U/bula Buphẹ Oḅaaghạph Bọ

AZihova rawạ mọ oomo awe otuughạ ilọ odị r’Omhạr k’akẹ phọ odị etigheri sidọl phọ abidị. (1 Timoti 2:3, 4) Loor esi iduọn phọ Abugbaanhaạn aZihova romiteoghom ghan ni ibadị asiBaibul r’arinyạ dị regbạ Baibul phọ, ghalhamọ r’ilọ awe dị oḅaaghạph, lọ edugh ni. Okạr oghaạph, ookpomhoghan phọ ayira momiteoghom ni simuunịr asividio ilọ abuẹn oḅaaghạph bọ,a kụ edi ni runhụ imaaghiạn dị repel li 100! Ika kụ idị yira romiteom ghan bọ koḅilhẹ odiemhi sividio phọ iphẹn phọ? Kụ ika kụ idị yira monhighemhị sividio phọ idiphọ amem mọ rekị bọ?

Romiteom Ghan Ika Sividio Onhụ Imaaghiạn?

Abumor r’abumaranhi dị rogbạ ghan koteneghi inhọn arunhụ oomo isiẹn aḅirinhi phọ kụ romiteom ghan sividio onhụ imaaghiạn phọ. Torobọ onyọ abidị ramiigha ghan ni loor kaaḅeghiọn aphogh ḍinyạ phọ obobọ vidio phọ bidị rowạ bọ ogbạ otenheghi phọ. Ipẹ reten, kụ osopha eten dị enhighẹ epelheghiom ogbạ iyaạr phọ otenheghi onhụ phọ. Kụ romhạn, kụ bidị omaaghiạn olọgh vidio. Iduọn rokaạph bọ, 60 arugu abumor r’abumaranhi kụ rogbạ rinyạ phọ ayira kotenheghi runhụ imaaghiạn dị roo/sophion ghan, oḅilhẹ kẹn ni omoọgh 40 inhọn arugu dị rotọl ghan mem bịn koḍighi aani.

Epẹ omhạn isighẹ ghan ni iboom ikpoki oḍighi asividio onhụ imaaghiạn. Asicamera r’inhọn araraạr oḍighinhom asividio imhạn ghan ikpoki epu iphẹn aḍio arodo. Ḅilhẹ kẹn, uḍighi ghan sividio olhoghi astudio, kụ imhoghi ghan mọ olhọgh sistudio phọ, eeni amem osighẹ otu otenhe studio. Ikpoki dị ewạ ghan orue ookolhobian eniin egu awe dị kogbạ ghan otenheghi onhụ imaaghiạn ipel ghan ni $30,000b.

Omhiịn mọ u/leom ilọ ateẹny ikpoki phọ rosogh ghan bọ, oḍighom mọ ayira mowạ ni reten onhighemhị oḅilhẹ odughe eten phọ rogbạ ghan bọ kotenheghi. Esi iduọn phọ yira rosighẹ ghan ni koḍighinhom omhoom olhẹm dị anhighẹ ḅilhẹ kẹn u/mạn ikpoki iboom. Kparipẹ roḍighinhom astudio, abuọ ogbạ otenheghi phọ rookolhobian ghan esi dị keḍighi green agbạ, dị rokol ghan mọ agreen screen, bịn korọl siphẹ ofịs phọ abidị oḍighi sividio phọ. Mem dị emhoghi ibadị abuọ imaaghiạn osighẹ oḍighinhom, abumor r’abumaranhi phọ kotue ni otọl ofịs abidị obobọ otu abidị bịn orekoọd elọ abidị; bịn ke/moghi mun oghị astudio.

Yira momiteom kẹn software dị kaloghonhaạn ḍighaạgh bumor phọ oḍighi oḍighi phọ abidị. Iphẹn phọ meḍighi idị nyiidiphọ abumor phọ rosighẹ ghan egbem amem mọ esighẹ ghan bọ igbaany kụ omiteom ḍinyạ. Abumor phọ ayira okạr kụ osereghiạn raraạr phọ iphẹn phọ ooḅenion bọ. Onyọ umor dị oghol mọ Alexander aḅẹm mọ: “Nyiidiphọ rogbor ghan komiteom sividio onhụ imaaghiạn kepu ipẹ erọl ghan bọ igbaạny. Olhoghi amhị aḅaạl kụ atenheghi. Mị rapogh ghan sividio phọ torobọ aḍio.”

Ḍio arodon, ikpoki dị resighẹ ghan ookolhobian eniin egu abuọ oḍighi imaaghiạn re/mạn ghan $5,000. Esi iduọn phọ, midughanhaan iyira omiteom asividio onhụ imaaghiạn ibadị arunhụ.

Rodiemhi Ghan Ika Sividio Onhụ Imaaghiạn?

Mem dị abumor phọ omadạn oḍighi asividio phọ rewạ ghan ni mọ enhuụn eteẹny buẹn kosighẹ bọ oḍighinhom. Mem dị eten ulhọgh ghan sividio phọ olhoghi asikasẹt r’asiDVD, kuolọ iphẹn phọ imhạn ghan ikpoki, esighẹ ghan mem, r’iboom arukumuan. Roḍighi omhạn kụ osighẹ ongọ company erugh mọ omiteom ibadị. Ekureriom mọ, kụ osaanyọgh sikasẹt phọ r’asiDVD phọ okiọm rookpomhoghan phọ. Lhạ phọ 2013 bịn, yira ulheom ni ikpoki dị epel li $2,000,000 omiteom asiDVD imaaghiạn.

Abuẹn oḅaaghạph bọ usereghiạn agey raraạr phọ iphẹn omiteom bọ. Kuolọ i/dugh ghan osighẹ asividio phọ oḍighinhom, ekạr ekpaariọm iduọn onhụ asikasẹt phọ r’asiDVD phọ omiteom bọ rebụgh bọ. Eeni amem, usighẹ ghan ibadị asiDVD kụ oḍighinhom ḍiniin aḍinyạ aBaibul bịn. Oniin onyọ umor epẹ Brazil dị oghol mọ Gilnei aḅẹm mọ: “Torobọ amem lọ yoor owạ aạl esi aBaibul, yoor kopụr owaaghị akasẹt phọ nyopọ aphạm bọ ḍinyạ aBaibul phọ, kụ ogbi owạ esi aBaibul phọ. Kụ i/dugh ghan oḍighi iduọn phọ.” Onyọ umaranhi dị oghol mọ Rafayane, dị aḍighinhom ghan siDVD onhụ imaaghiạn phọ aḅẹm mọ: “Ophạm ghan ituughạ oginha oye phọ iḍighi ghan iboom arukumuan. Omhiịn esi aBaibul obobọ aḍinyạ dị egbạ esi aBaibul phọ isighẹ ghan ni muboom amem.” Ḅilhẹ kẹn mem dị abumor r’abumaranhi phọ ayira omite epẹ erugh phọ, iwạ ghan mọ bidị ophạm sikasẹt r’asiDVD dị bidị kopegh olhoghi aTV oye lọ aḍeenhaan ḍiḅeraạn. Abuniin abumor uphạm ghan kẹn raraạr opheghom aDVD ilọ abidị kụ oghimhọm. Esighẹ rekị bịn araraạr opheghom asiDVD dị kotue ni opạm otelheom imite ni, kụ ibadị abumor ayira oḍighinhom ghan iphẹn phọ. Umor phọ Bobby, dị odi ghan United States, aḅẹm mọ: “Eḍighi maạr dị nạ m’aạl esi aBaibul kụ aḅilhẹ rawạ aạl enhọn, pọ kewạ mọ nme onhọn aDVD. Iphẹn phọ isighẹ ghan mem eḅilhẹ eḍighi idị ikparanhaạn iyoor osighẹ ghan aBaibul phọ oḍighinhom.”

Lhạ phọ 2013, oḍighom mọ aZihova umiteom ni JW Library Sign Language app, bịn eḍighi idị abumor r’abumaranhi phọ kotue ni odanlood oḅilhẹ opegh sividio onhụ imaaghiạn siphẹ asifon phọ abidị. Uphụr omiteom app phọ Onhụ Imaaghiạn America. Kụ reteẹny 2017, ooḅenhion idị kotue ni osighẹ oḍighinhom oomo ipheriphọ arunhụ imaaghiạn phọ. Iḅaạl li ilhoghi abumor r’abumaranhi phọ oomo isiẹn aḅirinhi phọ. Onyọ umor epẹ Brazil dị oghol mọ Juscelino, aḅẹm mọ: “P’eeghe imạ! Mị u/tue usophe ootughiạn ipẹ Aloor Phọ Repogh Bọ uḍeenhaan bọ iyoor phọ oḅaaghạph bọ ephomhoghiạn, ḅilhẹ r’ipẹ bidị rowạ bọ mọ yoor ukuamhị upoph aani siẹn igey phọ idiphọ abuphẹ u/ḅaaghạph bọ. Olhoghi amhị aḅaạl agey, kụ app phọ omiteom bọ aḍighi idị mị akạr alhọgh mem atuughạ Baibul phọ.”

Rodon yira romiteom ghan oomo asividio arunhụ imaaghiạn kosighẹ odoghoḍi siphẹ ekool intanẹt phọ ayira r’aJW Library Sign Language app phọ. Esi iduọn phọ, resighẹ ghan iyạl ikpo asiḍughul otu bịn kparipẹ r’arunwanyụ obobọ asiạ, ogbạ oteneghi, orekoọd ḅilhẹ r’odiemhi arinyạ onhụ imaaghiạn. Okạr oghaạph, ibadị arunhụ imaaghiạn romiteom aani ghan raraạr abidị eniin phọ amem mọ iniin arunhụ dị roḅạ komiteom romiteom ghan bọ.

Miịn idị abuniin abumor r’abumaranhi ayira dị oḅaaghạph oghaạph. Onyọ umaranhi dị oghol mọ Klízia aḅẹm mọ: “Oghẹn onhọn ookpomhoghan kụ amhoọgh ogbolhomhaam abuphẹ oḅaaghạph bọ dị tutụ omheera ookolhobian eḍien aruwaloor eten dị edugh oteẹny? Iyaạr i/lo siẹn aḅirinhi phọ dị kotue osighẹ otoomaạm iphẹn ookpomhoghan aZihova ruḍighinhaan bọ iyoor.” AVladimir aḅẹm mọ: “Asividio phọ riḍeenhaan ghan imhị mọ aZihova amoọgh ni ogbolhomhaam abuẹn oḅaaghạph bọ egina phọ eten phọ odị amhoọgh bọ aghị esi awe dị u/ḅaaghạph.”

Asividio onhụ imaaghiạn phọ ayira ibadị amem reḅẹm ghan mọ: “Umiteom idiphọ apakirị oḍighi itughemhị aBaibul dị osighẹ iisogh dị u/kpaariọm kụ rologhonhaạn ḍighaạgh.” Yoor okạr kụ osereghiạn iisogh phọ anyinha, opol rosogh ghan bọ siphẹ donate.jw.org. Iisogh phọ iphẹn phọ reḍighi ghan idị yira kotue omiteom siBaibul r’arinyạ dị regbạ Baibul phọ kongọ oomo awe, eḅaramaạm buphẹ roḍighinhom ghan bọ onhụ imaaghiạn.