December

AZihova amoọgh ni iikpọ oḅerion abuphẹ momhuughu bọ ḍughụm? Amoọgh ni! Odị kụ “Enaạn Oomo Iikpọ.” (Ogan. 1:8) Esi iduọn phọ, odị amoọgh ni iikpọ dị emhanhạm ophiemhi atorobọ amulhọgh ḍien, ghalhamọ r’aḍuugh. (1 Kọr. 15:26) Enhọn ephigh phọ yira otụ bọ omheeraam mọ aZihova katue ni aḅerion buphẹ momhuughu bọ pọ, odị amoọgh epul iitughiạn dị eekunha i/lo. Odị alegheri torobọ aḍien eenhaạn. (Isa. 40:26) Ḅilhẹ kẹn, odị raatughiạn ghan ni buphẹ momhuughu bọ. (Job 14:13; Luk 20:38) Odị katue ni bịn aatughiạn torobọ iyaạr ilọ abuphẹ odị kaḅerion bọ, eḅaramaạm emitenhom mọ abidị, roozọ phọ, raraạr dị bidị olhegheri siphẹ aghuḍum mọ abidị, ḅilhẹ r’epul iitughiạn phọ abidị. Dị eegholhaan ni, yira kotue ni omeeraam oguanhaan phọ aZihova oḅerion abuphẹ momhuughu bọ loor esi dị odị amoọgh ni eephuạ r’iikpọ oḍighi ipẹ phọ. Ooḅeghiọn enhọn ephigh phọ yira otụ bọ omheeraam oguan oḅerenhu esi aḍuugh phọ: AZihova maḅerion ghan ni we dị momhuughu. Simem aBaibul phọ, odị angọ ni iikpọ rebenhẹ odị dị okpẹ oḍuomolhoghi, eḅaramaạm Zizọs, oḅerion awe dị momhuughu. w23.04 9-10 ¶7-9

Eḍighi maạr dị yira oghaaphạn bunhọn eyoghoyoghọ eten ḅilhẹ r’olhọgh eegu, pọ kedughanhaan ni we olher arurụ ongọ ipẹ yira rokaạph bọ. Toroboiperolbọ, eḍighi maạr dị yira omhiịn mọ oye phọ rawạ bịn ogbakiạn, pọ kewạ mọ owilhẹ raghaạph phọ. (Prov. 26:4) Kuolọ eeni ogbogh opol ko/megheron eten phọ epẹ phọ. Ibadị kowạ ni onhaghạn ipẹ yira rowạ bọ oghaạph phọ. Okạr agey, oboom asuọ odi ni mem dị yira okparaghạ ozọ ghan eyoghoyoghọ eten. Lọm aZihova inyaạm orue ozọ eyoghoyoghọ eten oghị esi awe dị opuru nyinhạ ḍigbagarạ aḍipuru obobọ oghaạph ikarạph ilọ omheeraam mọ ayira. Ka/bula mọ, ongọ ophagharanhaạn eten dị eyoghoyoghọ ketue ni epoomhị ighạgh ilhoghi. Kụ kẹn ketue ni eḍighi idị awe konme ḍiitughiạn phọ abidị ilọ aBaibul phọ. “Iikolobian ghan oomo amem ophagharanaạn dị nyina kengọ” ilọ omheeraam mọ anyinha eyoghoyoghọ eten r’olhọgh eegu. (1 Pit. 3:15) Ii, eegharạ oyoghoyoghọ kụ eḍighi inyaạm anạ! w23.09 19 ¶18-19

Ooḅeghiọn inya areten dị yira kotue oḍeenhaan okparạm. Eḅẹl phọ, oye okparạm ra/nuụn ghan kaghạgh olhoghi. Odị rapoomhị ghan ni loor ḅilhẹ ra/ḍighi ghan kaḅulhemian mem dị oye aḍighi nyodị iyaạr oghạgh olhoghi. (Ex. 34:6) Omhunhenhiom iyạl, oye okparạm mọ rapoomhị ghan loor kakori. Oye okparạm mọ rapoomhị ghan ni loor kakori ghalhamọ r’amem dị iyaạr phọ odị rakori bọ reebinya kepelhom ipẹ ogbiighi bọ. (Mat. 18:26, 27) Omhunhenhiom iraạr, oye okparạm ra/ḍighi ghan iyaạr dị u/pụr ugbiighi. Mem dị oye okparạm mọ amhoọgh ephigh iyaạr oḍighi, odị raa/gborion ghan kozuoghom iyaạr phọ. Kparipẹ ghụn, odị ramiteom ghan mem kagbiighi kụ agbi oḍighi. Kụ odị angọ mem mọ ewạ bọ oḍighi iyaạr phọ. Omhunhenhiom inya, oye okparạm ra/nụn ghan mem lọ asoman imhinhimhiịn. Odị rakiọm ghan ghisigh kaatughiạn ghan ilọ imạ araraạr phọ aZihova maḍighinhaan bọ nyodị kụ aḍighi oomo ipẹ odị katue bọ oghị aghisigh okumu aZihova r’ibo. (Kọl. 1:11) Idiphọ aKristẹn, ewạ ni dị yira koḍeenhaan ghan okparạm esi oomo areten phọ iphẹn phọ. w23.08 20-21 ¶3-6

Ekpanhạ ephigh otuạn oghoph ekpom mọ ayira omaaniọm bọ pọ aloor esi dị aZihova raaḅeghiọn ghan ni kaphogh. Iphẹn phọ remạ ghan mọ odị ramiịn ghan ni k’epẹ olhoghi phọ, ka/nyụ r’anyụ bịn idiphọ awe romiịn ghan bọ. Odị kuphomhoghiạn ni iyira eḍighi maạr dị yira omuzeḍi ilhoghi ayira osụ-olhoghi phọ rangọ ghan bọ ghuḍum. (Jọn 4:14) Bịn yira ko/ngọ eepoogh dị ikạ aḅirinhi phọ aSetan kiphuẹ iyira. (1 Jọn 5:18, 19) Mem dị yira oḍuraan otuman aZihova, ephomhoghiạn phọ r’eegu phọ yira rolọgh ghan bọ nyodị kebụgh ni. Loor iduọn yira ro/wạ bọ oḍighi idị kepin esi Odẹ phọ ayira, kilhoghonhaạn iyira ḍighaạgh oghel ghalhamọ r’aḍiitughiạn oḍighi ikarạph. AMarta, onyọ umaranhi epẹ Croatia dị asoman odẹgh ophogh opesi ipesi, agẹ mọ: “Ikparanhaạn ni imhị omhiịn araraạr eten dị eeleeny ḅilhẹ r’eenhan eephuạ oghelhọm ikarạph ekulha amem mọ. Kuolọ oghiilhaan aZihova kụ ughoph imhị.” Ika kụ idị oghiilhaan Enhaạn aghoph bọ nyodị? AMarta aḅẹm mọ onọ aatughiạn ilọ ipẹ okarạph osopha kakọm bọ amiteom. Yira kotue ni oḍighi aani iniin phọ. w23.06 20-21 ¶3-4

AZizọs alhegheri ni mọ eḍighi ni ogbi aZihova oḅaalhamhị aḍien phọ odị esi okpẹ kirokirọ phọ mogbaanhaạn bọ nyodị. Epẹ kụ iyaạr phọ oḍiemiom mọ ayira atughemhị bọ bumatuạn phọ odị ooḅereghị ghan mọ: “Odẹ phọ ayoor odi bọ k’akẹ phọ, eegu eroIonaạn ḍien phọ anạ!” (Mat. 6:9) AZizọs anhaghanhạn ni mọ ophọn phọ kụ ogbogh oghaạph dị asoman torobọ oye epẹ k’akẹ r’isiẹn ade phọ. Oye o/lho epẹ k’akẹ obobọ siẹn ade phọ dị malhọgh ikuph apu Zizọs oḅaalhamhị aḍien phọ aZihova. Kuolọ mem mọ osiph bọ Zizọs, amulhọgh ḍien phọ ugbạ oḅạm emhụ odị mọ raapụ ghan ḍien Enhaạn! Esi aZizọs ikarạph dị eeleeny oopụ aḍien phọ Enhaạn i/lo. Ikạr kụ eeḅaghamhị Zizọs olhegheri mọ kokol emhụ ipẹ phọ kụ okiigh nyodị. Eeni ipẹ kụ iḍighi bọ iyaạr phọ aZizọs aaḅereghị ghan bọ “r’amukum ologhi” kụ egbi bọ oteẹny amem mọ osiph bọ nyodị.—Luk 22:41-44. w24.02 11 ¶11

Siẹn eghiil aghuḍum mọ, yira omoọgh ophomhoghiạn aZihova r’aZizọs opu siya ayira. (Mat. 10:37) Iphẹn phọ re/mạ ghan mọ yira kopogh ogunhọm eghunotu phọ ayira, eten dị eḅilhẹ eghịgh mudị iiḍighi eghunotu phọ kụ risophoghom iyira oḍighi idị eḅeraạn Enhaạn r’aKraist. Kuolọ, tutụ yira komoọgh kuuḅi aghisigh Enhaạn r’aKraist, pọ yira omoọgh oḍighi ipẹ isi bọ iyira siphẹ eghunotu phọ. (1 Tim. 5:4, 8) Olhoghi ayira kaḅaạl li mem dị yira oḍighi iphẹn phọ. Loor esi dị aZihova apighi eghunotu phọ eten dị oḅaạl olhoghi katọl mem dị olom r’anhịr ozoọm ghan nyoniin r’olhọgh eegu ḅilhẹ r’ephomhoghiạn, mem dị odẹ r’onhiin ophomhoghiạn oḅilhẹ otughemhị ibạm anmụny phọ abidị, ḅilhẹ mem dị ibạm anmụny phọ onhaghanhạn ghan odẹ r’onhiin abidị. (Efẹ. 5:33; 6:1, 4) Torobọ oḍighi dị nạ amhoọgh siphẹ eghunotu phọ, kparaghạ omhiịn mọ nạ abeḍenhọm oromha osụ-olhoghi aBaibul phọ, kparipẹ r’idị nạ aatughiạn, idị awe roḍighi epẹ ekool phọ anyinha obobọ idị awe igbogh arinyạ eghaạph. Arinyạ ookpomhoghan phọ ketue ni eḍeenhaan nyinhạ ilọ osighẹ asinhị iilhogh aBaibul phọ oḍighinhom. w23.08 28 ¶6-7

Ewạ ni dị onyọ umaranhi katuughạ sighalhanyạ orolhọm. Iniin asighalhanyạ dị odị atuughạ eghoroghọr ketue ni eloghonhaạn nyodị ḍighaạgh siphẹ oomo adọl aghuḍum mọ odị. Esi omaạm, tuughạ aạl r’ogẹ. Iniin arikpisi, u/miịn aạl r’ogẹ idiphọ asighalhanyạ dị emhoghi mọ anhịr ephoph atuughạ. Toroboiperolbọ, emạn ni maạr dị torobọ onyọ aKristẹn katuughạ ilọ aạl r’ogẹ. (1 Tim. 4:13) Esi iduọn phọ, ka/meera iyaạr ekikima nyinhạ otuughạ aạl r’ogẹ. Eeghe asuọ kụ edị nạ kamoọgh? Asighalhanyạ phọ iphẹn phọ kelhoghonhaạn nyinhạ ḍighaạgh omhoọgh oḍighi. Kedughanhaan kẹn nyinhạ otuughạ aBaibul phọ ḅilhẹ r’otughemhị abunhọn. Kụ edị emhạn maạr epu, aạl ghan r’ogbirima ghan Ekpo Onhu phọ Enhaạn keḍur nyinhạ etumeri aZihova.—1 Tim. 4:15. w23.12 20 ¶10-11

Lọm aZihova olhoghonhaạn aḍighaạgh okpạr opụ odẹgh ophogh. Idiphọ awe dị u/munughan, yira omoghi ni eenhan ghan odẹgh ophogh oḍighi araraạr dị i/nighẹ. Kụ aSetan akị ni ghisigh raḍighi ghan idị iphẹn phọ kikparanhaạn iyira. Eniin eten dị odị rakparaghạ ghan oopụ iitughiạn phọ ayira pọ esi oozaghamiạn aloor dị u/ḅaạl. Odọ oozaghamhiạn aloor phọ opọ phọ katue ni alọgh ikarạph iitughiạn olhoghi ayira—kụ odọ iitughiạn phọ ipẹ phọ reḍighi ghan idị yira ko/ḅaạl ghisigh aZihova ḅilhẹ rekọm ghan idị oye kaḍighi igbogh ikarạph. (Mạk 7:21-23; Jems 1:14, 15) Yira omoghi ni olhoghonhaạn aḍighaạgh aZihova orue okpạr opu odẹgh ophogh oḍighi araraạr dị i/nighẹ. AZizọs aḅarạm ni ilọm mọ iphẹn eḅẹm bọ mọ: “Ka/meera yoor omeel oḍighanaan odẹgh ophogh, uphẹI iyoor asighẹ esi ikarạph” siphẹ iiḅereghị odẹ phọ. (Mat. 6:13) AZihova rawạ ni olhoghonhaạn ayira ḍighaạgh, kuolọ ewạ ni mọ olhọm nyodị. Kụ ewạ ni kẹn dị yira koḍighi idị emhoọgh muḅọph r’iiḅereghị phọ ayira. w23.05 6-7 ¶15-17

Mem dị olom r’anhịr osereghiạn siya phọ abidị r’Odẹ k’akẹ phọ abidị, bidị koogboronom ghan ni osighẹ oroma phọ odị oḍighinhom, kụ iphẹn phọ keloghonhaạn bidị ḍighaạgh okpạr opu iiḅaghamhị dị ketue ekọm idị ephomhoghiạn phọ abidị keephoọm. Awe dị omhoọgh siya dị ekpạr r’aZihova rokparaghạ ghan kẹn otuughaạny odị kụ oḍeenhaan raagharạ odị, idiphọ oḍighi ghan iiḅi, okparạm, ḅilhẹ r’osạr owilhenhaạn. (Efẹ. 4:32–5:1) Olom r’anhịr oḍeenhaan ghan raagharạ phọ iphẹn phọ pọ ephomhoghiạn phọ abidị kekị ni ghisigh bịn ekpạr ghan. Onyọ umaranhi dị oghol mọ Lena, dị m’aạl ilhom siẹn 25 asiạ, aḅẹm mọ: “Redugh ghan agey ophomhoghiạn oḅilhẹ olhọgh eegu oye dị amhoọgh igey asiya r’aZihova.” Ooḅeghiọn eniin eḍeenhaan. Mem mọ aZihova rasaḅạr bọ we phọ koḍighi bọ Odẹ r’onhiin aMesaya phọ, Odị asaḅạr Josef r’aMeri esi ibadị siphẹ eemharạ eemharạ phọ aDevid. Eeghe kụ iḍighi? Iyạl phọ abidị umhoọgh siya dị ekpạr r’aZihova, kụ aZihova akuphom ni owol mọ bidị kosighẹ ni ephomhoghiạn phọ odị kụ omeremhị idiphọ eḅẹl iyaạr siphẹ apinien phọ abidị. w23.05 21 ¶3-4

Ii, oḍiemhiom mọ ayira, Zizọs, amunughan, kuolọ abuphẹ odị asighẹ bọ raḍighinhom ooḅakiọm ookpomhoghan phọ siẹn ade phọ u/munughan. Etue ni ikparanhaạn iyira onhaghanhạn abidị, ekạr ekpaariọm mem dị bidị uḅenhị iyira oḍighi iyaạr dị i/lo olhoghi ayira oḍighi. Eniin amem, otelhedom aPita aakpukiạn ni odạph itọ dị ongọ nyodị. Eniin amem dị ookpaạny aḅenhị nyodị aạny inhạm dị i/ḅaạl odaphạn Olhogh phọ AMozis, aPita o/mheera—ka/mem bịn, kuolọ iraạr amem! (Iiḍ. 10:9-16) Eeghe kụ iḍighi? Imhoom iiḅakiọm mọ imhoọgh idị erọl esi odị. Ḍieriphọ aḍighaạgh phọ, otelhedom mọ aPọl anhaghanhạn ni itọ mem dị ikumor awe phọ epẹ Jeruselem ongọ nyodị iiḅakiọm, mọ odị aphạm inya alhephiri anmụny aghimọm siphẹ otu iiḅereghị phọ aselemian loor odị pidị eḍeenhaan mọ odị atuụgh ni iilhogh phọ aMozis raako. APọl alhegheri ni mọ aKristẹn u/lo mun eeḍiạn Olhogh phọ aMozis. Kụ odị ko/ḍighi iyaạr dị eeph. Ghalhamọ r’iduọn phọ ni, “ḍio phọ etum bọ pạ, aPọI asighẹ we phọ kụ aḍita abidị r’odị oselemian Ioor.” (Iiḍ. 21:23, 24, 26) Loor iduọn aPọl anhaghanhạn bọ iiḅakiọm mọ, oḅọph onhụ arọl li.—Rom. 14:19, 21. w23.10 10 ¶15-16

Eeni nạ kaa/tughiạn mọ oghiilhaan aḍighi ni eniin ekpanhạ eegharạ dị emhoghi orọl igbo igey arighirị. Kuolọ toroboiperolbọ, buphẹ rowạ bọ oḍigh arighirị r’aZihova omoọgh “oghiilhaan” odị. Etigheri onhụ asiạ phọ yira mokumu bọ aZihova, ewạ ni mọ oomo ayira oghiọm ghisigh ophamhanhạm oghiilhaan dị amhoon oghị esi aZihova. Oghiilhaan Enhaạn p’eeghe? Oye dị amhoọgh ogey oghiilhaan Enhaạn ka/wạ oḍighi iyaạr dị kepuẹ siya phọ odị r’Enhaạn. AZizọs amhoọgh ni odọ ‘olhọgh eegu’ phọ obobọ oghiilhaan Enhaạn phọ opọ phọ. (Hib. 5:7) R’amem r’amem odị o/mhoọgh oghiilhaan dị u/kpeanhaạn oghị esi aZihova. (Isa. 11:2, 3) Kparipẹ ghụn, odị amhoọgh ephomhoghiạn dị eḍiinyan aghị esi Enhaạn kụ awạ ghan oḍighi ipẹ odị rawạ bọ. (Jọn 14:21, 31) Idiphọ aZizọs, yira olọgh ni aZihova eegu ḅilhẹ r’eghuan dị eḍiinyan loor esi dị aZihova amoọgh ephomhoghiạn, asụ-olhoghi, aḍighi Enhaạn elhiom ooruẹn r’iikpọ. Yira oḅilhẹ kẹn olegheri mọ aZihova uphomhoghiạn iyira ḅilhẹ amoọgh ni ogbolhomaam akị esi ipẹ yira romegheron ghan bọ k’oghị esi iiḅakiọm mọ odị. Olhoghi aZihova raḅaạl ghan ni mem dị yira onhaghanhạn nyodị, kuolọ repin ghan ni esi odị mem dị yira oḅaạr emhụ.—Ps. 78:41; Prov. 27:11. w23.06 14 ¶1-2; 15 ¶5

Uw-emhạ phọ Uzziah r’omhoọgh iikpọ, bịn awulha mọ aZihova kụ azin oomo araraạr phọ odị amhoọgh bọ. Eeghe kụ iyaạr ituughạ phọ? Ewạ ni dị yira kootughianhạm ghan loor ayira mọ aZihova kụ azin atorobọ iyaạr dị yira omhoọgh. Kparipẹ r’oobaga, yira ongọ ghan aZihova ḍisẹph ilọ atorobọ iyaạr dị yira oḍighi. (1 Kọr. 4:7) R’osooromhi aloor ewạ ni mọ olhọgh elhegh mọ idiphọ awe dị u/munughan mọ yira komoghi ghan ni ilioghọm. Onyọ umor dị odi igbo 60 asiạ aḅẹm mọ: “Mị matuughạ omhiịn mọ mị u/ḅonyonhu uzuan mem dị abunhọn omhiịn opiomạn amhị. Mem dị ulhiọm imhị, mị raalemhi ghan ni opiomạn phọ amhị kaghiọm ghisigh akparamhị siya phọ amhị r’aZihova.” Mem dị yira onhaghanhạn aZihova kụ osooromhi loor yira romoọgh ghan ni ibo.—Prov. 22:4. w23.09 10 ¶10-11

Ikạr kụ emhoghi dị abuḅẹl aKristẹn phọ komoọgh okparạm. Etigheri iduọn bidị osoman bọ iiḅaghamhị dị omhạr awe rosoman ghan, bidị usoman ni inhọn iiḅaghamhị. Ibadị abidị u/soman ikpuuroghọm ḍighaạgh abuḍiemhiom aruukụ iiḅereghị abuọ aJu phọ ḅilhẹ r’abuọ itooghị aRom mọ bịn, kuolọ bidị usoman kẹn ḍighaạgh ikạr arughunotu abidị. (Mat. 10:21) Kụ siphẹ okạr ookpomhoghan phọ, eeni amem bidị eenhan ghan ni itughemhị okpẹ abuphẹ momheel bọ oḍuạ siẹn igey phọ kụ rokparaghạ bọ okọm amadia. (Iiḍ 20:29, 30) Kuolọ toroboiperolbọ, aKristẹn phọ abuphẹ phọ ukparạm ni. (Ogan. 2:3) Ika? Bidị ugbirima ilọ imạ areḍeenhaan okparạm, idiphọ aJob. (Jems 5:10, 11) Bidị uuḅereghị ni olhọm inyaạm. (Iiḍ. 4:29-31) Kụ ogbon imạ phọ ipẹ keḍuạ bọ emite esi okparạm mọ abidị. (Iiḍ. 5:41) Yira kotue kẹn ni okparạm eḍighi iyaạr dị yira ogbor ghan otuughạ kụ oḅilhẹ ogbirima ilọ areḍeenhaan okparạm mọ edi bọ siphẹ Ekpo Onhụ phọ Enhaạn r’arinyạ ookpomhoghan phọ. w23.07 3 ¶5-6

AZihova r’aZizọs iyira ku/wilhẹ. Mem mọ otelhedom mọ aPita apharanhaạn bọ Zizọs eten, imhoghi ni dị odị kasopha ogbogh osopha. Odị kabilhẹ odạph aZizọs obobọ odị kakiọm ni ghisigh? AZizọs alhọm ni aZihova mọ odị aḍighi idị omheeraam mọ aPita ka/dugh. AZizọs aḅenhị ni Pita ilọ iiḅereghị phọ ipẹ phọ ḅilhẹ r’akpọ oḅio phọ odị amhoọgh bọ mọ epẹ ghisigh aPita kakparamhị ni bumor phọ odị. (Luk 22:31, 32) Dị iikia i/lo, ootughiạn ghan ilọ ikpo onhụ phọ aZizọs ipẹ phọ ikparamhị ghan ni Pita! Mem dị yira omhoọgh ephigh osopha osopha, aZihova katue ni asighẹ bupoghom dị omhoọgh ogbolhomaam ayira ungoọm iyira akpọ oḅio phọ yira omhoghi bọ ophamhanhạm aḍimheerạ phọ ayira. (Efẹ. 4:8, 11) Idiphọ aZihova amiteom bọ ni raraạr phọ aPita r’abueriphọ abutelhedom mọ omhoghi bọ, odị kungọ kẹn ni iyira ipẹ yira omhoghi bọ mem dị yira osighẹ ilọ Omhạr phọ oḍighi eḅẹl. w23.09 24-25 ¶14-15

AZihova ralọgh ghan ni elhegh oomo phọ araraạr phọ yira roḍighinhaan ghan bọ bunhọn ilọ eghom eghom. Odị ramiịn ghan idiphọ ekiạ dị yira ophighironhaạn nyodị ḅilhẹ r’omhụgh dị odị ulhe iyira dị odị k’akpẹ. Eḍighi maạr lọ nạ aḍighi ghan oniin odị raloghonhaạn ghan ḍighaạgh ikumor awe phọ obobọ okumor oye, aZihova o/wulha oomo phọ araraạr phọ ipẹ ephomhoghiạn enyu ghan bọ nyinhạ oḍighinhaan odị. (1 Kọr. 15:58) Odị alọgh kẹn ni elhegh ephomhoghiạn phọ nạ aghị bọ ghisigh raḍeenhaan nyiidiphọ. AZihova rawạ mọ yira oghị ghisigh obughẹ ephomhoghiạn phọ yira roḍeenhaan bọ nyodị r’abunhọn. Yira kotue ni okparamhị ephomhoghiạn phọ ayira esi aZihova esi aạl ghan kụ oḅilhẹ ogbirima ghan ipẹ yira aạl bọ siphẹ Ekpo Onhụ phọ odị ḅilhẹ rogbor ghan oḅaanhaạn odị esi iiḅereghị. Yira kotue ni obughẹ ephomhoghiạn phọ yira omhoọgh bọ oghị esi abumor phọ ayira mem dị yira owạ ghan reten olhoghonhaạn abidị ḍighaạgh. Iduọn ephomhoghiạn phọ ayira rebụgh bọ, yira rokparamhị ghan siya phọ ayira r’aZihova ḅilhẹ r’abumor r’abumaranhi phọ. Kụ yira kokelhọm ni siya phọ ipẹ phọ k’agee-pọ! w23.07 10 ¶11; 11 ¶13; 13 ¶18

Torobọ onyọ aKristẹn kụ kasopha ilọ odọ arookonhom dị odị kasighẹ ophoghaam aloor odị. Ogina olhogh dị aBaibul phọ alhọgh angọ onyọ aKristẹn dị rawạ osighẹ arookonhom pọ, iḅaạl ka/loghạ, ḅilhẹ ḍuạ esi iiḍighi ikarạph aruwaloor. (Iiḍ. 15:20; Gal. 5:19, 20) Kuolọ idị egbolhomaam inhọn areten arookonhom mọ, oye phọ kụ kasopha. Eeni yira otue ni olegheri okuphom owol odọ arookonhom dị kelọgh ni ḍighaạgh engọ onhọn oye obobọ kengọ iiḅaghamhị, kuolọ ewạ ni mọ olhọgh ni eegu elhiom mọ abumor r’abumaranhi phọ ayira omhoọgh bọ osopha odọ arookonhom dị bidị kosighẹ. Idị egbolhomaam iphẹn phọ, ewạ mọ olhọgh olhoghi ayira inya phọ araraạr phọ iphẹn: (1) Ogina itooghị Omhạr k’Enhaạn bịn kụ ketue eekonhom we esi areezẹgh emạn. (Isa. 33:24) (2) Torobọ onyọ aKristẹn “amaạr aphạm” olhoghi odị mem dị odị rasopha ilọ arookonhom odị.—Rom. 14:15, 19, 20. w23.07 24 ¶15

Na amaghamhị ni maạr siya phọ anạ r’aZihova ḍughụm? Dị iikia i/lo, nạ amaghamhị ni maạr! Kụ ko/gina anạ bịn. K’iḍiodi phọ, ibadị awe uphomhoghiạn ni iboom aZihova idiphọ anạ. (Ps. 104:33, 34) Ibadị mophinyọn ni rikiạ orue okumu aZihova. Idiphọ kụ edị abuniin awe epẹ Izrạl iḍiodi phọ dị oghol mọ Nazaraịt, obobọ awe dị oḅọgh ongọ oḍighi ghan. Ekpo onhụ phọ “Nazaraịt” eḍighi ekpo onhụ aHibru dị remạ ghan mọ “Odị Osaḅạr,” “Odị Ogbatạn,” obobọ “Odị Aḅọgh Loor Angọ.” ANazaraịt phọ pọ abuọ Izrạl dị omhoọgh oophugh kụ ophinyọn rikiạ okumu aZihova eten dị egbatanhaạn. Olhogh phọ AMozis angọ ni eepoogh dị olhephiri oọny obobọ anhịr ephoph kakiran iyọ dị egbatanhaạn r’aZihova m’onọ katọl idiphọ onyọ aNazaraịt esi amem dị odị amaanhaạn. (Num. 6:1, 2) Mem dị onyọ Izrạl aghunyan obobọ aghiran iyọ aNazaraịt phọ, pọ odị kadaphạn iilhogh dị abunhọn abuọ Izrạl ko/dạph aani. Eeghe kụ iḍighi kụ onyọ Izrạl kasopha bọ oghiran iyọ aNazaraịt phọ? Eeni aloor esi ephomhoghiạn dị odị amhoọgh esi aZihova ḅilhẹ r’oḍeenhaan osereghiạn esi aḍisẹph dị aZihova masẹph nyodị.—Deut. 6:5; 16:17. w24.02 14 ¶1-2

Siphẹ aBaibul phọ, ekpo onhụ aHibru phọ ogbạ bọ mọ “oḅạr,” obobọ “ephomoghiạn obạr,” rogbor ghan koḍighinhom mem dị rokaạph ilọ eten phọ epẹ Enhaạn raḅạr ghan bọ righirị odị loor ephomhoghiạn phọ odị amhoọgh bọ aghị esi abidị. Roḍighinhom ghan kẹn ni ekpo onhụ phọ ephẹn phọ mem dị rokaạph ilọ ephomoghiạn phọ edi ghan bọ igbo arebenhẹ Enhaạn. (2 Sam. 9:6, 7) AZihova rawạ kẹn mọ yira oḅạr nyodị. Oḅạr phọ ayira katue ghan ni akpạr iduọn amem mọ rekị bọ. Ooḅeghiọn idị iphẹn phọ emitenhaan Daniel. Ibadị araraạr imitenhaan ni Daniel dị edẹgh dọl oḅạr phọ odị. Kuolọ mem dị odị mapel 90 asiạ kụ edị odị asoman odẹgh ophogh dị apelheghiom. Abuphẹ rokumu bọ odaạm mọ ulhọgh ni ḍien Daniel, kụ kẹn, u/lọgh ghan eegu Enhaạn phọ aDaniel. Kụ bidị oḅian oghiigh aDaniel. Kụ oḍighi idị Odaạm mọ alhọgh olhogh dị kadẹgh apogh mughumọ aDaniel k’aḅạr Enhaạn obobọ Odaạm mọ. Orue okpetenhaan, pọ kewạ mọ odị aḍeenhaan mọ odị aḅạr ri Odaạm mọ esi owooriọm iiḅereghị aZihova esi 30 aḍughul otu. ADaniel asopha oḅạr aZihova bịn.—Dan. 6:12-15, 20-22. w23.08 5 ¶10-12

AZihova rawạ dị yira kokị ghisigh oḍeenhaan ghan ephomhoghiạn bumor r’abumaranhi phọ ayira. Ghalhamọ r’amem dị bidị iyira u/zoọm eten dị ekpeanhaạn, yira kotue ni okuphom owol mọ bidị u/legheri kụ upiomạn bọ iyira ḅilhẹ mọ bidị rokparaghạ ni oḍighi idị eḅeraạn aZihova. (Prov. 12:18) Enhaạn apomoghiạn ni rebenhẹ phọ odị okpẹ bọ oḍuom olhoghi phọ, etigheri sipiomạn phọ abidị. Ghalhamọ yira upiomạn ni, odị ra/kạgh ghan olhoghi bịn kuḅitonhaạn iyira. (Ps. 103:9) Yira okạr kụ rosereghiạn osạr owilhenhaạn phọ aZihova. Mem dị yira osạr owilhenhaạn aani bunhọn pọ yira rotuughaạny ghan nyodị! (Efẹ. 4:32–5:1) Ka/bulha kẹn mọ, iḍuọn eekunha phọ reteẹny bọ, mekạr ekpaariọm dị yira koḍuraan otuman bumor r’abumaranhi phọ ayira. Igbiphoghọm kepogh ghan bịn obụgh. Otue kẹn ni ulhọgh iyira ikoli loor omheeraam mọ ayira. Eḍighi maạr dị ipẹ phọ emite, pọ yira kokạr kụ omoghi olhoghonhaạn aḍighaạgh abumor r’abumaranhi phọ.—Prov. 17:17. w24.03 15-16 ¶6-7

Aḍinyạ Iigbia phọ epamanhạm ni reḍeenhaan iḍoọgh dị oḍuraan otuman aZihova, omhoọgh kuuḅi aghisigh odị, kụ oḅilhẹ omhoọgh ghuḍum oḅaạl olhoghi. ADevid oniin ni. K’amem iḍoọgh kụ edị odị asaḅạr gạ Enhaạn, kụ onyebel roten aḍighi odaạm. (1 Ki. 3:6; 9:4, 5; 14:8) Otuughạ ilọ adọl aghuḍum mọ aDevid ketue ni ekparamhị eḅilhẹ enyu nyinhạ okumu aZihova r’omheeraam. Nạ atue kẹn ni agbon otuughạ ilọ eḍeenhaan phọ aMạk obobọ Timoti. Nạ kamiịn ni mọ bidị ukumu aZihova k’eghoroghọr kụ omhoọgh kuuḅi aghisigh Enhaạn. Ipẹ aghuḍum mọ anạ katọl bọ ghisigh edi esi ipẹ nạ aḍighinhom bọ nyiidiphọ. Obeḍenhọm aZihova kụ oghel obeḍenhọm aloor anạ keḍighi idị aZihova kụ kaaḅakị ghan igbaranuọm aruwol phọ anạ. Nạ katue ni amoọgh oḅaạl olhoghi r’ookiạ aghuḍum. Legheri mọ, aZihova amaghamhị ni maạr ipẹ nạ raḍighi bọ. Iyaạr edi ni dị enhighẹ epu osighẹ aghuḍum mọ anạ okumuom Odẹ k’akẹ phọ anạ ḍughụm? w23.09 13 ¶18-19

Otelhedom mọ aPọl alhegheri ni mọ abumor r’abumaranhi phọ u/munughan. Esi omaạm, abuniin u/meeraam mọ odị maḍighi onyọ amatuạn mem mọ odị aghị bọ ateẹny bidị. (Iiḍ. 9:26) Kụ ipẹ reten, kụ abuniin omhiigh oghị omhạn oghaạph ikarạph ilọ odị ophuẹ aḍien odị. (2 Kọr. 10:10) APọl amhiịn ni oniin okumor oye dị apiomạn opiomạn dị aḍighi idị abuniin okpetaan. (Gal. 2:11, 12) Kụ oniin ogbogh oyaghirị aPọl, Mạk, abi ni nyodị. (Iiḍ. 15:37, 38) APọl mutue ni asopha mọ onọ ka/moọgh mun iyaạr oḍighinhom abumor phọ abuẹn phọ loor opiomạn phọ abidị. Kuolọ odị aghị ghisigh asereghiạn ghan bumor r’abumaranhi phọ kụ aghị ghisigh akumu aZihova eten dị ekpẹ oḍuom olhoghi. Eeghe kụ ilhoghonhaạn bọ Pọl ḍighaạgh oghiọm aghisigh oḍighi ghan iduọn phọ? APọl akạr kụ aphomhoghiạn bumor r’abumaranhi phọ. Kụ ephomhoghiạn phọ epẹ phọ kụ ilhoghonhaạn bọ nyodị ḍighaạgh ogbon imạ araagharạ phọ abidị kparipẹ r’asipiomạn phọ abidị. Ephomhoghiạn kụ ilhoghonhaạn bọ Pọl ḍighaạgh oḍighi ipẹ edi bọ siphẹ esi aBaibul phọ ibạl phọ arodon. w24.03 15 ¶4-5

ABaibul phọ apamanhạm ni reḍeenhaan dị emạ emiteom idị oyoghoyoghọ amhạn maạr. Ooḅeghiọn eḍeenhaan Aizịk. Mem mọ odị arugh bọ epẹ Gerar emhạ abuọ aPhilistine phọ, bidị umhooghọm ni nyodị eḍịm kụ ookpereghi sighuḍia phọ odẹ phọ odị aguphogh bọ. Kụ kparipẹ r’owạ elhiom odị esi ee r’abidị, Aizịk asighẹ ghụn eghunotu phọ odị agheelhom enhọn ekpisi kụ aguphogh inhọn asighuḍia. (Gen. 26:12-18) Kuolọ awe aPhilistine phọ uḅilhẹ ni oru oḅẹm mọ bunọ kụ umhoọgh muụm asighuḍia phọ. Ghalhamọ r’iduọn phọ ni bịn, Aizịk azọ ni r’eephọ. (Gen. 26:19-25) Eeghe kụ ilhoghonhaạn bọ nyodị ḍighaạgh ophamhaghạn aloor mem mọ ozuoghom ghan bọ nyodị? Dị iikia i/lo, odị atuughaạny ni ezọ eephọ odẹ phọ odị Ebraham ḅilhẹ “osooromi aloor r’obolobolọ ologhi” onhiin phọ odị Sera.—1 Pit. 3:4-6; Gen. 21:22-34. w23.09 15 ¶4

R’ephomhoghiạn aZihova arom ni oḅẹl Oọny phọ odị oru isiẹn ade phọ otughemhị awe ilọ Omhạr phọ kụ oḅilhẹ ongọ aghuḍum mọ odị otagharạn ayira esi ikarạph r’aḍuugh. Kụ ipẹ reten kụ oḅeton Zizọs ogheelhom epẹ k’akẹ dị odị katooghị siphẹ Omhạr phọ Enhaạn. Ekpanhạ emhuoghaạph aBaibul phọ pọ oḅaalhamhị aḍien phọ aZihova esi omhunhenhi ogbi phọ odị ilọ ade phọ, dị eego esi Omhạr phọ odị aKraist kụ ratooghị bọ. Ogbi phọ aZihova ka/tue anmia. Odị maghunyian mọ odị kamunenhi ni ipẹ odị maguanhaan bọ. (Isa. 46:10, igẹ dị edi ude; Hib. 6:17, 18) Moọny amem, ade phọ keten ni paradais dị anmụny Adạm r’Iv dị omhunhughan oḅilhẹ oselheman “kokelhọm ghuḍum k’agee-pọ.” (Ps. 22:26) Kuolọ, iphẹn bịn kụ ki/gina araraạr dị aZihova agbiighi oḍighi. Arigbiom mọ odị pọ oḅophoghị oomo arebenhẹ phọ odị epẹ k’akẹ r’isiẹn ade phọ. Mem mọ opọ phọ, oomo awe epẹ k’akẹ r’isiẹn ade phọ kosooromhi loor ongọ aZihova idiphọ oginha otooghiạ. (Efẹ. 1:8-11) Eḍighi ni iikia esi anạ omhiịn eten phọ epẹ aZihova ramunhenhi bọ rigbiom mọ odị ḍughụm? w23.10 20 ¶7-8

Mem mọ oḍuạ bọ Babilọn osi Jeruselem, i/bia bịn bidị omhiigh osoman aḍikparamhinheẹn loor ekuom ikpoki, iiḅaghamhị imirighan itooghị, ḅilhẹ r’isophoghom. Iphẹn phọ iḍighi idị ekparanhaạn buniin ogbon oḍighi olhọgh otu iiḅereghị phọ aZihova. Esi iduọn phọ, aZihova amạ ni riil phọ odị Haggai r’aZechariah lhạ phọ oghị oosạ oophugh awe phọ. Oḍighi ariil phọ abuẹn phọ amhoọgh ni ekol. (Hag. 1:1; Zech. 1:1) Kuolọ rekị bọ omhạn 50 asiạ, bịn eḅilhẹ emhoghi okparamhị abidị. Kụ Ezra, ophelhegbe ogeeghiạ Olhogh phọ, aḍuạ Babilọn aru Jeruselem okparamhị awe phọ Enhaạn dị bidị kokị ghisigh osighẹ iiseeny phọ aZihova oḍighi eḅẹl. (Ezra 7:1, 6) Idiphọ imiịn phọ aHaggai r’aZechariah elhoghonhaạn bọ ḍighaạgh we phọ Enhaạn oghị aghisigh oḍuom olhoghi aZihova mem isophoghom, imiịn phọ ipẹ phọ ketue kẹn ni ekparamhị aani oḍuomolhoghi phọ ayira esi aZihova etigheri odọ iiḅaghamhị dị yira osoman.—Prov. 22:19. w23.11 14-15 ¶2-3

Ika kụ edị yira kotue oḍeenhaan ephomhoghiạn buẹn r’ayira oḅọph bọ omheeraam mọ? Eniin eten pọ oodereghị ghan abidị. Yira kotue ni okị ghisigh oodereghị ghan oniin atum nyoniin eḍighi maạr dị yira omhoọgh igbiririph. (1 Tẹs. 4:18) Ika kụ edị yira kotue okparamhị ephomhoghiạn phọ yira omhoọgh bọ oghị esi abunhọn? Esi oḍighi ghan oomo ipẹ yira kotue bọ osạr ghan owilhenhaạn asipiomạn abunhọn. Uḍighi ika kụ ekạr bọ emhoghi rodon dị oniin kaḍeenhaan ghan nyoniin ephomhoghiạn? Lọgh elhegh ephigh phọ aPita angọ bọ: “Eekuronom oomo araraạr mekpulạn. Esi iduọn phọ, . . . oniin amoọgh ephomhoghiạn dị eḍiinyan aghị esi ophoriphọ.” (1 Pit. 4:7, 8 NWT) Yira kogon omhiịn eeghe siẹn okarạph aḅirinhi phọ ophọn phọ eekunha phọ metuman bọ siẹn? Idị egbolhomaam bumatuạn phọ odị, aZizọs aghaạph mọ: “Awe oomo areeIhe kiIọgh ni inyina ḍien Ioor emụ phọ amị.” (Mat. 24:9) Orue omherenyạn amulhọgh ḍien phọ, yira omoghi omhoọgh amuḅọph. Yira oḍighi iduọn phọ, aSetan ka/tue alọgh madia siẹn igbo phọ ayira, loor esi dị ephomhoghiạn kụ iphạm iyira eḅophoghị.—Fil. 2:1, 2. w23.11 13 ¶18-19

Igey phọ edi bọ siphẹ Ekpo Onhụ phọ Enhaạn emoọgh ni iikpọ iboom. Eekiạ iyaạr remite ghan ni mem dị yira otughemhị we ilọ okạr oye phọ aZihova aru bọ. Reḅariọn ghan riḍien awe, bịn bidị komhiigh omhiịn imạ araagharạ Odẹ ephomhoghiạn phọ ayira. Kụ iikpọ phọ odị i/moọgh bọ eekunha renyu ghan ni bidị oghuenhi odị. (Isa. 40:26) Elhiom ooruẹn phọ odị rengọ ghan ni bidị oḍuom olhoghi. (Deut. 32:4) Kụ bidị rotuughạ ghan ni ibadị araraạr esi osụ-olhoghi phọ odị. (Isa. 55:9; Rom 11:33) Rengọ ghan ni bidị iidereghị oru olhegheri mọ Enhaạn kụ ephomhoghiạn phọ r’aloor. (1 Jọn 4:8) Iduọn bidị roḍuraan bọ kotuman aZihova, oḍuom olhoghi phọ abidị orọl k’agee-pọ idiphọ anmụny odị rakpạr ghan bịn. Ekạr kụ eḍighi eekiạ eepoogh olhoghonhaạn awe ḍighaạgh oḍuraan otuman Odẹ phọ abidị! Mem dị yira ophinhom aani bin oḍighi phọ ophọn phọ, aZihova rumhiịn ghan iyira idiphọ awe dị “oḅọph oḍighi rokumu” r’odị.—1 Kọr. 3:5. w24.02 12 ¶15

Eḍighi maạr dị rotughemhị ghan nyinhạ Baibul phọ obobọ odẹ r’onhiin anạ dị oḍighi Bugbaanhaạn kụ rookonhom nyinhạ, nạ mamhiigh ni raatughiạn ilọ oḍiiny amuụm ḍughụm? Aḍiphẹ phọ aḍimạ aḍiigbu ni! Tutụ nạ kaḍiiny muụm pọ nạ amoọgh ophụr oḅọgh aloor anạ ongọ aZihova. Ika kụ edị nạ kaḅọgh bọ loor anạ angọ aZihova? Nạ kaaḅereghị kụ aguanhaan nyodị mọ nạ kakumu ogina odị aḅilhẹ asighẹ ogbi phọ odị aḍighi eḅẹl siphẹ aghuḍum mọ anạ. Iphẹn phọ remạ ghan mọ nạ raguanhaan ghan aZihova mọ nạ kakiọm ghisigh apomhoghiạn nyodị r’oomo ologhi, r’oomo uwaIoor, r’oomo iitughiạn, r’oomo inyaạm anạ. (Mạk 12:30) Nạ kaḅọgh loor anạ angọ aZihova esi dị ogina anạ bịn odi, kụ eḍighi iyaạr dị edi igbo aZihova r’anạ bịn. Ḍieriphọ aḍighaạgh phọ, oḍiiny amuụm eḍighi iyaạr dị koḍighi esi ogbo; reḅenhị ghan we phọ romiịn bọ nyinhạ mọ nạ maḅọgh loor anạ angọ aZihova. Ikunya oḅọgh aloor phọ anạ ongọ aZihova eḍighi iyaạr iigbia, esi iduọn phọ aḍiigbu anạ eḍighi omhunhenhi ipẹ nạ aguan bọ, kụ aZihova rawạ mọ tuụgh ni aḍighi.—Eccl. 5:4. w24.03 2 ¶2; 3 ¶5

Apinien o/lho dị u/moọgh iiḅaghamhị. ABaibul phọ akaạph ni eten dị eegholhaan, mọ buphẹ aalhạn bọ komoọgh ni “iiḅaghamị.” (1 Kọr. 7:28) Eeghe kụ iḍighi? Loor esi dị apinien raḅophoghị ghan iyạl awe dị u/munughạn, dị omhoọgh roozọ r’iḍighinhom araraạr kirokirọ. Bidị otue ni oḍuạ kirokirọ arikpisi kụ otu, eeni kẹn r’asidọl dị egbaranhaạn. Bidị otue ni omiteom roozọ dị eeni opọ r’abidị aalhạn bọ u/miịn mem mọ bidị k“aalhạn bọ. Iniin iphẹn phọ ketue ni ekọm iiḅaghamhị. Kparipẹ r’olhọgh elhegh mọ iyạl phọ abidị opiomạn ni kụ oḍighi iyaạr omiteom oolemhi araraạr, bidị otue ni bịn omiigh okpalhạm opọ r’abidị aalhạn bọ. Bidị otue ni ootughiạn mọ ogbaranhaạn obobọ okạ apinien phọ bịn kụ amamạn eten osiemhi eekunha iiḅaghamhị apinien phọ. Kuolọ ipẹ phọ ketue ni engọ bidị ogey oḅaạl olhoghi ḍughụm? Eeye. AZihova rawạ dị awe dị maalhạn kolọgh eegu iikolhobian apinien phọ ghalhamọ r’amem dị opọ r’abidị aalhạn bọ akpạr orolhạn. w24.03 16 ¶8; 17 ¶11

Mem dị nạ maḅọgh ni loor angọ aZihova aḅilhẹ aḍiiny muụm, bịn oḍuom olhoghi orọl k’agee-pọ siẹn ade phọ paradaịs kakiọm ni ghisigh abụgh idiphọ nạ ratuughạ bọ kabughẹ aḅilhẹ alhegheri iboom aZihova. (Hib. 5:13–6:1) Eeni ipẹ oghaạph bọ siphẹ Rom 5:2-4 memitenhaan aani ni nyinhạ. Nạ masoman ni iiḅaghamhị kirokirọ, kuolọ nạ ukparạm ghan ni, kụ epẹ eekunha phọ nạ amhoọgh kuuḅi aghisigh Enhaạn. Loor iduọn nạ alhegheri bọ mọ aZihova apomhoghiạn aḅilhẹ asereghiạn nyinhạ, nạ mamhoọgh nyiidiphọ iboom ariphigh otuạn ogon araraạr phọ aZihova aguanhaan bọ. Oḍuomolhoghi phọ anạ makpạr apu ipẹ arọl ghan bọ eḅẹl amem mọ. Makạr atu onọ esi anạ. Manme nyinhạ iboom, matir torobọ agạ aghuḍum mọ anạ aḅilhẹ ranme eten phọ nạ razoọm ghan bọ buọ eghunotu anạ, osopha anạ, ghalhamọ r’ipẹ nạ raḍighinhom ghan bọ mem mọ anạ. Otelhedom mọ aPọl aḅarạm ni iyaạr dị emhạn maạr agey dị egbolhomaam oḍuomolhoghi phọ nạ amhoọgh bọ mem mọ nạ mamhoọgh bọ kuuḅi aghisigh Enhaạn. Odị angọ nyinhạ okuphom owol mọ oḍuomolhoghi phọ anạ kamunughan ni.—Rom 15:13. w23.12 12-13 ¶16-19

Mem dị yira osoman ogbagarạ odẹgh ophogh, olhoghoma phọ, iitughiạn phọ, ḅilhẹ r’eten phọ epẹ yira romegheron ghan bọ regbatanhaạn ghan ni reten phọ ulhegheriom bọ iyira. Ooḅaghamhiạn aloor atue ni ukirikiriom iyira idiphọ oghuugh dị radegh loor oolhogh abazị. Ika kụ edị aZihova rulhoghonhaạn ghan iyira ḍighaạgh mem dị odọ ooḅaghamhiạn aloor phọ ophọn phọ uzuoghom iyira? Odị aguanhaan ophighi ayira okparamhị. Oolhogh abazị raaḅaghamhị ghan ni agey oghuugh. Orue oḍighi idị oghuugh phọ ka/degh iboom, buphẹ rozoghị bọ rosoore ghan ni oomo iigaạny oghuugh phọ raraạr dị kemiighemhi oghuugh phọ pidị aderiạn. Iphẹn phọ reḍighi ghan idị abuphẹ oḍigh bọ siphẹ oghuugh phọ kologhoma oghoph oḅilhẹ okelhọm oghuugh phọ bidị oḍigh bọ. Kuolọ, amem dị oghuugh phọ rakiil kụ edị ibadị araraạr phọ remiighemi ghan bọ oghuugh pho ketue eḍighi idị oghuugh phọ kamiigh. Eniin phọ eten phọ kẹn, amem dị yira oghị ghisigh rokumu nyodị etigheri odẹgh ophogh kụ edị aZihova kumhiighemhi iyira. w24.01 22 ¶7-8

Mem dị nạ amhoọgh oghiilhaan, puru loor anạ mọ, ‘Eeghe kụ edị aZihova maḍighi?’ Tuutughiạn ilọ olhẹm mọ odị. Esi omaạm, mem dị yira okiririom ophogh ipẹ aZihova rapogh ghan bọ inhụn phọ r’asifalawạy phọ—odị u/lẹm bọ u/kighimaạm loor ḅilhẹ ke/tue bọ eeḅereghị nyodị—kekparamhị ni oḍuom olhoghi phọ ayira mọ odị kuphogh ni iyira. (Mat. 6:25-32) Gbirima raraạr phọ aZihova maḍighinhaan bọ rebenhẹ phọ odị. Nạ atue ni atuughạ ilọ oye siphẹ aBaibul phọ dị aḍeenhaan omheeraam dị agbatanhaạn, obobọ nạ atue ni abạl ilọ idị emitenhaan oniin ebenhẹ aZihova siẹn amem mọ ayira. Kụ oḅarạm isiphẹ, gbirima ilọ araraạr phọ ipẹ aZihova maḍighinhaan bọ nyinhạ. Ika kụ edị odị aḍur bọ nyinhạ alhọgh siẹn igey phọ? (Jọn 6:44) Ika kụ edị odị rapagharanhaạn ghan iiḅereghị phọ anạ? (1 Jọn 5:14) Ika kụ edị nạ ramooghọm ghan suọ ḍio etum ḍio esi ekiạ ooḅi Oọny phọ odị?—Efẹ. 1:7; Hib. 4:14-16. w24.01 4 ¶6; 7 ¶17