ESI ITUUGHẠ PHỌ 59
Nạ Katue Ni Akparaghạm Igbiphoghọm
Moọny amem, oomo aKristẹn kosoman ni isophoghom, eeni r’igbiphoghọm kẹn. Iphẹn phọ kiikperemhi ni iyira ḍughụm?
1. Uḍighi ika kụ i/ḍighi bọ iikia esi ayira mọ yira kosoman ni igbiphoghọm?
ABaibul phọ aḅẹm ni mọ: “Kogbiphoghọm ni oomo awe Iọ owạ oḅophoghạn r’aJizọs Kraist orọI adọI aruukuan.” (2 Timoti 3:12) Ugbiphoghọm ni Zizọs loor esi dị odị o/ḍighom pakirị aḅirinhi phọ aSetan. Yira kẹn u/ḍighom aani pakirị aḅirinhi phọ, esi iduọn phọ, re/ḍighi ghan iikia esi ayira mem dị itooghị aḅirinhi phọ r’arookpomhoghan aruukụ iiḅereghị okpẹ rugbiphoghọm iyira.—Jọn 15:18, 19.
2. Ika kụ idị yira kookolhobian okori igbiphoghọm?
Ewạ mọ okparamhị oḍuomolhoghi phọ ayira esi aZihova nyiidiphọ. Wạ ghan mem torobọ aḍio aḅaanhaạn nyodị esi iiḅereghị kụ aḅilhẹ aạl Ekpo-onhụ phọ odị. Gbor ghan aghị ituughạ. Araraạr phọ iphẹn phọ kengọ nyinhạ inyaạm okaran igbiphoghọm, ghalhamọ iḍuạ ni esi eghunotu anạ kụ eru. Otelhedom mọ Pọl, opọ ogbor ghan bọ ogbiphoghọm agẹ mọ: “[AZihova] kụ ruloghonaạn ghan imị ḍighaạgh. Mị ka/kiilaan.”—Hibru 13:6.
Yira kotue ni obughẹ akpọ-oḅio phọ ayira esi ogbor ghan oḍighi oḍighi oghaạph ilọ omhạr phọ. Mem dị yira rokaạph ilọ omhạr phọ, yira rotuughạ ghan ilọ oḍuom olhoghi aZihova kụ okpạr opu oghiilhaan awe. (Proverbs 29:25) Nạ amhoọgh akpọ-oḅio omite oghaạph ghan ilọ omhạr phọ nyiidiphọ, kekparamhị ni nyinhạ oghiọm aghisigh oghaạph ghan iiḅi iinhaghạn phọ ghalhamọ abuọ itooghị phọ usophoghom ni oḍighi phọ ayira.—1 Tesalonikạ 2:2.
3. Ika kụ idị okparạm igbiphoghọm ringọ ghan iyira suọ?
Okạr oghaạph, re/dụgh ghan mem dị rugbiphoghọm iyira, kuolọ mem dị yira okparaghạm igbiphoghọm, omheeraam ayira rakpạr ghan ni. Yira roḍuraan ghan kẹn kotuman aZihova loor esi dị yira romiịn ghan olhoghonhaạn aḍighaạgh odị mem dị eghịgh mudị inyaạm iyira i/lho mun. (Ibạl Jems 1:2-4.) Repin ghan ni esi aZihova omhiịn dị yira romiinhọm, kuolọ olhoghi odị raḅaạl ghan ni mem dị yira okparạm. ABaibul phọ aḅẹm ni mọ: ‘Enaạn kingọ ghụn ni inyina ḍisẹph, eḍighi iyaạr dị nyina i/piomạn kụ rekparạm ni iminhimhiịn phọ.’ (1 Pita 2:20) AZihova kasephọm ni ghuḍum k’agee-pọ buphẹ okparạm bọ osi epẹ eekunha phọ, aḅirinhi dị isophoghom ke/tọl mun.—Matiu 24:13.
OLHEGHERI OBUGHẸ
Otuughạ olhegheri iyaạr phọ eḍighi bọ kụ yira kotue bọ ni oḅạr aZihova etigheri isophoghom ḅilhẹ r’aḍisẹph dị keḍuạ emite.
4. Nạ katue ni akparạm isophoghom eghunotu
AZizọs akạr ri aghaạph amiteom mọ abuniin abuọ eghunotu ayira ko/meera mọ yira okumu aZihova. Ibạl Matiu 10:34-36, kụ eeḅeghiọn ḍipuru phọ aḍiẹn:
Eeghe kụ ketue emitenhaan oye dị asopha okumu aZihova siphẹ eghunotu phọ odị?
Omhiịn eniin eḍeenhaan, Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Nạ kaḍighi eeghe eḍighi maạr dị asiya obobọ oyaghirị anạ akikima nyinhạ okumu aZihova?
Ibạl Psalm 27:10 r’aMạk 10:29, 30. Mem dị nyinha aạl eniin esi aBaibul, iiḅeghiọn ghan ḍipuru phọ aḍiẹn:
Oguanhaan phọ ophọn phọ kalhoghonhaạn nyinhạ ḍighaạgh ika mem dị abuọ eghunotu anạ obobọ arighirị anạ rosophoghom nyinhạ?
5. Kiọm ni ghisigh aaseeny ghan aZihova etigheri igbiphoghọm
Rewạ ghan ni akpọ-oḅio orue okumu aZihova mem dị abunhọn rokparaghạ osophoghom ayira. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Ika kụ idị areḍeenhaan awe phọ edi bọ siphẹ avidio phọ ekparamhị nyinhạ?
Ibạl Iiḍighi 5:27-29 r’aHibru 10:24, 25. Mem dị nyinha aạl eniin esi aBaibul, iiḅeghiọn ghan ḍipuru phọ aḍiẹn:
Eeghe kụ iḍighi kụ emạn bọ ni maạr oghiọm aghisigh okumu aZihova ghalhamọ abuọ itooghị phọ usophoghom ni iiseeny r’arukumuan phọ ayira?
6. AZihova kalhoghonhaạn ni nyinhạ ḍighaạgh okparạm
Abugbaanhaạn aZihova dị asiạ r’asidọl phọ egbaranhaạn okiọm ni ghisigh rokumu aZihova ghalhamọ r’amem dị rogbiphoghọm ni bidị. Omhiịn iyaạr phọ elhoghonhaạn bọ bidị ḍighaạgh, ipegh VIDIO phọ. Kụ eeḅeghiọn ḍipuru phọ edaphạn bọ siẹn.
Eeghe kụ ilhoghonhaạn bọ ḍighaạgh Bugbaanhaạn phọ siphẹ avidio phọ okparạm?
Ibạl Rom 8:35, 37-39 r’aFilipai 4:13. Mem dị nyinha aạl eniin esi aBaibul, iiḅeghiọn ghan ḍipuru phọ aḍiẹn:
Ika kụ idị esi aBaibul phọ ephẹn phọ ekparamhị nyinhạ mọ nạ katue ni akparaghạm torobọ odẹgh ophogh?
Ibạl Matiu 5:10-12, kụ eeḅeghiọn ḍipuru phọ aḍiẹn:
Uḍighi ika kụ nạ kamoọgh bọ ni ibo ghalhamọ rogbiphoghọm ni nyinhạ?
Irubal Abugbaanhaạn aZihova mokparaghạm ni igbiphoghọm. Nạ katue ni aḍighi aani iduọn phọ!
ABUNIIN AWE OOTUGHIẠN MỌ: “Bidị ko/tue okparạm igbiphoghọm.”
Eghẹn esi aBaibul kụ ketue engọ bidị oḍuomolhoghi orue okparạm?
OGHAẠPH OOKARAGH
AZihova asereghiạn ni ikuph phọ yira rolọgh ghan bọ okumu odị etigheri igbiphoghọm. R’olhoghonhaạn aḍighaạgh odị, yira kotue ni okparạm osi eekunha phọ!
Ooḅula
Idiphọ aKristẹn, uḍighi ika kụ i/ḍighi bọ iikia esi ayira mọ awe kugbiphoghọm ni iyira?
Nạ kaḍighi eeghe ookolhobian okori amem igbiphoghọm?
Eeghe kụ ketue engọ nyinhạ akpọ oḅio mọ nạ katue ni akumu aZihova etigheri odẹgh ophogh?
WAAGHỊ AMHIỊN
Miịn idị oḍoọgh onyọ umor aghaạph idị aZihova alhoghonhaạn nyodị ḍighaạgh mem dị oghol dọl asạm mọ odị olhọgh nyodị ikoli.
Miịn iyaạr dị elhoghonhaạn ḍighaạgh oniin olom r’anhịr okumu aZihova esi ibadị asiạ eeḍiạn igbiphoghọm.
Miịn idị nạ katue akaran igbiphoghọm r’akpọ-oḅio.
“Kookolobian Nyiidiphọ Osoman Igbiphoghọm” (Otu Okoriom, July 2019)
Yira omhiịn ika isophoghom dị eḍuạ siphẹ eghunotu phọ ayira kụ eru, kụ ika kụ idị yira kotue opamhanhạm eephọ siphẹ eghunotu phọ ayira kụ oḅilhẹ oḅạr aZihova?
“Igey Phọ Re/seere Ghan Eephọ, Reler Ghan Ghụn Eghạm” (The Watchtower, October 2017)