ALibrary Dị Nạ Katue Ni Apạm Ḍighaạgh Anạ

“Epẹ omhạn yira uu/tughiạn rootughiạn r’amem mọ yira koteẹny ghan ni rinyạ phọ ayira dị eego esi asifon.” Nạ ameeraam aani ni ikpo-onhụ phọ ipẹ phọ ḍughụm? Eḍighi pakirị oghaạph okparamhị phọ Umor phọ Geoffrey Jackson angọ bọ siphẹ Omhunhenhiom 6 Iinhaghạn Dị Aloor Phọ Repogh Bọ Ongo, 2020. Odị aghiọm ghisigh aḅẹm mọ: “Kuolọ nyiidiphọ yira mutọl ika r’egbagarạ phọ ezẹgh phọ ephẹn phọ dị araraạr arukumuan idiphọ aJW Library app phọ i/lo? AZihova muukolhobian iyira k’epẹ omhạn orue odaluạn odọ asidọl phọ iphẹn phọ.”

Ika kụ idị aZihova ruukolhobian ghan bọ iyira? Uḍighi eeghe orue omiteom aJW Library app phọ, ḅilhẹ eeghe kụ edị rewạ orue oghiọm aghisigh onhighemhị ghan?

Oḅẹl Odị Omiteom

Unwanyụ aMay 2013, Aloor Phọ Repogh Bọ uḅenhị ni MEPS Programming, eḍighi bọ ekpịgh dị edi epẹ emhụ agadạ phọ, omiteom app dị aphamhanhạm New World Translation phọ opọ ooḅenhion bọ. Onyọ umor dị oghol mọ Paul Willies dị rakumuan aani ghan r’aMEPS Programming aḅẹm mọ, “Kụ egbi oteẹny amem mọ amuphẹ phọ, yoor ko/miteom ghan app afon olhọgh siphẹ intanẹt phọ. Kuolọ yoor uukpomhoghi ni bumor, owilhẹ yogh iniin iiḍighi, okumuan r’inhọn ariikpịgh siphẹ Betẹl omhiigh omakạ r’olhẹm kụ oḅilhẹ olhoghoḍị araraạr phọ rewạ bọ siphẹ app phọ. Yoor uuḅereghị ni ibadị amem, kụ r’olhoghonhaạn aḍighaạgh aZihova yoor umiteom ni app phọ esi oogh arunwanyụ siphẹ aruupuruan atorobọ alhạ phọ!”

Ipaanhaạn dị etum siphẹ pọ oḍighi idị app phọ kakạr aten library dị osereghi ibadị arinyạ arunhụ aḍiaḅạ kirokirọ. Eteẹny bọ January 2015, bịn olhoghoḍị ibadị arinyạ onhụ Aḅekeeny siphẹ app phọ, kụ odiiny arunwanyụ reten, bịn awe omhiigh odanlod arinyạ rukuron inhọn arunhụ aḍiaḅạ.

Esighẹ k’amem mọ amuphẹ phọ abumor phọ ayira monhighemhị ni app phọ ibadị areten, ologhọm sividio, kụ oḅạr rinyạ r’asividio r’asuọr ophegh otu ituughạ torobọ awiki olọgh nyoniin agạ, oḅilhẹ oḍighi idị oye katue ni azụ ekpịgh aBaibul bịn esighẹ ekị Research Guide dị eghaạph ilọ esi phọ.

Onhighemhị aLibrary phọ

Asifon r’asikomputa dị epel 8 erubal kụ rekpegheron ghan JW Library torobọ aḍio, ḅilhẹ idị epel 15 erubal kụ rekpegheron ghan torobọ unwanyụ! Ewạ mọ oḍighi ghan eeghe omhiịn mọ awe okiọm ghisigh oḍighinhom ghan app phọ dị iiḅaghamhị ke/tọl? Umor phọ Willies aḅẹm mọ: “Oḍighi app ra/muneen ghan. Yoor rokumuan ghan oomo amem omhiịn mọ oḅaraghiọm ni imhoom araraạr ḅilhẹ oḍighi idị kedughanhaan buẹn roḍighinhom bọ. Loor iduọn ro/gbạ ghan bọ mem ooḅenhion asifon r’asikomputa, emoghi ni dị yira kogbor ghan ooḅenhion app phọ ayira pidị akiọm ghan ghisigh aluạn r’ipẹ rooḅenhion bọ. Rewạ ghan kẹn mọ omhaạr onhighemhị oḅilhẹ obughẹ esi phọ arinyạ phọ r’asividio phọ retọl ghan bọ loor esi iduọn araraạr phọ rolọgh ghan bọ siphẹ aJW Library phọ repogh ghan bọ bịn obụgh.” Oḅạr oomo arunhụ phọ oḅophoghị, arinyạ dị remạn ni 200,000 ḅilhẹ r’asividio r’asuọr dị repel li 600,000 kụ edi JW Library app iduọn rokaạph bọ!

Oghiọm aghisigh onhighemhị r’ooḅenhion ghan app phọ epelhom ogho asikomputa bịn. Eḅilhẹ kẹn ewạ mọ okpẹ ghan ikpoki kụ ogbi osighẹ iniin asisoftware oḍighinhom. Ikpoki dị rokpẹ ghan ḍiniin alhạ oḍighinhom oniin asoftware bịn emạn ni $1,500 (U.S.). Opumom isiphẹ, abumor phọ odi bọ MEPS Programming rolheom ghan ikpoki dị remạn ni $10,000 (U.S.) torobọ alhạ oghoom imhoom asikomputa, sitablet r’asifon dị purukụ olhẹm obọ omiịn idị kooḅenion kụ app phọ aluạn r’imhoom mọ iphẹn purukụ olhẹm bọ.

Odanlod Araraạr Rekome Ghan Maleom Ikpoki Phọ Rosogh Ghan Bọ

JW Library makạr akome maleom mọ roleom ghan bọ oprint omiteom, okpoghogh r’osaanyọgh arinyạ phọ ayira. Esi omaạm, oghaạph ilọ aḍinyạ phọ Ooḅeghiọn Igẹ Iigbia Phọ Torobọ Aḍio. Olọ 2013 uprint omiteom idị remạn ni 12 erubạl. Kuolọ opọ 2020 phọ, uprint oogh erubal arinyạ phọ bịn—ghalhamọ r’iduọn yira omhoọgh bọ ni bunhọn abumoom 700,000 abukaaphọm oomo isiẹn aḅirinhi phọ. Eeghe kụ imiteom onmia phọ? Ibadị abumor r’abumaranhi ayira robạl ghan igẹ iigbia ilọ aḍio phọ siphẹ JW Library.a

“Ekạr Kụ Eḍighi Egbogh Ephua”

JW Library raloghonhaạn ghan kẹn buphẹ roḍighinhom bọ ḍighaạgh reten dị ko/tue ogbi. Geneviève, dị odi ghan epẹ Canada, aloghomha mọ app phọ maḍighi idị odị ragbor ghan katuughạ Baibul. Odị aḅẹm mọ, “Okạr oghaạph, mughumọ iḍighi edị mị kamiteom ghan egu arinyạ kụ agbi otuughạ, mị u/gbiom mọ mị mutuughạ ghan ni torobọ aḍiroọr. Kuolọ loor app phọ, mị rokoph fon amhị bịn oomo araraạr dị mị rawạ edi siphẹ. Ogbor ghan otuughạ iduọn phọ mekparamhị omheeraam mọ amhị eḅilhẹ iphophe imhị siẹn igey phọ.”

AJW Library phọ akạr kụ alhoghonhaạn ḍighaạgh mem egbogh ezẹgh aCOVID-19 phọ. Umaranhi dị oghol mọ Charlyn, epẹ United States, aḅẹm mọ: “Loor esi ezẹgh aCOVID-19 phọ reeḅaghamhị bọ oomo aḅirinhi phọ, mị ko/miịn ḍimoom aḍinyạ ayira dị oprint omiteom esi aḍikpom alhạ. Kuolọ aJW Library phọ rungọ ghan iyira oomo araraạr dị emhoghi okparamhị omheeraam mọ ayira, mị rasẹph ni aZihova ilọ iikolhobian ephomhoghiạn phọ iphẹn phọ.”

Umaranhi dị oghol mọ Faye, dị odi ghan epẹ Philippines, rakaạph bọ idị odị r’ibadị abunhọn olhoghomha, aḅẹm mọ: “Ookiạ app phọ ophọn kụ edị mị raḍighinhom ghan okparamhị asiya phọ amhị r’aZihova. Eḅẹl iyaạr dị mị rabạl ghan ḍiroọr edi siphẹ. Idị mị ranaghanạm ghan rurụ mem dị mị aphạm rukumuan edi siphẹ. Odị kụ edị mị rasighẹ ghan kaakolhobianam ituughạ awiki phọ. Odị kụ edị mị rasighẹ ghan kaakolhobianam ituughạ aBaibul amhị. Mị rapogh ghan siphẹ sividio mem lọ mị amhoọgh eepoogh. Mị rasighẹ ghan k’aalhọm rumhuoghaạph obobọ Baibul phọ mem lọ mị odi ḍikoọl rakori. Ekạr kụ eḍighi egbogh ephua.”

AJW Library phọ akạr kẹn amoọgh maạr oḍighinhom epẹ erugh phọ. Esi omaạm, oniin onyọ umaranhi epẹ Cameroon awạ ni osighẹ oḍighinhom esi aBaibul dị onhọn onyọ umaranhi aḍighinhom iyạl ikpo awiki omhạn epẹ erugh phọ. Kuolọ odị o/rue ootughiạn esi aBaibul phọ. Odị aḅẹm mọ: “Enighenhaạn bọ mị aatughiạn iyạl ikpo ikpo-onhụ dị edi esi phọ. Kụ mị akpegheron app phọ, aghị siphẹ aBaibul phọ agẹ ikpo-onhụ phọ alhọgh. Mem mem mọ bịn mị amhiịn esi aBaibul phọ. Oḍighinhom app phọ rilhoghonhaạn ghan imhị ḍighaạgh omhiịn ariisi aBaibul dị mị mawula.”

Imạ iisogh phọ nyinha resogh ghan bọ idiphọ oghaạph bọ siphẹ donate.jw.org kụ rilhoghonhaạn ghan bọ iyoor ḍighaạgh omiteom r’onhighemhị aJW Library app phọ ongọ abumor r’abumoranhi phọ ayira oomo isiẹn aḅirinhi phọ. Meḍighi eegharạ inmo phọ anyinha.

Iphigh Araraạr Dị Emite Olhoghi aJW Library

1. 

   October 2013—Umiteom app phọ aphamhanhạm bọ New World Translation phọ ooḅenhion bọ

2. 

   January 2015—Uḅarạm inhọn arinyạ onhụ Aḅekeeny, kụ ogbi oḅarạm ilọ inhọn arukuron arunhụ aḍiaḅạ

3. 

   November 2015—Ulhọgh iki dị kotue ni ogoorọm iyaạr

4. 

   May 2016—Uḅarạm agạ phọ aphạm bọ raraạr ituughạ awiki phọ

5. 

   May 2017—Uḍighi idị oye katue ni agẹ iyaạr alọgh

6. 

   December 2017—Uḍighi idị katue ni apamanạm Study Bible phọ

7. 

   March 2019—Uḍighi idị kotue ni odanlod suọr, opeghom sividio dị u/danlod, ḅilhẹ otue omiịn riisi siphẹ Research Guide

8. 

   January 2021—Oḍighi idị ketue ni epạm ḍinyạ phọ Kelhọm Ghuḍum K’agee-pọ!