Ọdaphan Jọn

5 Ịphen phọ reten kụ ẹteeny ẹyaal ạbuo a Ju phọ, kụ a Jizọs ạghi Jeruselem. 2 Kụ ẹpe Jeruselem sịphe Ọnhu Aḍibuo Iyool Ịga phọ, ebaraph ịrol li dị oghol ọnhu a Hibru mọ ạ Bẹtzetạ, dị ẹmhoogh oogh ạsi vạrạndạ. 3 Kụ aḍiboom aḍita awe dị úmoon, r’ạbudi rọ́miin ghan eten, r’ạbudi oḍiku rạagha, r’ạbudi ạraghaagh ọbobo aruwol emhuughu ụrol li sịphe phọ. 4* —— 5 Oye ạrol li kẹn sịphe phọ dị mạrol émoon esi 38 ạsia. 6 A Jizọs ạmhiin ni oye phọ ọphon phọ dị ạmhinha sịphe phọ, kụ alhegheri bọ ni mọ oye phọ mạrol li émoon esi ẹedoony amem, apuru mọ: “Nạ rạwa ni omhoon?” 7 Kụ oye phọ úmoon bọ ạphagharanhaan nyọdi mọ: “Oye phọ, mị ụ́moogh oye dị kụsighe ịmhi asoore sịphe ạmuum mọ mem dị raḅunyonhu, kụ mem dị mị rạki osoor, ọnhon oye rạar ghan ni ịmhi eten bịn kasoor.” 8 Kụ a Jizọs ạḅenhi nyọdi mọ: “Ḅetenhu, sịghe eetere phọ ạna arelhe.” 9 Kụ oye phọ amhoon mem mem mọ, kụ ạsighe eetere phọ ọdi amhiigh orelhe.

Aḍio phọ ạḍiphe phọ iḍighi Ḍio Ophooghian. 10 Kụ ạbuo a Ju phọ omhiigh ọḅenhi oye phọ ookonhom bọ mọ: “Arodon phọ a Ḍio Ophooghian, kụ ị́kpe dị nạ kạpam eetere.” 11 Kụolo ọdi ạphagharanhaan bịdi mọ: “Oniin phọ oye phọ uukonhom bọ ịmhi kụ ụḅenhi ịmhi mọ ‘Sịghe eetere phọ ạna arelhe.’” 12 Kụ bịdi opuru nyọdi mọ: “Ạnhian kụ ạḅenhi bọ nyịnha mọ, ‘Sịghe eetere phọ arelhe’?” 13 Kụolo ọdi ólhegheri oye phọ aakonhom bọ nyọdi, ịdi eḍighi bọ a Jizọs aḍighi lẹeph bịn aḍigh igbo aḍita awe phọ odi bọ sịphe phọ.

14 Ịphen phọ reten kụ a Jizọs ạmhiin oye phọ sịphe otu ịiḅereghi phọ kụ ạḅenhi mọ: “Mịin, nạ mamhoon. Káḍighi mụn ịkaraph ọbo ịyaar dị eeph epu sịen kemitenhaan ghan bọ nyịnha.” 15 Kụ oye phọ ạghi ạḅenhi bụo a Ju phọ mọ a Jizọs kụ aakonhom bọ nyịnho. 16 Kụ ạbuo a Ju phọ ọtuan ịphen phọ ọgbiphoghom ghan Jizọs, loor esi dị ọdi aḍighi ghan rạraar phọ ịphen phọ Ḍio Ophooghian phọ. 17 Kụ ọdi ạphagharanhaan bịdi mọ: “Ọde phọ ạmhi rakumuan ni k’ạnyiidipho, kụ mị kẹn ạkiom ni ghisigh rakumuan.” 18 Pọ kụ ịyaar phọ ạbuo a Ju phọ omhiigh bọ ọwa areten oghiigh ọdi, loor esi dị mọ ọdi ọ́ka olhogh a Ḍio Ophooghian phọ bịn, kụolo mọ ạwa kẹn dị awe kọotughian mọ Ẹnhaan r’ọno oolheeny ni, loor esi dị ạḅem ghan mọ Ẹnhaan Ọde ọno.

19 Esi ịduon phọ, a Jizọs ạḅenhi bịdi mọ: “Mị ạkar rịḅenhi ghan inyinha mọ, Ọony phọ kátue aḍighi tọrobo ịyaar dị ọdi rạwa bịn, emuton ịpe ọdi ạmhiin bọ dị Ọde phọ raḍighi. Kụ tọrobo ịyaar dị Ọpo phọ aḍighi kụ ịdi Ọony phọ rạtuugh ghan kaḍighi. 20 Ọde phọ ạpomoghian Ọony phọ kụ raḍeenhaan ghan Ọony phọ oomo ạraraar phọ ọdi raḍighi ghan bọ, kụ kaḍeenhaan ni Ọony phọ rạraar* dị epu ịphen phọ pịdi eḍighi iikia esi anyinha. 21 Kụ ịdipho Ọde phọ raḅerion ghan bọ bụlo momhuughu kạḅilhe ạngo ghuḍum, kụ ịdi Ọony phọ rạngo aani ghan ghuḍum tọrobo oye lọ ọdi rạwa ọngo. 22 Ọde phọ rásophonhaan ghan oye ọoruen, kụolo mạḅogh oomo oḍighi oogbo ịiruen phọ ạngo Ọony phọ, 23 pịdi oomo awe okuenhi Ọony phọ ịdipho bịdi rokuenhi ghan bọ Ọde phọ. Kụ tọrobo oye dị úkuenhi Ọony phọ pọ óghuenhi Ọde phọ arom bọ Ọony phọ. 24 Mị ạkar rịḅenhi ghan inyinha mọ, tọrobo ọlo ạnhaghan ikpo ọnhu phọ ạmhi kụ amheeraam Ọpo urom bọ ịmhi kạmoogh ni ghuḍum k’agee-pọ, kụ kósophanhaan nyọdi ọoruen kụolo ọdi kạḅeeny ẹku aḍuugh aḍigh ẹku aghuḍum.

25 “Mị ạkar rịḅenhi ghan inyinha mọ, amem retu ni, kụ mụen kụ amem mọ, bụphe momhuughu bọ kọnaghan bọ ẹḍogh Ọony phọ Ẹnhaan, kụ bụphe mọnhaghanhan bọ nyọdi ọmoogh ghuḍum. 26 Ịdipho Ọde phọ ạmhoogh bọ ghuḍum* sịphe aloor phọ ọdi, kụ ịdi ọdi maḍighi ịdi Ọony phọ kạmoogh aani ghuḍum sịphe aloor phọ ọdi. 27 Kụ Ọde phọ mạngo nyọdi ịikpo oogboom ịiruen, loor esi dị ọdi kụ Ọony phọ oye. 28 Ịphen phọ kíḍighi iika esi anyinha, ịdi eḍighi bọ amem retu ni dị oomo ạbuphe odi bọ sịphe iiḍi phọ* kọnaghan ẹḍogh phọ ọdi 29 kụ omite. Koḅerion bụphe oḍighi ghan bọ igey ạraraar ọngo ghuḍum, kụ oḅerion bụphe oḍighi ghan bọ ịkaraph ạraraar osoph ọoruen ọngo. 30 Mị kátue aḍighi tọrobo ịyaar dị mị rạwa bịn. Mị rạdaph ghan ịpe Ọde phọ ụḅenhi bọ ịmhi kụ aagbo ịiruen, kụ ịiruen phọ ạmhi eeleeny ni ghisigh ọdi loor esi dị mị ráḍighi ghan ịpe mị rạwa bọ, mị raḍighi ghan ghụn ịpe ọpo urom bọ ịmhi rạwa bọ.

31 “Eru mạar dị oginha ạmhi kụ rạkaaph ghan ịlo aloor ạmhi, pọ ịpe mị rạkaaph ghan bọ kị́ne. 32 Ọnhon oye odi ni dị rạkaaph ghan ịlo ạmhi, kụ mị alegheri ni mọ ịpe ọdi rạkaaph ghan bọ ịlo ạmhi ịne ni. 33 Nyinha merom ni we mọ ọghi ọteeny Jọn, kụ ọdi mịḅenhi inyinha ịpe eru bọ ịne ịlo ạmhi. 34 Tọrobo ịpe ẹrol bọ, ụ́ḅem mọ mị amoghi dị oye kụ kạkaaph ịlo ạmhi, kụolo mị rạkaaph ghan rạraar phọ ịphen phọ pịdi nyinha ẹmoogh pẹlieeny. 35 Ọdi ạghigh ọtozi dị raamor kụ ạḍiḅaal phọ rẹmu, kụ esi ekulha amem nyinha imheera ni obo iboom ibo loor esi ạḍiḅaal phọ ọdi. 36 Kụolo mị ạmoogh ni ịyaar dị epu ịpe ạ Jọn ạghaaph bọ: Iiḍighi phọ Ọde phọ ạmhi urom bọ ịmhi mọ mị uḍighi kụ mị raḍighi bọ kụ iḍeenhaan mọ Ọde phọ kụ urom ni ịmhi. 37 Kụ Ọde phọ urom bọ ịmhi mạghaaph ni ịlo ạmhi. Nyinha kẹ̋nhaghan ghan ẹḍogh ọdi kụ nyinha kẹ̋mhiin ghan kẹn risigh ọdi, 38 ḅịlhe nyinha ị́moogh ekpo ọnhu phọ ọdi sịphe ilhoghi phọ anyinha, loor esi dị nyinha ímeeraam ọkar ọpo ọdi arom bọ.

39 “Nyinha rẹeḅeghion ghan Ịge Iigbia phọ ọmhoogh aghuḍum k’agee-pọ; kụ Ịge Iigbia phọ ịphen phọ kụ ịghaaph bọ ni ịlo ạmhi. 40 Kụolo nyinha ị́wa oru ọteeny ạmhi pịdi nyinha ẹmoogh ghuḍum. 41 Mị ụ́wa rughuenhian ḍịghaagh awe, 42 kụolo mị ạkar alegheri mọ nyinha ị́pomoghian Ẹnhaan. 43 Mị marumhom ḍien Ọde phọ ạmhi, kụolo nyinha ịmhi ị́lhoghoma. Mọ ọnhon oye kụ asopha ẹlo ọdi bịn aru ọbo nyinha mịloghoma ni. 44 Nyinha kemeeraam bọ ika, mem dị nyinha rẹwa ghan dị oniin kạngo nyoniin rughuenhian kpạripe rọwa arughuenhian phọ ẹḅua bọ ḍịghaagh oginha Ẹnhaan phọ kụ eru? 45 Kẹ́etughian mọ mị kạḅenhi Ọde phọ ạmhi mọ nyinha meḍighi ịkaraph; a Mozis, ọpo nyinha eḍuom bọ olhoghi kụ rạkaaph ghan bọ mọ nyinha eḍighi ịkaraph. 46 Ọkar ọghaaph, mọ nyinha imheeraam ni Mozis, ọbo nyinha mimheeraam ni ịmhi, ịdi eḍighi bọ ọdi ạge ni ịlo ạmhi. 47 Kụolo eru mạar dị nyinha ímeeraam ịge phọ ọdi, nyinha kemeeraam bọ ika ịphen mị rạkaaph bọ?”