EMHUOGHAẠPH ITUUGHẠ PHỌ 46
Ipẹ AZihova Ungọ Bọ Iyira Okuphom Owol Oguan AParadais Phọ
“Torobọ oye dị odi siẹn ade phọ lọ awạ ḍisẹph, kalọm mọ Enhaạn phọ re/bi ghan bọ asẹph nyinọ.”—ISA. 65:16.
AḌUỌR PHỌ 3 Yoor Oḍuom Nyinhạ Olhoghi
OGHAẠPH OOKARAGHa
1. Oyil phọ Aizaya aḅenhị eeghe we phọ Izrạl?
OYIL phọ Aizaya aghaạph mọ aZihova ‘Enhaạn dị re/bi ghan.’ Ekpo onhụ phọ, “re/bi ghan” remạ ghan mọ “erọli li idiphọ.” (Isa. 65:16) “Erọl li idiphọ” remạ ghan mọ “ketu ni inẹ,” obobọ “okpẹ o/lho.” Mem dị osighẹ ikpo onhụ phọ erọl li idiphọ oghaaphọm ilọ aZihova obobọ Zizọs siphẹ aBaibul phọ, ringọ ghan iyira okuphom owol mọ iyaạr phọ rokaạph bọ inẹ ni. Esi iduọn phọ, awe phọ unhaghanhạn ni dom mọ Aizaya: Mọ torobọ iyaạr dị aZihova aghaạph re/bi ghan. Okạr agey, aZihova ramunhenhi ghan ni torobọ iyaạr lọ odị aguanhaan.
2. Uḍighi ika kụ yira kotue bọ oḍuom olhoghi ruguanhaan phọ aZihova ilọ aghisigh phọ, kụ eeghe asipuru kụ edị yira kooḅeghiọn?
2 Yira kotue ni omoọgh aani odọ okuphom owol phọ ophọn phọ okị esi aruguanhaan phọ aZihova ilọ aghisigh phọ ḍughụm? Dị rekị omhạn 800 asiạ egbi k’amem mọ Aizaya, otelhedom mọ aPọl aghaạph ni aagholhomhi iyaạr phọ eḍighi bọ kụ aruguanhaan Enhaạn re/bi ghan bọ. Odị aḅẹm mọ: “Enaạn iyira okpẹ ki/gbaạm.” (Hib. 6:18) Idiphọ okol amuụm amubọ ka/tue bọ amiteom muụm alạ, kụ edị aZihova phọ aḍighi bọ zin igey, ka/tue agbạ okpẹ. Esi iduọn phọ, yira kotue ni oḍuom olhoghi mọ torobọ iyaạr dị aZihova aghaạph kemite ni, eḅarạm oomo aruguanhaan phọ odị ilọ aghisigh phọ. Siẹn emhuoghaạph phọ ephẹn phọ, yira kooḅeghiọn sipuru phọ iphẹn: Eeghe kụ edị aZihova maguanhaan ongọ ayira epẹ ghisigh? Eeghe okuphom owol kụ edị aZihova mungọ iyira mọ odị kamunenhi ni ipẹ odị aguanhaan bọ?
AZIHOVA AGUANHAAN EEGHE?
3. (a) Eeghe oguanhaan kụ edị arebenhẹ aZihova okạr rosereghiạn ghan? (Ogananami 21:3, 4) (b) Awe romegheron ghan ika mem dị yira oḅenhị bidị oguan phọ opọ phọ?
3 Yira kooḅeghiọn oguan dị arebenhẹ aZihova siẹn oomo aḅirinhi phọ okạr rosereghiạn ghan. (Bạl Ogananami 21:3, 4.) AZihova aguanhaan ilọ amem dị “aḍuugh r’amukum ologhi r’emoghi r’eephina ke/tọl mun.” Ibadị ayira rosighẹ ghan ni esi aBaibul phọ ephẹn phọ koodereghiọm we epẹ erugh phọ, koḅilhẹ oḍeenhaan bidị ipẹ aghuḍum katọl bọ siphẹ Paradais. Ika kụ edị abuniin awe romegheron ghan mem dị yira oḍeenhaan bidị esi aBaibul phọ ephẹn phọ? Bidị otue ni oḅẹm mọ, “Edụgh agey onhaghạn kuolọ mị u/meeraam mọ ketue ni emite.”
4. (a) Eeghe kụ edị aZihova alhegheri mọ kemite? (b) Etigheri ongọ oguanhaan phọ, eeghe kụ edị aZihova aḅilhẹ aḍighi?
4 Ii, mem mọ Odị aphum bọ otelhedom mọ Jọn oghaạph ipẹ aghuḍum katọl bọ siphẹ Paradais, aZihova alhegheri ni mọ yira kosighẹ dom oḍuom olhoghi phọ aḍiẹn phọ oḅenhị aani bunhọn awe rodon. AZihova alhegheri kẹn mọ kekparanhaạn ni ibadị omheeraam oguan phọ odị ilọ “imoom araraạr.” (Isa. 42:9; 60:2; 2 Kọr. 4:3, 4) Ika kụ idị yira kologhonhaạn bunhọn ḅilhẹ r’asiloor ayira ḍighaạgh omheeraam okuphom owol mọ aḍisẹph kirokirọ phọ oghaạph bọ siphẹ Ogananami 21:3, 4 mọ ketue ni emite? AZihova o/guanhaan iphẹn phọ bịn owilhẹ, kuolọ aḅilhẹ kẹn ni angọ imạ ariphigh otuạn okuphom owol mọ kemite ni. Eeghe ariphigh kụ edị angọ bọ?
AZIHOVA ANGỌ OKUPHOM OWOL MỌ ARUGUANHAAN PHỌ ODỊ KEMUNUGHAN NI
5. Eeghe ariphigh kụ edị yira omhoọgh oḍuom olhoghi oguan aParadais phọ, kụ iḍighen esi kụ edị yira komiịn riphigh phọ?
5 Ariphigh otuạn oḍuom olhoghi oguan aParadais phọ edi siphẹ asiikpịgh phọ edaphạn bọ. Esi phọ ebạl mọ: “Kụ opọ arolọm bọ agadạ odaạm emạ phọ aḅẹm mọ, ‘Nyiidiphọ mị raḍighi oomo araraạr phọ imoom.’ Uḅeniọm kẹn ni imị mọ, ‘Gẹ iphẹn idị eḍighi bọ ikpo onhụ phọ iphẹn inẹ ni, amabi o/lo.’ Kụ odị aḅẹm mọ, ‘Moḍighi ni omạn. Mị kụ Alfạ phọ r’Omega phọ, emiighom mọ ḅilẹ r’ekureriom mo.’”—Ogan. 21:5, 6a.
6. Uḍighi ika kụ ipẹ ogẹ bọ Ogananami 21:5, 6 ekparamhị bọ oḍuom olhoghi phọ ayira esi oguan phọ Enhaạn?
6 Eeghe kụ iḍighi kụ ariisi aBaibul phọ iphẹn phọ ekparamhị bọ oḍuomolhoghi phọ ayira esi oguan phọ Enhaạn? Aḍinyạ phọ Revelation Climax ekaạph iduọn ilọ asiikpịgh phọ iphẹn phọ mọ: “Ekịgh mudị aZihova ageọm elhegh ḍinyạ ongoọm ayira akpọ oḅio mọ odị kamunenhi ni ruguanhaan phọ odị ilọ aghisigh phọ.”b Oguanhaan phọ Enhaạn ogẹ siphẹ Ogananami 21:3, 4. Kuolọ, siphẹ siikpịgh phọ 5 r’ 6, yira omiịn dị aZihova kụ aviilhọm ḍighaạgh okparamhị okuphom owol phọ ayira mọ oguanhaan phọ odị ka/bi. Uguạ, ooḅeghiọn ikpo onhụ phọ aZihova aḅạ bọ ongoọm ayira okuphom owol.
7. Anhiạn kụ amhiighom bọ oḅạ siphẹ ekpịgh phọ 5, kụ uḍighi ika kụ ipẹ phọ eḍighan bọ elhegh?
7 Okuphom owol phọ Enhaạn angọ bọ imhiighom r’ikpo onhụ phọ iphẹn eḅẹm bọ mọ: “Kụ opọ arolọm bọ agadạ odaạm emạ phọ aḅẹm mọ.” (Ogan. 21:5a) Ikpo onhụ phọ iphẹn phọ ighughuronhom esi iraạr amem mọ aZihova aḅạ bọ uḍien siphẹ ogananami phọ. Ookpaạny dị amhoọgh iikpọ kụ o/ngọ bọ okuphom owol phọ ophọn phọ, obobọ aZizọs phọ oḅeton bọ, kuolọ aZihova r’aloor! Ephigh phọ ephẹn phọ kụ imạ bọ emiteom mọ yira kotue ni oḍuom olhoghi iphẹn odị aḅilhẹ bọ aghaạph. Eeghe kụ iḍighi? Loor esi dị aZihova ‘okpẹ ka/gbạ.’ (Taitọs 1:2) Ikpo onhụ phọ ipẹ phọ meḍighi idị yira mokạr okuphom owol ipẹ ogẹ bọ Ogananami 21:5, 6.
“NYIIDIPHỌ MỊ RAḌIGHI OOMO ARARAẠR PHỌ IMOOM”
8. Ika kụ edị aZihova aghaạph akparamhị mọ oguanhaan phọ odị katu ni inẹ? (Isaiah 46:10)
8 Ooḅeghiọn ekpo onhụ phọ aZihova aḅạ bọ mọ “Nyiidiphọ!” (Ogan. 21:5) Ekpo onhụ aGrik phọ ogbạ bọ mọ “nyiidiphọ!” oḍighinhom ni ibadị ariisi siẹn aḍinyạ Ogananami phọ. Aḍiniin aḍinyạ ighaạph mọ ekpo onhụ phọ “nyiidiphọ” roḍighinhom ghan mem dị rokaạph iyaạr, “oḍighi idị awe phọ ronaghạn bọ obobọ robạl bọ koḅereremhi reḅeri abidị onhaghạn obobọ omhiịn iyaạr phọ koḅilhẹ bọ okaạph.” Esi iduọn phọ, Enhaạn aḅilhẹ aghaạph eeghe? Enhaạn iḅẹm mọ: “Nyiidiphọ mị raḍighi oomo araraạr phọ imoom.” Ogbạ agey, siẹn phọ aZihova rakaạph ghan ilọ onmia dị kamite ghisigh, kuolọ esi odị, odị akuphom owol oguan phọ ophọn phọ dị tutụ odị aghaạph eten dị eghịgh mudị memhiigh remite nyiidiphọ.—Bạl Isaiah 46:10.
9. (a) Ikpo onhụ phọ “mị raḍighi oomo araraạr phọ imoom” remạ ghan eeghe iyạl araraạr dị aZihova kaḍighi? (b) Kụ eeghe kụ kemitenhaan “oḅẹl akẹ phọ r’aḍiḅẹl ade” phọ?
9 Oḅilhẹ ooḅeghiọn iniin ikpo onhụ dị omhiịn siphẹ Ogananami 21:5: “Mị raḍighi oomo araraạr phọ imoom.” Siphẹ emhuoghaạph ekpịgh aBaibul phọ ephẹn phọ, ikpo onhụ phọ ipẹ phọ remạ ghan iyạl araraạr dị aZihova kaḍighi—Ogbuurogh osighẹ r’oḅulhemhi. Eḅẹl phọ, eeghe kụ edị aZihova kagbuurogh bọ asighẹ? Siphẹ Ogananami 21:1, yira aạl mọ: “Oḅẹl akẹ phọ r’aḍiḅẹl ade phọ meten.” “Oḅẹl akẹ phọ” remạ ghan iikpọ itooghị aḅirinhi phọ, aSetan r’ikarạph aruwaloor phọ odị renyuughiom bọ. (Mat. 4:8, 9; 1 Jọn 5:19) Idiphọ osighẹ bọ oḍighinhom siphẹ aBaibul phọ, “ade phọ” kotue ni oḅẹm mọ awe phọ orugh bọ siẹn ade phọ. (Gen. 11:1; Ps. 96:1) Esi iduọn phọ, “aḍiḅẹl ade” phọ remạ ghan bukarạph awe ade phọ arodon. AZihova ka/selhemhi obobọ aalemhi kẹ phọ r’ade phọ, kparipẹ ghụn, odị kaḅeer asighẹ kẹ phọ r’ade phọ. Odị kagbuurogh asighẹ kẹ phọ r’ade phọ edi bọ nyiidiphọ kụ amiteom “omoom akẹ r’aḍimoom ade”—iduọn phọ pọ imhoom itooghị r’omhạr awe elhiom eḍighinhom iyaạr.
10. Eeghe kụ edị aZihova kaḍighi bọ imhoom?
10 Siphẹ Ogananami 21:5, aZihova akaạph ni ilọ araraạr phọ odị kaḍighi bọ imhoom. Lọgh elhegh mọ aZihova o/ḅẹm mọ: “Mị ranmeeghi oomo araraạr imoom.” Kparipẹ ghụn, odị aḅẹm mọ: “Mị raḍighi oomo araraạr imoom.” Iphẹn phọ remạ ghan mọ aZihova kaḍighi idị ade phọ r’omhạr awe koḍighi imhoom esi oḍighi idị bidị komunughan. Idiphọ Isaiah aghaạph bọ, oomo ade phọ keḍighi imạ oghoony dị anhighẹ—idiphọ oghoony phọ Iden. Odị kuḍighi iyira r’aloor imhoom esi ookonhom atorobọ onyọ ayira omhadạn. Kookonhom buọ araaghạ, we dị eten ro/miịn ghan, ḅilhẹ r’abuḅaaghạph ḅaaghạph, koḅerion kẹn buphẹ momhuughu bọ ongọ ghuḍum.—Isa. 25:8; 35:1-7.
“IKPO ONHỤ PHỌ IPHẸN INẸ NI, AMABI O/LO. . . . MOḌIGHI NI OMẠN!”
11. Eeghe itọ kụ edị aZihova angọ Jọn, kụ eeghe kụ iḍighi?
11 Eeghe iyaạr kụ edị aZihova aḅilhẹ aghaạph ongọ ayira okuphom owol? AZihova aḅenhị Jọn mọ: “Gẹ iphẹn idị eḍighi bọ ikpo onhụ phọ iphẹn inẹ ni, amabi o/lo.” (Ogan. 21:5) AZihova o/tọ bịn oḅenhị nyodị mọ “gẹ.” Kuolọ angọ kẹn nyodị ephigh phọ. Odị aḅenhị mọ: “Idị eḍighi bọ ikpo onhụ phọ iphẹn inẹ ni, amabi o/lo.”—iduọn phọ pọ ikpo onhụ phọ Enhaạn ekpẹ ni obeḍenhọm ḅilhẹ amabi o/lho. Olhoghi ayira aḅaạl li iduọn aJọn anhaghanhạn bọ ni kụ ‘agẹ.’ Esi iduọn phọ, yira kotue ni obạl ilọ oguan aParadais phọ Enhaạn oḅilhẹ ogbirima ḍisẹph kirokirọ phọ rikori bọ iyira.
12. Uḍighi ika kụ aZihova katue bọ ni akaạph mọ: “Moḍighi ni omạn!”?
12 Enhaạn aḅilhẹ aghaạph eeghe? “Moḍighi ni omạn!” (Ogan. 21:6) Siẹn phọ aZihova akaạph mudị oguanhaan aParadais phọ mamhunhughan. Odị katue ni akaạph iduọn phọ loor esi dị iyaạr i/lo dị ketue ekikima nyodị omhunhenhi ogbi phọ odị. AZihova akaạph ni enhọn iyaạr dị ingọ iyira okuphom owol ilọ oguanhaan phọ odị. Eeghe kụ iyaạr phọ?
“MỊ KỤ ALFẠ PHỌ R’OMEGA PHỌ”
13. Uḍighi ika kụ aZihova aḅẹm bọ mọ: “Mị kụ Alfạ phọ r’Omega phọ”?
13 Idiphọ oghaạph bọ epẹ omhạn, aZihova r’aloor aḅaanhaạn ni Jọn iraạr amem siphẹ uḍien phọ. (Ogan. 1:8; 21:5, 6; 22:13) Siphẹ iraạr phọ amem mọ, aZihova aḅẹm ghan ni iniin phọ ikpo onhụ phọ mọ: “Mị kụ Alfạ phọ r’Omega phọ.” Ekpo onhụ phọ Alfạ kụ eḅẹl ekpo abcd aGrik phọ, kụ Omega phọ ekureriom. AZihova aḍighinhom ghan ikpo onhụ phọ “Alfạ phọ r’Omega phọ,” omạ omiteom mọ mem dị odị amhiigh oḍighi iyaạr, odị kaḍighi ni asiemhi eekunha ḅilhẹ emoọgh ekol.
AZihova ramunenhi ghan ni torọ iyaạr dị odị amhiigh oḍighi (Miịn siikpịgh phọ 14, 17)
14. (a) Ngọ eḍeenhaan amem dị aZihova aḅẹm mọ “Alfạ” ḅilhẹ r’amem dị odị kaḅẹm mọ “Omega.” (b) Eeghe okuphom owol kụ edị aGenesis 2:1-3 ungọ iyira?
14 Mem mọ aZihova alhẹm bọ Adạm r’Iv, Odị aghaạph ni okạr ogbi phọ odị amhooghonhaạn bọ omhạr awe r’ade phọ. ABaibul phọ aḅẹm mọ: “Enhaạn isẹph ni bidị, kụ eḅẹm mọ: ‘Imuum emuzeḍi eḍighi ibadị, imuzeḍi de phọ kụ etọ ḅerẹ engọ.’” (Gen. 1:28) Mem mọ opọ phọ, aZihova akạr raḅẹm ghan mọ odị “Alfạ.” Odị akạr ri aghaạph ogbi phọ odị agananami mọ: Amem retu ni dị anmụny Adạm r’Iv dị omhunhughan ḅilhẹ onhaghanhạn nyodị komuza siẹn ade phọ kụ otenhe de phọ paradais. Mem dị iphẹn phọ kemunughan bọ, ketọl mudị odị maḅẹm mọ “Omega.” Mem mọ aZihova amhạn bọ olhẹm akẹ phọ r’ade phọ ḅilhẹ r’oomo araraạr phọ, odị aghaạph ni iyaạr dị eḍeenhaan mọ ogbi phọ odị kakạr ri amunughan. Kụ edi siphẹ Genesis 2:1-3. (Bạl) AZihova asaḅạr ri omhunhenhiom oḍual aḍio phọ aseere mọ aḍio iigbia. Iphẹn phọ remạ ghan eeghe? Iphẹn phọ iḍeenhaan mọ ogbi phọ aZihova ilọ omhạr awe r’ade phọ kekạr ri emunughan emạn eekunha omhunhenhiom oḍual aḍio phọ.
15. Uḍighi ika kụ eghịgh bọ mudị aSetan magbaragbaramhị ogbi phọ aZihova ilọ omhạr awe?
15 Mem mọ Adạm r’Iv ogbagharạn bọ Enhaạn, bidị uḍighi buḍighinhom ikarạph, bịn osighẹ ikarạph r’aḍuugh omharạm nmụny phọ abidị. (Rom. 5:12) Loor iduọn phọ, ighịgh mudị aSetan magbaragbaramhị ogbi phọ Enhaạn omuzeḍi ade phọ we dị omhunhughan ḅilhẹ ronaghanhạn Enhaạn. Ibilhẹ eghịgh kẹn mudị aSetan maḍighi idị ke/dugh mun ni bịn dị aZihova kaḅẹm mọ “Omega.” Eeni aSetan aatughiạn mọ iyạl ikpo areten bịn kụ isughanhaan aZihova osighẹ omhunhenhiom ogbi phọ odị. Kụ mọ eniin eten pọ oghiigh Adạm r’Iv kụ olhẹm onhọn olom r’anhịr dị omhunhughan omhunhenhi ogbi phọ Odị ilọ omhạr awe. Kuolọ m’aZihova aḍighi ni iduọn phọ, obọ Eru phọ maghol Nyodị mọ ogbaạm okpẹ. Eeghe kụ iḍighi? Loor esi dị, odaphạn ipẹ ogẹ bọ Genesis 1:28, aZihova maḅenhị Adạm r’Iv mọ anmụny abidị kụ komuza bọ siẹn ade phọ.
16. Uḍighi ika kụ aSetan aatughiạn bọ mọ odị katue ni aḍighi idị aZihova ka/tue amunhenhi ipẹ odị aguanhaan bọ?
16 Eeghe onhọn osopha kụ edị eeni aSetan aatughiạn mọ aZihova kasighẹ aḍighinhom? Eeni aSetan aatughiạn mọ aZihova kameera ni mọ Adạm r’Iv omharaghị nmụny kuolọ mọ anmụny phọ ko/tue ni bịn omunughan. (Eccl. 7:20; Rom. 3:23) Eru ni idiphọ, pọ iikia i/lo, Eru phọ kaḅẹm mọ aZihova ka/moọgh mun ekol. Loor eeghe? Loor esi dị, osopha phọ ophọn phọ kaḍighi idị aZihova ka/tue mun amunenhi ogbi phọ odị, dị anmụny Adạm r’Iv dị ronaghanhạn nyodị ḅilhẹ omhunhughan komuza siẹn ade phọ dọl aParadais.
17. Ika kụ edị aZihova aphamhaghạn iiḅaghamhị phọ esoor bọ siphẹ oghoony phọ Iden, kụ eekunha phọ kekọm eeghe kụ emiteom? (Miịn kẹn afoto phọ.)
17 AZihova aphamhaghạn ni iiḅaghamhị phọ esoor bọ siphẹ oghoony phọ Iden eten dị ephẹr Setan. (Ps. 92:5) Kparipẹ dị odị kagbạ okpẹ, aZihova aḍeenhaan ni mọ odị ragbạ ghan igey, esi omheera mọ Adạm r’Iv omhạr nmụny. Kụ kparipẹ dị keḍeenhaan mọ aZihova mapiọm ogbi phọ odị, odị amhoọgh ghụn okpạr opu r’ekol. Odị aḍighi ni idị ogbi phọ odị kamunughan, esi omiteom “oọny” dị katagharạn eemharạ eemharạ Adạm r’Iv dị ronaghanhạn nyodị. (Gen. 3:15; 22:18) Iikolhobian ekiạ etagharạn phọ aZihova amiteom bọ ekạr kụ epẹr Setan! Eeghe kụ iḍighi? Loor esi dị, iikolhobian phọ ekpasị esi ephomhoghiạn dị i/ḅarạm owạ imạ ilọ aloor. (Mat. 20:28; Jọn 3:16) ASetan o/mhoọgh eegharạ phọ epẹ phọ loor esi dị odị rawạ ghan ilọ imạ aloor bịn. Esi iduọn phọ, eeghe kụ edị iikolhobian ekiạ etagharạn phọ kekọm emiteom? Mem dị reteẹny eekunha Oniin Oonịr Asiạ itooghị phọ aKraist, eemharạ eemharạ Adạm r’Iv dị ronaghanhạn aZihova komunughan kụ otọl dọl aparadais siẹn ade phọ—idiphọ aZihova agbiighi bọ k’emhiighom mọ. Mem mọ amuphẹ phọ, aZihova maḅẹm mọ “Omega,” obobọ memhunhughan.
IPẸ YIRA KOKPARAMHỊ BỌ OḌUOMOLHOGHI OGUANHAAN APARADAIS PHỌ
18. Eeghe iraạr ariphigh otuạn oḍuom olhoghi kụ edị aZihova ungọ iyira? (Miịn kẹn igbe phọ “Iraạr Ariphigh Otuạn Oḍuom Olhoghi Oguanhaan Phọ AZihova.”)
18 R’iphẹn yira mooḅeghiọn bọ siẹn phọ, eeghe okuphom owol kụ edị yira kotue ongọ we lọ omhoọgh iikia ilọ oguanhaan aParadais phọ? Eḅẹl phọ, aZihova r’aloor kụ aguanhaan. Aḍinyạ Ogananami phọ eḅẹm mọ: “Kụ opọ arolọm bọ agadạ odaạm emạ phọ aḅẹm mọ: ‘Nyiidiphọ mị raḍighi oomo araraạr phọ imoom.’” Odị amoọgh osụ olhoghi, iikpọ, ḅilhẹ r’eephuạ oḍighi ipẹ odị aguanhaan bọ. Omhunhenhiom iyạl, aZihova akạr akuphom owol oguanhaan phọ dị tutụ eghịgh esi odị mudị memite. Pọ kụ iyaạr phọ odị aḅẹm bọ mọ: “Ikpo onhụ phọ iphẹn inẹ ni, amabi o/lo. . . . Moḍighi ni omạn!” Omhunhenhiom iraạr, aZihova ramunenhi ghan ni torọ iyaạr dị odị amhiigh oḍighi. Pọ kụ iyaạr phọ odị aḅẹm bọ mọ: “Mị kụ Alfạ phọ r’Omega phọ.” AZihova kaḍeenhaan ni mọ aSetan ogbaạm okpẹ ḅilhẹ mamheel.
19. Nạ kaḍighi eeghe eḍighi maạr dị awe omhoọgh iikia ilọ oguan aParadais phọ Enhaạn?
19 Legheri mọ, torọ amem dị nạ aghaaphạn we epẹ erugh phọ ilọ okuphom owol phọ Enhaạn mungọ bọ iyira, nạ rakparamhị ghan oḍuom olhoghi phọ anạ ilọ aruguanhaan phọ aZihova. Enhọn amem dị nạ aạl omạ oguanhaan aParadais phọ oghaạph bọ oghol siphẹ Ogananami 21:4 kụ oye aḅẹm mọ, “Edụgh agey onhaghạn kuolọ mị u/meeraam mọ ketue ni emite,” nạ kaḍighi ika? Nạ katue ni abạl aḅilhẹ agbạ siikpịgh phọ 5 ḅilhẹ 6 aḅenhị oye phọ. Oḍeenhaan idị aZihova aghaạph r’okuphom owol oguanhaan phọ odị. Ii, kotue ni oḅẹm mọ odị malhọgh elhegh oḍeenhaan mọ ipẹ odị aghaạph bọ emoọgh omite.—Isa. 65:16.
AḌUỌR PHỌ 145 God’s Promise of Paradise
a Emhuoghaạph phọ ephẹn phọ keeḅeghiọn okuphom owol phọ aZihova mungọ bọ iyira mọ oguanhaan phọ odị ilọ aParadais phọ katu ni inẹ. Torọ amem dị nạ aghaaphạn bunhọn ilọ okuphom owol phọ yira omhoọgh bọ, yira rokparamhị ghan oḍuom olhoghi phọ ayira ilọ aruguanhaan phọ aZihova.