Gon Ghan Ḍio Phọ AZihova

1. Yira koḍighi eeghe orue okpetenhaan aḍio phọ aZihova?

MEM dị aBaibul phọ aghaạph aghol ‘ḍio phọ aZihova,’ remạ ghan mem dị aZihova aagbonhaan iiruẹn mulhọgh ḍien phọ odị kụ aphẹl we phọ odị. Iḍiodi phọ, aZihova asophonhaan ghan ni iiruẹn iniin areelhe. (Isa. 13:1, 6; Ezek. 13:5; Zeph. 1:8) Siẹn asiḍio phọ ayira, ‘aḍio phọ aZihova,’ kemiigh mem mọ iikpọ itooghị phọ kezuoghom bọ Babilọn Ogbogh phọ kụ ekureriom r’eghạm Amagedọn phọ. Orue okpetenhaan ‘aḍio phọ aZihova,’ yira omoghi ookolhobian anyiidiphọ. AZizọs o/tughemhị mọ ookolhobian ghan ilọ amem igbogh “iminimiịn” phọ bịn, kuolọ mọ oḅarạm ‘ogon’ ghan.—Mat. 24:21; Luk 12:40.

2. Eeghe kụ iḍighi kụ yira kotue bọ ni omooghọm suọ ipẹ ogẹ bọ 1 Tesalonikạ?

² Siphẹ aḍiḅẹl aḍinyạ phọ ophum bọ nyodị ogẹ oghiomaạn abuọ aTesalonikạ phọ, otelhedom mọ aPọl aḍighinhom ni ibadị oghaạph omaaniọm ilọ olhoghonhaạn aḍighaạgh Kristẹn phọ, orue ookolhobian r’oḅilhẹ ogon aḍigbogh aḍio iiruẹn phọ aZihova. APọl alhegheri ni mọ aḍio phọ aZihova ke/tu mem mọ amuphẹ phọ. (2 Tẹs. 2:1-3) Toroboiperolbọ, odị aromha ni bumor phọ ookolhobian ilọ aḍio phọ aḍiphẹ phọ mudị ketu iḍue keḅaạl bọ. Yira kẹn kotue ni osighẹ oḍighinhom aani oromha phọ odị. Esi iduọn phọ, ooḅeghiọn ipẹ odị aghaạph bọ: (1) ipẹ aḍio phọ aZihova ketu bọ, (2) budọ awe phọ ko/kpetenhaan bọ, ḅilhẹ (3) r’ipẹ yira kotue bọ ookolhobian orue okpetenhaan.

AḌIO PHỌ AZIHOVA KETU IKA?

3. Ika kụ idị aḍio phọ aZihova ketu idiphọ oḅạ rakị ghan bọ imhi ḍughuI? (Miịn kẹn afoto phọ.)

³ “Idiphọ oḅạ rakị ghan bọ imi ḍughuI.” (1 Tẹs. 5:2) Ephẹn kụ eḅẹl esi iraạr oghaạph omaaniọm dị oḍighinhom oghaạph ilọ eruanhaan aḍio phọ aZihova. Aruḅạ rokem ghan agey omhi iyaạr ḍughul loor esi dị uwotu phọ ka/seere olhoghi mem mọ amuphẹ phọ. Aḍio phọ aZihova ketu kẹn ni ekperenhom, kụ esiph ibadị awe eteghegheeny. Ghalhamọ r’abugey aKristẹn bịn eeni keḍighi ni ekperenhom esi ipẹ araraạr keegboronhom bọ emite. Kuolọ amuphe iyira ku/teẹny, idiphọ kateẹny bọ bukarạph phọ.

4. Eghẹn eten kụ edị aḍio phọ aZihova eghịgh bọ oghunughun?

⁴ “Idiphọ anịr dị mesiom omạr kụ oghunughun rakun.” (1 Tẹs. 5:3) Anhịr dị mesiom omhạr ka/tue akaraghị alegheri mem mọ oghunughun phọ kakun bọ nyodị. Kuolọ ghalhamọ r’iduọn phọ ni bịn, odị alegheri ni mọ ketu ni. Kụ mem dị aru keḍighi ekperenhom, reboom eephinha dị odị ka/tue akpetenhaan. Eniin phọ eten pho kẹn, kụ edị yira u/legheri ḍio phọ ḅilhẹ r’amem mọ aḍio phọ aZihova kemiigh bọ. Kuolọ yira okuphom ni owol mọ abukarạph phọ ko/tue okpetenhaan ooruẹn phọ Enhaạn.

5. Eghẹn eten kụ edị kotue bọ omaaniọm igbogh iiḅaghamhị phọ ḍiḅaạl aḍiroọr?

⁵ Idiphọ aḍibaạl aḍiroọr. APọl aḅilhẹ aghaạph aghol oḅạ aḍughul siphẹ omhunhenhiom iraạr oghaạph omaaniọm mọ odị. Kuolọ egi phọ ephẹn phọ aPọl atomaạm ḍio phọ aZihova ḍiḅaạl aḍiroọr anme oghaạph phọ. (1 Tẹs. 5:4) Aruḅạ dị oghị imhi ḍughul otue ni otọl ookoroghiạn araraạr phọ bidị omhi bọ bịn amem etenhom bidị. Aḍiroọr etue ni eḅalalaạm bidị. Iniin phọ kẹn ni, igbogh iiḅaghamhị phọ kesighẹ ni ekperenhom buphẹ oghịgh bọ ruḅạ dị u/meera uḍuạ agạ ufiri phọ kụ orolhonhaạn bọ oḍighi ghan araraạr dị i/ḅeraạn aZihova. Yira kotue ni otọl dọl dị yira ko/tọl idiphọ abidị esi oghel iḍighinhom araraạr dị i/ḅeraạn aZihova kụ okiọm ghisigh owạ ghan ipẹ “eḍighi bọ ephalaḅaạl phọ kụ remuum ghan iimuma iiḅi r’aruukuan r’igey kirokirọ.” (Efẹ. 5:8-12) APọl aḅilhẹ aḍighinhom iyạl oghaạph omaaniọm dị eeghighighạn, oghaaphọm ilọ abuphẹ kokpetenhaan bọ.

ANHIẠN KỤ EDỊ KA/KPETENHAAN ḌIO PHỌ AZIHOVA?

6. Eghẹn eten kụ edị ogbogh opol awe ronaanhị bọ? (1 Tesalonikạ 5:6, 7)

⁶ Buphẹ “ronaanị yogh” bọ. (Bạl 1 Tesalonikạ 5:6, 7.) APọl atomaạm buphẹ ko/kpetenhaan bọ ḍio phọ aZihova we dị ronaanhị yogh. Bidị u/lọgh elhegh raraạr phọ remite bọ r’amem mọ. Esi iduọn phọ, bidị ko/tue olegheri mem dị iyaạr dị emhạn maạr emite ḅilhẹ ko/tue oḍighi iyaạr. Ogbogh opol awe rodon ronaanhị ni eten aruwaloor. (Rom. 11:8) Bidị u/moọgh ḍiḅeraạn ilọ areḍeenhaan phọ emạ bọ emiteom mọ yira kụ odi bọ siḍio “aruukuna phọ,” ḅilhẹ u/lọgh elhegh mọ igbogh iiḅaghamhị phọ metuman siẹn. Imhanhanhaan dị emite etue ni esumeẹny ḍiḅeraạn abuniin awe omhoọgh aḍiḅeraạn oru esi adom Omhạr phọ. Ghalhamọ r’iduọn phọ ni, ibadị oḅilhẹ ghan bịn ronaanhị ghan kparipẹ r’oomhanham. Ghalhamọ r’abuniin dị omheeraam ni mọ aḍio ooruẹn phọ retu ni rootughiạn ghan mọ aḍio phọ ekẹl li. (2 Pit. 3:3, 4) Kuolọ yira olọgh elhegh mọ idiphọ rekul bọ keḅaạl, aḍio phọ aZihova retuman ghan siẹn bịn.

7. Ika kụ idị buphẹ kosoman bọ ighạgh ilhoghi phọ Enhaạn oghịgh we dị amiim rakiigh?

⁷ Buphẹ “amiim rakiigh” bọ. Otelhedom mọ atomaạm buphẹ kosoman bọ ighạgh ilhoghi phọ Enhaạn we dị amiim rakiigh. Awe dị amiim rakiigh ro/nuụn ghan kolhegheri raraạr dị remite siphẹ bidị odi bọ, ḅilhẹ osopha abidị ra/kạr ghan kanhighẹ. Iniin phọ kẹn ni kụ edị abukarạph awe phọ ro/megheron ghan agey koghị esi iphụr arurụ phọ Enhaạn. Bidị rosaḅạr ghan okol aghuḍum dị katorori bidị angọ muphe. Kuolọ aBaibul phọ atoma Kristẹn mọ oomhanham oḅilhẹ ooko siloor abidị. (1 Tẹs. 5:6) Oniin oye dị atuughạ ilọ aBaibul aḅẹm mọ oomhanham kụ oḅilhẹ ooko aloor pọ remạ ghan “ophoomhị aloor kụ oḅilhẹ omhoọgh olhoghi dị amhiigh orue osopha ghan ogey osopha.” Eeghe kụ iḍighi kụ ewạ bọ ophoomhị aloor oḅilhẹ omhiigh? Pidị yira ko/ḍighom aani imirighan itooghị ḅilhẹ r’iiḅaghamhị dị emite. Iduọn aḍio phọ aZihova rekpụl bọ, dị nạ u/gona loor, adọl aḅirinhi phọ ketue ni eḍighi iyaạr dị nạ kaḍighom aani oḍighi araraạr phọ iphẹn phọ. Ghalhamọ r’iduọn phọ ni, i/wạ m’ooḅaghamhiạn loor iboom ilọ ipẹ yira komegheron bọ. Uwaloor iigbia phọ Enhaạn katue ni ulhoghonhaạn iyira ḍighaạgh ophoomhị aloor r’omhoọgh olhoghi dị amhiigh orue ghan osopha ogey osopha.—Luk 12:11, 12.

YIRA KOḌIGHI EEGHE ORUE OOKOLHOBIAN ILỌ AḌIO PHỌ AZIHOVA?

8. Ika kụ idị 1 Tesalonikạ 5:8 aghaạph amaaniọm raagharạ dị kilhoghonhaạn iyira ḍighaạgh ogon ghan kụ oḅilhẹ oomhanham? (Miịn kẹn afoto phọ.)

⁸ Okpolhoghiạn “asuomạ okorian aloor ayira . . . kụ ozua . . . eghoony.” APọl usighẹ iyira atomaạm we eghạm dị okpolhoghiạn asuomạ eghạm kụ oḅilhẹ oomhanham ilọ eghạm. (Bạl 1 Tesalonikạ 5:8.) Onyọ eghạm akpẹ ghan ookolhobian oomo amem ilọ eghạm mem dị robe eghạm. Iniin phọ kẹn kụ edị ewạ aani esi ayira. Yira kookolhobian oḅilhẹ ogon ḍio phọ aZihova esi okpolhoghiạn ghan oomo amem asuomạ okorian aloor phọ ayira aḍighi bọ omheeraam r’ephomhoghiạn, ḅilhẹ r’eghoony odụomolhoghi phọ ayira. Araagharạ phọ ipẹ phọ kekạr kụ ilhoghonhaạn iyira ḍighaạgh.

9. Omheeraam rughoph ghan iyira ika?

⁹ Asuomạ okorian aloor rakoph ghan ekpom onyọ eghạm. Omheeraam r’ephomhoghiạn rekoph ghan ekpom mọ ayira omaaniọm bọ. Kilhoghonhaạn iyira ḍighaạgh oghiọm aghisigh okumu Enhaạn r’odạph aZizọs. Omheeraam rungọ ghan iyira okuphom owol mọ aZihova ka/bilhẹ okpẹ abuphẹ osighẹ bọ oomo olhoghi kụ rowaạm nyodị. (Hib. 11:6) Omheeraam kunyu iyira oḅạr Oḍiemhiom mọ ayira, Zizọs, ghalhamọ imhoghi ni oḍighi iduọn phọ r’aḍikparamhinheẹn. Yira kotue ni okparamhị omheeraam mọ ayira orue okaran ipaanhaạn esi olhọgh elhegh reḍeenhaan awe aḍio arodon dị ophamhanhạm ḍimheerạ phọ abidị etigheri igbiphoghọm obobọ ḍikparamhinheẹn. Yira kotue ni okoronhaan siphil ophorogh eelạ esi otuughaạny abuphẹ odughe bọ dọl aghuḍum mọ abidị kụ osighẹ bọ Omhạr phọ oḍighi eḅẹl.b

10. Ika kụ idị ephomhoghiạn Enhaạn r’amatuman rilhoghonhaạn ghan iyira ḍighaạgh orue okparạm?

¹⁰ Ephomhoghiạn emạn kẹn ni maạr orue oghiọm aghisigh oomhanham r’ogon ghan. (Mat. 22:37-39) Ephomhoghiạn Enhaạn rilhoghonhaạn ghan iyira ḍighaạgh ogbạ ikpo onhụ phọ r’okparạm, etigheri iiḅaghamhị dị eeni kekọm ingọ iyira. (2 Tim. 1:7, 8) Loor esi dị ephomhoghiạn phọ ayira eḅeẹny ni ekị eteẹny buphẹ u/ḅọph bọ omheeraam r’ayira. Yira okiọm ni ghisigh rogbạ ghan ikpo onhụ phọ epẹ arokool phọ ayira koḍighinhom kẹn fon obobọ ogẹ aḍinyạ oghiomaạn. Iyira i/phẹr ogon ghan mọ r’eniin aḍio onyọ amatuman phọ ayira kanmia ni amiigh oḍighi aani ipẹ eru bọ inẹ.—Ezek. 18:27, 28.

11. Ika kụ idị ephomhoghiạn abuẹn r’ayira oḅọph bọ omheeraam mọ kilhoghonhaạn iyira ḍighaạgh? (1 Tesalonikạ 5:11)

¹¹ Ephomhoghiạn amatuman phọ ayira eḅaramaạm ni buẹn r’ayira oḅọph bọ omheeraam mọ. Yira roḍeenhaan ghan ephomhoghiạn phọ ephẹn phọ esi ‘okparamị ghan ologhi oniin, oniin aaneghị ghan nyoniin.’ (Bạl 1 Tesalonikạ 5:11.) Idiphọ awe eghạm dị oḅophoghạn robian mulhọgh ḍien, yira rokparamhị ghan oniin atum nyoniin. Ii eeni amem dị eghạm mọ mekpọ, onyọ eghạm atue ni apiomạn aḍighi iyaạr nyopọ r’odị odi bọ agạ, kuolọ ra/legheri ghan kụ kaḍighi iduọn phọ. Eniin phọ eten phọ, yira ko/tue olegheri kụ oḍighi iyaạr dị kepin esi abumor r’abumaranhi phọ ayira obobọ osighẹ ikarạph okpeọm ikarạph. (1 Tẹs. 5:13, 15) Yira roḍeenhaan ghan kẹn ephomhoghiạn phọ ayira esi olhọgh ghan eegu bumor phọ abuphẹ ropogh bọ ookpomhoghan phọ. (1 Tẹs. 5:12) Mem mọ aPọl agẹ bọ ḍinyạ phọ aḍiẹn phọ, ookpomhoghan phọ aTesalonikạ ko/mhạn lhạ. Abumor phọ omạ bọ eeni olhegheri iyaạr phọ ko/bụgh, kụ otue ni opiomạn yogh. Ghalhamọ r’iduọn phọ ni, okpẹ ni olhọgh eegu. Idiphọ igbogh iiḅaghamhị phọ reteẹny bọ, eeni yira komoghi ni iiḅakiọm ikumor awe arookpomhoghan phọ opu idị merọl ghan. Eeni yira ko/tue mun oḅaanhaạn buphẹ odi bọ epẹ emhụ agadạ phọ ḅilhẹ r’olạ agadạ phọ; esi iduọn phọ, emạn ni maạr dị yira kotuughạ ophomhoghiạn r’olhọgh ghan eegu ikumor awe phọ ayira nyiidiphọ. Etigheri ilọ emite, omhaạr oomhanham, ku/gbon e/munughan phọ abidị, kparipẹ ghụn, miịn bidị idiphọ awe dị okpẹ oḍuomolhoghi dị aZihova asighẹ raḍighinhom oḍighi dị eego esi aKraist.

12. Ika kụ edị oḍuom olhoghi phọ ayira rakoph ghan iitughiạn phọ ayira?

¹² Idiphọ eghoony eghạm rekoph ghan bọ emhụ onyọ eghạm, kụ edị oḍuomolhoghi apelieẹny phọ ayira rakoph ghan iitughiạn phọ ayira. R’oḍuomolhoghi dị amhiigh, yira olọgh ni elhegh mọ iyaạr dị aḅirinhi phọ omhoọgh ongọ ayira dị emhoọgh maạr oḍighinhom i/lo. (Fil. 3:8) Oḍuomolhoghi rulhoghonhaạn ghan iyira ḍighaạgh ophoomhị aloor r’omhiigh. Iphẹn phọ ikạr kụ emitenhaan Wallace r’aLaurinda dị okumuan ghan ephẹn Africa. Esi iraạr awiki, iyạl awe umhughanhaan ni bidị. Oniin aroph odẹ oniin aroph onhiin esi aḍuugh. Loor esi ezẹgh aKOVID-19 phọ, bidị u/tue mun uḅula epẹ olhoghotu phọ abidị oḅilhẹ ooḅughonhaan arughunotu phọ abidị. AWallace agẹ mọ: “Oḍuomolhoghi oḅetenhu esi aḍuugh phọ ulhoghonhaạn imhị ḍighaạgh ootughiạn ilọ abidị, ki/lọ ipẹ bidị orọl bọ siẹn eekunha asiḍughulotu phọ abidị, kuolọ ipẹ bidị kotọl bọ iḅẹl asiḍughulotu omhoom aḅirinhi phọ. Oḍuomolhoghi phọ ophọn phọ ruphoomhị ghan ni imhị mem dị e/ḅaạl olhoghi eḍigh ekpom amhị loor esi aḍuugh phọ abidị.”

13. Eeghe kụ edị yira koḍighi orue omhoọgh uwaloor iigbia phọ?

¹³ “Ke/ḍime niạn uwaloor iigbia phọ.” (1 Tẹs. 5:19) APọl asighẹ uwaloor iigbia phọ atomaạm niạn dị edi olhoghi aloor ayira. Uwaloor iigbia phọ Enhaạn raḍighi ghan idị yira komoọgh oophugh oḍighi ipẹ enhighẹ bọ ḅilhẹ r’inyaạm okumuan ongọ aZihova. (Rom. 12:11) Eeghe kụ edị yira koḍighi orue omhoọgh uwaloor iigbia phọ? Yira kotue ni olọm esi iiḅereghị, otuughạ Baibul phọ osighẹ bọ uwaloor iigbia phọ kụ ogeọm, oḅilhẹ okị ghisigh otọl siẹn ookpomhoghan phọ odị asighẹ bọ uwaloor iigbia phọ odị kụ raaḅakiọm. Iphẹn phọ kilhoghonhaạn iyira ḍighaạgh omhoọgh “iimuma uwaloor iigbia phọ.”—Gal. 5:22, 23.

14. Orue oghị aghisigh omhoọgh uwaloor iigbia phọ ewạ mọ oghel eeghe? (Miịn kẹn afoto phọ.)

¹⁴ Mem dị Enhaạn m’ungọ iyira uwaloor iigbia phọ, kewạ ni ogona aloor pidị yira ko/ḍime “niạn uwaloor iigbia phọ.” Enhaạn rangọ ghan uwaloor phọ odị we dị omhoọgh iitughiạn r’aroozọ dị eḅaạl. Odị ka/kiọm ghisigh ungọ ghan iyira uwaloor phọ odị eḍighi maạr lọ yira oghị ghisigh ootughiạn ghan oḅilhẹ oḍighi ghan ikarạph araraạr. (1 Tẹs. 4:7, 8) Orue oghị aghisigh omhoọgh ghan uwaloor iigbia phọ, kewạ mọ yira, ‘ku/pogh ghan imiịn usooromi.’ (1 Tẹs. 5:20) “Imiịn” phọ oghaạph bọ oghol siẹn phọ pọ adom mọ aZihova ungọ bọ iyira dị eego esi uwaloor iigbia phọ odị, kụ adom mọ eḅaramaạm iinhaghạn ilọ aḍio phọ aZihova, ḅilhẹ r’iphụr arurụ phọ mọ amem i/loonhaan mun aḅirinhi phọ ophọn phọ. Yira kuu/tughiạn r’amem r’amem mọ aḍio phọ aZihova ke/tu siẹn asiḍio phọ ayira. Kparipẹ ghụn, ogbor ghan ootughiạn ilọ aḍio phọ aḍiphẹ phọ—esi ophamhanhạm igey aroozọ kụ oḅilhẹ okuọm loor ayira iiḍighi “aruukuan” phọ.—2 Pit. 3:11, 12.

“IIḄEGHIỌN GHAN OOMO ARARAẠR EPHOGH”

15. Ika kụ edị yira kotue okel iikelheghian ikarạph aruwaloor phọ? (1 Tesalonikạ 5:21)

¹⁵ Moọny amem ghisigh, amulhọgh ḍien phọ Enhaạn kogbeelhom ni mọ: “Oomo ariisi mephooghị, ḅilẹ iiḅaghamị i/lo!” (1 Tẹs. 5:3) Ikarạph aruwaloor phọ kemiteom ni iinhaghạn dị i/tu inẹ siẹn ade phọ ookelheghi awe. (Ogan. 16:13, 14) Kokaạph ika ilọ ayira? Yira ko/meel oḍighanhaan eḍighi maạr dị yira ‘ooḅeghiọn ghan oomo araraạr ophogh.’ (Bạl 1 Tesalonikạ 5:21.) Ekpo onhụ aGrik phọ ogbạ bọ mọ ‘ooḅeghiọn ghan ophogh’ usighẹ ghan oḍighinhom mem dị ozuumaam ropogh ikpoki dị edighi igey r’idị i/ḍighi igey. Esi iduọn phọ, emoghi ni dị yira kooḅeghiọn ghan ipẹ yira onhaghạn bọ oḅilhẹ aạl omhiịn mughumọ igey ni. Ipẹ kụ edị ewạ mọ abuọ aTesalonikạ phọ oḍighi, kụ ekạr ikpaariọm iyira phọ odi bọ siḍio aruukunha phọ oḍighi ipẹ phọ obughẹ. Kparipẹ r’omheeraam ghan atorobọ iyaạr dị yira onhaghạn, yira kosighẹ ghan ipẹ yira onhaghạn bọ otomaạm ipẹ aBaibul phọ ḅilhẹ r’oḍighom mọ aZihova oghaạph aani ilọ ipẹ phọ. Yira oḍighi ghan iduọn phọ, yira ko/meel oḍighanhaan iikelheghian ikarạph aruwaloor phọ.—Prov. 14:15; 1 Tim. 4:1.

16. Eeghe oḍuom olhoghi kụ edị yira okuphom owol, kụ eeghe kụ edị kinyu iyira oḍighi?

¹⁶ Yira olegheri ni mọ awe phọ aZihova kokpetenhaan ni igbogh iiḅaghamhị phọ. Kuolọ, onyọ ayira dị alhegheri idị kemitenhaan nyodị ghisigh o/lho. (Jems. 4:14) Toroboiperolbọ, mughumọ yira ukpetenhaan igbogh iiḅaghamhị phọ obobọ yira umhugh kụ egbi oteẹny amem mọ amuphẹ phọ, yira komoọgh ni ghuḍum k’agee-pọ eḍighi iyaạr dị yira ophamhanhạm ni ḍimheerạ phọ ayira. Buphẹ osagharạn bọ uwaloor phọ kotọl r’aKraist epẹ k’akẹ. Abueriphọ iyool phọ kotọl siẹn ade phọ dọl aparadais. Oomo phọ ayira oghị ghisigh ogbon ookiạ oḍuom olhoghi phọ ayira kụ ogon ghan ḍio phọ aZihova!