Pạm Akparamhị Oḍuomolhoghi AKristẹn Phọ Anạ

1. Eeghe oḍuomolhoghi kụ edị aZihova mungọ iyira?

AZIHOVA mungọ iyira ookiạ oḍuomolhoghi aghuḍum k’agee-pọ. Abuniin ayira omoọgh oḍuomolhoghi ogheel k’akẹ oḍighi olhẹm aruwaloor dị ko/tue omugh. (1 Kọr. 15:50, 53) Ogbogh opol ayira omoọgh oḍuomolhoghi orọl isiẹn ade phọ k’agee-pọ r’omhoon aloor dị amhunhughan ḅilhẹ r’oḅaạl olhoghi. (Ogan. 21:3, 4) Mughumọ yira opogh rokiọm ghisigh omhoọgh aghuḍum k’agee-pọ siẹn ade phọ obobọ epẹ k’akẹ, yira osereghiạn ni oḍuomolhoghi phọ ayira.

2. Oḍuom olhoghi phọ ayira akpasị esi eeghe, kụ uḍighi ika kụ yira oḅẹm bọ iduọn phọ?

² Ekpo onhụ phọ ogbạ bọ siphẹ aBaibul phọ mọ “oḍuomolhoghi,” remạ ghan “ogon m’imạ araraạr kemite ni.” Oḍuomolhoghi phọ yira omhoọgh bọ ilọ aghisigh phọ aḍighi ni olọ obeḍenhọm, loor esi dị iḍuạ ḍighaạgh aZihova kụ eru. (Rom. 15:13) Kụ yira olegheri ni mọ odị, ra/bilhẹ ghan oḍighi ipẹ odị maghaạph bọ. (Num. 23:19) Yira okuphom ni owol mọ aZihova amoọgh ni eephuạ r’iikpọ oḍighi omhunhenhi oomọ ipẹ odị maghaạph bọ oḍighi phọ. Esi iduọn phọ, oḍuomolhoghi phọ ayira o/ḍighi oopho aḍiitughiạn dị yira omhoọgh obobọ iyaạr dị eḍigh olhoghi ayira bịn, kuolọ akpasị esi ariphigh dị yira olhegheri ni okuphom owol.

3. Yira kooḅeghiọn eeghe siẹn emhuoghaạph phọ ephẹn phọ? (Psalm 27:14)

³ Odẹ k’akẹ phọ ayira uphomhoghiạn iyira iboom, kụ odị rawạ mọ yira oḍuom nyodị olhoghi. (Bạl Psalm 27:14.) Mem dị oḍuomolhoghi phọ ayira esi aZihova kụ akpạr, yira kotue ni okparaghạm odẹgh ophogh kirokirọ kụ osoman ghisigh phọ r’akpọ oḅio ḅilhẹ r’ibo. Uguạ ooḅeghiọn ipẹ oḍuom olhoghi phọ ayira katue bọ ughoph iyira. Kuolọ ophoor ooḅeghiọn ipẹ oḍuomolhoghi phọ ayira aghịgh bọ ilumạ ḅilhẹ r’eghoony. Ipẹ reten kụ yira ooḅeghiọn ipẹ yira kotue bọ okparamhị oḍuom olhoghi phọ ayira.

OḌUOMOLHOGHI PHỌ AYIRA AKỊGH ILUMẠ

4. Ika kụ idị oḍuomolhoghi aghịgh ilumạ? (Hibru 6:19)

⁴ Siphẹ aḍinyạ phọ odị agẹ bọ aghiọm Kristẹn abuọ aHibru phọ, aPọl atomaạm oḍuomolhoghi phọ ayira ilumạ. (Bạl Hibru 6:19.) APọl agbor ghan ni aḍiku rughuugh aghiighị ibadị arikpisi, esi iduọn phọ odị alhegheri ni mọ rosighẹ ghan ilumạ phọ kụ omiighemhi oghuugh pidị oghim ka/ḍuanhạm. Eniin amem dị aPọl aḍigh oghuugh rakị ekpisi ogbogh oghim dị aḅarạm olophiạ amhiigh ni oghim. Kụ abuọ oghuugh phọ omhiigh osereghi ilumạ phọ pidị oolhogh phọ ka/kilhom oghuugh phọ akị akaram egbogh iyaạr. (Iiḍighi 27:29, 39-41) Idiphọ ilumạ remiighemhi ghan bọ oghuugh, kụ edị oḍuomolhoghi phọ ayira rumhiighemhi ghan iyira pidị yira ko/ḍuạ ḍighaạgh aZihova mem dị yira osoman iiḅaghamhị. Oḍuomolhoghi phọ ayira raloghonhaạn ghan ḍighaạgh omhiighemhi ayira mem oghim iiḅaghamhị, loor esi dị yira okuphom owol mọ amem retu ni dị araraạr kenighẹ. Ka/bulha mọ, aZizọs aḅẹm ni mọ kukpuuroghọm ni iyira. (Jọn 15:20) Esi iḍuọn phọ, mem dị yira ogbirima ghan ilọ araraạr phọ aZihova uguanhaan bọ iyira ghisigh kilhoghonhaạn iyira ḍighaạgh oghiọm aghisigh okumu odị agey.

5. Ika kụ edị oḍuom olhoghi akparamhị Zizọs mem mọ odị asoman bọ ḍigbagarạ aḍuugh?

⁵ Tuutughiạn ipẹ oḍuomolhoghi alhoghonhaạn bọ Zizọs ḍighaạgh mem mọ odị kamugh bọ ḍigbagarạ aḍuugh phọ. Ḍio phọ aPentikọst 33 C.E., otelhedom mọ aPita aghaạph ni ilọ imiịn dị ogẹ siphẹ aḍinyạ phọ aPsalms dị eghaạph ipẹ aZizọs aphoomhị bọ loor ḅilhẹ u/kiilhaan bọ mem mọ amuphẹ phọ, aPita aḅẹm mọ: “Aḍizu phọ amhị ketolhọm oḍuomolhoghi; idị eḍighi bọ nạ ka/bilhẹ ghuḍum mọ amhị pạ oḍi phọ, ḅilhẹ kẹn aḍizu oye aghuḍuul phọ k’anạ ke/ḅọr. . . . Kụ egbodo phọ anạ keḅaalhamhị ni olhoghi amhị iboom.” (Iiḍighi 2:25-28; Ps. 16:8-11) Ii ghalhamọ r’iduọn aZizọs alhegheri bọ ni mọ odị kamugh ni, odị amhoọgh ni oḍuomolhoghi mọ Enhaạn kaḅeton ni nyodị ḅilhẹ mọ odị kamoọgh ni ibo oḅilhẹ oḅophoghạn r’Odẹ phọ odị epẹ k’akẹ.—Hib. 12:2, 3.

6. Eeghe kụ edị oniin onyọ umor aghaạph ilọ oḍuomolhoghi?

⁶ Oḍuomolhoghi aKristẹn phọ ayira malhoghonhaạn ni ḍighaạgh ibadị abumor r’abumaranhi okparạm. Ooḅeghiọn eḍeenhaan onyọ umor dị akpẹ oḍuomolhoghi dị oghol mọ Leonard Chinn, dị odi ghan epẹ England. Mem Eḅẹl Eghạm Oomo Aḅirinhi phọ, usiph ni nyodị olhọgh ikoli loor iduọn odị u/meera bọ u/ḍighi onyọ eghạm. Esi iyạl unwanyụ ukasaghiọm ogina odị eniin esi bịn, kụ oḅilhẹ ongọ nyodị igbagarạ iiḍighi dị odị aḍighi ghan. Odị aḅẹm mọ: “Araraạr phọ iphẹn phọ imitenhaan bọ imhị, iḍighi ni iyaạr dị mị aru alhegheri mọ oḍuomolhoghi akạr kụ amạn maạr orue okparaghạm odẹgh ophogh. Yira omoọgh ni eḍeenhaan aZizọs, butelhedom mọ, riil phọ, ḅilhẹ r’imạ aruguanhaan phọ edi bọ siphẹ aBaibul phọ. Oomo phọ iphẹn phọ kụ rekparamhị ghan bọ oḍuomolhoghi phọ ayira ilọ aghisigh phọ ḅilhẹ r’omhoọgh inyaạm okparạm.” Oḍuomolhoghi amhiighemhi ni umor phọ Leonard idiphọ ilumạ, kụ katue kẹn ni umhiighemhi aani iyira.

7. Ika kụ idị odẹgh ophogh rakparamhị ghan oḍuomolhoghi phọ ayira? (Rom 5:3-5; Jems 1:12)

⁷ Mem dị yira okparaghạm odẹgh ophogh kụ omhiịn idị aZihova rulhoghonhaạn iyira ḍighaạgh, yira rolegheri ghan ni mọ aZihova rawạ dị yira komoọgh oḅaạl olhoghi. Iphẹn phọ rekparamhị ghan oḍuomolhoghi phọ ayira agey. (Bạl Rom 5:3-5; Jems 1:12.) Esi iduọn phọ, nyiidiphọ oḍuomolhoghi ayira makpạr apu ipẹ arọl ghan bọ mem mọ purukụ yira oḍigh bọ siẹn igey phọ. ASetan rawạ mọ odẹgh ophogh phọ yira osoman bọ udughe iyira, kuolọ r’olhoghonhaạn aḍighaạgh aZihova yira kotue ni okaran oḅilhẹ omoọgh ekol.

OḌUOMOLHOGHI PHỌ AYIRA AKỊGH EGHOONY

8. Ika kụ edị oḍuomolhoghi aghịgh eghoony? (1 Tesalonikạ 5:8)

⁸ ABaibul phọ atomaạm oḍuomolhoghi phọ ayira eghoony. (Bạl 1 Tesalonikạ 5:8.) Onyọ eghạm razua ghan eghoony oghoph emhụ odị esi ikpinhạ dị amulhọgh ḍien phọ odị kotạph nyodị. Siẹn eghạm aruwaloor phọ yira robe bọ, ewạ mọ yira oghoph ilhoghi phọ ayira osighẹ esi araraạr dị aSetan ratạph ghan kuruom iyira ophuenhọm iitughiạn phọ ayira. Idiphọ eghoony rekoph ghan bọ emhụ onyọ eghạm, kụ edị oḍuomolhoghi rakoph ghan iitughiạn phọ ayira, obọ yira orue orọl dọl dị ekpẹ oḍuomolhoghi oghị esi aZihova.

9. Eeghe kụ remite ghan mem dị awe u/moọgh oḍuomolhoghi?

⁹ Oḍuomolhoghi aghuḍum k’agee-pọ phọ yira omhoọgh bọ kulhoghonhaạn iyira ḍighaạgh osaḅạr ghan araraạr r’osụ olhoghi ḅilhẹ r’onhaghạn aḍughụm. Ḍieriphọ aḍighaạgh phọ, eḍighi maạr dị oḍuomolhoghi phọ ayira adugh kụ yira omhiigh ootughiạn ghan araraạr dị aloor phọ ayira rewạ, yira kotue ni bịn obulha ootughiạn ghan ilọ oḍuomolhoghi aghuḍum k’agee-pọ phọ ayira. Omhiịn eḍeenhaan aKristẹn phọ abuphẹ orọl bọ iḍiodi phọ epẹ Korịnth. Bidị uwilhẹ ni omhoọgh omheeraam oghị esi ekpanhạ iyaạr dị Enhaạn aguanhaan—oguanhaan oḅilhẹ oḅetenhu esi aḍuugh phọ. (1 Kọr. 15:12) Otelhedom mọ aPọl agẹ ni mọ awe dị u/moọgh omheeraạm mọ oḅetenhu esi aḍuugh odi ni rosighẹ ghan ghuḍum mọ abidị koḍighinhom ongọ raraạr phọ ipẹ aloor phọ abidị rewạ bọ. (1 Kọr. 15:32) Ḍio arodon ibadị dị u/ḍuom olhoghi ruguanhaan phọ Enhaạn roḍighi ghan raraạr ilọ eḅeraạn bidị, koghelhọm loor idị eḅeraạn bidị. Kuolọ yira oḍuomolhoghi ruguanhaan phọ Enhaạn ilọ aghisigh phọ. Oḍuomolhoghi phọ ayira aḍighi idiphọ eghoony dị rekoph ghan iitughiạn phọ ayira ḅilhẹ r’ilhoghonhaạn ghan iyira ḍighaạgh dị yira ko/tọl dọl owạ ghan ogina imạ ilọ aloor bịn, loor esi dị ipẹ phọ repuẹ ghan siya phọ ayira r’aZihova.—1 Kọr. 15:33, 34.

10. Ika kụ idị oḍuomolhoghi katue ughoph iyira asighẹ esi ikarạph iitughiạn?

¹⁰ Eghoony oḍuomolhoghi phọ ayira ketue kẹn ni ighoph iyira esighẹ esi ootughiạn ghan mọ yira ko/tue oḍighi iyaạr dị keḅeraạn aZihova. Esi omaạm, yira otue ni ootughiạn mọ: ‘Mị ka/tue asianhaan oḍighi aani oniin onyọ abuphẹ kotọl bọ k’agee-pọ. Mị ko/gey oye. Mị ka/tue adaphạn siigbu phọ Enhaạn.’ Ka/bulha mọ Eliphaz oyaghirị phọ aJob, aru bọ oodereghị aJob aghaạph aani ni idọ phọ ipẹ phọ. Eliphaz aḅẹm mọ: “Oye dị kamugh ni katue ni akạr aselheman ḍughụm?” Kụ aḅilhẹ aḅẹm mọ: Enhaạn “o/ḍuom olhoghi buọ iigbia phọ odị, ḅilhẹ mọ asikẹ phọ kẹn bịn i/ḅaạl riḍien odị.” (Job 15:14, 15) P’eeghe okpẹ! Legheri mọ aSetan kụ rawạ mọ moọgh idọ iitughiạn phọ ipẹ phọ. Odị alegheri ni mọ eḍighi maạr dị nạ aghiọm ghisigh aatughiạn ghan ipẹ phọ, oḍuomolhoghi phọ anạ kadugh ni. Esi iduọn phọ, kel oomo okpẹ kirokirọ phọ ipẹ phọ, kụ agbon ruguanhaan phọ aZihova. R’amem r’amem ka/moọgh iikia mughumọ Enhaạn akạr ri rawạ mọ tọl k’agee-pọ. Odị kakạr kụ alhoghonhaạn nyinhạ ḍighaạgh oteẹny aḍiigbu phọ anạ.—1 Tim. 2:3, 4.

KPARAMHỊ OḌUOMOLHOGHI PHỌ ANẠ

11. Eeghe kụ iḍighi kụ emoghi bọ okparạm siẹn yira rokori bọ dị aruguanhaan phọ Enhaạn kemunughan?

¹¹ I/dugh okparamhị omheeraam mọ ayira oomo amem. Eeni etue ni iphẹr iyira okparạm okori aruguanhaan phọ Enhaạn. Toroboiperolbọ, aZihova odi ghan bịn k’agee-pọ, eten dị odị ragbi ghan mem egbatanhaạn ni r’ilọ ayira. (2 Pit. 3:8, 9) Odị raḍighi ghan ipẹ odị aguanhaan bọ eten phọ epẹ ekạr bọ enhighẹ, kuolọ eeni odị ka/ḍighi mem mọ amuphẹ yira ootughiạn bọ. Eeghe kụ kilhoghonhaạn iyira ḍighaạgh ophạm okparamhị oḍuomolhoghi phọ ayira iduọn yira rokori bọ dị Enhaạn kamunhenhi ruguanhaan phọ odị?—Jems. 5:7, 8.

12. Odaphạn Hibru 11:1, 6, ika kụ idị oḍuomolhoghi aḅọph r’omheeraam?

¹² Yira kotue ni okiọm ghisigh okparamhị oḍuomolhoghi phọ yira omhoọgh bọ eḍighi maạr dị yira u/bilhẹ oḍuraan otuman aZihova, opọ kamunhenhi bọ ipẹ yira oḍuom bọ olhoghi phọ. Okạr oghaạph, eḍighi maạr dị yira okạr rowạ omhoọgh oḍuomolhoghi, pọ yira komoọgh omheeraam mọ aZihova odi ni ḅilhẹ mọ odị ‘raanmo ghan ni ruunmo buphẹ osighẹ bọ oomo ologhi phọ abidị kụ rowaạm bọ nyodị.’ (Bạl Hibru 11:1, 6.) Mem dị yira oghị ghisigh kụ omhiịn ghan aZihova idiphọ Enhaạn dị odi ghan ni, oḍuomolhoghi phọ yira omhoọgh bọ mọ odị kaḍighi ni amunhenhi raraạr phọ ipẹ odị aguanhaan bọ kabụgh ni. Uguạ ooḅeghiọn reten dị yira kotue okparamhị siya phọ r’oḍuomolhoghi phọ ayira r’aZihova.

13. Ika kụ idị yira kotue oḍuraan otuman Enhaạn?

¹³ Ḅeeḅereghị ghan kụ aḅilhẹ aạl ghan Ekpo Onhụ phọ aZihova. Ghalhamọ r’iduọn yira ko/tue bọ omiịn aZihova, yira kotue ni oḍuraan otuman nyodị. Yira kotue ni oḅaanhaạn nyodị esi iiḅereghị, r’oḍuomolhoghi mọ odị kanaghạn ni iiḅereghị phọ ayira. (Jer. 29:11, 12) Yira kotue ni onaghạn eḍọgh Enhaạn esi aạl ghan Ekpo onhụ phọ odị kụ oḅilhẹ ogbirima ghan ipẹ yira m’aạl bọ. Mem dị yira aạl ghan ipẹ aZihova aphogh ghan bọ rebenhẹ phọ odị oḅạr bọ nyodị iḍiodi phọ, oḍuomolhoghi phọ ayira kakpạr ghan bịn. Oomo araraạr phọ edi bọ siphẹ Ekpo Onhụ phọ Enhaạn “ugẹ otughemiọm ghan ayira, pidị yira otuạn okparạm mọ r’akpọ olhoghi phọ oghaạph aḍinyạ iigḅia phọ rungọ ghan bọ iyira omoọgh oḍuom olhoghi.”—Rom. 15:4.

14. Eeghe kụ iḍighi kụ yira kogbirima ghan bọ ilọ araraạr dị aZihova maḍighinhaan bunhọn?

¹⁴ Gbirima ghan ipẹ aZihova amhunhenhi bọ ruguanhaan phọ odị epẹ omhạn. Ooḅeghiọn ilọ ipẹ Enhaạn aḍighinhaan bọ Ebraham r’aSera. Asiạ abidị meghị anyụ dị bidị ko/tue mun omạr moọny. Kuolọ, Enhaạn aguanhaan mọ bidị komạr ri obumoọny. (Gen. 18:10) Ebraham amhegheron ika ilọ oguanhaan phọ ophọn phọ? ABaibul phọ aḅẹm mọ: “Odị aḍuom ologhi esi dị oḍuom ologhi i/tọl kụ atuạn bọ aḍighinom odẹ ibadị areelhe phọ.” (Rom. 4:18) Ii odaphạn ephoghom awe, adọl phọ Ebraham oḍuom olhoghi o/lho mun, kuolọ Ebraham aḍuom ni olhoghi mọ aZihova kamunhenhi ni ruguanhaan phọ odị aguanhaan bọ nyodị. Eekunha phọ aZihova o/bi oye omheeraam mọ ophọn phọ. (Rom. 4:19-21) Eḍeenhaan phọ ephẹn phọ yira mooḅeghiọn bọ itughemhị iyira mọ oomo amem yira kotue ni oḍuom olhoghi mọ aZihova kamunhenhi ni ruguanhaan phọ odị, ghalhamọ ighịgh ni siphẹ ariḍien phọ ayira mọ ke/tue edugh.

15. Uḍighi ika kụ ewạ bọ dị yira kogbirima ghan ilọ araraạr dị Enhaạn muḍighinhaan iyira r’aloor?

¹⁵ Tuutughiạn ilọ araraạr dị aZihova maḍighinhaan nyinhạ. Tuutughiạn ghan suọ dị nạ r’aloor makạr ghan amhoọgh esi aruguanhaan dị aZihova makạr amhunhenhi dị edi siphẹ Ekpo Onhụ phọ odị. Esi omaạm, aZizọs aguanhaan ni mọ Odẹ phọ odị kamiteom ni ungọ iyira raraạr phọ ipẹ yira omhoghi bọ orolhọm. (Mat. 6:32, 33) AZizọs aḅilhẹ kẹn ni angọ nyinhạ okuphom owol mọ aZihova kango ni nyinhạ uwaloor iigbia phọ mem dị nạ alhọm nyodị. (Luk 11:13) AZihova ramunhenhi ni ruguanhaan phọ ipẹ phọ. Eeni kẹn ni nạ atue ni aatughiạn inhọn aruguanhaan dị odị maḍighinhaan nyinhạ. Esi omaạm, odị aguanhaan ni nyinhạ osạr owilhenhaạn ikarạph anạ, oodereghị anạ, ḅilhẹ r’oḍighi idị asiya phọ anạ r’odị kekpạr. (Mat. 6:14; 24:45; 2 Kọr. 1:3) Mem dị nạ agbirima ilọ araraạr phọ ipẹ aZihova maḍighi bọ angọ nyinhạ, nạ kakparamhị ni oḍuomolhoghi phọ anạ ilọ araraạr phọ ipẹ odị kaḍighi bọ ghisigh.

OḌUOMOLHOGHI PHỌ NẠ AMHOỌGH BỌ ANGỌ GHAN NYINHẠ IBO

16. Uḍighi ika kụ oḍuomolhoghi aḍighi bọ imạ inmo dị emhạn maạr?

¹⁶ Oḍuomolhoghi phọ yira omhoọgh bọ orọl k’agee-pọ eḍighi inmo k’Enhaạn dị yira okạr osereghiạn. Yira oḍuom olhoghi oghelhọm imạ araraạr ghisigh, kụ yira okuphom owol mọ kemite ni. Oḍuomolhoghi phọ ayira akịgh ilumạ, dị rimhiighemhi ghan iyira mem dị yira osoman odẹgh ophogh, igbiphoghọm, ḅilhẹ r’aḍuugh. Oḍuomolhoghi phọ ayira kẹn aḍighi eghoony, righoph ghan iyira kesighẹ esi iitughiạn dị i/moọgh maạr oḍighinhom ḅilhẹ rilhoghonhaạn ghan iyira ḍighaạgh oḅạr ipẹ enhighẹ bọ. Oḍuomolhoghi phọ ophọn phọ aBaibul phọ aghaạph bọ rulhoghonhaạn ghan iyira ḍighaạgh oḍuraan otuman Enhaạn agey. Regananamhi ghan kẹn odọ ipẹ ephomhoghiạn phọ Enhaạn amhoọgh bọ aru esi ayira ebụgh iboom. Yira romooghọm ni suọ iduọn yira oghị bọ ghisigh rokparamhị oḍuomolhoghi phọ ayira.

17. Eeghe kụ iḍighi kụ oḍuom olhoghi phọ ayira rakọm ghan bọ ibo kungọ iyira?

¹⁷ Siphẹ aḍinyạ phọ odị agẹ bọ aghiọm Kristẹn abuọ aRom mọ, odị akparamhị bidị mọ “oḍuom olhoghi phọ nyinha emoọgh mọ ingọ ghan inyinha ibọ.” (Rom. 12:12) APọl amhoọgh ni ibo loor esi dị odị akuphom owol mọ eḍighi maạr lọ odị aphamhanhạm ni dọl dị ekpẹ oḍuomolhoghi, m’onọ kamoọgh ni ghuḍum k’agee-pọ epẹ k’akẹ. Yira phọ kẹn ni robo ni esi oḍuomolhoghi phọ yira omhoọgh bọ, loor esi dị yira okuphom owol mọ aZihova kamunhenhi ni ruguanhaan phọ odị. Idiphọ okọ suọr phọ aḅẹm bọ: “oḅaạl olhoghi kụ odianhaan oye phọ opọ . . . aḍuom bọ olhoghi aZihova Enhaạn phọ odị, . . . Opọ ra/bi ghan bọ ipẹ odị maguanhaan bọ.”—Ps. 146:5, 6.