EMHUOGHAẠPH ITUUGHẠ PHỌ 46
AḌUỌR PHỌ 49 Making Jehovah’s Heart Glad
Bumor—Nyinha Resianhaan Ni Oḍighi Abudị Rologhonhaạn Ghan Ḍighaạgh Ikumor Awe Phọ?
“Ibo k’Enaạn edianaan buphẹ rongọ bọ epu buphẹ roboọr bọ.”—IIḌ. 20:35.
EGBON
Ilọ okparamhị abumor dị moḍiiny muụm osianhaan oḍighi abudị rologhonhaạn ghan ḍighaạgh ikumor awe phọ.
1. APọl alhoghoma ika ilọ abuphẹ rologhonhaạn ghan bọ ḍighaạgh ikumor awe phọ?
ABUPHẸ rologhonhaạn ghan bọ ḍighaạgh ikumor awe phọ omoọgh ni ikpanhạ iiḍighi siẹn ookpomhoghan phọ. Otelhedom mọ aPọl amhaghamhị ni maạr bumor phọ abuẹn phọ. Esi omaạm, mem mọ odị agẹ bọ aghiọm Kristẹn aFilipai phọ, odị aghol li aḅilhẹ asẹph bidị ḅilhẹ r’ikumor awe phọ.—Fil. 1:1.
2. Itir ika umor phọ Luis mem mọ omạ bọ nyodị oḍighi oniin odị raloghonhaạn ghan ḍighaạgh ikumor awe phọ?
2 Iḍoọgh obobọ abudị asiạ meghị dị oḍighi bumor romoọgh ghan ni iboom ibo mem dị omạ bidị okumuan idiphọ abudị rologhonhaạn ghan ḍighaạgh ikumor awe phọ. Esi omaạm, aDevan amhạn 18 asiạ mem mọ omạ bọ nyodị. Ḍieriphọ aḍighaạgh phọ, umạ umor phọ Luis mem dị odị mapel li 50 asiạ. Odị aghaạph ni idị retọl ghan, kụ aḅẹm mọ, “eḍighi ni eboom eepoogh oḍighi aani oniin odị raloghonhaạn ghan ḍighaạgh ikumor awe phọ, ekạr ekpaariọm mem dị mị aatughiạn ephomhoghiạn phọ ookpomhoghan phọ muḍeenhaan bọ imhị!”
3. Eeghe asipuru kụ edị yira kooḅeghiọn?
3 Eḍighi maạr dị nạ aḍighi onyọ umor dị maḍiiny ni muụm kụ nạ k”oḍighi oniin odị raloghonhaạn ghan ḍighaạgh ikumor awe phọ, nyinhạ k”eḅeraạn oḍighi aani ḍughụm? Eeghe kụ kenyu bọ nyinhạ oḍighi aani oniin? ABaibul phọ akaạph eeghe araraạr dị nạ kaḍighi orue osianhaan? Siẹn emhuoghaạph phọ ephẹn phọ, yira kooḅeghiọn ophanyanhaạn asipuru phọ iphẹn phọ. Kuolọ ophụr ooḅeghiọn iiḍighi abuphẹ rologhonhaạn ghan bọ ḍighaạgh ikumor awe phọ.
IIḌIGHI ABUPHẸ ROLOGHONHAẠN GHAN BỌ ḌIGHAẠGH IKUMOR AWE PHỌ
4. Eeghe kụ iiḍighi abuphẹ rologhonhaạn ghan bọ ḍighaạgh ikumor awe phọ? (Miịn kẹn afoto phọ.)
4 Odị raloghonhaạn ghan ḍighaạgh ikumor awe phọ pọ onyọ umor dị maḍiiny muụm kụ uwaloor iigbia phọ amạ olhoghonhaạn aḍighaạgh ikumor awe phọ oḍighi ghan araraạr dị emhạn maạr siphẹ ookpomhoghan phọ. Abuniin opạm oḍighi omhiịn mọ abukaaphọm mọ omoọgh ni ekool arukumuan r’arinyạ omitenhom epẹ erugh phọ. Abunhọn rologhonhaạn ghan ḍighaạgh ogbuurogh r’ookoḍị aKindọm Họl phọ. Oḍighi abuniin ogbi ghan awe ḅilhẹ r’okpamhaghị ghan asimaịk r’ophegh ghan asividio mem ituughạ. Iniin iiḍighi phọ abidị rosighẹ ghan ni riḍien komhiinhọm. Ekpanhạ iyaạr phọ pọ, bidị oḍighi we dị ophomhoghiạn aZihova ḅilhẹ rodạph ghan siigbu elhiom eḍighinhom iyaạr phọ odị. Bidị oḅilhẹ kẹn opomhoghiạn bumor r’abumaranhi phọ agey. (Mat. 22:37-39) Ika kụ idị onyọ umor dị maḍiiny muụm kasianhaan bọ oḍighi aani oniin odị raloghonhaạn ghan ḍighaạgh ikumor awe phọ?
Abuphẹ rologhonhaạn ghan bọ ḍighaạgh ikumor awe phọ rotuughaạny ghan Zizọs esi omiteom ghan aloor okumu ongọ abunhọn (Miịn ekpịgh phọ 4)
5. Eeghe kụ edị onyọ umor dị rawạ oḍighi aani oniin odị raloghonhaạn ghan ḍighaạgh ikumor awe phọ kaḍighi?
5 ABaibul phọ amaaghị ni raraạr dị kopogh kụ ogbi omạ onyọ umor oḍighi aani oniin odị raloghonhaạn ghan ḍighaạgh ikumor awe phọ. (1 Tim. 3:8-10, 12, 13) Kotue ni omạ aani nyinhạ oḍighi aani oniin odị raloghonhaạn ghan ḍighaạgh ikumor awe phọ eḍighi maạr dị nạ atuughạ kụ aḅilhẹ adaphạn raraạr phọ aBaibul phọ amạ bọ. Kuolọ, ekpẹ ni dị nạ kamiigha loor aatughiạn iyaạr phọ renyu bọ nyinhạ oḍighi aani oniin odị raloghonhaạn ghan ḍighaạgh ikumor awe phọ.
EEGHE KỤ RENYU BỌ NYINHẠ OḌIGHI AANI ONIIN ODỊ RALOGHONHAẠN GHAN ḌIGHAẠGH IKUMOR AWE PHỌ?
6. Eeghe kụ enyu nyinhạ okumu ongọ abumor r’abumaranhi phọ? (Matiu 20:28; miịn kẹn opoḍi phọ.)
6 Tuutughiạn egbogh eḍeenhaan phọ ayira, Zizọs—ephomhoghiạn Odẹ phọ odị r’awe kụ inyu ghan nyodị oḍighi araraạr. Ephomhoghiạn phọ epẹ phọ kụ inyu ghan nyodị olhọgh inyaạm okumuan r’oḍighinhaan awe raraạr ghalhamọ r’idị eghom ni. (Bạl Matiu 20:28; Jọn 13:5, 14, 15) Eḍighi maạr dị ephomhoghiạn kụ renyu nyinhạ, pọ aZihova kalhoghonhaạn ni nyinhạ ḍighaạgh osianhaan oḍighi aani oniin odị raloghonhaạn ghan ḍighaạgh ikumor awe phọ.—1 Kọr. 16:14; 1 Pit. 5:5.
AZizọs aḍighi ni aḍeenhaan butelhedom mọ odị ilọ okumu ghan ongọ abunhọn kparipẹ r’owạ igbogh asidọl r’egbogh esi (Miịn ekpịgh phọ 6)
7. Eeghe kụ iḍighi kụ onyọ umor kakel bọ eegharạ olhoghoma idị odị amhạn?
7 Epẹ aḅirinhi phọ, awe roobagaam ghan we dị roḍeenhaan ghan ilọ bidị omhạn. Iphẹn phọ i/lo aani siẹn ookpomhoghan phọ aZihova. Onyọ umor dị aphomhoghiạn bunhọn idiphọ aZizọs, ka/miịn loor odị mudị odị kụ amhạn maạr apu bunhọn bịn awạ ghan oponomaam abunhọn. Oye dị alhoghoma idị odị amhạn kụ omạ oḍighi aani oniin odị raloghonhaạn ghan ḍighaạgh ikumor awe phọ, eeni ka/meera oḍighi iniin iiḍighi dị emhoghi osooromhi aloor orue ophogh iyool phọ aZihova omhạn bọ ni maạr. Eeni odị kaloghoma mọ odị apel oḍighi phọ. (Jọn 10:12) AZihova ka/sẹph ikuph oye dị alhoghoma loor obobọ raloghoma ghan mọ odị amạn maạr apu bunhọn.—1 Kọr. 10:24, 33; 13:4, 5.
8. AZizọs angọ eeghe oromha bumatuạn phọ odị?
8 Ghalhamọ arighirị aZizọs bịn uwạ ghan ni omhoọgh aroopoogh, kuolo ephigh phọ bidị otụ bọ owạ ghan roopoogh phọ, i/kpeanhaạn. Ooḅeghiọn idị iyạl abumatuạn aZizọs, Jems r’aJọn oḍighi. Bidị uḅenhị Zizọs ongọ abidị igbogh asidọl siphẹ Omhạr phọ odị. AZizọs o/mheeraam oḍighi iphẹn bidị olhọm bọ. Kparipẹ ghụn, odị aagholhomhi aḅenhị oomo 12 abumatuạn phọ odị mọ: “olọ rawạ oḍighi ogbogh, pọ kaḍighi oye dị kakumu ghan angọ buerị phọ, kụ olọ rawạ oḍighi oḍiemiom, pọ odị kaḍighi eekuna ebenẹ.” (Mạk 10:35-37, 43, 44) Abumor dị rosianhaan ghan roopoogh arukumuan loor aḍiḅeraạn okumu ongọ abunhọn, roḍighi ghan ḍisẹph kongọ ookpomhoghan phọ.—1 Tẹs. 2:8.
EEGHE KỤ KELHOGHONHAẠN NYINHẠ ḌIGHAẠGH OMHOỌGH EEPHUẠ OKUMU ONGỌ ABUMOR PHỌ?
9. Nạ kabughẹ ika eephuạ phọ anạ orue osianhaan?
9 Dị iikia i/lo, nạ apomoghiạn ni aZihova kụ rawa kẹn okumu ongọ abunhọn. Ghalhamọ r’iduọn phọ ni, eeni nạ o/mhoọgh eephuạ okumuan idiphọ odị raloghonhaạn ghan ḍighaạgh ikumor awe phọ. Nạ kabughẹ ika eephuạ phọ anạ? Tuutughiạn ilọ ibo phọ reḍuạ ghan bọ kemite mem dị nạ akumu angọ bunhọn. AZizọs aḅẹm mọ: “Ibo k’Enaạn edianaan buphẹ rongọ bọ epu buphẹ roboọr bọ.” (Iiḍ. 20:35) AZizọs r’aloor bịn aḍighi ni iphẹn odị aghaạph bọ. Odị amhoọgh ni ibo esi okumu ghan ongọ abunhọn, nạ kẹn kamoọgh aani ni.
10. Ika kụ idị aZizọs aḍeenhaan mọ odị amhoọgh ghan ni iboom ibo okumu ongọ abunhọn? (Mạk 6:31-34)
10 Ooḅeghiọn eḍeenhaan dị emạ emiteom mọ aZizọs amhoọgh ghan ni ibo okumu ongọ abunhọn. (Bạl Mạk 6:31-34.) Eniin amem, dị aZizọs r’abutelhedom mọ odị mokumuan ephẹr. Bidị uḅẹm ni mọ bunọ kokị ekpisi dị ephọ opooghian aani. Kuolọ aḍita awe ukem ni osoph bidị osoor osi ekpisi phọ bidị rokị bọ, owa ghan dị aZizọs katughemhị bidị. Odị mutue ni aḅẹm mo eeye, loor esi dị odị r’abutelhedom mọ odị “u/moọgh r’eepoogh ole eḍien.” Obobọ aZizọs mutue ni bịn atughemhị bidị iyạl ikpo araraạr bịn aḅenhị bidị mogheel. Kuolọ loor esi ephomhoghiạn phọ odị amhoọgh bọ esi abidị, odị “amiigh otughemị abidị iminighạn araraạr.” Kụ odị atughemhị bidị tutụ k’amem dị “adulhe retu.” (Mạk 6:35) U/kpaariọm nyodị oḍighi iduọn phọ, kuolọ odị aḍighi iduọn phọ loor esi dị “odị amoọgh igbiririph abidị.” Odị awạ otughemhị abidị loor esi dị odị aphomhoghiạn bidị. Okumu ghan ongọ abunhọn ingọ ghan Zizọs iboom ibo.
11. Ika kụ idị aZizọs alhoghonhaạn ghan ḍighaạgh buphẹ odị atughemhị bọ? (Miịn kẹn afoto phọ.)
11 Mem mọ aZizọs atughemhị bọ ḍita phọ, odị o/tughemhị bịn owilhẹ pạ. Odị amhaạr ri aphogh bidị, kụ amiteom eḍien eten iiḍaạny kụ aḅenhị mọ abutelhedom mọ odiighi olheenye. (Mạk 6:41) Odị asighẹ eten phọ ephẹn phọ kụ atughemhiọm butelhedom mọ odị okumu ghan ongọ abunhọn. Odị aḅilhẹ kẹn aḍeenhaan bidị mọ odọ iiḍighi phọ iphẹn phọ, eghịgh bọ iiḍighi abuphẹ rologhonhaạn ghan bọ ḍighaạgh ikumor awe phọ, emạn ni maạr. Gbiom olhoghi odọ ibo dị abutelhedom mọ omhoọgh oḍighan r’aZizọs odi eḍien iiḍaạny phọ ephẹn phọ dị tutụ “oomo phọ abidị ole epherọgh”! (Mạk 6:42) Ephẹn bịn kụ ka/mem dị aZizọs asighẹ imạ ilọ abunhọn kụ aḍiemhiom. Odị asighẹ oomo adọl aghuḍum mọ odị siẹn ade phọ akumu ghan angọ bunhọn. (Mat. 4:23; 8:16) Odị amhoọgh ghan ibọ r’ogbaanyạn otughemhị ghan ḅilhẹ r’osooromhi aloor oḍighinhaan ghan abunhọn raraạr. Dị iikia i/lo, nạ kamoọgh aani ni ibo, iduọn r’ophooph olhoghi nạ rasianhaan bọ oḍighi aani odị raloghonhaạn ghan ḍighaạgh ikumor awe phọ.
Ephomhoghiạn aZihova r’eephuạ okumu ongọ abunhọn kenyu nyinhạ okumuan isiphẹ ookpomhoghan phọ torobọ eten dị nạ katue (Miịn ekpịgh phọ 11)a
12. Uḍighi ika kụ i/wạ bọ mọ tuutughiạn ghan mọ nạ o/mhoọgh sighalhanyạ dị ookpomhoghan phọ omhoghi?
12 Eḍighi maạr dị nạ alhoghoma mọ nạ o/mhoọgh ḍighalhanyạ dị egbatanhaạn, ka/ḅonyonhu azuan. Dị iikia i/lo, nạ amoọgh ni imạ araagharạ dị ookpomhoghan phọ omhoghi. Nạ kamooghọm ni suọ eḍighi maạr dị nạ aaḅereghị kụ aạl ipẹ aPọl agẹ bọ siphẹ 1 Korịnt 12:12-30. Siphẹ phọ, aPọl akaạph ni aagholhomhi mọ idiphọ atorobọ ebenhẹ aZihova, nạ amoọgh ni oḍighi dị amhạn maạr siẹn ookpomhoghan phọ aZihova. Eḍighi maạr dị nạ ko/sianhaan iniin araraạr dị emhoghi orue oḍighi odị raloghonhaạn ghan ḍighaạgh ikumor awe phọ, pọ ka/ḅonyonhu azuan. Kparipẹ ghụn, ḍighi oomo ilọ nạ katue orue okumu aZihova ḅilhẹ r’olhoghonhaạn aḍighaạgh bumor phọ anạ. Kuphom ni owol mọ ikumor awe ookpomhoghan phọ anạ romiịn ni imạ iiḍighi phọ anạ, kụ kongọ ni nyinhạ oḍighi dị nạ katue aḍighi.—Rom. 12:4-8.
13. Eeghe iyaạr kụ imheerạ ilọ araraạr phọ rowạ ghan bọ ḍighaạgh awe phọ romạ ghan bọ ophạm iiḍighi?
13 Ooḅeghiọn enhọn ephigh phọ ekpeanhaạn bọ dị nạ kasianhaan idiphọ oniin odị raloghonhaạn ghan ḍighaạgh ikumor awe phọ: Ibadị araraạr phọ ewạ bọ ḍighaạgh oye dị masianhaan, eḍighi ni raagharạ dị torobọ onyọ aKristẹn amhoghi ni omhoọgh. Okạr oghaạph, ekpẹ ni dị torobọ onyọ aKristẹn kaḍuraan atuman aZihova, amoọgh aani ghan ibo phọ reḍuạ ghan bọ keru esi ongọ aani ghan abunhọn ḅilhẹ r’orọl ghan eten dị ekpeanhaạn onyọ aKristẹn. Okạr eeghe iyaạr kụ edị onyọ umor kaḍighi orue osianhaan?
IPẸ NẠ KATUE BỌ ASIANHAAN
14. Remạ ghan eeghe oḍighi oye dị ‘amhaạr erolọm’? (1 Timoti 3:8-10, 12)
14 Ooḅeghiọn iniin araagharạ dị oghaạph oghol siphẹ 1 Timoti 3:8-10, 12. (Bạl.) Oye dị komạ malhoghonhaạn ghan ḍighaạgh ikumor awe phọ ‘kamaạr erolọm.’ Iphẹn phọ remạ ghan mọ odị kaḍighi oye dị “akpẹ ni olhọgh eegu,” ḅilhẹ “aghuan.” Iphẹn phọ re/mạ ghan mọ odị ka/milọgh ghan reẹgh obobọ ka/ḅo ghan ilọ areẹgh. (Eccl. 3:1, 4) Toroboiperolbọ, odị kamaạr apogh iiḍighi phọ ongọ bọ nyodị. Nạ aḍighi oye dị awe kotue ni obeḍenhọm, pọ ookpomhoghan phọ kolhọgh ni nyinhạ eegu.
15. Remạ ghan eeghe oḍighi oye dị ka/moọgh iyạl asinem obobọ ekpooko?
15 “Ku/moọgh iyạl asinem.” Iphẹn phọ remạ ghan mọ odị kaḍighi oye dị ragbạ ghan igey ḅilhẹ akpẹ oḍumolhoghi. Ilọ nạ aghaạph nạ kaḍighi ghan, kụ nạ kaa/keleghi ghan bunhọn. (Prov. 3:32) ‘Ku/ḍighi oye ekpooko.’ Iduọn phọ pọ nạ kagbạ ghan igey mem dị nạ ramuul ḍighi r’abunhọn ḅilhẹ r’amem dị nạ aphạm ikpoki. Ka/sighẹ eepoogh imạ asiya phọ nạ amhoọgh bọ r’abumor r’abumaranhi phọ agboom ikpoki ḍighaạgh abidị, kụ kaa/gbegheḍiom bidị.
16. (a) Remạ ghan eeghe mem dị oḅẹm mọ ‘miim ka/pughọI ghan iboom’? (b) Remạ ghan eeghe omhoọgh ‘ooruẹn olhoghi dị aḅaạl’?
16 “Miim ku/pughọI ghan iboom.” Iphẹn phọ remạ ghan mọ ku/lhegheriom nyinhạ idiphọ ogbogh opughọl miim. Moọgh ‘ooruẹn olhoghi dị aḅaạl.’ Iphẹn phọ remạ ghan mọ nạ kaḍighi oye dị radạph siigbu phọ aZihova. Ii, ghalhamọ r’iduọn yira u/munughan bọ, nạ katue ni akelhọm eephọ phọ reḍuạ ghan bọ keru esi omhoọgh igey asiya r’aZihova.
17. Ika kụ idị onyọ umor kaḍeenhaan mọ odị akpẹ ni obeḍenhọm mem dị rooḅeghiọn nyodị kophogh? (1 Timoti 3:10; miịn kẹn afoto phọ.)
17 “lpụr ghan eeḅeghiọn aani bidị ephogh.” Iphẹn phọ remạ ghan mọ ikumor awe phọ kophogh ghan ni nyinhạ mughumọ nạ katue ni apạm iiḍighi dị ongọ nyinhạ. Esi iduọn phọ, mem dị ikumor awe phọ ongọ nyinhạ oḍighi, maạr adaphạn ghan iiḅakiọm mọ ookpomhoghan phọ ongọ bọ ilọ oḍighi phọ. Miịn ni mọ nạ anaghanhạn ni oḍighi phọ ḅilhẹ r’eten phọ nạ kaḍighi bọ aḅilhẹ amạn. Mem dị nạ alhọgh inyaạm aḍighi akuamhị, abunhọn siphẹ ookpomhoghan phọ komiịn ni oḅilhẹ osereghiạn ḍiphoph phọ anạ. Ikumor awe, imiịn ni mọ nyinha enuụn ghan ni etughemhị bumor dị moḍiiny muụm. (Bạl 1 Timoti 3:10.) Abumor dị moḍiiny muụm dị odi 10 kụ esi 14 asiạ obobọ asiạ phọ esoorom epu pạ, odi ni siphẹ ookpomhoghan phọ anyinha ḍughụm? Bidị omoọgh ni eegharạ ophạm ghan ituughạ aBaibul ogina abidị ḍughụm? Rogbor ghan ni kophagharanhaạn ḍipuru mem ituughạ? Rogbor ghan ni komite epẹ erugh phọ ḍughụm? Eḍighi idiphọ, pọ ingọ bidị iiḍighi dị ekasiạn r’asiạ phọ ḅilhẹ r’asidọl phọ abidị. Nyinha eḍighi ghan iduọn phọ, pọ nyinha reeḅeghiọn ghan iḍoọgh abumor phọ abuẹn phọ kephogh. Kụ tutụ bidị romạn 17 asiạ obobọ 19 asiạ, bịn kosianhaan ni oḍighi aani abudị rologhonhaạn ghan ḍighaạgh ikumor awe phọ.
Ikumor awe phọ kotue ni ooḅeghiọn opogh bumor dị moḍiiny muụm esi ongọ ghan abidị iiḍighi (Miịn ekpịgh phọ 17)
18. Remạ ghan eeghe oḍuạ ‘esi iigholhogh’?
18 ‘Ḍuạ esi iigholhogh.’ Iphẹn phọ remạ ghan mọ nạ ka/ḍighi yogh ghan raraạr dị koogholhogh ghan nyinhạ oomo amem. Ii awe otue ni ogbaaghiọm onyọ aKristẹn. Zizọs bịn ugbaaghiọm ni. Odị aḅenhị ni budaphạm mọ odị mọ bidị kosoman aani ni iphẹn phọ. (Jọn 15:20) Toroboiperolbọ, eḍighi maạr dị nạ aphamhanhạm ni roozọ dị eḅaạl idiphọ aZizọs, pọ nạ kamoọgh ni ḍigey aḍien siẹn ookpomhoghan phọ.—Mat. 11:19.
19. Remạ ghan eeghe ophin oniin anhịr?
19 “Aphin oniin anịr bịn.” Eḍighi maạr dị nạ maphin anhịr, pọ nạ kapamanhạm siigbu phọ aZihova ilọ apinien—iduọn phọ pọ oye phọ kapin oniin anhịr bịn. (Mat. 19:3-9) R’amem r’amem onyọ aKristẹn ku/le emhạ. (Hib. 13:4) Kuolọ i/mineen siphẹ bịn. Nạ amoọgh oḅạr anhịr phọ anạ. Nạ ka/pogh ghan bunhọn anmariịr eten dị i/kpeanhaạn.—Job 31:1.
20. Eghẹn eten kụ edị uw-emhụ eghunotu kamaạr apạm otọ odị?
20 “Amaạr aphạm nmụny odị r’otọ odị.” Eḍighi maạr dị nạ aḍighi uw-emhụ eghunotu, pọ nạ kamaghamhị maạr iiḍighi eghunotu phọ anạ. Gbor ghan aphạm iiseeny eghunotu. Agbor ghan arelhean ghan torobọ onyọ eghunotu anạ epẹ erugh phọ. Loghonhaạn ḍighaạgh ibạm anmụny phọ anạ omhoọgh asiya dị ekpạr r’aZihova. (Efẹ. 6:4) Oye dị amhaạr rapogh eghunotu odị raḍeenhaan ghan mọ odị katue ni apogh ookpomhoghan phọ.—Poghom 1 Timoti 3:5.
21. Eḍighi maạr dị k”omạ nyinhạ idiphọ oniin odị raloghonhaạn ghan ḍighaạgh ikumor awe phọ, pọ ewạ mọ ḍighi eeghe?
21 Eḍighi maạr dị nạ k”omhiigh rakumuan idiphọ oniin odị raloghonhaạn ḍighaạgh ikumor awe phọ, pọ seseeny ni, r’iiḅereghị ḅilhẹ ni akiririom aphogh emhuoghaạph phọ ephẹn phọ. Kuamhị atuughạ raraạr phọ ropogh ghan bọ kụ ogbi omạ oye oḍighi aani oniin odị raloghonhaạn ḍighaạgh ikumor awe phọ, kụ akparaghạ omhoọgh araagharạ phọ ipẹ phọ. Pogh mughumọ ephomhoghiạn phọ nạ amhoọgh bọ aghị esi aZihova r’abumor r’abumaranhi phọ ebụgh ni. Bughẹ eephuạ phọ anạ okumu ongọ abidị. (1 Pit. 4:8, 10) Moọgh ibo phọ reḍuạ ghan bọ keru esi okumu ongọ abumor r’abumaranhi phọ. Eḍighi edị aZihova kasẹph ikuph phọ anạ iduọn nạ rasianhaan bọ oḍighi aani oniin odị raloghonhaạn ghan ḍighaạgh ikumor awe phọ!—Fil. 2:13.
AḌUỌR PHỌ 17 “I Want To”
a ILỌ AFOTO Oḅẹl: Ḍighaạgh ekeeny, r’osooromhi aloor aZizọs rakumu ghan kongọ bumatuạn phọ odị; kụ ḍighaạgh elhiom, oniin odị raloghonhaạn ghan ḍighaạgh ikumor awe phọ raloghonhaạn ghan ḍighaạgh onyọ umor dị asiạ meghị siphẹ ookpomhoghan phọ.