 3 Kụ buniin ạbutughemhia Olhogh phọ omhiigh ọghaaph sịphe olhoghi ạbidi mọ: “Oye phọ ọphon phọ rạapu ḍien Ẹnhaan.” 4 A Jizọs alhegheri ni ịitughian phọ ạbidi, kụ ạḅem mọ: “Uḍighi ika kụ nyinha rẹetughian bọ ịkaraph ạraraar sịphe arokpom mọ anyinha? 5 Sịen ọḅem mọ, ‘Mọsar ịkaraph ạna ọwilhenhaan nyịnha,’ r’ọḅem mọ, ‘Ḅetenhu arelhe,’ ẹghen kụ idugh epu? 6 Kụolo, pịdi nyinha elhegheri mọ Ọony phọ oye ạmoogh ni ịikpo sịen ade phọ ọsar ọwilhenhaan ịkaraph—” kụ ọdi ạḅenhi oye phọ ariisi aloor phọ emhuughu bọ mọ: “Ḅetenhu, ạsighe ẹmhinha phọ ạna, agheel k’ạna.” 7 Kụ oye phọ aḅetenhu agheel k’ọdi. 8 Ịphen phọ iḍigh ni ḍiigu esi aḍita awe phọ, kụ oghuenhi Ẹnhaan phọ ạngo bọ we ọdo ịikpo phọ ịphen phọ.
9 A Jizọs atelhe rạḍua sịphe phọ, kụ ạmhiin oye dị oghol mọ ạ Mạtiu dị ạrol ude sịphe otu oḍighi ạbubonyiom iisogh phọ, kụ a Jizọs ạḅenhi nyọdi mọ: “Tue aḍighi ọnyo ạmatuan ạmhi.” Kụ ọdi aḅetenhu ạdaph nyọdi. 10 Ịphen phọ reten, a Jizọs odi rale ghan eḍien kạ Mạtiu, bịn ịbadi ạbubonyiom iisogh r’abuḍighinhom ịkaraph oru omhiigh olhean ọdi r’ạbumatuan phọ ọdi. 11 Kụ ạbuo ạ Fạrisi phọ rọmhiin ịphen phọ, kụ opuru bụmatuan phọ ọdi mọ: “Uḍighi ika kụ ọtughemhia phọ anyinha ralean ghan bọ bụbonyiom iisogh r’ạbuḍighinhom ịkaraph phọ?” 12 Ọdi rọnhaghan ịphen phọ kụ ạḅenhi bịdi mọ: “Awe dị úmoon kụ umhoghi oyil, kạ́bulo omhoon. 13 Esi ịduon phọ, ịki ẹtuugha ẹmhu ikpo ọnhu phọ ẹḅem bọ mọ: ‘Mị rạwa mọ iḍeenhaan ghan ọnma ighirigiir, kpạripe r’ọphinyon ghan ạrikia.’ Loor esi dị mị uru ọmhagh abuḍighinhom ịkaraph, kạ́buo elhiom eḍighinhom ịyaar.”
14 Kụ ạbumatuan phọ ạ Jọn oru ọteeny nyọdi kụ opuru mọ: “Uḍighi ika kụ yoor r’ạbuo ạ Fạrisi phọ rọkaagh ghan bọ ni ẹḍogh kụ ạbumatuan phọ ạna rọ́kaagh aani ghan bọ?” 15 Kụ a Jizọs ạphagharanhaan bịdi mọ: “Ạrighiri oye dị rạpin ạnhir úmoogh ịyaar ọtuan okururu mem dị oye phọ odi r’ạbidi, ọmoogh ni ḍughụm? Kụolo amem retu ni dị kọsighe oye phọ rạpin bọ ạnhir phọ igbo ạbidi, pọ kụ amem dị bịdi kọkaagh ẹḍogh. 16 Oye ólho dị kạsighe ọpherepe omhoom ukpe kụ ạkolhom ogbaany ukpe dị ạphaaru, loor esi dị omhoom ukpe phọ kạpoghoronhu ni ạḍua, kụ esi phọ ẹphaaru bọ ẹbugh epu ịpe ẹrol ghan bọ. 17 Ḅịlhe kẹn awe rọ́sighe ghan mumhoom amiim kọlhogh ogbaany okuru amiin dị oḍighinhom ozu ẹnham. Bịdi oḍighi ịduon phọ pọ okuru phọ kạpaaru ni amiin mọ azuan, kụ okuru phọ kạ́moogh mụn mạar oḍighinhom. Kụolo awe rọlogh ghan mumhoom amiim omhoom okuru amiim, bịn mooko ịyal phọ ịdi.”
18 Kụ ọdi odi rạḅenhi bịdi rạraar phọ ịphen phọ, bịn oniin ọtooghia arelhe aru ạteeny nyọdi, kụ akpuḍian kụ ạḅem mọ: “Mẹsighe bọ ẹteeny nyịidipho pọ ọnyanhi phọ ạmhi mamhugh, kụolo tue ạsighe ḍịghaagh ạna ạḅamham nyọdi bịn ọdi kạḅilhe ni ạmoogh ghuḍum.”
19 Kụ a Jizọs aḅetenhu kụ ọdi r’ạbumatuan phọ ọdaph oye phọ. 20 Kụ ạnhir dị ạmhoogh ẹzegh dị ịḅaal remite ghan loor phọ dị mẹrol li 12 ạsia ạḅua ni ọmhan aru ạḅogh ịghelhe ạsuoma ạnyu phọ ọdi, 21 loor esi dị ạḅenhian ghan loor ọdi mọ: “Mị arue ni kụ ạḅogh ghạlhamo r’ạsuoma ạnyu phọ ọdi, bịn mị kamoon ni.” 22 A Jizọs rooghiraany ọmhiin nyọdi kụ ạḅem mọ: “Kpọ oḅio, nyạnhi ạmhi! Omheeraam mọ ạna maakonhom nyịnha.” Kụ mem mem mọ bịn anhịr phọ amhoon.
23 Kụ ọdi rosi k’ọtooghia phọ, kụ ạmhiin we dị ropulha yogh ruuḍue r’aḍita awe dị rọyugh, 24 kụ a Jizọs ạḅenhi bịdi mọ: “Imiteghu ẹpe erugh, ịdi eḍighi bọ ọbam ọnyanhi phọ ómhugh, rạnaanhi ni.” Bịdi rọnhaghan ịphen phọ kụ omhiigh ọmhilhogh r’ọgilaam ọdi. 25 Aḍita phọ romiteghu erugh rọmhan, kụ ọdi aḍigh ẹpe olhoghi otu phọ, kụ ạpham ḍịghaagh ọnyanhi phọ, kụ ọbam ọnyanhi phọ aḅetenhu. 26 Kụ ịphen ọdi aḍighi bọ, ilheeny ni oomo ekpisi phọ ẹpe phọ.
27 A Jizọs atelhe rạḍua sịphe phọ, kụ ịyal awe dị rọ́miin ghan eten ọdaph nyọdi, kụ ọlo ghan mọ: “Ụnma iyoor ighirigiir Ọony a Devid.” 28 Ọdi roḍigh otu, kụ awe phọ rọ́miin ghan bọ eten phọ oru ọteeny nyọdi, kụ a Jizọs apuru bịdi mọ: “Nyinha emeeraam ni mọ mị katue ni aḍighi ịphen phọ?” Kụ bịdi mọ: “Ii Uwo Ẹmhoogh.” 29 Kụ ọdi ạḅogh riḍien ạbidi, kụ ạḅem mọ: “Loor omheeraam mọ nyinha meḍeenhaan bọ, ẹtuugh ịpe nyinha rẹwa bọ emite.” 30 Kụ bịdi omhiigh ọmhiin eten. Kụ a Jizọs ạphur bịdi rụru mọ: “Ịmiin mọ nyinha ị́ḅenhi oye ịphen phọ.” 31 Kụolo bịdi romite erugh bịn omhiigh ọghaaph ịlo ọdi olheenye oomo ekpisi phọ.
32 Bịdi rọḅuaghu bọ, bịn awe ọsighe oye dị rạ́ḅa ghan dị ọkaraph uwaloor rạaḅaghamhi oruom nyọdi; 33 Kụ ọdi rophorogh ọkaraph uwaloor phọ, kụ oye phọ ụ́ḅa ghan bọ amhiigh ọḅa. Ịphen phọ iḍighi ni iikia esi aḍita awe phọ kụ ọḅem mọ: “K’ekulha ịphen phọ ke̋mite ghan sịen Izrẹl.” 34 Kụolo ạbuo ạ Fạrisi phọ ụḅem ghan mọ: “Ọdi ạsighe ịikpo ọtooghia ịkaraph aruwaloor phọ kụ raporoghom ghan bọ ịkaraph aruwaloor phọ.”
35 Kụ a Jizọs amhiigh orelhe yogh oomo igbogh r’ịbam ạramha phọ, ạtughemhi ghan sịphe arubughotu phọ ạbidi, agbeelhom ghan iiḅi ịinhaghan ịlo Ọmhar phọ, kụ ạḅilhe aakonhom ghan oomo ọdo ạreezegh r’ariiphinha. 36 Ọdi rọmhiin ḍita awe phọ, kụ ạmhoogh igbiririph ạghi esi ạbidi, loor esi dị bịdi ụghigh iyool ịga dị ọkpan ruzu phọ kụ ọwilhe bịn dị opoghom úlo. 37 Kụ ọdi ạḅenhi bụmatuan phọ ọdi mọ: “Ọkar agey, ibugha phọ ẹbugh ni, kụolo awe arukumuan phọ okom. 38 Esi ịduon phọ, ịlom Uwo Oḍighi ibugha phọ mọ ọdi ạmhagh we arukumuan ạlhogh oḍighi ibugha phọ ọdi.”