EMHUOGHAẠPH ITUUGHẠ PHỌ 26
AḌUỌR PHỌ 123 Loyally Submitting to Theocratic Order
Sooromhi Loor Amheeraam Ipẹ Nạ U/legheri Bọ
“Yira ko/tue onaghanhạn Enhaạn Oomo Iikpọ phọ omạn.”—JOB 37:23.
EGBON
Ipẹ yira kotue bọ oḍighi ghalhamọ r’iduọn yira u/legheri bọ oomo araraạr, kụ ogbon ipẹ yira olhegheri bọ nyiidiphọ, ḅilhẹ okpasị oḍuom olhoghi ayira esi aZihova.
1. Eghẹn eekiạ eten kụ edị aZihova ulhẹm iyira, kụ eeghe kụ iḍighi?
AZIHOVA ulhẹm iyira eekiạ eten. Odị ulhẹm iyira eten dị yira kotue ni ootughiạn iyaạr, otuughạ emhoom iyaạr, kụ oḅilhẹ osighẹ oḍighinhom ipẹ yira motuughạ bọ. Eeghe kụ iḍighi kụ odị ulhẹm bọ iyira eten phọ ephẹn phọ? Odị rawạ mọ “omhoọgh olhegheri iyaạr phọ Enhaạn” kụ okumu nyodị esi ipẹ yira molhegheri bọ ilọ odị.—Prov. 2:1-5; Rom. 12:1.
2. (a) Eeghe kụ edị ewạ mọ olhọgh elhegh? (Job 37:23, 24) (Miịn kẹn afoto phọ.) (b) Eeghe asuọ kụ edị yira komoọgh eḍighi maạr dị yira olhọgh elhegh mọ yira u/legheri oomo araraạr?
2 Ghalhamọ r’iduọn aZihova ulhẹm bọ iyira eten dị yira kotue ni otuughạ raraạr, ibadị araraạr edi ni dị yira u/legheri. (Bạl Job 37:23, 24.) Ooḅeghiọn eḍeenhaan phọ aJob. AZihova aapuru yogh ni nyodị sipuru dị eḍighi idị odị amhiịn mọ ibadị araraạr edi ni dị odị u/legheri. Ipẹ phọ emite bọ ilhoghonhaạn nyodị ḍighaạgh osooromhi aloor kụ oḅilhẹ oolemhi iitughiạn phọ odị. (Job 42:3-6) Yira phọ kẹn kotue ni omooghọm suọ eḍighi maạr dị r’osooromhi aloor yira olhọgh elhegh mọ yira u/legheri oomo araraạr. Odọ osooromhi aloor phọ ophọn phọ kụ unyu iyira oḍuom olhoghi mọ aZihova kagananamhi ni ipẹ yira okạr bọ omhoghi olhegheri. Kụ kilhoghonhaạn iyira kẹn ḍighaạgh osopha ogey osopha.—Prov. 2:6.
Omheeraam mọ araraạr edi ni dị yira u/legheri kingọ ni iyira suọ idiphọ engọ bọ Job (Miịn ekpịgh phọ 2)
3. Yira kooḅeghiọn eeghe iyaạr?
3 Siẹn emhuoghaạph phọ ephẹn phọ, yira kooḅeghiọn iniin araraạr dị yira u/legheri ḅilhẹ r’ipaanhaạn dị eeni yira kosoman ni loor iduọn yira u/legheri bọ. Yira kooḅeghiọn kẹn iyaạr phọ eḍighi bọ kụ enhighẹ bọ iduọn yira u/legheri bọ iniin araraạr. Ooḅeghiọn iphẹn phọ kekparamhị oḍuom olhoghi ayira mọ aZihova “opọ amhoọgh bọ oomo olhegheri iyaạr” kuḅenhị ni iyira ipẹ yira okạr bọ omhoghi olhegheri.—Job 37:16.
YIRA U/LEGHERI MEM MỌ EEKUNHA PHỌ KETU BỌ
4. Odaphạn Matiu 24:36, eeghe kụ eniin iyaạr dị yira u/legheri?
4 Bạl Matiu 24:36. Yira u/legheri mem mọ eekunha aḅirinhi phọ ketu bọ. Ghalhamọ aZizọs bịn mem mọ arọl bọ siẹn ade phọ o/lhegheri ilọ “aḍio phọ aḍiphẹ r’amem mọ.”a Amem irọl li dị odị aḅenhị butelhedom mọ odị mọ aZihova Ogbogh Odaphạm Amem mọ amoọgh ni raraạr dị odị magbiighi “ilọ amem r’amem,” dị ogina odị kụ alhegheri mem mọ. (Iiḍ. 1:6, 7) AZihova magu ni ḍio r’amem dị aḅirinhi phọ ophọn phọ kasi eekunha, kuolọ i/lo esi ayira olhegheri aḍio phọ r’amem mọ.
5. Ika kụ idị ketue ni itir iyira loor iduọn yira u/legheri bọ ḍio phọ r’amem mọ eekunha phọ ketu bọ?
5 Odaphạn ipẹ aZizọs aghaạph bọ, yira u/legheri onhụ asiạ dị yira koḅilhẹ okori kụ eekunha phọ egbi oru. Etue ni iphẹr iyira bịn yira oḅonyonhu ozuan loor iduọn yira rokori bọ k’asiạ phọ. Eeni kẹn kikparanhaạn iyira okparaghạm arigilaạm abuọ eghunotu ayira obobọ abunhọn, dị otuạn iduọn eekunha phọ k”eru bọ rugilaạm iyira. (2 Pit. 3:3, 4) Eeni yira kootughiạn mọ midughanhaan ghụn iyira okparạm r’omhinhoghọm arigilaạm mọ eḍighi iyaạr lọ yira olhegheri ḍio phọ r’amem mọ eekunha phọ ketu bọ.
6. Uḍighi ika kụ enighẹ bọ ni iduọn yira u/legheri bọ ḍio eekunha phọ?
6 Loor iduọn aZihova iyira u/ḅenhị bọ ḍio phọ eekunha aḅirinhi phọ ketu bọ, ingọ iyira eepoogh oḍeenhaan mọ yira rokumu ghan nyodị loor ephomhoghiạn phọ yira omhoọgh bọ esi odị, ḅilhẹ kẹn mọ odị iyira ku/bi. Yira u/tuạn ilọ eekunha aḅirinhi phọ kụ rokumu bọ aZihova, kparipẹ ghụn yira rowạ ghan okumu odị k’agee-pọ. Esi iduọn phọ, kparipẹ rogbon ilọ amem mọ aḍio phọ aZihova ketu bọ, yira ogbon ghụn ilọ imạ araraạr phọ kemite bọ ḍio phọ aḍiphẹ phọ. Iphẹn phọ kilhoghonhaạn iyira ḍighaạgh oḍuraan ogbị aZihova r’oḍighi ipẹ eḅeraạn bọ nyodị.—2 Pit. 3:11, 12.
7. Eeghe kụ edị yira olhegheri?
7 Ekạr kụ ekpeanhaạn ogbon araraạr phọ yira olhegheri bọ. Esi omaạm, yira olegheri mọ eekunha aḅirinhi phọ imhiigh 1914. Kụ siphẹ aBaibul phọ, aZihova ungọ ni iyira imiịn dị emạ eḍeenhaan ilọ iphẹn phọ, aḅilhẹ kẹn ni akaạph agananamhi idị aḅirinhi phọ katọl emhiigh lhạ phọ aḍiphẹ phọ. Loor iduọn phọ, yira okạr okuphom owol mọ aḍigbogh aḍio phọ aZihova metuman siẹn. (Zeph. 1:14) Yira olegheri kẹn mọ aZihova ungọ ni iyira oḍighi oghaạph iiḅi iinhaghạn phọ oḅenhị oomo awe. (Mat. 24:14) Rogbeelhom ni iiḅi iinhaghạn phọ rere dị emhạn ni 240, esi arunhụ dị epel li 1,000. Yira u/moghi olhegheri aḍio phọ r’amem mọ kụ ogbi olhọgh ikuph oḍighi phọ ophọn phọ amhạn bọ maạr.
YIRA U/LEGHERI IPẸ AZIHOVA KAḌIGHI BỌ
8. “Iiḍighi egey Enhaạn phọ” remạ ghan eeghe? (Ecclesiastes 11:5)
8 K/oomo amem kụ edị yira ronaghanhạn ghan “iiḍighi egey Enhaạn phọ.” (Bạl Ecclesiastes 11:5.) Iiḍighi egey Enhaạn phọ oghol bọ siẹn phọ remạ ghan raraạr dị aZihova raḍighi ghan obobọ rameera ghan mọ emite obọ emuneni ogbi phọ odị. Yira ko/tue bịn olegheri iyaạr phọ eḍighi bọ kụ aZihova rameera ghan bọ mọ iniin araraạr emite obobọ eten phọ odị kulhoghonhaạn bọ iyira ḍighaạgh. (Ps. 37:5) Ekịgh idiphọ yira ko/tue bọ onaghanhạn ipẹ obumoọny raḍum ghan bọ olhoghi okuruḅakạ onhiin odị, iyaạr dị ghalhamọ r’abuọ sayẹns k”orue ni onhaghanhạn.
9. Loor iduọn yira u/legheri bọ ipẹ aZihova kaḍighi bọ raraạr, eeghe odọ iitughiạn kụ ketue ni etu olhoghi ayira?
9 Loor iduọn yira u/legheri bọ ipẹ aZihova kulhoghonhaạn bọ iyira ḍighaạgh, olhoghi ayira atue ni abạl iyạl iyạl mem dị yira rowạ osopha osopha. Esi omaạm, yira otue ni ookpukiạn odughe adọl aghuḍum mọ ayira, obobọ oghị ekpisi dị omhoghi bukaaphọm. Yira otue ni ookia mughumọ yira omoọgh ni kuuḅi aghisigh aZihova mem dị yira k”oteẹny siigbu dị yira roporogh siẹn ookpomhoghan phọ, obobọ osoman ipaanhaạn mem dị yira omiteom loor mem dị rolọgh ruutu ookpomhoghan phọ, obobọ mem dị yira olhọgh ni mem epẹ erugh phọ kụ eghịgh mudị asuọ ra/ḅuạ kamite.
10. Ighẹn imạ araagharạ kụ edị yira momhoọgh loor iduọn yira u/legheri bọ ipẹ aZihova kaḍighi bọ raraạr?
10 Iduọn yira u/legheri bọ ipẹ aZihova kaḍighi bọ raraạr, ilhoghonhaạn ghụn iyira ḍighaạgh omhoọgh imạ araagharạ idiphọ osooromhi aloor r’olhegheri okụ. Yira moru olọgh elhegh mọ iitughiạn r’areten phọ aZihova epelheghiom ilọ ayira. (Isa. 55:8, 9) Mitughemhị iyira kẹn oḍuom olhoghi r’obeḍenhọm aZihova esi atorobọ iyaạr. Mem dị yira omhiịn mọ arukumuan ayira epẹ erugh phọ obobọ arukumuan olhọgh aruutu ookpomhoghan phọ rekị ni imạ, yira rongọ ghan ni ḍisẹph phọ aZihova. (Ps. 127:1; 1 Kọr. 3:7) Eḍighi iyaạr dị araraạr i/kị ipẹ yira rowạ bọ, olhegheri mọ aZihova ramiịn ni ipẹ araraạr rekị bọ. (Isa. 26:12) Yira oḍighi bin phọ muẹn ayira, kụ oḍuom olhoghi mọ aZihova kaḍighi bin phọ muphẹ odị. Yira okuphom owol mọ aZihova kungọ ni iyira iiḅakiọm mọ yira omhoghi bọ, ghalhamọ i/ḍighi ni eten iiḍaạny idiphọ odị aḍighi ghan bọ mem dị eten.—Iiḍ. 16:6-10.
11. Eeghe araraạr dị emhạn maạr kụ edị yira olhegheri?
11 Yira olegheri ni mọ aZihova aḍighi Enhaạn ephomhoghiạn, elhiom ooruẹn, r’Enhaạn osụ-olhoghi. Yira olegheri kẹn mọ odị amaghamhị ni maạr oomo ipẹ yira moḍighinhaan bọ nyodị r’abumor r’abumaranhi phọ ayira. Kụ yira olegheri kẹn mọ aZihova kanmo ni ruunmo buphẹ oḅạr bọ nyodị.—Hib. 11:6.
YIRA U/LEGHERI IPẸ KEMITE BỌ IḌUE
12. Odaphạn Jems 4:13, 14, eeghe iyaạr kụ edị yira u/legheri?
12 Bạl Jems 4:13, 14. Yira u/legheri ipẹ kemite bọ iḍue. Siẹn aḅirinhi phọ ophọn phọ, “araraạr dị olhoghi u/seere” ketue ni imitenhaan iyira. (Eccl. 9:11) Loor iduọn phọ, yira ko/tue okaạph mughumọ ipẹ yira ogbiighi bọ kemoọgh ni ekol obobọ yira kotọl li r’ighuḍum omhiịn oomo ipẹ yira ogbiighi bọ oḍighi.
13. E/legheri ipẹ aghuḍum mọ ayira katọl bọ ghisigh ritir ghan iyira ika?
13 E/legheri ipẹ aghuḍum katọl bọ ghisigh etue ni eḍighi ipaanhaạn ingọ iyira. Ika? Eeni yira otue ni omiigh ooḅaghamhiạn aloor ilọ ipẹ kemite bọ ghisigh, kụ ipẹ phọ etue ni eḍighi idị yira kotoph ibo phọ ayira. Ekperenhom iiḅaghamhị ḅilhẹ r’araraạr dị olhoghi u/seere ketue ni ekọm okururu ingọ iyira. Kụ mem dị ipẹ yira ogbiighi bọ i/kị ipẹ yira rowạ bọ, etue ni ekọm mabi r’oḅonyonhu ozuan ingọ iyira.—Prov. 13:12.
14. Oḅaạl olhoghi phọ ayira akpasị esi eeghe? (Miịn kẹn sifoto phọ.)
14 Etigheri ipaanhaạn dị yira osoman, yira kotue ni oḍeenhaan mọ yira rokumu ghan aZihova loor iduọn yira ophomhoghiạn bọ nyodị, k/ilọ asuọ dị yira romoọgh. ABaibul phọ aḍeenhaan mọ i/wạ dị yira kogon dị aZihova kughoph iyira esi atorobọ iiḅaghamhị dị yira osoman. Aḍeenhaan kẹn mọ aZihova ra/gbiighi ghan kepẹ omhạn raraạr dị kimitenhaan iyira. AZihova alegheri ni mọ oḅaạl olhoghi ayira o/kpasị esi olhegheri oomo ipẹ kimitenhaan bọ iyira ghisigh. Kparipẹ ghụn, akpasị esi owạ ghan iiḅakiọm odị ḅilhẹ ronhaghanhạn ghan odị. (Jer. 10:23) Eḍighi maạr dị yira owạ ghan iiḅakiọm aZihova mem dị yira rowạ osopha osopha, pọ eḅilhẹ ekịgh mudị yira roḅẹm ghan mọ: “Lọ [aZihova] ameera ni, yoor kotọl li oḍighi iphẹn r’ipẹ.”—Jems. 4:15.
Owạ ghan iiḅakiọm aZihova kụ oḅilhẹ onhaghanhạn ghan odị ringọ ghan iyira ogey oghoph (Miịn siikpịgh phọ 14-15)b
15. Eeghe iyaạr kụ edị yira olhegheri ilọ aghisigh phọ?
15 Ii, yira u/legheri ipẹ iḍue ketọl bọ, kuolọ iyaạr dị yira olhegheri pọ aZihova maguanhaan mọ awe kotọl li k’agee-pọ epẹ k’akẹ r’isiẹn ade phọ. Yira olegheri ni mọ Enhaạn okpẹ ka/gbạ, ḅilhẹ mọ iyaạr i/lo dị kekikima nyodị omhunhenhi aruguanhaan phọ odị. (Taị. 1:2) Odị bịn kụ “rakaạph ghan ipẹ kemite bọ ḅilhẹ kepẹ omhạn ilọ araraạr phọ ipẹ kemite bọ ghisigh.” Araraạr dị odị aghaạph epẹ omhạn dị k”emite ghan i/lo, kụ araraạr dị odị aghaạph ilọ aghisigh phọ ketuụgh kẹn ni emite. (Isa. 46:10) Yira okạr okuphom owol mọ iyaạr i/lo dị kekikima aZihova ophomhoghiạn ayira. (Rom 8:35-39) Odị kungọ ni iyira osụ-olhoghi phọ, iidereghị phọ, ḅilhẹ r’iikpọ phọ yira omhoghi bọ orue okparạm atorobọ adọl dị yira osoman. Ii, aZihova kulhoghonhaạn ni iyira ḍighaạgh aḅilhẹ usẹph iyira.—Jer. 17:7, 8.
YIRA KO/TUE ONAGHANHẠN OMẠN ESI DỊ AZIHOVA ULHEGHERI IYIRA ASI
16. Odaphạn Psalm 139:1-6, eeghe araraạr ilọ ayira kụ edị aZihova alhegheri dị yira ko/tue olegheri omạn?
16 Bạl Psalm 139:1-6. Olemiạ phọ ayira alegheri ni ipẹ odị ulhẹm bọ iyira, odị alegheri ni emitenhom mọ ayira, ipẹ yira rologhoma ghan bọ iyaạr, ḅilhẹ r’eten iitughiạn phọ ayira. Odị amoọgh ni ogbolhomaam ayira oomo amem. Mem dị yira oghaạph obobọ oḍighi iyaạr, odị alegheri ni iyaạr phọ ekọm bọ kụ yira oghaạph bọ obobọ oḍighi bọ iyaạr phọ epẹ phọ. Idiphọ Uw-emhạ phọ Devid aghaạph bọ, aZihova aakolhobian ni oomo amem olhoghonhaạn ayira ḍighaạgh. P’eeghe idị olhoghi ayira aḅaạl olhegheri mọ Uw-emhạ oomo aḅirinhi phọ ḅilhẹ r‘Olemhiạ akẹ phọ r’ade phọ rulhọgh ghan ni iyira elhegh kaḅilhẹ uphogh iyira! ADevid aghaạph mọ: “Olhegheri iyaạr anạ ilọ amhị, akẹl iboom. Upel imhị onhaghanhạn.”—Ps. 139:6.
17. Eeghe kụ iḍighi kụ ketue bọ ikparanhaạn iyira omheeraam mọ aZihova akạr ri ulhegheri iyira?
17 Eten phọ uukonhom bọ iyira, eḍighinhom iyaạr ekpisi ayira, obobọ omheeraam dị yira omhoọgh ghan etue ni ekọm idị kikparanhaạn iyira omhiịn aZihova idiphọ Odẹ dị akạr uphomhoghiạn iyira. Eeni yira otue ni ootughiạn kẹn mọ ikarạph dị yira oḍighi epẹ omhạn mekọm idị aZihova ka/tue mun aḍuraan utuman iyira. ADevid bịn alhoghoma aani ghan ni iduọn phọ. (Ps. 38:18, 21) Oye dị rakparaghạ onme eten aghuḍum odị atue ni amiigh ootughiạn mọ, ‘Eḍighi maạr dị Enhaạn akạr unhaghanhạn imhị, uḍighi ika kụ odị kawạ bọ mọ mị ukel eten aghuḍum mọ amhị miluạn bọ imhị?’
18. Eeghe asuọ kụ edị yira komoọgh mem dị yira omheeraam mọ aZihova ulhegheri iyira upu iyira phọ r’aloor? (Miịn kẹn sifoto phọ.)
18 Yira kotue ni omeeraam mọ aZihova akạr alegheri ilọ ayira upu iyira, ḅilhẹ kẹn mọ odị ramiịn ghan ni imạ araagharạ ayira dị yira phọ r’aloor u/miịn. Ghalhamọ r’iduọn odị ramiịn ghan bọ ni sipiomạn phọ ayira, odị anaghanhạn ni iyaạr phọ eḍighi bọ kụ yira rologhoma bọ ḅilhẹ rozọ ghan bọ eten phọ epẹ phọ, kụ odị uphomhoghiạn ni iyira etigheri ipẹ phọ. (Rom 7:15) Mem dị yira olhọgh elhegh mọ aZihova amiịn ni egey iyaạr loor ayira, kingọ iyira akpọ oḅio phọ yira omhoghi bọ oghiọm aghisigh okumu aZihova r’ibo.
AZihova asighẹ imạ araraạr phọ yira kokelhọm bọ siphẹ omhoom aḅirinhi phọ kụ rukparamhiọm ghan iyira orue okaran araraạr dị yira u/seere olhoghi dị kimitenhaan iyira (Miịn siikpịgh phọ 18-19)c
19. Eeghe kụ edị yira olhegheri okuphom owol ilọ aZihova?
19 Yira olegheri ni mọ aZihova ephomhoghiạn. Yira u/moọgh iikia ilọ ipẹ phọ. (1 Jọn 4:8) Asiigbu elhiom eḍighinhom iyaạr phọ odị eḍeenhaan ephomhoghiạn phọ r’aḍiḅeraạn phọ odị amhoọgh bọ esi ayira. Yira olegheri kẹn mọ aZihova rawạ mọ omhoọgh ghuḍum k’agee-pọ. Odị amiteom ekiạ etagharạn phọ oḍighi idị iphẹn phọ kedugh. Inmo ekiạ phọ ingọ iyira okuphom owol mọ yira kotue ni okumu aZihova ghalhamọ r’iduọn yira u/munughan bọ. (Rom 7:24, 25) Yira olegheri kẹn mọ “Enaạn ebụgh ni epu iloghi phọ ayira, eḅilẹ elegheri oomo araraạr.” (1 Jọn 3:19, 20) AZihova ramiịn ghan ni torobọ iyaạr ilọ ayira, kụ odị akuphom owol mọ yira kotue ni oḍighi ipẹ odị rawạ bọ.
20. Eeghe kụ kilhoghonhaạn iyira ḍighaạgh dị yira koo/ḅaghamhiạn loor iboom ilọ araraạr dị yira u/legheri?
20 AZihova kaa/ghinhaạn iyira raraạr dị emhoghi mọ yira olhegheri. Mem dị yira osooromhi loor kụ olhọgh elhegh iphẹn phọ, yira koo/ḅaghamhiạn loor ilọ araraạr dị yira ko/tue opamaghạn, yira kogbon ghụn raraạr dị ekạr emhạn maạr. Yira oḍighi iduọn phọ, pọ yira roḍeenhaan ghan mọ yira oḍuom ni olhoghi aZihova, Opọ “alhegheri bọ oomo araraạr.” (Job 36:4) Ii, nyiidiphọ onhaghạn aḍughụm ayira ilọ iniin araraạr akom ni, kuolọ yira opogh ni rokiọm ghisigh mem dị Egbogh Enhaạn phọ ayira kutughemhị iyira imhoom araraạr ilọ odị k’agee-pọ.—Eccl. 3:11.
AḌUỌR PHỌ 104 God’s Gift of Holy Spirit
a AZizọs kụ kaḍiemhiom eghạm mọ kobe bọ ophiemhiom okarạph aḅirinhi phọ aSetan. Esi iduọn phọ, yira kotue ni oḅẹm mọ nyiidiphọ odị malhegheri ni ḍio phọ eghạm mọ Amagedọn kemiigh bọ r’amem mọ odị “kanyeene bọ idiphọ ookparạ.”—Ogan. 6:2, 19:11-16.
b ILỌ AFOTO : Odẹ r’oọny odị rolọgh ghan raraạr okuru eḅuạ abidị, pidị eghunotu phọ omaạr ookolhobian eḍighi maạr dị ekperenhom iyaạr emite.
c ILỌ AFOTO PHỌ: Onyọ umor dị asoman iiḅaghamhị raatughiạn ghan ilọ ibo phọ odị kamoọgh bọ siphẹ omhoom aḅirinhi phọ.