Iḍighi Ghan ‘Ipẹ Enaạn Rakaạph Bọ’

1-2. Eeghe kụ rengọ ghan bọ rebenhẹ phọ Enhaạn oḅaạl olhoghi? (Jems 1:22-25)

AZIHOVA r’oobị Oọny phọ odị rowạ dị olhoghi ayira kaḅaạl ghan. Opọ agẹ bọ Psalm 119:2 aḅẹm mọ: “Oḅaạl olhoghi odianhaan buphẹ odạph bọ itooghị phọ odị, buphẹ onhaghanhạn bọ nyodị r’oomo olhoghi abidị.” AZizọs aḅẹm kẹn ni mọ: ‘Oḅaạl olhoghi odianaan ghụn ni buphẹ ronaghạn ghan bọ oghaạph phọ Enaạn koḅilẹ ooko.’—Luk 11:28.

² Idiphọ awe dị rooseeny ghan aZihova, yira awe oḅaạl olhoghi. Eeghe kụ iḍighi? Yira omoọgh ni ibadị ariphigh, kuolọ ekpanhạ ephigh phọ pọ iduọn yira robạl ghan bọ Ekpo-onhụ phọ Enhaạn kụ oḅilhẹ rokparaghạ ghan osighẹ oḍighinhom ipẹ yira rotuughạ bọ.—Bạl Jems 1:22-25.

3. Ika kụ edị yira romooghọm ghan suọ mem dị yira osighẹ oḍighinhom ipẹ edi bọ siphẹ Ekpo-onhụ phọ Enhaạn?

³ Ibadị areten edi ni dị yira romooghọm ghan suọ mem dị yira ‘otuụgh oḍighi ipẹ Ekpo-onhụ phọ Enhaạn rekaạph bọ.’ Esi omaạm, mem dị yira osighẹ oḍighinhom ipẹ yira aạl bọ siphẹ Ekpo onhụ phọ Enhaạn, reḍighi ghan idị olhoghi aZihova kaḅaạl. Olhegheri iphẹn phọ ringọ ghan iyira oḅaạl olhoghi. (Eccl. 12:13) Osighẹ oḍighinhom ipẹ yira aạl bọ siphẹ Ekpo-onhụ phọ Enhaạn, rekparamhị ghan siya ayira r’abuọ eghunotu ayira ḅilhẹ r’abuọ ookpomhoghan phọ ayira. Dị iikia i/lo, eeni nạ mamhiịn ni iphẹn phọ siphẹ aghuḍum mọ anạ. Idị epelhom siẹn, yira rokpetenhaan ghan ni iniin iiḅaghamhị phọ ipẹ remitenhaan ghan bọ buphẹ ro/dạph ghan bọ olhogh phọ aZihova. Okạr agey, yira omeeraam ni ipẹ Uw-emhạ phọ Devid aghaạph bọ. Mem dị odị r’oghaạph oghol olhogh phọ, itọ phọ r’iiruẹn phọ aZihova, odị akureriom mọ: “Iikpiạ dị ukpẹ ghan imhị esi ooko abidị ebụgh ni.”—Ps. 19:7-11.

4. Uḍighi ika kụ re/dugh ghan bọ osighẹ oḍighinhom ilọ yira otuughạ siphẹ Ekpo-onhụ phọ Enhaạn?

⁴ K/oomo amem kụ edị redugh ghan odaphạn ilọ yira aạl siphẹ Ekpo-onhụ phọ Enhaạn. Ghalhamọ r’iduọn yira omhoọgh bọ ni ibadị araraạr oḍighi, omiteom ghan ni mem otuughạ Baibul phọ pidị yira otue onaghanhạn ipẹ aZihova rawạ bọ mọ oḍighi. Esi iduọn phọ, ooḅeghiọn iniin areten dị ketue ilhoghonhaạn iyira ḍighaạgh ogbor ghan aạl Ekpo-onhụ phọ Enhaạn. Yira kooḅeghiọn kẹn raraạr dị keḍighi idị yira kootughiạn ghan ipẹ yira aạl bọ ḅilhẹ r’areten dị yira kotue osighẹ oḍighinhom ipẹ yira otuughạ bọ.

SEERE MEM AẠL GHAN EKPO-ONHỤ PHỌ ENHAẠN

5. Ighẹn iiḍighi kụ resighẹ ghan muboom amem ayira?

⁵ Ibadị arebenhẹ aZihova rodon omoọgh ni ibadị araraạr oḍighi. Yira rolọgh ghan ni muboom amem oḍighi araraạr dị aBaibul phọ aḅẹm mọ emạn maạr. Esi omaạm, ibadị ayira omoọgh ni iiḍighi ophoghaam aloor ayira r’abuọ eghunotu phọ ayira. (1 Tim. 5:8) Ibadị ayira rolọgh ghan kẹn ni mem ophogh abuọ eghunotu ayira dị asiloor i/nighẹ obobọ asiạ meghị. Ewạ kẹn ni dị oomo ayira kopogh omhoon aloor phọ ayira, kụ resighẹ ghan kẹn ni mem. Epel iphẹn phọ, yira omoọgh kẹn ni iiḍighi siphẹ ookpomhoghan phọ. Okpanhạ oḍighi ayira pọ ophinhom aani abin oghaạph iiḅi iinhaghạn phọ. Etigheri oomo araraạr phọ iphẹn nạ amhoọgh bọ oḍighi, nạ kamoọgh ika mem aạl ghan aBaibul phọ, ogbirima, r’oḅilhẹ osighẹ oḍighinhom?

6. Nạ kaḍighi eeghe pidị nạ atue agbor ghan abạl Baibul phọ? (Miịn kẹn afoto phọ.)

⁶ Aạl ghan aBaibul phọ eḍighi ni eniin iyaạr dị emhạn maạr iboom dị yira koḍighi idiphọ aKristẹn. Esi iduọn phọ, ewạ mọ oseere mem dị yira kobạl ghan. (Fil. 1:10) Idị egbolhomaam oye dị kamoọgh oḅaạl olhoghi, aPsalm eḅẹl emhụ phọ eḅẹm mọ: “Oḅaạl olhoghi odianhaan oye phọ opọ amhoọgh bọ ḍiḅeraạn olhogh phọ aZihova kụ rabạl ghan bọ ḍughul r’ootaany.” (Ps. 1:1, 2) Iphẹn phọ ekạr eḍeenhaan mọ ewạ ni dị yira komiteom ghan mem aạl ghan aBaibul phọ. Oghẹn amem kụ ikpẹ aạl ghan aBaibul phọ? Ophagharanhaạn oomo phọ ayira ka/ḍighi nyoniin. Kuolọ ekpanhạ iyaạr phọ pọ, torobọ amem lọ oye phọ asopha aạl, eḍighi ni mem dị oye phọ katue agbor ghan abạl. Onyọ umor dị oghol mọ Victor aḅẹm mọ: “Riḅeraạn ghan imhị aạl aBaibul phọ esoph aḍiroọr. Ghalhamọ r’iduọn mị u/ḍighi bọ oye dị raḅon ghan kosumạ, aḍiroọr phọ kụ edị mị ra/moọgh ghan ibadị araraạr dị kigbaragbaramhị imhị. Kụ iduọn ibadị iitughiạn k”eru bọ olhoghi imhị rilhoghonhaạn ghan imhị ḍighaạgh ogbon ipẹ mị ratuughạ bọ.” Nạ aḍighi aani iduọn phọ ke”nighẹ ḍughụm? Puruan loor mọ, ‘Oghẹn amem kụ edị mị katue ghan abạl Baibul phọ?’

GBIRIMA GHAN IPẸ NẠ AẠL BỌ

7-8. Eeghe kụ ketue ikikima iyira okạr omhooghọm asuọ ibạl aBaibul phọ ayira? Kaạph amaaniọm.

⁷ Okạr oghaạph, eeni amem yira otue ni obạl ibadị arumhuoghaạph obobọ siikpịgh dị u/gbirima ipẹ esi phọ rekaạph bọ. Nạ m’aạl ghan ni iyaạr bịn moọny amem abulha ipẹ nạ aạl bọ? Oye o/lho dị iphẹn phọ k”emitenhaan ghan. Kụ iphẹn phọ ketue kẹn ni emite mem dị yira aạl Baibul phọ. Esi omaạm, eeni yira osopha aạl ghan ibadị ariisi aBaibul torobọ aḍio. Opọ phọ ogey osopha ni. Ekpẹ ni dị yira kopighi siigbu kụ oporogh oteẹny. (1 Kọr. 9:26) Kuolọ eḍighi maạr dị yira rowạ okạr omhooghọm asuọ ibạl aBaibul phọ, pọ ewạ dị yira kobạl kụ oḅilhẹ ogbirima.

⁸ Ooḅeghiọn oghaạph omaaniọm mọ ophọn phọ: Iizuphạ remoghi ghan olophiạ orue oḍum. Kuolọ ketọl ika eḍighi maạr dị oboom olophiạ alhọph eẹny ekulha amem bịn amuụm arọph iizuphạ phọ. Iizuphạ phọ ke/mooghọm suọ olophiạ phọ. Kemooghọm ghụn suọ mem dị olophiạ phọ alhọph enụm enụm kụ ade phọ emhoọph muụm mọ kụ iizuphạ phọ eḅilhẹ emhoọph aani muụm mọ siphẹ ade phọ. Eniin phọ eten phọ kẹn ni, yira kuu/gborion ghan mem dị yira robạl Baibul phọ, loor esi dị, yira oḍighi iduọn phọ yira ko/moọgh mem ogbirima ipẹ yira robạl bọ, kụ koo/tughiạn osighẹ oḍighinhom.—Jems. 1:24.

9. Yira koḍighi ika mem dị yira omhiịn mọ yira roogborion ghan mem dị yira robạl Baibul?

⁹ Amem merọl ghan ni dị nạ amhiịn mọ nạ raagborion ghan mem dị nạ rabạl Baibul phọ? Nạ kaalemhi raraạr ika? Miigha loor. Lọgh ikuph ootughiạn ghan ipẹ nạ aạl bọ obobọ rabạl bọ. Kụ nạ katue ni aḍighi iduọn phọ. Nạ katue ni abughẹ mem mọ nạ ralọgh ghan bọ aạl aBaibul phọ pidị nạ amoọgh mem ootughiạn ghan ipẹ nạ rabạl bọ. Enhọn eten pọ nạ atue ni abạl iphurukpu asiikpịgh bịn, kụ asighẹ mem mọ esugha bọ agbirimaam ipẹ nạ aạl bọ. AVictor oghaạph bọ oghol epẹ omhạn aḅẹm mọ, “mị ra/bạl ghan iboom, eeni amem eniin emhuoghaạph bịn. Kụ loor iduọn mị rabạl ghan bọ esoph aḍiroọr, ridughanhaan ghan imhị ogbirima ipẹ mị aạl bọ oomo emhụ aḍio phọ.” Torobọ eten dị nạ asopha aạl, emoghi ni omhiigha aloor kụ aạl obọ nạ amhooghọm suọ ibạl phọ anạ.—Ps. 119:97; miịn igbe phọ “Asipuru Dị Ekpẹ Ooḅeghiọn.”

10. Ngọ eḍeenhaan idị nạ katue awạ reten osighẹ oḍighinhom ipẹ nạ ratuughạ bọ. (1 Tesalonikạ 5:17, 18)

¹⁰ Etigheri mem mọ nạ asopha bọ aạl ghan aBaibul phọ r’onhụ amem mọ nạ ralọgh ghan bọ, ka/bilhẹ osighẹ ipẹ nạ aạl bọ oḍighinhom. Mem dị nạ rabạl esi Baibul, puruan loor anạ mọ, ‘Ika kụ idị mị kasighẹ iphẹn mị aạl bọ aḍighinhom nyiidiphọ obobọ epẹ ghisigh?’ Esi omaạm, oḅẹm mọ ibạl aBaibul phọ anạ emeelhom ḍinyạ 1 Tesalonikạ 5:17, 18. (Bạl.) Mem dị nạ aạl iyạl phọ asiikpịgh phọ iphẹn phọ, nạ atue ni asophe pạ kụ aatughiạn onhụ amem dị nạ raaḅereghị ghan r’araraạr phọ ipẹ nạ rakaạph ghan bọ siphẹ iiḅereghị phọ anạ. Ekpẹ kẹn ni ootughiạn ghan araraạr dị nạ kakol ghan asẹph aZihova. Kụ eeni nạ usopha mọ nạ kakol iraạr araraạr asẹph aZihova. Eḍighi maạr dị nạ asighẹ iyạl ikpo ikalhạ agbirima ghan raraạr phọ nạ atuughạ bọ siphẹ aBaibul phọ, kelhoghonhaạn nyinhạ ḍighaạgh onhaghanhạn Ekpo-onhụ phọ Enhaạn kụ otuụgh oḍighi ipẹ rekaạph bọ. Kụ nạ aḅilhẹ apoph akị ghisigh idiphọ oye dị asighẹ Ekpo-onhụ phọ Enhaạn raḍighinhom. Kụ kokaạph ika eḍighi maạr dị nạ amhiịn mọ nạ amoọgh ni ibadị araraạr ooḅenhion siphẹ aghuḍum mọ anạ?

PIGHI SIIGBU DỊ NẠ KATUE NI APOROGH ATEẸNY

11. Eeghe kụ ketue eḍighi iyaạr dị nạ kaḅonyonhu azuan eeni amem? Ngọ eḍeenhaan.

¹¹ Nạ atue ni aḅonyonhu azuan mem dị nạ aạl Baibul phọ kụ amhiịn mọ ewạ ni onme ibadị araraạr siphẹ aghuḍum mọ anạ. Esi omaạm: Oḅẹm mọ ḍiniin aḍio nạ aạl esi aBaibul dị engọ iphụr arurụ mọ ku/pogh ghan nyoniin usooromhi kụ ophophe nyoriphọ. (Jems 2:1-8) Esi iduọn phọ, nạ umhiịn mọ ewạ ni dị nạ kanme eten phọ epẹ nạ razoọm ghan bọ we, kụ nạ aḍighi iyaạr amiteom. P’eeghe imạ! Ḍieriphọ aḍio phọ, bịn nạ aạl esi dị eḅẹm mọ ekpẹ ni ophamhaghạn anem mọ anạ . (Jems 3:1-12) Kụ nạ aatughiạn mọ eeni amem nạ rakaạph ghan ni raraạr dị reḅonyon ghan oye kezu. Bịn nạ arue asopha mọ emhiigh rodon kụ rekị, oghaạph phọ anạ kakparamhị ghan we. Ḍio dị emhunhenhiom iraạr, bịn nạ aạl esi aBaibul dị ephạm iphụr arurụ dị eḅẹm mọ ka/ḍighi oyaghirị aḅirinhi phọ. (Jems 4:4-12) Kụ nạ amhiịn mọ ewạ ni omhiigha loor kụ osaḅạr araraạr phọ nạ rasighẹ ghan bọ kazaamhiọm loor. Ḍio phọ emhunhenhiom bọ inya phọ, nạ katue ni aḅonyonhu azuan loor iduọn nạ amhoọgh bọ ibadị araraạr onmeeghi siphẹ aghuḍum mọ anạ.

12. Uḍighi ika kụ i/kpẹ bọ oḅonyonhu ozuan eḍighi maạr dị ituughạ aBaibul phọ anạ egananami raraạr dị ekpẹ onmeeghi siphẹ aghuḍum mọ anạ? (Miịn kẹn igẹ phọ edi bọ ude.)

¹² Ka/ḅonyonhu azuan eḍighi maạr dị nạ amhiịn mọ ewạ ni onme ibadị araraạr siphẹ aghuḍum mọ anạ. Iphẹn phọ emạ emiteom mọ nạ asooromhi ni loor kụ aḅilhẹ ratuughạ Baibul phọ agey. Oye dị asooromhi loor kụ aḅilhẹ alhọgh elhegh riisi dị odị asughanham rabạl ghan Baibul phọ eten dị keloghonhaạn nyodị ḍighaạgh onme araraạr siphẹ aghuḍum mọ odị.a Ka/bulha kẹn mọ, omhoọgh imhoom aroozọ phọ k/iyaạr dị koḍighi mem bịn. (Kọl. 3:10; poghom study note phọ eḅẹm bọ mọ “is being made new.”) Eeghe kụ kelhoghonhaạn nyinhạ ḍighaạgh oghiọm aghisigh osighẹ oḍighinhom ipẹ nạ ratuughạ bọ siphẹ Ekpo-onhụ phọ Enhaạn?

13. Ika kụ edị nạ katue apighi siigbu dị nạ katue ni ateẹny? (Miịn kẹn afoto phọ.)

¹³ Kparipẹ r’olhọgh ikuph onme oomo araraạr dị nạ amhiịn mọ enighẹ onme siphẹ aghuḍum mọ anạ, kparaghạ ghụn onme enụm enụm. (Prov. 11:2) Nạ atue ni aḍighi iduọn: Gẹ alhọgh esi oomo araraạr phọ nạ amhiịn bọ mọ enighẹ onme siphẹ aghuḍum mọ anạ, kụ amhiighom nyeniin obobọ iyạl. Nạ romhadạn kụ aḅilhẹ amhiigh ipheriphọ. Nạ kamiighom nyeghẹn?

14. Ighẹn asiigbu kụ edị nạ katue amiighom?

¹⁴ Nạ atue ni amiighom elọ edughanhaan nyinhạ oḍighi. Obobọ nạ atue ni amiighom elọ ekạr emhoghi mọ nme siphẹ aghuḍum mọ anạ. Mem lọ nạ masopha iyaạr dị nạ kamiighom, waaghị raraạr ilọ iyaạr phọ siphẹ arinyạ ookpomhoghan phọ. Nạ atue ni aḍighinhom Watch Tower Publications Index obobọ the Research Guide for Jehovah’s Witnesses. Kol ḍiigbu phọ nạ aghọr bọ aaḅereghị, alhọm mọ aZihova angọ nyinhạ eephuạ r’inyaạm oḍighinhom ipẹ nạ aghaạph bọ. (Fil. 2:13) Kụ akparaghạ oḍighi ipẹ nạ atuughạ bọ. Mem dị nạ aphorogh ateẹny ḍiḅẹl aḍiigbu phọ nạ aghoọr bọ, kenyu ni nyinhạ oghiọm aghisigh ophorogh iphoriphọ. Okạr oghaạph, mem dị nạ arue anme eniin iyaạr siphẹ adọl aghuḍum mọ anạ idiphọ onyọ aKristẹn obobọ amhoọgh eegharạ dị nạ u/moọgh ghan, kenyu ni nyinhạ oghiọm aghisigh onmeeghi inhọn araraạr.

MEERA EKPO ONHỤ PHỌ ENHAẠN EḌIGHI OḌIGHI SIPHẸ ALOOR PHỌ ANẠ

15. Eeghe ogbaranhaạn kụ odi igbo awe phọ aZihova r’abunọn awe dị robạl aani ghan Baibul phọ? (1 Tesalonikạ 2:13)

¹⁵ Abuniin awe m’aạl li Baibul phọ ibadị amem. Kuolọ bidị okạr ri omeeraam ipẹ aBaibul phọ ratughemhị bọ ḍughụm? Bidị rodaphạn ni ipẹ aBaibul phọ ratughemhị bọ obobọ ronmeeghi ni raraạr siphẹ aghuḍum mọ abidị ḍughụm? Eeye! Ibadị awe ro/daphạn ghan ipẹ aBaibul phọ atughemhị bọ. Kuolọ awe phọ aZihova rodaphạn ghan ni ipẹ aBaibul phọ atughemhị bọ! Idiphọ aKristẹn oḅẹl okuron asiạ phọ, yira osighẹ ni Baibul phọ idiphọ aḍinyạ dị ephạm dom Enhaạn. Idị epelhom siẹn, yira rokparaghạ ghan ni oḍeenhaan mọ Ekpo onhụ phọ Enhaạn reḍighi ni oḍighi siẹn aghuḍum mọ ayira.—Bạl 1 Tesalonikạ 2:13.

16. Eeghe kụ kilhoghonhaạn iyira ḍighaạgh oḍighi awe dị kotuụgh ghan oḍighi ipẹ Ekpo onhụ Enhaạn eghaạph bọ?

¹⁶ Re/dugh ghan oomo amem aạl Ekpo onhụ phọ Enhaạn kụ oḅilhẹ osighẹ oḍighinhom. Etue ni ikparanhaạn iyira owạ amem aạl aBaibul phọ. Eeni kẹn yira roogborion ghan mem dị yira robạl Baibul phọ, bịn ro/lọgh ghan mem ootughiạn ipẹ yira aạl bọ. Yira otue ni oḅonyonhu ozuan mem dị yira omhiịn mọ ewạ ni dị yira konmeeghi ibadị araraạr siphẹ aghuḍum mọ ayira. Etigheri ipaanhaạn phọ nạ asoman bọ, kaa/tughiạn mọ nạ ka/tue akpạr apu. R’olhoghonhaạn aḍighaạgh aZihova, nạ katue ni akpạr apu. Eḍighi ni idị yira kosopha osighẹ olhoghonhaạn aḍighaạgh phọ aZihova, kụ oḍighi we dị konaghạn ghan Ekpo onhụ phọ Enhaạn kụ otuụgh oḍighi. Dị iikia i/lo, oḅaạl olhoghi phọ ayira kabụgh ni mem dị yira aạl ghan Ekpo onhụ phọ Enhaạn, kụ osighẹ ghan oḍighinhom siẹn aghuḍum mọ ayira.—Jems 1:25.