AZihova Rapogh Ni We Phọ Odị

1. Eeghe kụ iḍighi kụ aZizọs alhọm bọ aZihova m’aphogh budaphạm mọ odị?

ḌUGHUL phọ aḍiphẹ eḅaạl kokiigh bọ nyodị, aZizọs alhọm ni ilọm dị egbatanhaạn Odẹ k’akẹ phọ odị. Odị alhọm aZihova m’aphogh ni budaphạm mọ odị. (Jọn 17:15, 20) Ii, kekulha aZihova k”owilhẹ ghan ophogh r’oghoph awe phọ odị. Kuolọ, aZizọs alhegheri ni mọ abudaphạm mọ odị kosoman ni igbagarạ isophoghom ḍighaạgh aSetan. AZizọs alhegheri kẹn mọ bidị omoghi ni olhoghonhaạn aḍighaạgh aZihova orue okpạr opu izuoghom Eru phọ.

2. Odaphạn Psalm 33:18-20, uḍighi ika kụ i/wạ bọ mọ oghiilhaan iiḅaghamhị?

² Aḅirinhi phọ aSetan rakọm ni iboom iiḅaghamhị kangọ bugey aKristẹn rodon. Yira osoman ni iiḅaghamhị dị ketue ni iḅonyon iyira eḅilhẹ edẹgh epogh dọl oḅạr phọ ayira r’aZihova. Kuolọ yira komiịn ni siẹn emhuoghaạph phọ ephẹn phọ, mọ yira u/moọgh iyaạr otuạn oghiilhaan. Ariḍien aZihova egbi ni oomo ayira—odị amiịn ni ipaanhaạn phọ yira osoman bọ, kụ anyạ ni oomo amem obakị ayira pidị yira orue okaran. Ooḅeghiọn ilọ iyạl awe aBaibul dị eḍeenhaan mọ “aZihova agbi ni riḍien odị buphẹ rokiilhaan bọ nyodị.”—Bạl Psalm 33:18-20.

MEM DỊ YIRA OLHOGHOMA IGINI

3. Pụr amem kụ edị yira kotue ologhoma igini?

³ Ii yira oḍighom aani pakirị eboom eghunotu abumor r’abumaranhi, kuolọ eeni amem yira rologhoma ghan ni igini. Esi omaạm, onyọ iḍoọgh atue ni aloghoma mọ ogina odị bịn odi mem dị amheerạ igbo abuọ askul abidị rakaạph ilọ omheeraam mọ odị, ḅilhẹ r’amem dị odị aḍuạ aghị omhoom ookpomhoghan. Abuniin ayira otue ni ologhoma beeph olhoghi obobọ oḅonyonhu ozuan, kụ ootughiạn ghan mọ ogina abunọ kotue ni okaran iphẹn phọ. Eeni yira otue ni obilhẹ oghaạph oḅenhị aani abunhọn ipẹ yira olhoghoma bọ, kụ ootughiạn ghan mọ bidị ko/naghanhạn. Kụ eeni amem kẹn, yira kookia ni mughumọ oye akạr ri amoọgh ogbolhomaam ayira. Olhoghoma igini ketue ni ekọm idị yira kologhoma mọ oye olhoghonhaạn ayira ḍighaạgh o/lho, yira oḅilhẹ omoọgh ooḅaghamhiạn aloor. AZihova o/wạ rowạ dị yira kologhoma eten phọ epẹ phọ. Uḍighi ika kụ yira oḅẹm bọ iduọn phọ?

4. Uḍighi ika kụ oyil phọ Ilaija aḅẹm bọ mọ: “Mị bịn kụ ogina oye dị asugha”?

⁴ Ooḅeghiọn eḍeenhaan phọ Ilaija akpẹ bọ oḍuomolhoghi. Odị aghiil li asuma esi 40 aḍughulotu loor iduọn aJezebel aghunyan bọ oghiigh odị. (1 Ki. 19:1-9) Epẹ eekunha phọ, odị arọl epogh aḍiighi kụ amhoghi aḅenhị aZihova mọ: “Mị bịn kụ ogina [oyil] dị asugha.” (1 Ki. 19:10) Abunhọn ariil usugha ni; Obadiah makparaghạ apẹl 100 ariil asighẹ esi aJezebel awạ bọ ozẹ abidị. (1 Ki. 18:7, 13) Eeghe kụ iḍighi kụ Ilaija alhoghoma bọ m’onọ bịn kụ asugha? Odị agbi ghan mọ oomo ariil phọ Obadiah aphẹl bọ momhuughu ḍughụm? Odị alhoghoma igini loor iduọn abunhọn u/meera bo u/kumu aZihova ghalhamọ r’iduọn aZihova akpạr bọ ni apu Baal siphẹ Eeḅarạph phọ aCarmel ḍughụm? Eḍighi edị odị alhoghoma mọ oye o/lhegheri odọ ooto r’osooromineen dị odị asoman, ḅilhẹ mọ oye o/mhoọgh ogbolhomaam odị ḍughụm? ABaibul phọ o/ghaạph kanhị-kalhe ilọ ipẹ odị atụ bọ alhoghoma iduọn phọ. Kuolọ iyaạr dị yira okuphom owol pọ, aZihova anhaghanhạn ni ephigh phọ aḅilhẹ alhegheri ipẹ odị kaloghonhaạn bọ nyodị ḍighaạgh.

5. Ika kụ idị aZihova angọ Ilaija okuphom owol mọ ogina odị bịn o/lho?

⁵ AZihova alhoghonhaạn ni ḍighaạgh Ilaija reten kirokirọ. Odị aḍighi ni idị Ilaija kakaạph ipẹ odị alhoghoma bọ. Odị apuru ni Ilaija iyạl amem mọ: “Nạ raḍighi ghan siẹn phọ eeghe?” (1 Ki. 19:9, 13) Iyạl phọ amem mọ, aZihova alher ri rurụ angọ mem mọ Ilaija raaku bọ ekpom mọ odị. AZihova aphagharanhaạn ni Ilaija esi ogananamhi aloor odị r’inyaạm mọ odị oḍeenhaan odị. Odị aḅilhẹ kẹn angọ Ilaija okuphom owol m’onọ aḅilhẹ ni amoọgh buboom awe dị rooseeny nyodị. (1 Ki. 19:11, 12, 18) Iikia i/lo, Ilaija aseere ni ekpom mem mọ aZihova aphagharanhaạn bọ nyodị. AZihova angọ ni Ilaija ibadị iiḍighi dị emhạn maạr. Odị aḅenhị mọ odị asagharạn elo Hazael oḍighi uw-emhạ aSyria, ḅilhẹ mọ asagharạn elo Jehu idiphọ uw-emhạ Izrạl, kụ aḅilhẹ asagharạn elo Ilaisa idiphọ oyil. (1 Ki. 19:15, 16) Esi ongọ Ilaija iiḍighi phọ iphẹn phọ, aZihova alhoghonhaạn nyodị ḍighaạgh ogbon imạ araraạr. Enhaạn aḅilhẹ angọ nyodị Ilaisa idiphọ ogbogh oyaghirị. Ika kụ idị nạ katue amoọgh olhoghonhaạn aḍighaạgh aZihova mem dị nạ alhoghoma igini?

6. Nạ kaaḅereghị ilọ eeghe mem dị nạ alhoghoma igini? (Psalm 62:8)

⁶ AZihova rawạ mọ ḅeeḅereghị ghan aḅenhị nyodị. Odị alegheri ni raraạr phọ nạ rakaran bọ, kụ angọ ni nyinhạ okuphom owol mọ odị kanhaghanhạn ni nyinhạ torobọ amem. (1 Tẹs. 5:17) Odị rakelhọm ghan ni onhaghanhạn abuẹn rooseeny bọ nyodị. (Prov. 15:8) Nạ kaaḅereghị ilọ eeghe mem lọ nạ alhoghoma igini? Kuukuanhaan ekpom mọ anạ aZihova idiphọ Ilaija aḍighi bọ. (Bạl Psalm 62:8.) Ḅenhị nyodị ogbolhomaam mọ anạ ḅilhẹ r’ipẹ nạ alhoghoma bọ. Lọm aZihova alhoghonhaạn nyinhạ ḍighaạgh okaran olhoghoma phọ anạ. Esi omaạm, eḍighi maạr dị nạ rakiilhaan ongọ ogbaanhaạn otu askul, pọ lọm aZihova angọ nyinhạ akpọ oḅio oru oghaạph. Nạ atue kẹn alọm nyodị osụ olhoghi ogbaạm omheeraam mọ anạ r’amagheel. (Luk 21:14, 15) Eḍighi maạr dị nạ alhoghoma oḅonyonhu ozuan, pọ lọm aZihova alhoghonhaạn nyinhạ ḍighaạgh oghaạph oḅenhị okpokolho onyọ aKristẹn. Ḅenhị aZihova aḍighi idị opọ nạ rakaạph bọ kaḅenhị kanaghanhạn ipẹ nạ alhoghoma bọ. Kuukuanhaan ekpom anạ aZihova, akiton aphogh ipẹ odị rapanyanhaạn bọ iiḅereghị phọ anạ, aḅilhẹ asighẹ olhoghonhaạn aḍighaạgh abunhọn, bịn nạ ka/kạr mun aloghoma igini.

7. Eḍeenhaan phọ aMauricio etughemhị nyinhạ eeghe?

⁷ AZihova mangọ oomo phọ ayira ogey oḍighi. Kuphom ni owol mọ aZihova amiịn ni aḅilhẹ asereghiạn oomo ipẹ nạ raḍighi bọ siphẹ ookpomhoghan phọ ḅilhẹ r’epẹ erugh phọ. (Ps. 110:3) Ika kụ idị okuọm aloor rukumuan phọ iphẹn phọ kelhoghonhaạn nyinhạ ḍighaạgh mem dị nạ alhoghoma igini? Ooḅeghiọn eḍeenhaan onyọ umor dị oghol mọ Mauricio.b AMauricio aḍiiny bọ muụm i/bia bịn ogbogh oyaghirị odị amhiigh oḍuraan oḍuạ isiẹn igey phọ. AMauricio aḅẹm mọ, “omhiịn iduọn odị raḍuạ bọ siẹn igey phọ iḍighi idị mị u/ḍuom mun olhoghi loor. “Mị uukia ghan mughumọ mị katue ni apamanhạm oḅọgh aloor ongọ aZihova phọ amhị, aḅilhẹ atọl siẹn eghunotu phọ aZihova. Mị ulhoghoma ni igini kụ aatughiạn ghan mo oye imhị ku/nhaghanhạn.” Eeghe kụ ilhoghonhaạn ḍighaạgh aMauricio? Odị aḅẹm mọ, “mị ubughẹ rukumuan phọ amhị. Ipẹ phọ iḍighi idị mị u/tolhonhaạn mun esi ikarạph iitughiạn phọ ipẹ phọ. Mem dị mị rakumuan r’abunhọn epẹ erugh phọ mị u/kạr ghan mun uloghoma igini, olhoghi amhị aḅaạl ghan ghụn.” Okạr oghaạph, ghalhamọ r’amem dị yira ko/tue ni omite epẹ erugh phọ r’abunhọn, kikparamhị ni iyira mem dị yira ooḍikuan r’abunhọn ongọ ogbaanhaạn dị eego esi afon r’ogẹ arinyạ. Eeghe kụ iḅilhẹ elhoghonhaạn ḍighaạgh aMauricio? Odị aḅẹm mọ: “Mị ukuọm loor oḍighi ookpomhoghan phọ. Mị akuamhị ghan aakolhobian asaimẹnt amhị. Iphẹn phọ iḍighi idị mị alhoghoma mọ aZihova r’abumor phọ usereghiạn ni imhị.”

MEM DỊ YIRA OLHOGHOMA OḄONYONHU OZUAN LOOR ODẸGH OPHOGH KIROKIRỌ

8. Ika kụ idị odẹgh ophogh kirokirọ ketue itir iyira?

⁸ Odẹgh ophogh amoọgh oteẹny ayira siẹn asiḍio eekunha phọ. (2 Tim. 3:1) Amem mọ r’odọ phọ odẹgh ophogh phọ ketue ni isighẹ iyira ekperenhom. Yira otue ni osoman iiḅaghamhị ikpoki ekperenhom, egbagarạ e/moon, obobọ ḍuugh oye ephomhoghiạn ayira. Simem dị erọl idiphọ, yira otue ni ooḅaghamhiạn loor oḅilhẹ oḅonyonhu ozuan, ekạr ekpaariọm mem dị eghịgh mudị yira osoman odẹgh ophogh atum odẹgh ophogh obobọ odẹgh ophogh kirokirọ eniin phọ amem mọ. Ii, legheri mọ aZihova rapogh ni oomo phọ ayira, kụ r’olhoghonhaạn aḍighaạgh odị yira kotue ni okaran torobọ odẹgh ophogh r’akpọ oḅio.

9. Kaạph ilọ iniin odẹgh ophogh phọ aJob asoman bọ.

⁹ Ooḅeghiọn ipẹ aZihova alhoghonhaạn bọ ḍighaạgh oye oḍuomolhoghi phọ Job. Odị asoman ni ogbagarạ odẹgh ophogh kirokirọ esi ekulha amem. Ḍiniin aḍio bịn uḅenhị ni Job mọ awe mosigheọgh inhạm mọ odị oḅilhẹ ozẹ reḅenhẹ phọ odị, edị ekạr eeph anmụny phọ odị momhuughu. (Job 1:13-19) I/bia bịn, iduọn odị odi bọ ni ramoghi, aJob amheelhom ni egbagarạ ezẹgh dị ephuẹ ḍizu phọ odị. (Job 2:7) Adọl phọ aJob eeph ni iboom dị tutụ odị alọ amiteom mọ: “Mị ka/tue mun; miphẹr imhị orọl.”—Job 7:16.

10. Ika kụ idị aZihova angọ Job ipẹ ewạ bọ orue okparạm? (Miịn afoto oḅẹl opoḍi phọ.)

¹⁰ AZihova aphogh ni Job. Loor esi dị aZihova aphomhoghiạn Job, Odị angọ ni nyodị raraạr phọ ipẹ odị amhoghi bọ orue okparạm. AZihova aghaaphạn Job, aghiọm nyodị olhoghi ilọ osụ olhoghi phọ Odị eekunha i/lo bọ ḅilhẹ r’ipẹ Odị rapogh ghan bọ olhẹm mọ odị. Odị aghaạph ni ilọ ibadị igbogh inhạm dị eḍigh ḍiigu. (Job 38:1, 2; 39:9, 13, 19, 27; 40:15; 41:1, 2). AZihova aḅilhẹ kẹn asighẹ oḍoọgh oye dị akpẹ oḍuomolhoghi dị oghol mọ Elihu akparamhiọm aḅilhẹ aadereghiọm Job. Elihu angọ nyodị okuphom owol mọ aZihova rakpẹ ghan ni iikpiạ buseenyom mọ odị okparạm bọ. AZihova anyu kẹn Elihu oolemhi aJob r’eten ephomhoghiạn. Elihu alhoghenhaạn ḍighaạgh Job ogbon aZihova idiphọ Olemhiạ oomo aḅirinhi phọ kparipẹ r’aloor odị. (Job 37:14) AZihova angọ kẹn ni Job oḍighi; mọ odị aaḅereghinhaạn iraạr phọ arighirị phọ odị mopiomạn bọ. (Job 42:8-10) Ika kụ idị aZihova rubakị ghan iyira rodon mem dị yira osoman igbagarạ asidọl?

11. Eeghe iidereghị kụ edị aBaibul phọ rungọ ghan iyira mem dị yira osoman odẹgh ophogh?

¹¹ AZihova iyira ru/ḅaanhaạn ghan onyen idiphọ odị aḅaanhaạn ghan bọ Job, kuolọ odị Odị ruḅaanhaạn ghan iyira dị eego esi Ekpo Onhụ phọ Odị, Baibul phọ. (Rom. 15:4) Odị ruudereghị ghan iyira esi ongọ ayira oḍuomolhoghi ilọ aghisigh phọ. Ooḅeghiọn iphurukpu araraạr siphẹ aBaibul phọ dị ketue iidereghị iyira mem lọ yira osoman odẹgh ophogh. AZihova ungọ ni iyira okuphom owol siphẹ aBaibul phọ mọ iyaạr i/lo,—ghalhamọ kẹn ogbagarạ odẹgh ophogh dị—“ketue igbariọn iyira siphẹ ephomoghiạn phọ [odị uphomoghiạn] bọ iyira.” (Rom. 8:38, 39) Odị aḅilhẹ kẹn ungọ iyira okuphom owol mọ odị “atuman ni oomo abuphẹ romạgh bọ nyodị” esi iiḅereghị. (Ps. 145:18) AZihova uḅenhị iyira mọ eḍighi maạr dị yira obeḍenhọm nyodị, pọ yira kotue ni okparạm torobọ odẹgh ophogh, oḅilhẹ omoọgh oboom oḅaạl olhoghi mem dị yira romiinhọm. (1 Kọr. 10:13; Jems. 1:2, 12) Ekpo Onhụ phọ Enhaạn ighiọm iyira olhoghi mọ odẹgh ophogh phọ ayira aḍighi olọ ekulha amem bịn mem dị otomaạm ghuḍum k’agee-pọ phọ odị kungọ bọ iyira. (2 Kọr. 4:16-18) AZihova aḅilhẹ ungọ iyira okuphom owol mọ odị kapiemhi ni zin oomo odẹgh ophogh kirokirọ phọ ayira—Setan Eru phọ ḅilhẹ r’abuphẹ rodạph bọ reten phọ odị. (Ps. 37:10) Nạ raatughiạn ghan ni riisi aBaibul dị ketue eedereghị nyinhạ mem lọ nạ asoman odẹgh ophogh ghisigh ḍughụm?

12. AZihova rawạ mọ yira oḍighi eeghe lọ yira rowạ ni okạr omhooghọm asuọ Ekpo Onhụ phọ odị?

¹² AZihova rawạ dị yira komiteom ghan mem ogbor ghan otuughạ Baibul phọ, kụ okuamhị ogbirima ipẹ yira aạl bọ. Mem dị yira osighẹ oḍighinhom ipẹ yira aạl bọ, omheeraam mọ ayira kakpạr ri, yira oḅilhẹ oḍuraan otuman Odẹ k’akẹ phọ ayira. Ipẹ phọ kikparamhị iyira okparạm ghan odẹgh ophogh. AZihova rangọ ghan kẹn uwaloor iigbia phọ odị buphẹ obeḍenhọm bọ Ekpo Onhụ phọ odị. Kụ uwaloor phọ opọ phọ kungọ iyira “iikpọ [dị k/ilọ ayira,] ilọ Enaạn,” orue okparaghạm atorobọ odẹgh ophogh.—2 Kọr. 4:7-10.

13. Ika kụ idị araraạr phọ ‘ebenhẹ phọ asụ bọ olhoghi’ romiteom ghan bọ rilhoghonhaạn ghan iyira ḍighaạgh okparaghạm odẹgh ophogh?

¹³ R’olhoghonhaạn aḍighaạgh aZihova, ‘ebenhẹ phọ asụ bọ olhoghi aḅilhẹ akpẹ oḍuomolhoghi’ romiteom ghan ni rumhuoghaạph, sividio, r’asuọr dị kilhoghonhaạn iyira ḍighaạgh okparamhị omheeraam mọ ayira ḅilhẹ r’oomhanham eten aruwaloor. (Mat. 24:45) Ewạ mọ osighẹ ghan oḍighinhom oomo aroopoogh phọ iphẹn phọ. Onyọ umaranhi epẹ United States aghaạph ni idị odị akạr kụ asereghiạn oomo araraạr pho iphẹn phọ. Odị aḅẹm mọ: “Siẹn 40 asiạ phọ mị makumu aZihova, modẹgh ni opogh omheeraam mọ amhị ibadị amem.” Umaranhi phọ ophọn phọ asoman ogbagarạ odẹgh ophogh kirokirọ—opughọl miim aghiilhom ni moto odị bịn azạm odẹ onhiin odị. Ḅilhẹ kẹn odẹ r’onhiin odị omheel egbagarạ e/moon, kụ akansạ aḍigh nyodị phọ r’aloor esi iyạl amem. Eeghe kụ ilhoghonhaạn nyodị ḍighaạgh okparạm? Odị aḅẹm mọ: “AZihova ruphogh ghan ni imhị oomo amem. Eḍien aruwaloor phọ ebenhẹ phọ asụ bọ olhoghi aḅilhẹ akpẹ oḍuomolhoghi ramiteom ghan bọ, milhoghonhaạn imhị ḍighaạgh okparạm. Iphẹn phọ meḍighi idị mị arue alhoghoma aani iphẹn Job alhoghoma bọ, kụ aḅẹm bọ mọ: ‘Tutụ mị amhugh, mị ra/paranhaạn ḍimheerạ phọ amhị!’”—Job 27:5.

14. Ika kụ idị aZihova rubakị ghan iyira dị eego esi abumor r’abumaranhi phọ mem iiḅaghamhị? (1 Tesalonikạ 4:9)

¹⁴ AZihova matughemhị we phọ odị dị oniin kapomhoghiạn ghan aḅilhẹ aadereghị ghan nyoniin mem iiḅaghamhị. (2 Kọr. 1:3, 4; bạl 1 Tesalonikạ 4:9.) Esi otuughaạny Elihu, abumor r’abumaranhi phọ ayira onyạ ni olhoghonhaạn ghan ayira ḍighaạgh dị yira kopamanhạm omheeraam mọ ayira mem iiḅaghamhị. (Iiḍighi 14:22) Esi omaạm, ooḅeghiọn idị ookpomhoghan abuọ aDiane okparamhị Diane oḅilhẹ olhoghonhaạn nyodị ḍighaạgh oḅạr aZihova mem dị olom odị amheel egbogh e/moon. Odị aḅẹm mọ: “Ikpạr ri. Kuolọ yoor ulhoghoma ni mọ aZihova ughuraam ni iyoor r’araaghaạgh ephomhoghiạn phọ odị runwanyụ phọ ipẹ phọ. Ookpomhoghan phọ ayoor uru ni ubakị iyoor. Bidị uru ghan ni uphogh iyoor , umhạgh iyoor fon, oḅilhẹ ghan uḅol iyoor, kụ iphẹn phọ ikạr kụ ikparamhị iyoor. Mị u/maạr bọ oghiilhom amoto, abumor r’abumaranhi phọ uru ghan usaạny imhị oghimọm ituughạ ḅilhẹ r’epẹ erugh phọ mem lọ mị katue.” P’eeghe aḍisẹph oḍighom aani apakirị eghunotu awe ephomhoghiạn!

SEREGHIẠN IPẸ AZIHOVA RUPHOGH GHAN BỌ IYIRA

15. Uḍighi ika kụ yira okuphom bọ owol mọ yira kotue ni okaran odẹgh ophogh?

¹⁵ Oomo phọ ayira kosoman ni odọ kirokirọ odẹgh ophogh. Toroboiperolbọ, iduọn yira motuughạ bọ, yira komoọgh ni olhoghonhaạn aḍighaạgh phọ yira omhoghi bọ mem iiḅaghamhị. Idiphọ odẹ ephomhoghiạn, oomo amem aZihova ruphogh ghan ni iyira. Odị odi ghan oogaạny ayira, aakolhobian onhaghạn ilọm mọ ayira r’obakị ayira. (Isa. 43:2) Yira okuphom ni owol mo yira kotue ni okparaghạm odẹgh ophogh loor esi dị odị mungọ iyira oomo araraạr phọ ipẹ ewạ bọ orue okparaghạm. Odị mungọ iyira inmo iiḅereghị, Baibul, riiḍien aruwaloor, ḅilhẹ r’ookpomhoghan ephomhoghiạn dị kilhoghonhaạn ghan iyira ḍighaạgh mem lọ ewạ.

16. Ika kụ idị yira kotọl siẹn eeḍiạn eten phọ aZihova ruphogh bọ iyira?

¹⁶ P’eeghe idị olhoghi ayira aḅaạl omhoọgh Odẹ k’akẹ dị ruphogh ghan iyira! “Arokpom mọ ayira rebo ni esi odị.” (Ps. 33:21) Yira koḍeenhaan mọ yira osereghiạn ni eten ephomhoghiạn phọ aZihova ruphogh bọ iyira esi osighẹ oḍighinhom oomo araraạr phọ odị amiteom bọ olhoghonhaạn ayira ḍighaạgh. Yira omoọgh oḍighi aani iyaạr omiteom omhiịn mọ yira otọl li siẹn eeḍiạn oghoph phọ Enhaạn. Iduọn phọ pọ, eḍighi maạr dị yira oghiọm ghisigh oḍighi oomo ipẹ yira kotue bọ onhaghanhạn aZihova kụ oḍighi idị enhighẹ siphẹ ariḍien phọ odị, pọ odị kuphogh ni iyira k’agee-pọ!—1 Pit. 3:12.