Olhoghonhaạn Aḍighaạgh Dị Alheeny Eleeny Mem ACOVID-19 Phọ

Unwanyụ aMarch 2020, mem mọ aWorld Health Organization ogbeelhom bọ mọ aCOVID-19 maḍighi egbogh ezẹgh, ibadị uu/tughiạn r’ootughiạn mọ ezẹgh phọ kekpophonom ni oomo aḅirinhi phọ dị kepel ḍikpom alhạ. Irubal awe, oḅaramaạm Bugbaanhaạn aZihova, momiinhọm ni siphẹ aloor phọ abidị reten iitughiạn, ḅilhẹ eten ikpoki loor egbogh ezẹgh phọ. Ika kụ idị Abugbaanhaạn aZihova ookolhobian oḅilhẹ odiemhi we raraạr orolhọm mem iiḅaghamhị phọ iphẹn phọ?

Olhoghonhaạn Aḍighaạgh Buphẹ Omoghi Bọ

Eeḍiạn iiḅakiọm Ekụ Abuukpomhoghiom Aloor Phọ Repogh Bọ Bugbanhaạn AZihova, umiteom ni Ruukụ Abulọgh Ḍighaạgh Mem Ekperenhom Iiḅaghamhị (DRC) dị repel li 950 loor ezẹgh aCOVID-19 phọ. Iniin arikpisi, uukolhobian idị abumor phọ siphẹ ekool phọ kongọ olhoghonhaạn aḍighaạgh phọ, kụ inhọn arikpisi, Abugbaanhaạn phọ momooghọm ni suọ olhoghonhaạn aḍighaạgh agomẹt. Abuọ DRC phọ kẹn mookolhobian ni oḍighi olhoghonhaạn aḍighaạgh dị abụgh ni iboom.

Esi omaạm, miịn idị emite epẹ Paraguay. Aḍiniin aḍinyạ iinhaghạn ighaạph mọ loor aḍikparaminheẹn phọ egbogh ezẹgh phọ ekọm bọ, “ibadị abuọ aParaguay phọ odiighi okoọny iloghi aruutu abidị.” Kuolọ aDRC phọ odi bọ Paraguay momiigh ni odiighi arukuru araraạr dị kotue ni otolọm iyạl awiki—eḍien dị ekasiạn, raraạr ogbuuroghom ariisi, r’araraạr oḅaalamhiọm aloor ilọ eghunotu inya awe. Torobọ okuru phọ apamanạm raraạr dị kemạn ni $30 (U.S.).

Ika kụ idị abumor phọ rologhonhaạn bọ ḍighaạgh phọ rokoronhaan ghan siloor koḅilhẹ oghoph bunhọn dị ko/teẹny ezẹgh aCOVID-19 phọ? Bidị rozuughian ghan simask koḅilhẹ okelạn bunhọn. Bidị roḅilhẹ ghan kẹn kowaaghị omhiịn mọ asikompinị phọ roboolha ghan bọ bidị riiḍien phọ rotọl ghan ni riisi dị ekuạ kụ kookolhobian ḅilhẹ rodaphạn ghan ni iiḅakiọm okoronhaạn agey. Iphẹn phọ eḅaramaạm omhaạr omhiịn mọ oomo awe dị koḅọgh rukuru phọ oonmenian ni raraạr oghophom asiloor, rogbuurogh ghan ni simoto phọ abidị, ḅilhẹ mọ roseere ghan ni rukuru phọ riisi dị momaạr ogbuuroghom aditọl. Eekunha phọ, abuphẹ osighẹ bọ rukuru phọ rokiọm bumor phọ ko/tuman bidị.

Oḍighinhom Iisogh Phọ R’osụ-olhoghi

Reteẹny bọ unwanyụ aJanuary 2021, Ekụ Abuukpomoghiom Mọ momeeraam mọ olheom ikpoki dị repel li 25 erubal adollar (U.S.) olhoghonhaạn aḍighaạgh loor aCOVID-19 phọ. Ilạ agadạ phọ r’asiDRC phọ roḍighinhom ghan ikpoki phọ rosogh ghan bọ r’osụ-olhoghi esi omhaạr ghan omherenyan aḍighi dị enhighẹ epelheghiom ilọ araraạr phọ rowạ bọ. Esi omaạm epẹ Chile, abumor phọ rooḅakị bọ oḍighi olhoghonhaạn aḍighaạgh phọ uwạ ni ogho eḍien dị eghịgh Beans dị oghol mọ lentil dị eemhọr phọ emhạn 750 kg (1,653 lb). Kuolọ aḍighi alentil phọ meghị anyụ epu ipẹ erọl ghan bọ iyạl amem esi oniin unwanyụ bịn! Iyạl awạ reten mem mọ bidị momeeraam bọ ogho alentil phọ ḍimhoom aḍighi phọ, bịn opọ rabool bọ aḅenhị bidị mọ oye maḅulemhi idị odị agho. Esi iduọn phọ kparipẹ r’aal aḍimoom aḍighi phọ, oye phọ aalha bumor phọ ipẹ oḅulemhi bọ ḍigbaany aḍighi!

Toroboiperolbọ, mem mọ abumor phọ oghị bọ osighẹ alentil phọ, oye phọ rabool bọ aḅẹm mọ onọ bidị ra/boola mun mọ loor esi dị abumor phọ rotuughaạny aani ghan buerị phọ aruukụ iiḅereghị phọ ro/di ghan bọ riiḍien eten dị eelheeny. Oniin onyọ umor phọ rooḅereghiọm olhoghi, kụ aḅenhị oye phọ rabool bọ mọ mowaaghị ni olegheri bumor dị okạr omhoghi riiḍien phọ epẹ arookpomhoghan phọ. Abumor phọ uḅilhẹ ni oḅenị oye phọ mọ loor esi iduọn awe phọ kongọ bọ raraạr phọ oḍighi bọ buọ arikpisi kirokirọ, kosighẹ ghan raraạr phọ ipẹ torobọ eghunotu phọ kotue bọ oḍighinhom kụ olọgh rukuru phọ. Okureri bidị uḅenhị ni oye phọ mọ ro/kpaariọm ghan oomo abuphẹ rosogh bọ ikpoki obobọ rokumuan bọ inhọn arukumuan kongọ Bugbaanhaạn aZihova. Iphẹn phọ ikạr kụ eḅeraạn oye phọ. Kụ ipel aalha abumor phọ ḍighi dị edugh, odị alhoghonhaạn bidị idị remạn ni 400 kg (882 lb) mem dị abumor phọ oḅilhẹ oghị ogho.

“Eḍeenhaan Egey Ephomhoghiạn”

ALusu, oniin ekpukele anhịr epẹ Liberia r’oogh abuọ eghunotu odị kụ urugh otu. Iduọn bidị olhe bọ eḍien aḍiroọr oḅilhẹ ooḅeghiọn Igẹ Iigbia phọ ḍiniin aḍiroọr, oọny oọny aLusu dị amhạn oḍual asiạ amhiịn mọ eḍien meminheen otu phọ. Kụ odị apuru mọ, “Yira kole eeghe?” ALusu aḅenhị ni nyodị mọ onọ maaḅereghị ni ilọ olhoghonhaạn aḍighaạgh kụ mọ onọ akuphom ni owol mọ aZihova kamiteom ni angọ bidị. Ootaany aḍio phọ aḍiphẹ phọ, ikumor awe ookpomhoghan aLusu umhạgh ni nyodị mọ aghị asighẹ riiḍien dị oḍighom mọ ongọ. Odị aḅẹm mọ: “Oọny oọny phọ amhị aḅẹm mọ nyiidiphọ odị malhegheri mọ aZihova katue ni anaghạn aḅilhẹ apagharanhaạn iiḅereghị loor iduọn aZihova aphagharanhaạn bọ iphẹn amhị.”

Oniin anhịr epẹ Democratic Republic of Congo atugh atumhan eghunotu Abugbaanhaạn. Mem dị odị amhiịn bọ idị Abugbaanhaạn oruom eghunotu phọ eḍien, odị aḅẹm mọ, “Mem dị ezẹgh phọ esi eekunha, yira koḍighi aani Bugbaanhaạn aZihova loor esi dị bidị mokạr kụ opogh bumor r’abumaranhi phọ abidị siẹn asimem mọ ekpạr bọ iduọn.” Kụ olom mọ apuru nyodị mọ, “Nạ katuạn kpurụ arusụ bịn aḍighi onyọ Ogbaanhaạn aZihova?” Kụ odị aphagharanhaạn mọ, “I/ḍighi idiphọ, akpurụ arusụ phọ opọ phọ aḍighi eḍeenhaan egey ephomhoghiạn.”

Abugbaanhaạn aZihova urue ni oogboronhom olhoghonhaạn ḍighaạgh bumor r’abumaranhi phọ ayira siẹn egbogh ezẹgh phọ ephẹn phọ loor esi iisogh phọ anyinha. Meḍighi iisogh phọ nyinha resogh ghan bọ edaphạn reten phọ ogoolhạ bọ siphẹ donate.jw.org.