Ọdaphan Luk
14 Ẹnhon amem a Jizọs ạghi ni olhoghi otu oniin oḍiemhiom ạbuo ạ Fạrisi phọ olhe eḍien Ḍio Ophooghian phọ, kụ bụphe ọrol aani bọ sịphe phọ ogbon nyọdi. 2 Kụ oye dị ạmhoogh ẹzegh dị rẹkom ghan owuphogh aloor* ạrol li ghisigh ọdi. 3 Kụ a Jizọs apuru bụphe olhegheri bọ Olhogh phọ agey r’ạbuo ạ Fạrisi phọ mọ: “Ẹkpeanhaan ni ookonhom oye Ḍio Ophooghian phọ ọbobo ị́kpe?” 4 Kụolo bịdi ụ́kaaph ịyaar. Esi ịduon phọ ọdi ạpham ni oye phọ, aakonhom, kụ ạḅenhi mọ ạghi. 5 Kụ ọdi apuru bịdi mọ: “Ọghen ọnyo anyinha kụ ẹdi ọony ọdi ọbobo ạnam ọdi asuma ghuḍia Ḍio Ophooghian phọ, káagborion ạpam apunhe?” 6 Kụ bịdi útue ụpagharanhaan nyọdi.
7 Ọdi rọmhiin ịpe awe phọ ọmhagh bọ rọsele yogh riisi ọrolhoghu dị ẹnhighe epu ịphoripho kụ ạngo bịdi ọghaaph ọmaanhiom, mọ: 8 “Mem dị oye ạmhagh aani nyịnha ọghi olhe amale apinien, kạ́ki ạtol esi dị ẹnhighe epu ịphoripho. Eeni oye phọ ạmagh aani ni sịen oye dị aḍigh eghuan apu nyịnha. 9 Kụ ọpo ịmhagh bọ inyinha atu ạḅenhi nyịnha mọ, ‘Ḅetenhu sịen phọ oye phọ ọphon phọ ạrol.’ Kụ r’umugholoor nạ ạki ạtol esi dị esoorom epu ịphoripho. 10 Kụolo mem lọ ọmhagh aani nyịnha, kịa ạrol ẹpe esoorom bọ epu ịphoripho, pịdi mem dị ọpo ạmhagh bọ nyịnha aru ạḅenhi nyịnha mọ, ‘Ọyaghiri, kịa ạrol ẹpe ẹnhighe bọ epu sịen.’ Bịn nạ kaḍigh ni eghuan ghisigh oomo ạbuphe ọmhagh aani bọ. 11 Ịdi eḍighi bọ tọrobo oye lọ aphophe loor ọdi kosooromhi ni, kụ oye lọ asooromhi loor ọdi kopophe ni.”
12 Ịpe reten kụ ọdi ạḅenhi ọpo ạmhagh bọ nyọdi oru olhe aani eḍien phọ mọ: “Mem dị nạ rạmagh we oru k’ạna olhe eḍien ootaany ọbobo eḍien adulhe, kạ́magh rịghiri ạna ọbobo bumor ạna ọbobo siya ạna ọbobo matuman ạna dị oḍighi rạalha. Ịdi eḍighi bọ bịdi otue ni ọmhagh aani nyịnha, bịn meḍighi ịdi bịdi moḅulhemian nyịnha ịpe nạ aḍighi bọ. 13 Kụolo mem lọ nạ rạmagh we oru olhe eḍien, mạgh rukulhom, r’ạrukugha, r’ạbudi oḍiku rạagha, r’ạbudi rọ́miin ghan eten; 14 bịn olhoghi ạna kạḅaal li loor esi dị bịdi ụ́moogh ịyaar ọkpeom ạna. Kụ Ẹnhaan kạkpe ni nyịnha mem mọ koḅerion bọ bụo elhiom eḍighinhom ịyaar phọ.”
15 Oniin ọdi ạrol aani sịphe phọ rọnhaghan ịphen phọ kụ ạḅenhi nyọdi mọ: “Ọḅaal olhoghi kụ oḍianhaan ọpo rale bọ eḍien* ẹpe Ọmhar phọ Ẹnhaan.”
16 Kụ a Jizọs ạḅenhi nyọdi mọ: “Oniin oye ạsa ni eboom eḍien adulhe, kụ ạamhaghagh ịbadi awe. 17 Rẹteeny mem mọ kole bọ eḍien adulhe phọ, kụ ọdi arom ẹbenhe ọdi mọ ạghi ạḅenhi bụphe ọomhaghagh bọ mọ, ‘Itu, loor esi dị mọsaaghi riiḍien phọ ọman.’ 18 Kụolo oomo phọ ạbidi umhiigh ni ọngooghi ẹgbaam. Ọḅel phọ ạḅenhi nyọdi mọ, ‘Mị ako ozo kụ emoghi dị mị kạki apogh; kạ́le wo, mị kátue atu.’ 19 Kụ ọnhon ạḅem mọ, ‘Mị ako ḍioph ạsinam dị ọgba ịyal yạl, kụ mị rạwa ọghi ophogh mọ ketue ni ekumuan; kạ́le wo, mị kátue atu.’ 20 Kụ ọnhon ạḅem mọ, ‘Pụruku mị aphin ạnhir, esi ịduon phọ mị kátue atu.’ 21 Kụ ẹbenhe phọ aḅula ạḅenhi oomo ịphen phọ ọde otu phọ ọdi. Ịphen phọ ịghagh ni olhoghi ọde otu phọ kụ ạḅenhi ẹbenhe phọ mọ, ‘Ụgua, kịa ẹpe aroḅodo phọ r’ịbam areten ẹmha phọ, ạpham rukulhom r’ạrukugha r’ạbudi rọ́miin ghan eten r’ạbudi rokpeku arumom.’ 22 Ẹbenhe phọ roḅula kụ ạḅem mọ, ‘Oye phọ, mị maḍighi ịpe nạ ạghaaph bọ, kụolo ariisi ọrolhoghu esugha ni.’ 23 Kụ uwo otu phọ ạḅenhi ẹbenhe phọ mọ, ‘Kịa ẹpe ịphoripho areten phọ ílo aani bọ sịen ẹmha phọ ạghaaph ạkpaariom mọ awe oru, pịdi otu phọ ạmhi amuza. 24 Loor esi dị mị rịḅenhi ghan inyinha mọ, r’oniin ọnyo ạbuphe mị ạphur bọ ạmhagh dị kạanemha eḍien adulhe phọ ạmhi ólho.’”
25 A Jizọs akiton ni asoman ḍiboom aḍita awe phọ rọdaph bọ nyọdi kụ ạḅenhi mọ: 26 “Oye lọ aru ụteeny ịmhi kụ ụ́logh ḍien* ọde ọdi r’onhiin ọdi r’ạnhir ọdi r’ạnmuny ọdi r’abumor ọdi r’abumaranhi ọdi, ii, ghạlhamo r’aghuḍum mọ ọdi, kátue aḍighi ọnyo ạmatuan ạmhi. 27 Kụ oye lọ oreeny ịmhinhimhiin* phọ ọdi ụ́sighe ụdapham ịmhi kátue aḍighi ọnyo ạmatuan ạmhi. 28 Esi ọmaam, ọghen ọnyo anyinha dị rạwa ọlhogh otu ạnyu kụ kạ́pur ạtol ude agbiighi maliom mọ ọmhiin mụghumo ọdi ạmoogh ni ikpoki dị ẹmhanham ọmadanham? 29 Ịduon kụ ílo, pọ ọdi kapighi ni otu phọ kụolo kátue ạlogh asiemhi, kụ oomo awe dị rọmiin aani omiigh ọgilaam ọdi 30 mọ: ‘Oye phọ ọphon phọ amhiigh ni ọlhogh otu phọ kụolo órue ọmhan.’ 31 Ọbobo ọghen uwo ẹmha dị rạwa ọghi ee ẹgham r’ọnhon uwo ẹmha kụ kạ́pur ạtol ude r’abutomhoghiom ọdi agbiighi mụghumo ọdi katue ni ạsighe 10,000 ạbuo ẹgham ọdi ạmerenyanham uwo ẹmha phọ ạpham bọ 20,000 ạbuo ẹgham kụ ratumhom? 32 Ọkar agey, eḍighi mạar dị ọdi kátue, pọ katom ni bụmeera enye mọ ọghi ọwa ẹepho r’ọphoripho uwo ẹmha phọ mem dị odi ni ekpisi dị ẹkel. 33 Iginha phọ kẹn, ilegheri mọ ọnyo anyinha dị ụ́bilhe rạraar dị ọdi ạmhoogh kátue aḍighi ọnyo ạmatuan ạmhi.
34 Ọkar agey, aboph ạnighe ni. Kụolo eḍighi mạar dị aḍiroph aboph phọ ephe, koḅulhemhi bọ ika ḍiroph phọ? 35 Aboph ọ́mhoogh ịyaar dị raḍighi ghan sịphe ade phọ, kụ kátue kẹn ạngo ẹnhuum ọzuphom ạraraar. Awe rozu ghan bịn. Ọlo ạmhoogh reḅeri ạnhaghan.”