EMHUOGHAẠPH ITUUGHẠ PHỌ 15
AḌUỌR PHỌ 30 My Father, My God and Friend
“Oḍuraan Ghan Otuman Enhaạn Kụ Inhighenhaạn” Iyira!
“Kụ elọ amhị, oḍuraan ghan otuman Enhaạn kụ inhighenhaạn imhị.”—PS. 73:28.
EGBON
Ipẹ yira kotue bọ oḍuraan otuman aZihova ḅilhẹ r’asuọ phọ yira komoọgh bọ oḍighi iduọn phọ.
1-2. (a) Eeghe araraạr kụ edị oye kaḍighi orue omhoọgh asiya dị ekpulhạn r’oyaghirị oye phọ? (b) Yira kooḅeghiọn eeghe siẹn emhuoghaạph phọ ephẹn phọ?
NẠ AMOỌGH ni oyaghirị dị r’anạ ekạr etuman? Nyinha iḍigh ika righirị phọ anyinha? Eeni nyinha igbor ghan eghaaphạn, kụ nạ aru alhegheri raraạr dị memitenhaan ghan nyodị, aḅilhẹ alhegheri raraạr dị eḅeraạn nyodị r’idị i/ḅeraạn nyodị. Eekunha phọ nạ aru amhiịn mọ odị amoọgh imạ araagharạ dị eḅeraạn nyinhạ otuughaạny. Kụ iyạl anyinha eḍighi igbogh arighirị.
2 Emoghi olhọgh ikuph r’amem orue oḍigh arighirị r’oye. Iniin phọ kẹn kụ edị edi aani oḍigh arighirị r’aZihova. Siẹn emhuoghaạph phọ ephẹn phọ, yira kooḅeghiọn ipẹ yira kotue bọ oḍuraan otuman Enhaạn ḅilhẹ r’asuọ phọ yira komoọgh bọ oḍighi iduọn phọ. Uguạ, ophụr ooḅeghiọn iyaạr phọ eḍighi bọ kụ enhighẹ bọ dị yira koḍuraan otuman ogbogh oyaghirị phọ ayira, Zihova.
3. Uḍighi ika kụ ewạ bọ dị yira kogbirima ghan suọ phọ yira komoọgh bọ oḍuraan otuman aZihova? Kaạph amaaniọm.
3 Dị iikia i/lo, nạ ameeraam ni mọ oḍuraan otuman aZihova ekạr kụ enighẹ. Kuolọ ogbirima ghan iyaạr phọ eḍighi bọ kụ ekạr bọ enhighẹ oḍuraan otuman aZihova kinyu iyira oghiọm aghisigh righirị phọ ayira r’odị. (Ps. 63:6-8) Esi omaạm, yira olegheri mọ olhe ghan egey eḍien, ozaamhiạn aloor, ophooghian ghan agey, ḅilhẹ r’ophughọl ghan amuboom amuụm ringọ ghan iyira ogey omhoon aloor. Ghalhamọ r’iduọn phọ ni, ibadị awe ro/kạr ghan kootughiạn idị araraạr phọ iphẹn phọ emhạn maạr, bịn opogh ogunhọm omhoon aloor phọ abidị. Kuolọ yira ogbor ghan ootughiạn ghan ilọ asuọ phọ yira komoọgh bọ oḍighi ghan araraạr phọ iphẹn phọ, kinyu ni iyira oghiọm aghisigh oḍighi ghan. Iniin phọ kẹn, eeni yira olegheri ni mọ enighẹ agey oḍuraan otuman aZihova, kuolọ ogbirima ghan asuọ phọ yira komoọgh bọ oḍighi iduọn phọ kinyu iyira oghiọm aghisigh oḍuraan otuman Oyaghirị phọ ayira, Zihova.—Ps. 119:27-30.
4. Okọ suọr phọ agẹ bọ Psalm 73:28 aghaạph eeghe iyaạr?
4 Bạl Psalm 73:28. Okọ suọr phọ agẹ bọ Psalm 73 aḍighi ghan onyọ aLivai dị akumuan ghan siphẹ otu iiḅereghị phọ aZihova idiphọ omoọr suọr. Eeni odị makumu ni aZihova eten dị ekpẹ oḍuomolhoghi esi ibadị asiạ. Kuolọ iwạ ni mọ odị aatughianhạm loor odị r’abunhọn mọ “oḍuraan ghan otuman Enhaạn” kụ inhighenhaạn nyodị r’abidị. Eeghe kụ iniin asuọ oḍighi iphẹn phọ?
“OḌURAAN OTUMAN ENHAẠN” RENGỌ GHAN OḄAẠL OLHOGHI
5. (a) Eeghe kụ iḍighi kụ oḍuraan ghan otuman aZihova ringọ ghan bọ iyira oḅaạl olhoghi? (b) Odaphạn Proverbs 2:6-16, ngọ eḍeenhaan idị osụ olhoghi phọ aZihova mengọ nyinhạ suọ kụ eḅilhẹ eghoph nyinhạ r’aloor.
5 Iduọn yira roḍuraan bọ kotuman aZihova, idiphọ kụ edị olhoghi ayira kaḅaạl ghan bịn. (Ps. 65:4) Ibadị ariphigh edi ni dị yira otuạn bọ oḅẹm iduọn phọ. Eḅẹl phọ, yira romooghọm ghan ni suọ mem dị yira odaphạn iromoghiom osụ olhoghi phọ edi bọ siphẹ aBaibul phọ. Iromhoghiom aBaibul phọ righoph ghan iyira kesighẹ esi oḍighi ikarạph ḅilhẹ r’araraạr dị ketue ni ingọ iyira iiḅaghamhị. (Bạl Proverbs 2:6-16.) Pọ kụ iyaạr phọ aBaibul phọ aḅẹm bọ mọ: “Oye dị awạ osụ olhoghi amhoọgh kamoọgh ni oḅaạl olhoghi. Kụ oye dị amhoọgh orọph omhiịn kamoọgh oḅaạl olhoghi.”—Prov. 3:13.
6. Eeghe kụ ikọm bọ idị okọ suọr phọ aroph ibo phọ odị?
6 Ii, ghalhamọ arighirị aZihova bịn rokururu ghan ni eeni amem. Okọ suọr phọ agẹ bọ Psalm 73 aroph ni ibo phọ odị mem dị odị amhiigh ootughiạn mọ araraạr i/kị eten phọ epẹ ekpẹ bọ oghị phọ. Odị amhiigh omhoọgh eḍịm r’oghạgh olhoghi loor esi dị odị aatughiạn ghan mọ awe phọ abuphẹ ro/kumu ghan bọ Enhaạn, kụ edị araraạr renighenhaạn ghan. Odị aatughiạn ghan mọ ikarạph awe phọ ghụn kụ roḍum ghan, romoon ghan loor, ḅilhẹ ro/miinhọm ghan. (Ps. 73:3-7, 12) Iphẹn phọ iiḅaghamhị ni agey okọ suọr phọ dị tutụ aatughiạn ghan mọ asuọ o/lho okumu aZihova. Odị akururu ni iboom kụ apuru mọ: “Ilọ oopho ni bịn ḍughụm, kụ mị asererẹ bọ dị mị ikarạph u/ḍighi?”—Ps. 73:13.
7. Eeghe kụ kilhoghonhaạn iyira ḍighaạgh oomhanham mem dị yira okururu? (Miịn kẹn afoto opoḍi phọ.)
7 Okọ suọr phọ o/mheera mọ okururu phọ odị aḅonyon nyodị azu. Odị aḍighi ni iyaạr onme iitughiạn phọ odị. Odị “aḍigh otu iiḅereghị phọ Enhaạn,” kụ aZihova aalemhi iitughiạn phọ odị. (Ps. 73:17-19) AZihova ogbogh oyaghirị phọ ayira ralegheri ghan ni mem dị yira okururu. Eḍighi maạr dị yira olhọm aZihova iiḅakiọm kụ osighẹ olhoghonhaạn aḍighaạgh phọ odị rangọ ghan bọ dị eego esi Ekpo-Onhụ phọ odị r’ookpomhoghan phọ, pọ yira komoọgh ni inyaạm oghiọm aghisigh okumu odị. Ghalhamọ ooḅaghamhiạn aloor uḅonyon ni iyira azu, aZihova kuudereghị ni iyira, aḅilhẹ apoomhị olhoghi ayira.—Ps. 94:19.a
Onyọ aLivai phọ agẹ bọ Psalm 73, ameerạ ghisigh ogbogh “otu iiḅereghị phọ Enhaạn” (Miịn ekpịgh phọ 7)
“OḌURAAN GHAN OTUMAN ENHAẠN” RENGỌ GHAN GHUḌUM AYIRA EMHỤ ḄILHẸ R’OḌUOMOLHOGHI ILỌ AGHISIGH PHỌ
8. Eeghe asuọ kụ edị oḍuraan otuman Enhaạn ringọ ghan iyira?
8 Oḍuraan ghan otuman Enhaạn ringọ ghan iyira suọ esi iyạl ikpanhạ areten. Eḅẹl phọ, ringọ ghan iyira ghuḍum dị amhoọgh emhụ. Iyạl, ringọ ghan iyira oḍuomolhoghi ilọ aghisigh phọ. (Jer. 29:11) Okạr omhiigha loor ooḅeghiọn suọ phọ iphẹn phọ.
9. Ika kụ idị oḍuraan otuman aZihova rengọ ghan ghuḍum ayira emhụ?
9 Oḍuraan otuman aZihova rengọ ghan ghuḍum ayira emhụ. Ibadị dị u/meeraam mọ Enhaạn edi ni rootughiạn ghan mọ aghuḍum o/mhoọgh emhụ, kụ mọ omhạr awe kope ni bịn. Toroboiperolbọ, ituughạ aBaibul phọ ayira mingọ iyira okuphom owol mọ Enhaạn “edi ghan ni, eḅilẹ ghan reenmo ruunmo buphẹ osighẹ bọ oomo ologhi phọ abidị kụ rowaạm bọ nyodị.” (Hib. 11:6) Yira omoọgh ni oḅaạl olhoghi rodon, loor esi dị yira rokumu ghan aZihova Odẹ k’akẹ phọ ayira, kụ ipẹ kụ idị odị ulhẹm iyira oḍighi.—Deut. 10:12, 13.
10. Odaphạn Psalm 37:29, eeghe iyaạr kụ edị aZihova maguanhaan buphẹ oḍuom bọ nyodị olhoghi?
10 Ibadị awe u/moọgh oḍuomolhoghi ilọ aghisigh phọ, oomo idị bidị rootughiạn ghan pọ oḍigh oḍighi, ophin anhịr obobọ aạl ilhom, omhạr anmụny ḅilhẹ r’omhoọgh ikpoki dị bidị kotolhọm mem dị bidị ko/tue mun oḍighi iyaạr. Bidị u/legheri ilọ aruguanhaan phọ Enhaạn ilọ aghisigh phọ. Kuolọ yira olegheri ni mọ aZihova ramaạr ghan ni kaphogh rebenhẹ phọ odị. (Ps. 25:3-5; 1 Tim. 6:17) Yira oḍuom ni olhoghi mọ aZihova kamuneni ni ruguanhaan phọ odị. Yira omoọgh ni imạ ibadị araraạr dị yira rogon omhiịn, ekạr nuụn ekpaariọm eepoogh ooḅereghị odị k’agee-pọ siphẹ Paradaịs.—Bạl Psalm 37:29.
11. Ighẹn inhọn imạ araraạr kụ edị yira rokelhọm ghan mem dị yira oḍuraan ghan otuman Enhaạn?
11 Inhọn imạ araraạr edi ni dị yira rokelhọm ghan mem dị yira oḍuraan otuman Enhaạn. Esi omaạm, aZihova aguanhaan osạr owilhenhaạn ayira ikarạph ayira eḍighi maạr dị yira okiton k’ekpom. (Isa. 1:18) Loor iphẹn phọ, yira ro/tool ghan dool apum loor ikarạph dị yira oḍighi epẹ omhạn. (Ps. 32:1-5) Yira romoọgh ghan kẹn ibo mem dị yira oḍighi idị olhoghi aZihova aḅaạl. (Prov. 23:15) Okạr agey, inhọn araraạr edi ni dị yira rokelhọm loor arighirị phọ ayira r’Enhaạn. Uguạ, omhiịn idị yira koḍighi kụ okiọm ghisigh oḍuraan ghan otuman Enhaạn.
IPẸ YIRA KOKIỌM BỌ GHISIGH “OḌURAAN OTUMAN ENHAẠN”
12. Eeghe araraạr kụ edị nạ maḍighi orue oḍuraan otuman Enhaạn?
12 Eḍighi maạr dị nạ maḍiiny muụm, pọ nạ maḍighi ni ibadị araraạr orue oḍuraan otuman Enhaạn. Nạ matuughạ ni igey phọ ilọ aZihova r’aZizọs Kraist, nạ makiton esi ikarạph anạ, amoọgh omheeraam dị akpạr esi Enhaạn, kụ nạ masopha kẹn oḍighi araraạr dị emhoọgh muḅọph r’ogbi phọ odị. Kuolọ, orue oḍuraan otuman Enhaạn, ewạ mọ kiọm ghisigh aḍighi ghan raraạr phọ ipẹ phọ.—Kọl. 2:6.
13. Eeghe iraạr araraạr kụ kilhoghonhaạn iyira ḍighaạgh oghiọm aghisigh oḍuraan otuman aZihova?
13 Eeghe kụ kilhoghonhaạn iyira ḍighaạgh oghiọm aghisigh oḍuraan otuman Enhaạn? (1) Aạl ghan oḅilhẹ otuughạ Baibul phọ. Mem dị yira roḍighi iduọn phọ, aḍiigbu ayira ki/ḍighi aạl ghan r’olhegheri araraạr ilọ Enhaạn bịn. Kparipẹ ghụn, onhaghanhạn eten iitughiạn phọ odị, kụ okparaghạ orọl idị edaphạn r’asinhị-iilhogh phọ odị edi bọ siphẹ aBaibul phọ. (Efẹ. 5:15-17) (2) Okparamhị omheeraam mọ ayira esi ogbirima ghan ibadị areten phọ aZihova muḍeenhaan bọ iyira ephomhoghiạn. (3) Oghel raraạr dị i/ḅeraạn aZihova, ḅilhẹ ku/moọgh muḅọph r’awe dị roḍighi ghan raraạr phọ ipẹ phọ.—Ps. 1:1; 101:3.
14. Odaphạn ipẹ edi bọ 1 Korịnt 10:31, ighẹn kụ iniin araraạr dị yira koḍighi torobọ aḍio oḍighi idị olhoghi aZihova kaḅaạl? (Miịn kẹn sifoto phọ.)
14 Bạl 1 Korịnt 10:31. Ekạr emạn maạr dị yira kokiọm ghisigh oḍighi ghan raraạr dị eḅeraạn aZihova. Iphẹn phọ epelhom omite ghan epẹ erugh phọ r’oghị ghan ituughạ. Ewạ mọ oḍighi ghan raraạr dị keḅeraạn aZihova torobọ aḍio. Esi omaạm, yira ogbạ ghan agey esi oomo araraạr kụ oḅilhẹ onmo ghan inmo r’ophooph olhoghi. Iphẹn phọ keḍighi idị olhoghi aZihova kaḅaạl. (2 Kọr. 8:21; 9:7) Odị rawạ dị yira koḍeenhaan mọ yira omaghamhị ni maạr inmo aghuḍum mọ odị ungọ bọ iyira. Yira omhaạr ghan ophogh loor ayira kụ oḅilhẹ ghan oghel muboom amale r’ipughọl, iphẹn phọ keḍighi idị yira koḍuraan otuman Ongoọm aghuḍum mọ, Zihova. Mem dị aZihova amhiịn ikuph phọ yira rolọgh ghan bọ oḍighi araraạr dị eḅeraạn nyodị, ghalhamọ r’araraạr dị eghom ni, olhoghi odị akạr kụ raḅaạl ghan.—Luk 16:10.
Omhiigha aloor mem dị oye rakiilhom oghuugh, olhe ghan egey eḍien, ozaamiạn aloor ḅilhẹ r’onmo ghan inmo eḍighi raraạr dị yira oḍighi, reḅaạl ghan olhoghi aZihova (Miịn ekpịgh phọ 14)
15. Eghẹn edọ eten kụ edị aZihova rawạ mọ ozoọm ghan bunhọn awe?
15 AZihova razoọm ghan ni egey eten oomo awe, mughumọ abugey obobọ abukarạph. (Mat. 5:45) Odị rawạ mọ yira ozoọm aani ghan eniin phọ eten phọ bunhọn. Esi omaạm, “kụ/kaaphaạn ghan oye ikarạph, owileghị iruonụ, . . . omoọgh igbiririph esi oomo awe.” (Taị. 3:2) Loor iduọn phọ, ku/pogh ghan we dị u/ḅọph oniin phọ omheeraam mọ r’ayira usooromhi. (2 Tim. 2:23-25) Ozoọm ghan oomo awe egey eten riḍur ghan iyira ketumeri aZihova.
YIRA KOTUE NI “OḌURAAN OTUMAN ENHAẠN” GHALHAMỌ R’AMEM DỊ YIRA OPIOMẠN
16. Ika kụ idị oye phọ agẹ bọ Psalm 73 amhiigh olhoghoma?
16 Kokaạph ika eḍighi maạr dị opiomạn oye phọ akọm idị oye pho alhoghoma mọ oye phọ o/kpeanhaạn mun dị aZihova kapomoghiạn? Idiphọ oghaạph bọ epẹ omhạn, idọ phọ iphẹn phọ imitenhaan ni oye phọ agẹ bọ Psalm 73. Odị aḅẹm mọ: “Kuolọ esugha enụm bịn obọ aruwol amhị meḍuạ siphẹ eten phọ, obọ mị maghorọm ameel.” (Ps. 73:2) Odị aḅilhẹ aḅẹm mọ iitughiạn odị “rekiḍim” kụ eḅilhẹ “reeḅaghamhị ekpom odị.” Kụ mọ idiphọ “enhạm dị enakara” odị o/nhaghanhạn aZihova. (Ps. 73:21, 22) Odị alhoghoma ni mọ odị o/kpeanhaạn mun dị aZihova kapomoghiạn loor esi ikarạph iitughiạn phọ odị ḍughụm?
17. (a) Eeghe kụ edị okọ suọr phọ aḍighi ghalhamọ r’amem mọ odị aḅonyonhu bọ azuan? (b) Yira otuughạ eeghe esi ipẹ emitenhaan bọ nyodị? (Miịn kẹn sifoto phọ.)
17 Eḍighi maạr dị okọ suọr phọ alhoghoma mọ aZihova maghel nyodị, pọ alhoghoma iduọn phọ ekulha amem bịn. Ghalhamọ r’amem mọ odị alhoghoma bọ mọ araraạr i/kị eten phọ epẹ odị awạ bọ, bịn odị amhiịn ni mọ ewạ ni dị odị kaḍuraan atuman Enhaạn. Odị aḅẹm mọ: “Ghalhamọ r’iduọn phọ ni bịn mị urọl ghan oomo amem atuman nyinhạ [Zihova]; kụ nạ aphạm ghan ḍighaạgh amhị. Nạ uubạkiọm ni imhị r’oroma phọ anạ kụ ruukunha phọ, nạ kụ ughuenhi ni imhị.” (Ps. 73:23, 24) Olhọm ghan aZihova ukparamhị iyira mem dị yira oḅonyonhu ozuan loor opiomạn ayira. (Ps. 73:26; 94:18) Ghalhamọ yira upiomạn ni, oḅula ḍighaạgh aZihova r’oḍuom olhoghi mọ odị “aakolhobian ni osạr owilhenhaạn” ayira. (Ps. 86:5) Ekạr ekpaariọm mem dị yira oḅonyonhu ozuan oḍuraan otuman aZihova.—Ps. 103:13, 14.
Mem dị yira omhiịn mọ asiya phọ ayira r’aZihova redugh, ogbor ghan ooḅereghị oḅilhẹ oghị ghan ituughạ bịn yira koḍuraan ni otuman aZihova (Miịn ekpịgh phọ 17)
“OḌURAAN OTUMAN ENHAẠN” K’AGEE-PỌ
18. Uḍighi ika kụ eekunha i/lo bọ oḍuraan otuman aZihova?
18 Eekunha i/lo ghan oḍuraan otuman aZihova r’otuughạ olhegheri ilọ odị. ABaibul phọ aḅẹm mọ: “OIegheri-iyaạr r’iitughiạn phọ Enaạn eekuna i/Io ghan.”—Rom 11:33.
19. Eeghe okuphom owol kụ edị aPsalm ingọ iyira?
19 Psalm 79:13 eḅẹm mọ: “Yoor awe phọ anạ, aḍita iyool igạ phọ anạ kosẹph ni nyinhạ k’agee-pọ, kụ oḅilhẹ ooseeny nyinhạ oghiil atum oghiil.” Nạ kẹn ni katue ni akuphom owol mọ nạ kamoọgh ni ḍisẹph k’agee-pọ iduọn nạ aghiọm bọ ghisigh raḍuraan katuman Enhaạn. Kụ nạ katue ni aḅẹm aani mọ: “Enhaạn kụ inyaạm amhị, odị bịn kụ aḍighiigh amhị k’agee-pọ.”—Ps. 73:26.
AḌUỌR PHỌ 32 Take Sides With Jehovah!
a Awe dị omhoọgh iiḅaghamhị, ooḅaghamhiạn aloor obobọ e/ḅaạl olhoghi dị mebia, komoghi ni omhiịn oyil arookonhom. Olhegheri obughẹ, miịn Watchtower, No. 1 2023.