Ọdaphan Jọn

1 Emhiighom mọ, Ekpo Ọnhu phọ ịrol li, kụ Ekpo Ọnhu phọ ịrol rạ Ẹnhaan, kụ Ekpo Ọnhu phọ iḍighi ẹmhugh.* 2 Ọphon phọ ạrol li rạ Ẹnhaan k’emhiighom mọ. 3 Oomo ạraraar iigo esi ọdi kụ emite, kụ ịyaar ílo dị íigo esi ọdi kụ emite.

4 Ịyaar dị eego esi ọdi kụ emite pọ aghuḍum, kụ aghuḍum mọ kụ aḍighi ḍịḅaal awe. 5 Kụ ạḍiḅaal phọ rẹmu ni sịphe ufiri phọ, kụ ufiri phọ kọ̋kpar opu ḍịḅaal phọ.

6 Oye ạrol li dị Ẹnhaan arom dị oghol mọ ạ Jọn. 7 Oye phọ ọphon phọ aru ịdipho ọgbaanhaan, ọghaaph ạraraar dị eru ịne ịlo ạḍiḅaal phọ, pịdi awe kịrokiro omeeraam dị eego esi ọdi. 8 Ọdi kụ kạ́ḍiḅaal phọ ạḍiphe phọ, kụolo aru ọghaaph ạraraar dị eru ịne ịlo ạḍiḅaal phọ.

9 Mem mọ ọpo phọ, aḍigey ạḍiḅaal phọ rẹmu ghan bọ kesoorom we kịrokiro rẹwa oḍigh aḅirinhi phọ. 10 Ọdi ạrol li sịen aḅirinhi phọ, kụ iigo esi ọdi kụ aḅirinhi phọ amite bọ, kụolo aḅirinhi phọ úlegheri nyọdi. 11 Ọdi aru ni ẹmha ọdi, kụ awe ẹmha phọ ọdi ụ́loghoma nyọdi. 12 Kụolo oomo ạbuphe ọlhoghoma bọ nyọdi, ọdi ạngo ni ịikpo mọ oḍighi nmụny Ẹnhaan, loor esi dị ụmhoogh omheeraam ọghi esi aḍien phọ ọdi. 13 Bịdi úḍighi nmụny Ẹnhaan dị eego esi ịḅaal ọbobo ogbi ọde r’onhiin ọbobo dị eego esi ogbi oye, kụolo iḍighi ogbi Ẹnhaan.

14 Ekpo Ọnhu phọ iḍighi ni oye* kụ ẹrol igbo ayoor, kụ yoor ọmhiin eghuan phọ ọdi, eghuan phọ oginha ọony* rạteeny ghan bọ ḍịghaagh ọde ọdi; kụ ạḍiseph Ẹnhaan* r’igey imuza ni loor ọdi. 15 (Ạ Jọn ạghaaph ghan ịlo ọdi, ii, ọdi ạlo ghan mọ: “Ọphon kụ ọpo mị ạghaaph ghan bọ ịlo ọdi mọ, ‘Ọpo odi bọ ọmhan ạmhi ratu mạar ịmhi eten, ịdi eḍighi bọ ọdi odi ghan ni kụ ogbi bọ ọmhar ạmhi.’”) 16 Loor esi ọokia ọnma ighirigiir phọ amuza bọ loor ọdi, moḍeenhaan oomo ayira ọokia ọnma ighirigiir dị rámunheen ghan. 17 Ẹnhaan ạngo Olhogh phọ dị eego esi a Mozis, kụolo ọokia ọnma ighirigiir phọ r’igey phọ iigo esi a Jizọs Krạịst kụ eru. 18 Oye ólho dị mạmhiin ghan Ẹnhaan; kụolo oginha ọony phọ ạghigh bọ Ẹnhaan,* odi ghan bọ ọogaany Ọde phọ* kụ mạghaaph ghan ọdo oye phọ Ẹnhaan aru bọ.

19 Ịphen kụ ịdi ạ Jọn ạghaaph bọ mem mọ ạbuo a Ju phọ orom bọ bụpinyon rịkia r’ạbuo a Livạị mọ ọḍua Jeruselem ọghi opuru nyọdi mọ: “Nạ ạnhian?” 20 Ọdi ạphagharanhaan ni bịdi, ạḅem mọ: “Mị kụ kạ́ Krạịst phọ.” 21 Kụ bịdi opuru nyọdi mọ: “Kụ nạ ạnhian? Nạ Ẹlạịjạ?” Kụ ọdi mọ: “Mị kạ́ Ẹlạịjạ.” “Nạ kụ Oyil phọ?” Kụ ọdi ạphagharanhaan mọ: “Eeye!” 22 Kụ bịdi ọḅem mọ: “Nạ ạnhian? Ụḅenhi iyoor pịdi yoor olegheri ịlo ọphagharanhaan ạbuphe urom bọ iyoor. Ụḅenhi iyoor oye phọ nạ aru bọ?” 23 Kụ ọdi ạḅem mọ: “Mị kụ oye phọ rạlo ghan bọ ẹpe ẹdala phọ mọ, ‘Iselhe eten phọ a Jehova,’* ịdipho oyil phọ Ạịzạyạ ạghaaph bọ.” 24 Ạbuo ạ Fạrisi phọ kụ urom bọ bịdi. 25 Kụ bịdi opuru nyọdi mọ: “Kụ uḍighi ika kụ nạ raḍiinye ghan bọ we mụum eru mạar dị nạ kụ kạ́ Krạịst phọ, ọbobo Ẹlạịjạ, ọbobo Oyil phọ?” 26 Kụ ạ Jọn ạphagharanhaan bịdi mọ: “Mị raḍiinye ghan we mụum. Kụolo oye odi ni igbo anyinha dị nyinha ílegheri, 27 oye phọ odi ọmhan ạmhi dị ratu, kụ iḍigh arokoro ọdi bịn mị ụ́man ọkarion.” 28 Ạraraar phọ ịphen phọ imite ẹpe Bẹtạni, ẹḅeenyom Ọphiiny ạ Jọdạn, ẹpe ạ Jọn ạrol bọ aḍiinye ghan we mụum mọ.

29 Ḍio phọ etum bọ sịphe ọdi ạmhiin ni Jizọs dị ratu ọteeny ọdi, kụ ạḅem mọ: “Ịmiin, ọphon kụ Ọony Oyool Ọga phọ Ẹnhaan, kagbuurogh bọ ịkaraph aḅirinhi phọ! 30 Ọphon kụ ọpo mị ạghaaph bọ ịlo ọdi mọ: ‘Oye odi ni ọmhan ạmhi dị ratu kụ mạar ịmhi eten, ịdi eḍighi bọ ọdi odi ghan ni kụ ogbi bọ ọmhar ạmhi.’ 31 Mị phọ kẹn bịn úlegheri ghan nyọdi, kụolo mị raḍiinye ghan we mụum pịdi oganhanhamhi nyọdi oḍeenhaan we phọ Izrẹl.” 32 Ạ Jọn ạḅilhe ni ạghaaph ịyaar oḍeenhaan mọ ịphen phọ ịne ni, ọdi ạḅem mọ: “Mị ụmhiin uwaloor iigbia phọ dị ạḍua ẹpe k’ạke phọ ratu ịdipho okuru ghọzo, kụ asoorom nyọdi. 33 Mị phọ kẹn bịn úlegheri ghan nyọdi, kụolo ọkaraghi Ọpo urom bọ ịmhi oḍiinye ghan awe mụum mọ ụḅenhi ịmhi mọ: ‘Tọrobo oye dị nạ ạmhiin dị uwaloor iigbia phọ ạḍua ẹpe k’ạke phọ aru asoorom, kụ kaḍiinyeom ghan bọ we uwaloor iigbia phọ.’ 34 Kụ mị mạmhiin ạḅilhe ạkaaph rạraar dị eḍeenhaan mọ ọphon phọ kụ Ọony phọ Ẹnhaan.”

35 Kụ ḍio phọ etum bọ sịphe, ạ Jọn ạḅilhe ni ạmheera pạ phọ r’ịyal ạbumatuan ọdi, 36 kụ ạmhiin Jizọs dị arelhe raten, kụ ạḅem mọ: “Ịmiin, ọphon kụ Ọony Oyool Ọga phọ Ẹnhaan!” 37 Ịyal phọ ạbumatuan phọ rọnhaghan ịphen phọ kụ ọdaph Jizọs. 38 Kụ a Jizọs aaghiraany ạmhiin dị bịdi rọdaph nyọdi kụ apuru mọ: “Nyinha rẹwa ghan eeghe?” Kụ bịdi opuru nyọdi mọ: “Rạbạị (ẹmhu phọ pọ, “Ọtughemhia”), nạ atugh ḍighen?” 39 Kụ ọdi ạḅenhi bịdi mọ: “Itu ẹghi ẹmhiin.” Kụ bịdi ọghi ọmhiin esi phọ ọdi arugh bọ, kụ ọrol r’ọdi ḍio phọ ạḍiphe phọ; mem mọ ọpo phọ rẹki ọteeny omhunhenhiom aḍioph ạwa* phọ. 40 Ạndrụ, umor phọ ạ Sạịmọn Pita, aḍighi aani oniin sịphe ịyal phọ awe phọ ọnhaghan bọ ịpe ạ Jọn ạghaaph bọ kụ ọdaph bọ Jizọs. 41 Ọdi ạphur ạghi ạteeny umor phọ ọdi Sạịmọn kụ ạḅenhi mọ: “Yoor mọmhiin a Mesạyạ phọ” (ẹmhu phọ pọ, “ạ Krạịst”), 42 kụ ạsighe ạghi aḍeenhaan Jizọs. A Jizọs rọmhiin nyọdi, kụ ạḅenhi mọ: “Nạ ạ Sạịmọn, ọony phọ ạ Jọn; kọmhagh ghan nyịnha mọ Sifạs” (ọgba rotenhe ọnhu a Grik pọ “a Pita”).

43 A Jizọs rạwa ọghi ạ Gạlili ḍio phọ etum bọ sịphe kụ ạmhiin Filip, kụ ạḅenhi mọ: “Tue aḍighi ọnyo ạmatuan ạmhi.” 44 A Filip ọlo ạ Bẹtseidạ, ẹmha ạbuo Ạndrụ ra Pita. 45 Kụ a Filip ạghi ạteeny Nạtạnịẹl kụ ạḅenhi mọ: “Yoor mọmhiin ọpo Olhogh phọ a Mozis r’ịge Ariil phọ ẹghaaph bọ ịlo ọdi. Ọdi a Jizọs, ọony phọ a Josẹf, ọpo ạ Nạzạrẹt phọ.” 46 Kụolo ạ Nạtạnịẹl apuru nyọdi mọ: “Egey ịyaar ketue ni ẹḍua Nạzạrẹt emite?” Kụ a Filip ạḅenhi nyọdi mọ: “Tue ạghi ạmhiin.” 47 Kụ a Jizọs ạmhiin bọ Nạtạnịẹl dị ratu ọteeny ọdi, ạghaaph ịlo ọdi mọ: “Ịmiin, ọphon phọ ọkaraghi ọlo Izrẹl dị úḍighi oye iikelheghian.” 48 Kụ ạ Nạtạnịẹl apuru nyọdi mọ: “Nạ ulhegheri ịmhi ika?” Kụ a Jizọs ạphagharanhaan mọ: “Mị ụmhiin ni nyịnha mem mọ nạ ạrol bọ ẹeḍian oreeny a fig phọ, kụ a Filip agbi bọ oru ọmhagh ạna.” 49 Kụ ạ Nạtạnịẹl ạḅem mọ: “Rạbạị, nạ kụ Ọony phọ Ẹnhaan, nạ kụ Uwo Ẹmha phọ Izrẹl.” 50 Kụ a Jizọs ạphagharanhaan mọ: “Nạ ụtuan ịduon mị ạḅenhi bọ nyịnha mọ mị ụmhiin nyịnha ẹeḍian oreeny a fig phọ kụ amheeraam bọ? Nạ kạmiin ni rạraar dị epu ịphen phọ.” 51 Kụ a Jizọs ạḅenhi nyọdi mọ: “Mị ạkar rịḅenhi ghan inyinha mọ, nyinha kẹmiin ni dị ạke phọ aghughuronhu kụ ạruukpaany phọ Ẹnhaan rọki ẹpe k’ạke phọ ḅịlhe ọḍua rotu ọteeny Ọony phọ oye.”