Tuughạ Ootughiạn Ghan Idiphọ AZihova R’aZizọs

1-2. Ophomhoghiạn aZihova eḅaramaạm eeghe, kụ ika kụ idị aZizọs aḍighi aḍeenhaan iphẹn phọ?

“NẠ KAPOMOGHIẠN Omoọgh-we Emụgh phọ anạ r’oomo ologhi anạ r’oomo [aghudụm] anạ r’oomo inyaạm anạ r’oomo iitughiạn anạ.” (Luk 10:27) AZizọs aghaạph ni aagholomhi mọ olhogh phọ ophọn phọ kụ amhạn maạr apu siphẹ iilhogh phọ aMozis. Esi iduọn phọ, ewạ mọ yira ophomhoghiạn aZihova r’oomo araraạr dị yira omhoọgh. Iduọn phọ pọ aruuphuạ phọ ayira, ipẹ yira rologhoma ghan bọ iyaạr, ḅilhẹ r’eten phọ yira roḍighinhom ghan bọ inyaạm mọ ayira keḍeenhaan ghan mọ yira opomhoghiạn ni aZihova. Ewạ kẹn ni dị iitughiạn phọ reḍuạ ghan bọ olhoghi phọ ayira kemite keḍeenhaan ghan mọ yira opomoghiạn ni aZihova. Ii, yira ko/tue okạr onaghanhạn oomo iitughiạn phọ aZihova. Kuolọ yira kotue ni onaghanhạn iitughiạn phọ Odị esi otuughạ ghan olhoghi phọ aKraist loor esi dị odị aḅọph iitughiạn r’Enhaạn.—1 Kọr. 2:16

² AZizọs aphomhoghiạn ni aZihova r’oomo olhoghi odị. Odị alhegheri ni ogbi phọ Enhaạn ilọ odị kụ asopha oḍighi ipẹ phọ ghalhamọ r’iduọn odị kakol bọ ni emhụ ipẹ phọ amiinhọm. Loor iduọn odị agbon bọ oḍighi ogbi Odẹ phọ odị, aZizọs o/mheera mọ iyaạr egbaragbaramhị nyodị esi aḍiigbu phọ aḍiphẹ phọ.

3. Eeghe iyaạr kụ edị otelhedom mọ aPita atuughạ ḍighaạgh aZizọs, kụ eeghe kụ edị odị aroma Kristẹn oḍighi? (1 Pita 4:1)

³ APita r’abueriphọ abutelhedom mọ umhoọgh ni eepoogh orọl r’aZizọs kụ otuughạ ipẹ odị raatughiạn bọ. Mem mọ aPita agẹ bọ ḍiḅẹl aḍinyạ phọ odị, odị aroma ni Kristẹn phọ mọ bidị osighẹ aani iniin phọ iitughiạn phọ aKraist okparamhiọm loor. (Bạl 1 Pita 4:1.) Ekpo-onhụ phọ “ekparamiọm loor” aPita aḍighinhom bọ eḍighi ekpo-onhụ awe eghạm, kụ remạ ghan onyọ eghạm dị asighẹ iinyạ eghạm anyaaghiạn ilọ eghạm. Esi iduọn phọ, eḍighi maạr dị onyọ aKristẹn atuughạ ootughiạn ghan eniin phọ eten phọ aZizọs aatughiạn ghan bọ, pọ odị kamoọgh ni oomo iinyạ phọ ewạ bọ omherenyạn ikarạph ḅilhẹ r’omheerạ agey siẹn aḅirinhi phọ aSetan.—2 Kọr. 10:​3-5; Efẹ. 6:12.

4. Eeghe araraạr dị yira kooḅeghiọn siẹn emhuoghaạph phọ ephẹn phọ kụ kilhoghonhaạn iyira ḍighaạgh odaphạn oroma phọ aPita?

⁴ Yira kooḅeghiọn eten phọ aZizọs raatughiạn ghan bọ iyaạr ḅilhẹ r’idị yira kotue otuughaạny aani nyodị. Yira kotuughạ idị (1) yira kotuughaạny eten phọ aZihova raatughiạn ghan bọ, ipẹ phọ kilhoghonhaạn iyira ḍighaạgh oḅọph eten iitughiạn, (2) yira kosooromhi loor, ḅilhẹ (3) yira komoọgh iitughiạn dị emhoon esi obeḍenhọm ghan aZihova esi iiḅereghị.

TUUGHAẠNY AANI ETEN IITUGHIẠN PHỌ AZIHOVA

5. Ika kụ idị aPita apiọm ootughiạn aani ipẹ aZihova aatughiạn bọ?

⁵ Amem irọl li dị aPita amhoọgh iitughiạn dị egbatanhaạn r’ipẹ aZihova. AZizọs aḅenhị butelhedom mọ odị m’onọ kakị Jeruselem, kụ oḅọgh nyodị ongọ buọ arumhụ ekụ iiḅereghị phọ, omiinẹ, kụ okiigh nyodị. (Mat. 16:21) Eeni ikparanhaạn ni Pita omheeraam mọ aZihova kameera mọ oghiigh Zizọs phọ awe Izrạl oḍuom bọ olhoghi ḅilhẹ aḍighi bọ aMesaya phọ oguanhaan bọ. (Mat. 16:16) Kụ aPita aphạm Zizọs atenhom ogbạl kụ aḅenhị mọ: “Omoọgh-we. Enaạn ki/meera! Iphẹn phọ nyinạ ki/mitenaan!” (Mat. 16:22) Loor iduọn iitughiạn phọ aPita ilọ oghaạph phọ ophọn i/ḍighi bọ iitughiạn phọ aZihova, iitughiạn phọ odị r’ipẹ aZizọs i/ḅọph.

6. Ika kụ idị aZizọs aḍeenhaan mọ iitughiạn phọ odị eḅọph ni r’ilọ aZihova?

⁶ Iitughiạn phọ aZizọs ikạr kụ eḅọph r’ipẹ Odẹ phọ odị. AZizọs aḅenhị Pita mọ: “Setan, ḍuạ siẹn ghisigh amị. Nạ atu ogbororian aghisigh amị, Ioor esi dị iitughiạn phọ anạ, iitughiạn awe, k/iitughiạn Enaạn.” (Mat. 16:23) Eeni aPita amhoọgh ni igey iitughiạn kụ angọ bọ Zizọs oromha phọ opọ phọ, kuolọ aZizọs aghel li oromha phọ odị. Yira otuughạ eeghe siẹn phọ? Iitughiạn oḅẹm mọ aZizọs ka/miinhọm obobọ ka/mugh, i/ḍighi ogbi aZihova ilọ aZizọs. Iphẹn phọ itughemhị Pita idị emhạn maạr omhoọgh aani iitughiạn Enhaạn.

7. Ika kụ idị aPita aḍeenhaan mọ odị rawạ ni oolemhi iitughiạn phọ odị pidị eḅọph r’ipẹ aZihova? (Miịn opoḍi phọ.)

⁷ Esighẹ rekị, bịn aPita aḍeenhaan mọ odị rawạ ni omhoọgh aani iitughiạn phọ aZihova. Amem mọ meteẹny dị awe areelhe phọ u/ḍuna yogh bọ koḍighi aani pakirị awe phọ Enhaạn. Enhaạn amạ Pita oghị oghaạph iiḅi iinhaghạn phọ oḅenhị oniin oye olọ areelhe phọ dị oghol mọ Koniliọs, kaḍighi bọ oḅẹl oye areelhe phọ kaḍighi bọ onyọ aKristẹn. Awe aJu phọ r’awe areelhe phọ uu/ḍikuan ghan. Esi iduọn phọ, iwạ ni mọ aPita aalemhi iitughiạn phọ odị, pidị odị atue aḍighi oḍighi phọ ophọn ongọ bọ nyodị. Mem mọ aPita arọph bọ anhaghanhạn iitughiạn phọ Enhaạn ilọ awe areelhe phọ, odị aalemhi ni iitughiạn phọ odị. Loor iduọn phọ, mem mọ orom bọ nyodị, odị aghị ni. (Iiḍ. 10:​28, 29) APita aghaạph ni iiḅi iinhaghạn phọ aḅenhị Koniliọs r’eghunotu phọ odị, kụ bidị oḍiiny muụm.—Iiḍ. 10:​21-23, 34, 35, 44-48.

8. Ika kụ idị yira kotue oḍeenhaan mọ iitughiạn phọ ayira eḅọph ni r’ipẹ aZihova? (1 Pita 3:8)

⁸ Asiạ reten, aPita aroma ni Kristẹn mọ bidị ‘oḅọph iloghi.’ (Bạl 1 Pita 3:8.) Idiphọ awe aZihova, yira kotue ni oḅọph ilhoghi r’abumor r’abumaranhi phọ ayira esi omhoọgh aani iitughiạn phọ aZihova edi bọ siphẹ aBaibul phọ. Esi omaạm, aZizọs aroma ni budaphạm mọ odị mọ bidị osighẹ Omhạr phọ oḍighi eḅẹl. (Mat. 6:33) R’oroma phọ opọ phọ, okaaphọm siphẹ ookpomhoghan phọ anyinha atue ni asopha oḍigh aani arukumuan oomo amem mọ. Kparipẹ r’oḅenhị odị mọ ‘oḍighi phọ akpạr ri oo, nạ katue ni?’ Kaạph ghụn imạ ilọ aḍiigbu phọ odị, kụ aḅilhẹ abakị nyodị.

SOOROMHI LOOR

9-10. Ika kụ idị aZizọs aḍeenhaan osooromhi aloor dị agbatanhaạn?

⁹ Ḍughul phọ aḍiphẹ eḅaạl kokiigh bọ nyodị, aZizọs atughemhị ni Pita r’abueriphọ abutelhedom mọ idị emhạn maạr osooromhi aloor. Epẹ omhạn, aZizọs arom ni Pita r’aJọn oghị ookolhobian esi dị odị katọl ale eḍien asughanham omhạn r’abidị. Eeni iikolhobian phọ iḅaramaạm ni oseere abafụ r’atowẹl pidị ootol ruwol awe phọ kotu bọ kụ ogbi olhe eḍien phọ. Kuolọ anhiạn kụ kasooromhi bọ loor aatol ruwol awe phọ?

¹⁰ AZizọs oo/kpukiạn oḍighi oḍighi phọ opọ phọ. Iḍighi ni iikia esi abutelhedom mọ, loor esi dị iyaạr phọ odị rawạ bọ oḍighi phọ, ebenhẹ kụ raḍighi ghan. AZizọs akporonhaạn asuomạ anyụ phọ odị, asighẹ towẹl akuugha esin odị, alhọgh muụm bafụ kụ amhiigh ootol aruwol abidị. (Jọn 13:​4, 5) Eeni isighẹ ni mem ootol aruwol 12 abutelhedom mọ odị. Odị aatol aani kẹn ruwol aJudas phọ aal bọ nyodị. Ghalhamọ r’iduọn phọ ni, aZizọs asooromhi ni loor amhạn ootol aruwol phọ abidị. Kụ aZizọs amhiigha loor apuru bidị mọ: “Nyina meIegheri emụ iphẹn phọ mị iḍighi bọ inyina ḍughụm? Nyina rimạgh ghan ni imị mọ ‘Otughemiạ’ r’Omoọgh-we,’ kụ ekpeanaạn ni iduọn phọ, idị eḍighi bọ mị amạn ni. Mị kụ Omoọgh-we phọ r’Otughemiạ phọ anyina ni kụ mị maatoI ruwol anyina, ekpeanaạn ni dị torobọ onyọ anyina kaatol aani ghan ruwoI ophorị phọ.”—Jọn 13:​12-14.

11. Ika kụ idị aPita aḍeenhaan mọ odị matuughạ osooromhi aloor? (1 Pita 5:5) (Miịn kẹn afoto phọ.)

¹¹ APita atuughaạny ni osooromhi aloor phọ aZizọs. Mem mọ aZizọs aḅula bọ epẹ k’akẹ phọ, aPita aakonhom ni oye dị aḍigh ekughạ k’amem mọ omhạr bọ. (Iiḍ. 1:​8, 9; 3:​2, 6-8) Aḍita awe dị omhiịn aani bọ iiḍaạny phọ uru ni okoom Pita. (Iiḍ. 3:11) APita kasighẹ ni rughuenhian phọ awe phọ rowạ bọ ongọ odị loor iduọn odị aḍuạ bọ ekpisi dị awe omhaghamhị maạr ḍigbogh aḍien r’arughuenhian ḍughụm? Eeye. R’osooromhi aloor, aPita aḅulhemhi iiseeny phọ r’arughuenhian phọ angọ aZihova r’aZizọs okpeanhaạn bọ osighẹ arughuenhian phọ. Odị aḅẹm mọ: “Iikpọ aḍien phọ [aZizọs] kụ iḍume bọ oye phọ ophọn nyina remiịn bọ eḅiIẹ bọ ni eIegheri.” (Iiḍ. 3:​12-16) Ikpo onhụ phọ aPita aḍighinhom bọ siphẹ aḍinyạ phọ dị agẹ bọ aghiọm bumor phọ, ighiọm iyira olhoghi mem mọ aZizọs asighẹ bọ towẹl akuugha esin odị kụ aatol ruwol abutelhedom mọ odị.—Bạl 1 Pita 5:5.

12. Idiphọ aPita, ika kụ idị yira koḍeenhaan ghan eegharạ osooromhi aloor?

¹² Yira kotue ni otuughaạny aani osooromhi aloor phọ aPita. Legheri mọ ogey osooromhi aloor apelhom ni oḅạ ghan ikpo onhụ dị eḍeenhaan mọ yira osooromhi ni loor. Ekpo onhụ phọ aPita aḍighinhom bọ kụ ogbạ bọ mọ osooromhi aloor eḍeenhaan mọ osooromhi aloor aḅaramaạm ni ipẹ yira ootughiạn bọ ilọ aloor ayira r’abunhọn. Yira ro/ḍighinhaan ghan we raraạr loor esi dị yira rowạ mọ bidị uuseeny ghan iyira, kuolọ ephomhoghiạn phọ yira omhoọgh bọ oghị esi aZihova r’abidị kụ rinyu ghan iyira oḍighinhaan abidị raraạr. Yira roḍeenhaan ghan mọ yira osooromhi loor agey mem lọ r’oḅaạl olhoghi yira okumuan ongọ aZihova r’abunhọn, ghalhamọ awe u/lọgh ni elhegh ipẹ yira oḍighi bọ.—Mat. 6:​1-4.

MOỌGH IITUGHIẠN DỊ EMHOON

13. Omhoọgh iitughiạn dị emhoon eḅaramaạm eeghe?

¹³ Omhoọgh iitughiạn dị emhoon eḅaramaạm eeghe? (1 Pit. 4:7) Onyọ aKristẹn dị amhoọgh iitughiạn dị emhoon raḍighi ghan oomo ipẹ odị katue bọ osopha ghan ogey osopha dị amhoọgh muḅọph r’iitughiạn phọ aZihova. Odị alegheri mọ iyaạr i/lo dị emhạn maạr epu siya phọ odị r’aZihova. Odị amoọgh ephoghom dị eeleeny ilọ aloor odị kụ alegheri mọ odị o/lhegheri oomo araraạr omhạn. Kụ odị raḍeenhaan ghan mọ odị abeḍenhọm Enhaạn esi ogbor ghan ooḅereghị olhọm aZihova iiḅakiọm.a

14. Ika kụ idị aPita apiọm obeḍenhọm aZihova eniin amem?

¹⁴ Ḍughul phọ aḍiphẹ eḅaạl kokiigh bọ Zizọs, odị aphụr ri rurụ bumatuạn phọ odị kụ aḅenhị mọ: “Oomo phọ anyina kekanyanụ ni esi omeeraam mọ anyina ḍughul phọ arodon.” R’akpọ oḅio, aPita aphagharanhaạn ni kụ aḅẹm mọ: “Eru dị oomo abueriphọ oghanyanụ owiIẹ nyinạ, mị r’aloor ka/kaarụ aani!” Ḍughul phọ aḍiphẹ phọ kẹn ni, aZizọs aromha ni buniin abumatuạn phọ odị mọ: “Igon ni eeḅereghị ghan.” (Mat. 26:​31, 33, 41) Mughumọ aPita adaphạn ni oromha phọ ophọn phọ, obọ odị mumoọgh ni akpọ oḅio oghaạph mọ odị alegheri ni Zizọs. Kparipẹ ghụn, aPita apharanhaạn Odẹ-otu phọ odị. Kụ olhoghi odị agurọgh ni nyodị agey.—Mat. 26:​69-75.

15. Eeghe kụ ilhoghonhaạn ḍighaạgh Zizọs ophamhanhạm iitughiạn dị emhoon ḍughul phọ aḍiphẹ eḅaạl kokiigh bọ nyodị?

¹⁵ AZizọs akạr kụ abeḍenhọm aZihova. Ghalhamọ r’iduọn odị amhunhughan bọ ni, odị agbor ghan ni aaḅereghị. Ipẹ phọ ingọ ni nyodị akpọ oḅio ozọ r’idị emhoọgh muḅọph r’ogbi aZihova. (Mat. 26:​39, 42, 44; Jọn 18:​4, 5) Dị iikia i/lo, aPita o/wulha eten phọ epẹ aZizọs agbor bọ aaḅereghị ḍughul phọ aḍiphẹ eḅaạl kokiigh bọ nyodị.

16. Ika kụ idị aPita aḍeenhaan mọ odị mamhoọgh iitughiạn dị emhoon? (1 Pita 4:7)

¹⁶ Esighẹ rekị bịn aPita amhiigh obeḍenhọm aZihova obughẹ esi iiḅereghị. Mem mọ oḅeton bọ Zizọs, odị angọ ni okuphom owol Pita r’abueriphọ abutelhedom mọ, mọ kongọ ni bidị uwaloor iigbia phọ, pidị aloghonhaạn bidị ḍighaạgh oḍighi oḍighi iphelhegbeel phọ ongọ bọ bidị. Toroboiperolbọ, aZizọs aḅenhị bidị mọ bidị orọl epẹ Jeruselem tutụ iphẹn phọ emite. (Luk 24:49; Iiḍ. 1:​4, 5) APita aḍighi ghan eeghe mem mọ bidị rokori bọ? APita r’abueriphọ abumor phọ ‘ukuọm siIoor abidị esi iiḅereghị.’ (Iiḍ. 1:​13, 14) Onyebel roten, siphẹ aḍiḅẹl aḍinyạ phọ odị agẹ bọ, aPita aromha ni Kristẹn phọ mọ bidị omhoọgh iitughiạn dị emhoon kụ obeḍenhọm aZihova esi iiḅereghị. (Bạl 1 Pita 4:7.) APita atuughạ ni ilọ obeḍenhọm ghan aZihova, kụ aḍighi ekọ ookpomhoghan phọ.—Gal. 2:9.

17. Ewạ mọ yira oghiọm ghisigh oḍighi ghan eeghe etigheri ḍighalhanyạ, olhegheri iyaạr, obobọ inyaạm dị yira omhoọgh? (Miịn kẹn afoto phọ.)

¹⁷ Orue omhoọgh iitughiạn dị emhoon, yira omoọgh ogbor ghan ooḅereghị aZihova. Olhọgh elhegh mọ ewạ ni mọ oghiọm ghisigh ooḅereghị ghan aZihova etigheri ḍighalhanyạ, olhegheri iyaạr, obobọ inyaạm dị yira omhoọgh. Esi iduọn phọ, mem dị yira rowạ osopha osopha dị amhạn maạr, ooḅereghị ghan olhọm aZihova iiḅakiọm, kụ oḍuom olhoghi mọ odị kụ alhegheri ipẹ ekạr bọ inhighenhaạn iyira.

18. Ika kụ idị yira kotue oolemhi iitughiạn phọ ayira kụ eḅọph r’ipẹ aZihova?

¹⁸ P’eeghe idị yira rosẹph aZihova, iduọn odị ulhẹm bọ iyira eten dị yira kotue ni otuughaạny imạ araagharạ phọ odị. (Gen. 1:26) Ii, yira ko/tue otuughaạny aZihova eten dị emhunhughan. (Isa. 55:9) Kuolọ, idiphọ aPita, yira kotue ni oolemhi aani iitughiạn phọ ayira bịn eḅọph r’ipẹ aZihova. Oghiọm ghisigh otuughaạny eten iitughiạn phọ aZihova, osooromhi loor, kụ oḅilhẹ omhoọgh iitughiạn dị emhoon.