EMHUOGHAẠPH ITUUGHẠ PHỌ 19
AḌUỌR PHỌ 22 The Kingdom Is in Place—Let It Come!
Eeghe Kụ Edị Yira Olhegheri Ilọ Iiruẹn Phọ AZihova Kasophonhaan Bọ We Epẹ Ghisigh?
“[AZihova] . . . o/wạ ophiemi r’oniin oye.”—2 PIT. 3:9.
EGBON
Ipẹ yira kotue bọ okuphom owol mọ iiruẹn phọ aZihova kaagbo bọ ghisigh keḍighi ni elhiom eḅilhẹ eeleeny kẹn.
1. Eeghe kụ iḍighi kụ kotue bọ ni oḅẹm mọ yira odi muukiạ amem?
YIRA okạr kụ odi muukiạ amem! Torobọ aḍio, yira romiịn ni imiịn aBaibul dị remunughan. Esi omaạm, yira romiịn ni dị “uw-emhạ epẹ esiinyọm mọ” ḅilhẹ “uw-emhạ epẹ esoorom mọ” robe omhiịn oye dị kakpạr apu. (Dan. 11:40, igẹ dị edi ude.) Yira romiịn ni idị oghaạph iiḅi iinhaghạn phọ ratarạ r’irubạl awe dị okpiphaany rotu okumu aZihova. (Isa. 60:22; Mat. 24:14) Yira oḅilhẹ kẹn omoọgh omuzeḍi raraạr dị kekparamhị siya ayira r’aZihova dị rongọ ghan “mem lọ ekpẹ ongọ.”—Mat. 24:45-47.
2. Eeghe kụ edị yira okạr okuphom owol, kuolọ ewạ mọ olhọgh elhegh eeghe?
2 AZihova rulhoghonhaạn ghan iyira ḍighaạgh okuamhị onhaghanhạn ikpanhạ araraạr dị kemite moọny amem. (Prov. 4:18; Dan. 2:28) Yira okuphom ni owol mọ yira kolegheri ni oomo ilọ ewạ olhegheri kụ igbogh iiḅaghamhị phọ egbi omhiigh, pidị yira otue opamanhạm ḍimheerạ phọ ayira oḅilhẹ otọl r’amuḅọph mem mọ amuphẹ phọ. Toroboiperolbọ, ewạ ni mọ olhọgh elhegh mọ araraạr edi ni dị yira u/legheri ilọ aghisigh phọ. Siẹn emhuoghaạph phọ ephẹn phọ, yira kooḅeghiọn iyaạr phọ eḍighi bọ kụ yira mooḅenhion bọ idị yira onhaghanhạn ghan iniin araraạr phọ iphẹn kemite bọ. Yira kooḅeghiọn kẹn iniin araraạr dị yira olhegheri ni ilọ aghisigh phọ ḅilhẹ r’ipẹ Odẹ k’akẹ phọ ayira kaḍighi bọ epẹ ghisigh.
ARARAẠR DỊ YIRA U/LEGHERI
3. Yira ughaạph ghan mọ apụr amem kụ edị aZihova kakughi bọ eepoogh dị awe kotu uḍighan iyira ooḅereghị odị, kụ yira utụ eeghe kụ oghaạph ghan bọ iduọn phọ?
3 Epẹ omhạn, yira uḅẹm ghan mọ mem dị igbogh iiḅaghamhị phọ emhiigh, abulọ aZihova roo/ḅereghị ghan ko/moọgh mun eepoogh ooḅereghị odị pidị oḅeẹny aani eghạm mọ Amagedọn. Yira uḅẹm ghan iduọn phọ loor esi dị yira usighẹ mọ oomo ipẹ emite bọ mem mọ aNoa kụ kemite aani rodon. Esi omaạm, yira uutughiạn ghan mọ iduọn aZihova aghughi bọ eghuugh phọ kụ olophiạ phọ agbi bọ omhiigh, kụ edị odị kakughi eepoogh omhoọgh aani apelieẹny mem dị igbogh iiḅaghamhị phọ rewạ omhiigh.—Mat. 24:37-39.
4. Uḍighi ika kụ yira ro/ḅẹm ghan mun bọ mọ oomo ipẹ emite bọ mem Amuụm-aḍigho phọ eḍighi imiịn?
4 Ekpẹ ni omhiịn ipẹ emite bọ mem Amuụm-aḍigho phọ amem mọ aNoa idiphọ imiịn ḍughụm? Eeye. Eeghe kụ iḍighi? Loor esi dị aBaibul phọ o/ghaạph idiphọ.a Ii, aZizọs aghaạph ni mọ idiphọ erọl bọ “mem mọ aNoa” kụ idị ketọl aani mem mọ Oọny phọ oye katu bọ. Kuolọ odị o/mạ ghan mọ oomo araraạr phọ emite bọ eḍighi imiịn dị kemunughan ghisigh; odị o/ḅẹm kẹn mọ iduọn oghughi bọ eghuugh oghuugh phọ aNoa emeerạ enye iyaạr dị kekạr emite. Toroboiperolbọ, iphẹn phọ re/mạ ghan mọ iyaạr ituughạ i/lo esi oghaạph phọ aNoa r’Aḍigho phọ.
5. (a) ANoa aḍighi ghan eeghe kụ Aḍigho phọ egbi bọ oru? (Hibru 11:7; 1 Pita 3:20) (b) Eeghe ooghighighạn kụ odi igbo oghaạph iiḅi iinhaghạn phọ ayira r’opọ aNoa?
5 Mem mọ aNoa anhaghạn bọ dom iphụr arurụ phọ aZihova, odị aḍeenhaan ni omheeraam esi okạ oghuugh. (Bạl Hibru 11:7; 1 Pita 3:20.) Iduọn kẹn kụ edị rewạ mọ awe dị onhaghạn oghaạph iiḅi iinhaghạn phọ rodon oḍeenhaan omheeraam kụ oḅilhẹ osighẹ oḍighinhom ipẹ bidị rotuughạ bọ. (Iiḍ. 3:17-20) APita aghol Noa mọ oyẹ dị “aghaạph ghan mọ awe orọl dọl aruukuan.” (2 Pit. 2:5) Toroboiperolbọ, idiphọ oghaạph bọ siphẹ emhuoghaạph phọ eten bọ, yira u/legheri mughumọ aNoa arue ni aghaạph aḅenhị torobọ oye dị arọl de phọ, kụ Aḍigho phọ egbi bọ oru. Rodon yira opạm aani ni oḍighi oghaạph iiḅi iinhaghạn phọ siẹn oomo aḅirinhi phọ kụ eekunha phọ egbi oru, kụ yira rolọgh ghan ni inyaạm oḍighi iduọn phọ. Etigheri inyaạm mọ yira rolọgh ghan bọ, yira ko/tue okaạph oḅenhị torobọ oye dị odi siẹn ade phọ kụ eekunha phọ egbi oru. Eeghe kụ iḍighi?
6-7. Yira kotue ni okaạph oghaạph iiḅi iinhaghạn phọ oḅenhị torobọ oye siẹn ade phọ kụ eekunha phọ egbi oru ḍughụm? Gbạ.
6 Tuutughiạn ipẹ aZizọs aghaạph bọ ilọ oḍighi iphelhegbeel phọ ayira. Odị aḅẹm mọ iiḅi iinhaghạn ilọ Omhạr phọ k’Enhaạn kokaạph ni “oleenye oomo aḅirini phọ, ogbạ oleenyemi oomo aramạ.” (Mat. 24:14) Imiịn phọ ipẹ phọ ekạr kụ remunhughan eten dị ke/munhughan ghan. Rokaạph ni nyiidiphọ dom Omhạr phọ runhụ dị epel li 1,000, kụ ogbogh opol awe siẹn aḅirinhi phọ monhaghạn ni dị eego esi osoph intanẹt phọ ayira jw.org.
7 Toroboiperolbọ, aZizọs aḅenhị ni bumatuạn phọ odị mọ bidị ko/tue ‘okiighị oomo aramhạ phọ,’ obobọ okaạph oḅenhị torobọ oye, kụ odị agbi oru. (Mat. 10:23; 25:31-33) Iikpo onhụ phọ aZizọs igbolhomaam aani ni iyira rodon. Irubal awe rodon otugh riikpisi dị abuọ itooghị phọ u/meera mọ oghaạph iiḅi iinhaghạn phọ. Oḅarạm isiphẹ, torobọ oniin okalhạ romạr ghan ni rukuron ibạm anmụny. Yira rokparaghạ ghan ni oghaạph oḅenhị awe “atorobọ eelhe r’arughunughun r’arunhụ.” (Ogan. 14:6) Kuolọ ephigh phọ pọ yira ko/tue okaạph iiḅi iinhaghạn phọ oḅenhị torobọ oye siẹn ade phọ kụ eekunha phọ egbi oru.
8. Eeghe aḍipuru kụ edị yira kotue ni opuru ilọ iiruẹn phọ aZihova? (Miịn kẹn sifoto phọ.)
8 Odaphạn iphẹn yira mooḅeghiọn bọ, oye atue ni apuru mọ: Kokaạph ika ilọ awe phọ abuphẹ eeni ko/moọgh aani bọ eepoogh onhaghạn iiḅi iinhaghạn phọ kụ igbogh iiḅaghamhị phọ egbi oteẹny? AZihova r’Oọny phọ odị Zizọs, opọ Odị maḅọgh bọ angọ oḍighi oogbo iiruẹn phọ, koḍighi ika bidị? (Jọn 5:19, 22, 27; Iiḍ. 17:31) Esi aBaibul phọ okpasị bọ emhuoghaạph phọ ephẹn phọ eḅẹm mọ aZihova “o/wạ ophiemi r’oniin oye.” Kparipẹ ghụn, odị rawạ mọ “oomo phọ awe phọ okiton esi ikarạph phọ abidị.” (2 Pit. 3:9; 1 Tim. 2:4) Ghalhamọ r’iduọn yira olhegheri bọ ni iphẹn phọ ilọ aZihova, odị iyira ku/ḅenhị ipẹ odị kaagboonhaan bọ iiruẹn buphẹ u/moọgh aani bọ eepoogh onhaghạn iiḅi iinhaghạn phọ. Okạr oghaạph, obọ i/kpaariọm nyodị oḅenhị ayira torobọ iyaạr dị odị maḍighi obobọ rawạ oḍighi.
Eeghe iiruẹn kụ edị aZihova kaagbo angọ we dị u/moọgh aani eepoogh onhaghạn iiḅi iinhaghạn phọ kụ igbogh iiḅaghamhị phọ egbi omhiigh? (Miịn ekpịgh phọ 8)c
9. Eeghe iyaạr kụ edị aZihova maganhanhamhi uḍeenhaan iyira siphẹ aBaibul phọ?
9 Siphẹ aBaibul phọ, aZihova akaạph ni agananami iniin araraạr dị odị kaḍighi. Esi omaạm, aBaibul phọ uḅenhị ni iyira mọ aZihova kaḅerion ni we ekeeny eḍighinhom iyaạr dị u/moọgh aani eepoogh onhaghạn iiḅi iinhaghạn phọ pidị onme reten phọ abidị. (Iiḍ. 24:15; Luk 23:42, 43) Iphẹn phọ memiteom inhọn iphigh asipuru.
10. Ighẹn kụ inhọn asipuru dị yira omhoọgh?
10 Eḍighi ni edị ko/ḅerion oomo abuphẹ komugh bọ mem igbogh iiḅaghamhị phọ ḍughụm? ABaibul phọ akaạph ni mọ ko/ḅerion oomo abuphẹ u/meeraam bọ aZihova, kụ kopiemhi bọ mem eghạm mọ Amagedọn. (2 Tẹs. 1:6-10) Kuolọ kokaạph aani ika ilọ awe dị eeni iirurughiạn, aḍikpọ, obobọ ekperenhom iyaạr kụ eghiigh obobọ oye kụ aghiigh? (Eccl. 9:11; Zech. 14:13) Abuniin abuẹn phọ kotolhọm aani ni igbo aḍita abuọ ekeeny eḍighinhom iyaạr phọ koḅerion bọ siphẹ omhoom aḅirinhi phọ ḍughụm? Onyọ ayira lọ alhegheri o/lho.
ARARAẠR DỊ YIRA OLHEGHERI
11. Eeghe iyaạr kụ edị kodaphạn bọ kụ oogbo iiruẹn ongọ we pạ Amagedọn?
11 Ibadị araraạr dị kemite ghisigh edi ni dị yira olhegheri. Esi omaạm, yira olegheri ni mọ siphẹ eghạm mọ Amagedọn koogboonhaan ni iiruẹn we odaphạn ipẹ bidị ozoọm bọ bumor phọ aKraist. (Mat. 25:40) Buphẹ osophonhaan bọ iiruẹn idiphọ iyool, moḍeenhaan ni mọ bidị obakị ni buẹn osagharạn bọ uwaloor iigbia phọ ḅilhẹ r’aKraist. Yira olegheri kẹn mọ abuniin abumor phọ aKraist kosugha ni siẹn ade phọ mem mọ igbogh iiḅaghamhị phọ kemiigh bọ, kuolọ bidị kokeel li k’akẹ mem dị rekpụl eghạm Amagedọn. Eḍighi iyaạr lọ abumor phọ aKraist kotọl li siẹn ade phọ kamem mọ opọ phọ, pọ emạ emiteom mọ awe iiḅi arokpom komoọgh ni eepoogh olhoghonhaạn abidị ḍighaạgh ḅilhẹ r’oḍighi phọ bidị roḍighi bọ. (Mat. 25:31, 32; Ogan. 12:17) Eeghe kụ iḍighi kụ ariphigh phọ iphẹn phọ eḍighan bọ ni elhegh?
12-13. Ika kụ edị abuniin awe kotue ni omegheron mem dị bidị omhiịn dị mophiemhi Babilọn Ogbogh phọ? (Miịn kẹn sifoto phọ.)
12 Ghalhamọ r’amem dị igbogh iiḅaghamhị phọ memhiigh, eeni abuniin awe dị omhiịn muphe aBabilọn Ogbogh phọ kootughiạn ni mọ Abugbaanhaạn AZihova moghaạph ni mọ iphẹn kụ araraạr dị kemite. Arokpom abuniin abuẹn phọ kenmia ni ḍughụm?—Ogan. 17:5; Ezek. 33:33.
13 Eḍighi iyaạr lọ eḍighi iduọn, pọ kekighimaạm ipẹ emite bọ epẹ Ijipt mem mọ aMozis. Lọgh elhegh mọ mem mọ awe phọ Izrạl roḍuạ bọ Ijipt, “aḍita awe kirokirọ” udạph aani ni bidị. Eeni abuniin abuẹn phọ umhiigh ni omhoọgh omheeraam mem mọ bidị omhiịn bọ dị Ḍioph Phọ Araraạr phọ aMozis aghaạph bọ mọ kosighẹ oliọm we phọ Ijipt emite. (Ex. 12:38) Eḍighi maạr dị iniin phọ iphẹn phọ emite aani mem mọ kopiemhi bọ Babilọn Ogbogh phọ, kekạgh ni olhoghi ayira eḍighi maạr dị yira omhiịn dị awe muḍighan iyira rokumu aani aZihova siẹn amuphe phọ kamiigh bọ? Eeye! Yira rowạ ozọ aroozọ dị eḍeenhaan mọ yira rotuughaạny ni Odẹ k’akẹ phọ ayira, “Enhaạn onmạ ighirigiir r’aghusạn, ra/nuụn ghan bọ kaghạgh olhoghi ḅilhẹ amoọgh ephomhoghiạn oḅạr dị ephughạn r’igey.”b—Ex. 34:6.
Abuniin abuphẹ komiịn bọ muphe ABabilọn Ogbogh phọ kootughiạn ni mọ Abugbaanhaạn AZihova moghaạph ni k’epẹ omhạn ilọ araraạr phọ iphẹn phọ (Miịn siikpịgh phọ 12-13)d
14-15. Amem mọ oye phọ amhugh bọ obobọ ekpisi phọ oye phọ arugh bọ emoọgh ni maạr oḍighinhom r’omhoọgh aghuḍum k’agee-pọ ḍughụm? Gbạ (Psalm 33:4, 5)
14 Eeni amem, yira ronaghạn ghan ni dị onyọ umor obobọ umaranhi kaḅẹm mọ, “Kenighẹ ghụn dị onyọ asiya amhị dị aZihova u/legheri kamugh kụ igbogh iiḅaghamhị phọ egbi omhiigh, loor esi dị oḍuomolhoghi oḅetenhu esi aḍuugh odianhaan ni nyodị.” Ii obọ aḍiphẹ phọ aḍimạ aḍiitughiạn ni. Kuolọ amem mọ oye phọ amhugh bọ i/moọgh maạr oḍighinhom r’orọl k’agee-pọ epẹ ghisigh. AZihova Oogboom Iiruẹn dị amhunhughan, odị raagbo ghan iiruẹn dị eeleeny eḅilhẹ eḍighi elhiom. (Bạl Psalm 33:4, 5.) Yira kotue ni oḍuom olhoghi mọ “Oogboom Iiruẹn oomo aḅirinhi phọ” kaḍighi ni ipẹ eru bọ elhiom.—Gen. 18:25.
15 Eḍighi kẹn ni osụ-olhoghi omheeraam mọ ko/tuạn ekpisi dị oye phọ arugh bịn ongọ oye phọ eepoogh orọl k’agee-po. Kụ eḍighi ni ugbi ni gbi ni ootughiạn mọ aZihova kasophonhaan irubal awe dị odi rikpisi dị u/moọgh aani eepoogh onhaghạn aani iiḅi iinhaghạn phọ idiphọ “arutụ” igạ. (Mat. 25:46) Oogboom Iiruẹn oomo aḅirinhi phọ amoọgh ni ḍiḅeraạn akị esi abidị. Yira u/legheri idị aZihova kakạr aḍighi raraạr mem igbogh iiḅaghamhị phọ. Eeni abuniin awe phọ abuẹn phọ komoọgh ni eepoogh otuughạ ilọ aZihova, omhoọgh omheeraam, oḅilhẹ oḍeenhaan mọ bidị odi r’aZihova kụ egbi oteẹny amem mọ aZihova kaḍeenhaan bọ weye oomo areelhe phọ odọ oye phọ odị aru bọ.—Ezek. 38:16.
Ekpom abuniin awe kenmia ni, . . . mem dị bidị omhiịn mọ igbogh iiḅaghamhị phọ memhiigh?
16. Eeghe kụ edị yira moru olhegheri ilọ aZihova? (Miịn kẹn foto phọ.)
16 Dị eego esi ituughạ aBaibul phọ ayira, yira moru olegheri idị aghuḍum oye amhạn maạr esi aZihova. Odị angọ ghuḍum Oọny phọ odị pidị oomo ayira omoọgh eepoogh orọl k’agee-pọ. (Jọn 3:16) Oomo phọ ayira molhoghoma ni ephomhoghiạn phọ aZihova amhoọgh bọ aru esi ayira. (Isa. 49:15) Odị alegheri ni ḍien atorobọ onyọ ayira. Okạr oghaạph, odị alegheri ni torobọ ilọ onyọ ayira dị ghalhamọ oye phọ amhugh ni, odị katue ni aḅeton oye phọ r’oomo araagharạ phọ ipẹ oye phọ amhoọgh ghan bọ r’araraạr phọ ipẹ oye phọ alhegheri ghan bọ kụ agbi bọ omhugh phọ! (Mat. 10:29-31) Esi iduọn phọ, yira kotue ni okuphom owol mọ Odẹ ephomhoghiạn phọ ayira odi bọ k’akẹ phọ kasoph ni ooruẹn angọ torobọ oye eten dị eeleeny, eḍighi elhiom, ḅilhẹ r’eten onmạ ighirigiir.—Jems 2:13.
Yira kotue ni okuphom owol mọ aZihova kaagbo ni iiruẹn angọ torobọ oye eten dị eeleeny, eḍighi elhiom, ḅilhẹ r’eten onmạ ighirigiir (Miịn ekpịgh phọ 16)
17. Yira kotuughạ eeghe siphẹ emhuoghaạph phọ etum bọ siẹn?
17 Araraạr phọ iphẹn phọ oogelhiọn bọ ekạr kụ eganhanhami idị ewạ mọ oogboronhom nyiidiphọ phọ oḍighi iphelhegbeel phọ. Eeghe kụ iḍighi kụ yira koḅẹm bọ iduọn phọ? Kụ eeghe kụ rinyu ghan bọ iyira oghaạph iiḅi iinhaghạn phọ oghiọm aghisigh? Yira komiịn ophanyanhaạn asipuru phọ iphẹn phọ siphẹ emhuoghaạph phọ etum bọ siẹn.
AḌUỌR PHỌ 76 How Does It Make You Feel?
a Orue omhiịn iyaạr phọ eḍighi bọ kụ ooḅenion bọ onhaghạn aḍughụm mọ ayira ophọn phọ, miịn emhuoghaạph phọ “This Is the Way You Approved” siphẹ Watchtower aMarch 15, 2015, ipoḍi phọ 7-11.
b Mem dị ophiemhi Babilọn Ogbogh phọ, kodẹgh ni opogh oomo arebenhẹ aZihova mem mọ aGog opọ aMagog kazuom bọ bidị. Koḅilhẹ ni kẹn odẹgh opogh oomo abuphẹ koḍighan bọ we phọ aZihova mem dị rophiemhi Babilọn Ogbogh phọ.
c ILỌ AFOTO: Iraạr asidọl dị eḍeenhaan iyaạr phọ eḍighi bọ kụ oghaạph iiḅi iinhaghạn phọ eeni ka/tue bọ ateẹny torobọ oye ḍio arodon: (1) Anhịr dị ekụ iiḅereghị ekpisi phọ odị arugh bọ i/meera mọ anhaghạn aani oghaạph iiḅi iinhaghạn phọ, (2) olom r’anhịr dị orugh ekpisi dị abuọ itooghị u/meera mọ oghaạph oghaạph iiḅi iinhaghạn phọ (3) oye dị arugh ekpisi dị r’ilọ osi ekpisi phọ oghaạph iiḅi iinhaghạn phọ i/lo.
d ILỌ AFOTO: Esinha onyanhị dị awilhẹ igey phọ raatughiạn ilọ araraạr dị odị atuughạ ilọ amuphe aBabilọn Ogbogh phọ. Iitughiạn odị menmia kụ aḅilhẹ aḅula k’odẹ r’onhiin odị dị odi siẹn igey phọ. Eḍighi maạr dị idọ araraạr phọ iphẹn phọ kụ emite, pọ ewạ ni mọ oḍeenhaan ni mọ yira okịgh ni Odẹ k’akẹ phọ ayira, Enhaạn onmạ ighirigiir r’aghusạn kụ oḅilhẹ omhoọgh ibo mem dị oḍighinhom ikarạph akiton aḅilhẹ aḅulha