Watchtower ONLINE LIBRARY
Watchtower
ONLINE LIBRARY
Abua
  • BIBLE
  • PUBLICATIONS
  • MEETINGS
  • w23 November opoḍi 8-13
  • Idị Yira Kotue Okparamhị Ephomhoghiạn Phọ Edi Bọ Igbo Ayira

No video available for this selection.

Sorry, there was an error loading the video.

  • Idị Yira Kotue Okparamhị Ephomhoghiạn Phọ Edi Bọ Igbo Ayira
  • Otu Okoriom Dị Ragbeelhom Omhạr Phọ Azihova (Ituughạ)—2023
  • Subheadings
  • Similar Material
  • UḌIGHI IKA KỤ YIRA KOPOMOGHIẠN BỌ ONIIN ATUM NYONIIN?
  • IKA KỤ EDỊ YIRA KOTUE OḌEENHAAN EPHOMHOGHIẠN ONIIN ATUM NYONIIN?
  • IKA KỤ EDỊ YIRA KOTUE OKPARAMHỊ EPHOMHOGHIẠN PHỌ EDI BỌ IGBO AYIRA?
  • EPHIGH PHỌ YIRA OKẠR BỌ OMHOGHI EPHOMHOGHIẠN RODON
  • Kiọm Ghisigh Abughẹ Ghan Ephomhoghiạn Phọ Anạ
    Otu Okoriom Dị Ragbeelhom Omhạr Phọ Azihova (Ituughạ)—2023
Otu Okoriom Dị Ragbeelhom Omhạr Phọ Azihova (Ituughạ)—2023
w23 November opoḍi 8-13

EMHUOGHAẠPH ITUUGHẠ PHỌ 47

Idị Yira Kotue Okparamhị Ephomhoghiạn Phọ Edi Bọ Igbo Ayira

“Oniin aphomoghiạn ghan nyoniin, idị eḍighi bọ Enaạn phọ azin ephomoghiạn.”—1 JỌN 4:7.

AḌUỌR PHỌ 109 Love Intensely From the Heart

OGHAẠPH OOKARAGHa

1-2. (a) Uḍighi ika kụ otelhedom mọ aPọl aḅẹm bọ mọ ephomoghiạn “kụ ipu oomo phọ inẹ”? (b) Ighẹn asipuru kụ edị yira kooḅeghiọn?

MEM mọ otelhedom mọ aPọl rakaạph bọ ilọ omheeraam, oḍuomolhoghi, ḅilhẹ r’ephomhoghiạn, odị aḅẹm mọ “ephomoghiạn kụ ipu oomo phọ inẹ.” (1 Kọr. 13:13) Uḍighi ika kụ aPọl aghaạph bọ idiphọ phọ? Epẹ ghisigh, yira ko/moghi mun omhoọgh omheeraam oghị esi aruguanhaan omhoom aḅirinhi phọ obobọ oḍuomolhoghi mọ odị kamunhenhi ni ruguanhaan phọ ipẹ phọ. Loor esi dị aruguanhaan phọ memhunughan. Kuolọ yira omoghi oomo amem ophomhoghiạn aZihova r’awe. Okạr oghaạph, ephomhoghiạn phọ ayira kepogh ghan bịn obụgh k’iiḍuul k’iiḍuul.

2 Loor iduọn yira omhoghi bọ ephomhoghiạn oomo amem, yira kooḅeghiọn iraạr asipuru. Eḅẹl phọ, uḍighi ika kụ yira kopomoghiạn bọ oniin atum nyoniin? Omhunhenhiom iyạl, ika kụ edị yira kotue oḍeenhaan ephomhoghiạn oniin atum nyoniin? Omhunhenhiom iraạr, ika kụ edị yira kotue okparamhị ephomhoghiạn phọ edi bọ igbo ayira?

UḌIGHI IKA KỤ YIRA KOPOMOGHIẠN BỌ ONIIN ATUM NYONIIN?

3. Yira utụ eeghe kụ oniin kapomoghiạn bọ nyoniin?

3 Uḍighi ika kụ emhạn bọ maạr dị yira komoọgh ephomhoghiạn siẹn igbo phọ ayira? Eniin esi ibadị ariphigh phọ pọ, ephomhoghiạn kụ iḍeenhaan mọ yira abugey aKristẹn. AZizọs aḅenhị butelhedom mọ odị mọ: “Oniin aphomoghiạn ghan nyoniin—kụ oomo awe oIegheriom mọ nyina kụ abumatuạn phọ amị ni.” (Jọn 13:35) Ephomhoghiạn rekparamhị ghan muḅọph phọ ayira. APọl aḅẹm mọ, ephomhoghiạn rengọ ghan “oḅọph onhụ dị amunughan.” (Kọl. 3:14) Enhọn ephigh edi kẹn ni otuạn ophomhoghiạn oniin atum nyoniin. Otelhedom mọ aJọn agẹ aghiọm bumor r’abumaranhi phọ mọ: “Oye lọ aphomoghiạn Enaạn aphomoghiạn aani ghan onyọ asiya odị.” (1 Jọn 4:21) Mem dị yira oḍeenhaan ephomhoghiạn oniin atum nyoniin, yira roḍeenhaan ghan Enhaạn ephomhoghiạn.

4-5. Kaạph amaaniọm ipẹ ephomhoghiạn phọ ayira esi Enhaạn ekomọm bọ ephomhoghiạn phọ oniin amhoọgh bọ aghị esi oniin.

4 Ika kụ edị ephomhoghiạn phọ yira omhoọgh bọ oghị esi aZihova ekomọm ephomhoghiạn phọ yira omhoọgh bọ oghị esi abumor r’abumaranhi phọ? Esi omaaniọm, ooḅeghiọn muḅọph phọ odi bọ igbo ekpom mọ ayira r’inhọn apakirị aloor phọ. Oyil arookonhom katue ni apogh esi phọ ipạ repooghu ghan bọ ḍighaạgh ayira, bịn akaạph idị ekpom mọ ayira edi. Eḍeenhaan phọ ephẹn phọ itughemhị iyira eeghe ilọ ephomhoghiạn?

5 Idiphọ oyil arookonhom katue bọ ni alegheri dọl ekpom mọ esi ophogh ipẹ aḍighaạgh phọ repooghu bọ, kụ edị yira kotue olegheri idị ephomhoghiạn phọ yira omhoọgh bọ oghị esi Enhaạn ekpạr esi mem dị yira ophogh ephomhoghiạn phọ yira omhoọgh bọ oghị esi abunhọn. Eḍighi maạr lọ yira omhiịn mọ ephomhoghiạn phọ yira omhoọgh bọ oghị esi abumor r’abumaranhi phọ redugh, pọ reḍeenhaan ghan mọ ephomhoghiạn phọ ayira esi Enhaạn redugh. Ḍieriphọ aḍighaạgh phọ, yira ogbor ghan oḍeenhaan ephomhoghiạn bunhọn, pọ reḍeenhaan ghan mọ ephomhoghiạn phọ ayira esi Enhaạn ekpạr ri.

6. Uḍighi ika kụ ewạ bọ mọ oogboronhom oḍighi iyaạr omiteom eḍighi maạr dị ephomhoghiạn phọ ayira esi abumor phọ redugh? (1 Jọn 4:7-9, 11)

6 Eru maạr dị yira omhiịn mọ ephomhoghiạn phọ yira omhoọgh bọ oghị esi abumor phọ ayira redugh, pọ iiḅaghamhị retu. Eeghe kụ iḍighi? Loor esi dị ipẹ phọ remạ ghan mọ asiya phọ ayira r’aZihova redugh. Otelhedom mọ aJọn aghaạph ni aagholhomhi mọ oye dị onyọ asiya odị u/pomoghiạn ka/tue apomoghiạn Enhaạn. (1 Jọn 4:20) Iphẹn phọ itughemhị iyira eeghe? Reḅaạl ghan ni olhoghi aZihova mem dị “oniin aphomoghiạn ghan nyoniin.”—Bạl 1 Jọn 4:7-9, 11.

IKA KỤ EDỊ YIRA KOTUE OḌEENHAAN EPHOMHOGHIẠN ONIIN ATUM NYONIIN?

7-8. Ighẹn areten kụ edị yira kotue oḍeenhaan ephomhoghiạn nyoniin atum nyoniin?

7 ABaibul phọ uroma ni iyira ibadị ariisi mọ “oniin aphomoghiạn ghan nyoniin.” (Jọn 15:12, 17; Rom. 13:8; 1 Tẹs. 4:9; 1 Pit. 1:22; 1 Jọn 4:11) Toroboiperolbọ, ephomhoghiạn edi ghan ekpom, obobọ eḍighi pakirị oye olhoghi phọ. Oye o/lho dị katue amiịn ipẹ edi bọ ekpom mọ. Ika nuụn kụ edị abunhọn kotue bọ omiịn ephomhoghiạn phọ ayira? Esi ikpo onhụ ḅilhẹ r’iḍighinhom araraạr phọ ayira.

8 Ibadị areten edi ni dị yira kotue oḍeenhaan bumor r’abumaranhi phọ mọ yira opomoghiạn ni bidị. Iphẹn phọ iniin areten: “Oniin agbạ ghan igey kụ aḅenhị nyoniin.” (Zech. 8:16) Itolạn “r’eephọ esi oomo awe!” (Mạk 9:50) “Oniin aphurọm ghan aghueni nyoniin.” (Rom. 12:10) “Oniin aIoghomạ nyoniin.” (Rom. 15:7) “lsạr ghan ewilenaạn bunọn.” (Kọl. 3:13) “Oniin arooI ghan ni iiḅaghamị oniin.” (Gal. 6:2) ‘Oniin aadereghị ghan nyoniin.’ (1 Tẹs. 4:18) “Oniin aaneghị ghan nyoniin.” (1 Tẹs. 5:11) “Oniin aaḅereghinaạn ghan nyoniin.”—Jems. 5:16.

Asifoto: 1. Onyọ umaranhi dị raaḅereghị ghan. 2. Odị aler rurụ angọ onhọn onyọ umaranhi dị rakaạph idị edi ekpom odị. 3. Odị amạgh ḍimhạgh avidio onyọ umaranhi dị asiạ meghị anyụ kụ aloor i/kuạ. 4. Odị ragẹ ghan ḍinyạ ḅilhẹ r’inmo oghiọm. 5. Odị relean ghan eḍien r’umaranhi dị aḍighima iyaạr ḍighaạgh.

Ika kụ edị yira kotue ologhonhaạn ḍighaạgh bumor r’abumaranhi dị odi esi iiḅaghamhị? (Miịn siikpịgh phọ 7-9)

9. Uḍighi ika kụ oodereghị ghan abunhọn eḍighi bọ eniin ekpanhạ eten oḍeenhaan ephomhoghiạn? (Miịn kẹn afoto phọ.)

9 Ooḅeghiọn eniin eten phọ yira kotue bọ oḍeenhaan ephomhoghiạn bunhọn. Yira kooḅeghiọn oroma phọ aPọl: ‘Oniin aadereghị ghan nyoniin.’ Uḍighi ika kụ oodereghị ghan abunhọn eḍighi bọ eniin ekpanhạ eten oḍeenhaan ephomhoghiạn? Aḍiniin aḍinyạ dị regbạ ghan Baibul egbạ ekpo onhụ phọ ‘oodereghị’ mọ “omheerạ otuman okparamhị oye dị ramiinhọm.” Esi iduọn phọ, mem dị yira oghị ghisigh oodereghị bunhọn, pọ yira rologhonhaạn ghan bumor r’abumaranhi phọ ayira ḍighaạgh oghị aghisigh okumu aZihova. Torọ amem dị yira oodereghị onyọ umor obobọ umaranhi, yira roḍeenhaan ghan nyodị ephomhoghiạn.—2 Kọr. 7:6, 7, 13.

10. Ika kụ edị igbiririph r’iidereghị retelean ghan?

10 Omhoọgh igbiririph r’ongọ ghan iidereghị kụ retelean ghan. Ika? Igbiririph renyu ghan oye oḍighi iyaạr omiteom oodereghị abulọ romiinhọm. Ii, yira ropụr ghan komhoọgh igbiririph; kụ ogbi ongọ iidereghị. Lọgh elhegh ipẹ aPọl aḍeenhaan bọ idị igbiririph renyu ghan aZihova oodereghị awe. APọl akaạph mọ aZihova aḍighi “Odẹ onmạ ighirigiir, Enaạn phọ eḍighi bọ zin oomo iidereghị phọ.” (2 Kọr. 1:3) Ikpo onhụ phọ “onmạ ighirigiir” aPọl asighẹ bọ aḍighinhom siẹn phọ, rekaạph ghan ilọ igbiririph phọ oye ramoọgh ghan bọ k’aghị esi abunhọn. Esi iduọn phọ, “okol Enhaạn mọ Odẹ, obobọ Azin, onmạ ighirigiir loor esi dị igbiririph iḍuạ esi odị kụ emite.” Igbiririph phọ ipẹ phọ renyu ghan nyodị oodereghị “abuphẹ romiinọm bọ iminimiịn kirokirọ.” (2 Kọr. 1:4) Idiphọ okol amuụm raamhanhamhi ghan bọ oye dị amuụm rapụ, kụ edị aZihova raamhanhamhi ghan kaḅilhẹ aadereghị bulọ oḅonyonhu ozuan. Ika kụ idị yira kotue otuughaạny aZihova esi oḍeenhaan ghan igbiririph r’oodereghị ghan abunhọn? Eniin eten pọ omhoọgh araagharạ dị ketue ilhoghonhaạn iyira ḍighaạgh omhoọgh igbiririph r’oodereghị ghan abunhọn. Ighẹn kụ araagharạ phọ iphẹn phọ?

11. Odaphạn Kolosị 3:12 ḅilhẹ 1 Pita 3:8, ighẹn inhọn araagharạ kụ edị ewạ mọ omhoọgh orue ophamhanhạm ephomhoghiạn phọ rinyu ghan bọ iyira oodereghị abunhọn?

11 Eeghe kụ kilhoghonhaạn iyira ḍighaạgh oghị aghisigh ‘oodereghị ghan oniin atum nyoniin’ torobọ aḍio? Kemoghi mọ yira omhoọgh igbiririph, ephomhoghiạn anmụny onhiin, ḅilhẹ r’onmạ ighirigiir. (Bạl Kolosị 3:12; 1 Pita 3:8.) Ika kụ edị araagharạ phọ iphẹn phọ kilhoghonhaạn iyira ḍighaạgh? Mem dị igbiririph r’ogbolhomaam abunhọn kụ eḍighi pakirị oye phọ yira oru bọ, yira komoọgh ni ephuọm oghị ghan aghisigh oodereghị abulọ romiinhọm. Idiphọ aZizọs aghaạph bọ, “ipẹ edi bọ ologhi phọ oye kụ edị odị rakaạph ghan kamiteom. Ogey oye rakaạph ghan igey araraạr phọ dị aakpomoghi bọ siphẹ oIoghi phọ odị kụ kamiteom.” (Mat. 12:34, 35) Oodereghị ghan abumor r’abumaranhi ayira dị omhoghi iidereghị kụ eniin ekpanhạ eten oḍeenhaan mọ yira opomoghiạn ni bidị.

IKA KỤ EDỊ YIRA KOTUE OKPARAMHỊ EPHOMHOGHIẠN PHỌ EDI BỌ IGBO AYIRA?

12. (a) Eeghe kụ edị ewạ mọ ogona loor? (b) Eeghe aḍipuru kụ edị yira kooḅeghiọn?

12 Oomo ayira rowạ ni oghiọm aghisigh ophomhoghiạn oniin atum nyoniin. (1 Jọn 4:7) Toroboiperolbọ, ewạ ni dị yira kolọgh elhegh iphụr arurụ phọ aZizọs mọ “ephomoghiạn ibadị awe keephoọm ni.” (Mat. 24:12) AZizọs ra/ḅẹm ghan siẹn phọ mọ ibadị abumatuạn odị k/opomoghiạn ghan mun oniin atum nyoniin. Kuolọ ewạ ni dị yira kogona loor obọ e/moọgh ephomhoghiạn abirinhi phọ kitir ghan bọ iyira. Siẹn yira momhiịn bọ iphẹn phọ, ooḅeghiọn ḍipuru phọ aḍiẹn phọ emhạn bọ maạr: Ika kụ edị yira kotue olegheri mughumọ ephomhoghiạn phọ ayira ekpạr ri?

13. Eeghe kụ ketue edẹgh epogh ephomhoghiạn phọ ayira?

13 Eniin eten olhegheri esi dị ephomhoghiạn phọ ayira ekpạr esi pọ ophogh ipẹ yira romegheron ghan bọ mem dị iyaạr emite. (2 Kọr. 8:8) APita aghaạph ni aghol iniin odọ amem dị yira kotue ni oḍighi iduọn phọ, odị aḅẹm mọ: “Oniin amoọgh ephomoghiạn dị eḍiinyan aghị esi ophoriphọ, idị eḍighi bọ ephomoghiạn kụ reekpereghi ghan ibadibadị ikarạph!” (1 Pit. 4:8 NWT) Asidugh ḅilhẹ re/munughan abunhọn ketue ni edẹgh epogh ephomhoghiạn phọ yira omhoọgh bọ oghị esi abidị.

14. Odaphạn 1 Pita 4:8, eeghe odọ ephomhoghiạn kụ edị ewạ mọ omhoọgh? Kaạph amaaniọm.

14 Omhiigha loor ooḅeghiọn ikpo onhụ phọ aPita. Eḅẹl apakirị ekpịgh phọ 8 ekaạph ilọ odọ ephomhoghiạn dị ekpẹ omhoọgh—“ephomoghiạn dị eḍiinyan.” Ekpo onhụ phọ aPita aḍighinhom bọ siẹn phọ mọ “eḍiinyan” remạ ghan “ootariọn.” Epheriphọ apakirị ekpịgh phọ ekaạph ilọ ipẹ yira roḍighi ghan bọ mem dị yira omhoọgh ephomhoghiạn dị eḍiinyan. Ephomhoghiạn dị eḍiinyan reekpereghi ghan sipiomạn abumor r’abumaranhi phọ. Oghaạph omaaniọm iduọn: Oḅẹm mọ nạ amoọgh idaabilị, kụ anyụ idaabilị phọ anạ emoọgh riisi dị mekponyonhaan ḅilhẹ iyaạr egbul kụ i/meera iḍuạ. Oḍighi idị awe ko/miịn riisi phọ ipẹ phọ, eeni nạ kasighẹ ukpe azuom aakpereghi anyụ phọ. Ukpe phọ kaa/kpereghi eniin esi obobọ iyạl ariisi bịn, kaakpereghi oomo ariisi phọ i/nighẹ bọ siphẹ idaabilị phọ. Idiphọ ukpe katue bọ ni aakpereghi raraạr kụ edị ephomhoghiạn reekpereghi ghan ibadibadị asipiomạn ḅilhẹ r’e/munughan abunhọn.

15. Eeghe kụ edị ephomhoghiạn dị ekpạr ketue inyu iyira oḍighinhaan abumor r’abumaranhi phọ? (Kolosị 3:13)

15 Ophomhoghiạn bumor phọ ayira osi esi dị yira kotue osạr obilhenhaạn sipiomạn phọ abidị—ghalhamọ r’amem dị ekpạr ri. (Bạl Kolosị 3:13.) Mem dị yira osạr ghan owilhenhaạn bunhọn, yira roḍeenhaan ghan mọ ephomhoghiạn phọ ayira ekpạr ri ḅilhẹ mọ yira rowạ ni oḍighi idị eḅeraạn aZihova. Eeghe kụ ketue ilhoghonhaạn iyira ḍighaạgh oogboronhom ophogh ghan ogunhọm sipiomạn r’araraạr ophin olhoghi dị abunhọn oḍighi?

Obạm afoto dị ogoọr ooghiremhi dị aḍeenhaan onyọ umor dị ragbuurogh olhoghi afon odị oniin esi ibadị asifoto dị odị asighẹ egu abumor r’abumaranhi. Maatol oniin afoto phọ amiteom amaạr abạm esi.

Idiphọ yira roseere ghan bọ sifoto dị enhighẹ siphẹ afon phọ ayira kogbuurogh idị i/nighẹ, yira rosereghiạn ghan ni imạ amem mọ yira ooḍikuan bọ bumor r’abumaranhi phọ ayira bịn koghel ootughiạn ghan amem mọ ipẹ bidị opiomạn bọ (Miịn siikpịgh phọ 16-17)

16-17. Eeghe kụ keḅilhẹ etue ilhoghonhaạn iyira ḍighaạgh ophogh ogunhọm ibạm asipiomạn abunhọn? Kaạph amaaniọm. (Miịn kẹn afoto phọ.)

16 Gbon igey araagharạ abumor r’abumaranhi phọ, ka/sipiomạn phọ. Ooḅeghiọn oghaạph omaaniọm. Oḅẹm mọ nạ odi esi ramoore ghan r’aḍita abumor r’abumaranhi. Nyinha memhạn umoore phọ, kụ nyinha esighẹ afoto. Kụ loor oghiilhaan mọ eeni oniin ka/nighẹ, kụ nyinha esighẹ inhọn iyạl asifoto. Nyiidiphọ nyinha memhoọgh iraạr asifoto. Eru maạr dị nạ aphogh oniin afoto phọ kụ nạ amhiịn mọ oniin onyọ umor o/yịgh, nạ kaḍighi ika? Nạ kagbuurogh nyopọ phọ loor esi dị nạ amoọgh ni inhọn iyạl idị oomo awe phọ oyighọgh.

17 Yira kotue ni osighẹ sifoto phọ iphẹn phọ omaaniọm raraạr phọ ipẹ retọl ghan bọ siphẹ iitughiạn phọ ayira. Yira ro/nuụn ghan ko/wulha mem mọ yira orọl bọ r’abumor r’abumaranhi phọ ayira. Kuolọ oḅẹm mọ onyọ umor obobọ umaranhi aghaạph obobọ aḍighi iyaạr dị ephin esi anạ mem mọ amuphẹ phọ. Nạ kaḍighi ika mem dị nạ raatughiạn ilọ ipẹ odị aḍighi bọ? Nạ ragbi mọ ke/nighẹ osighẹ olhoghi anạ siphẹ phọ, eten phọ epẹ nạ kagbuurogh bọ afoto phọ u/nighẹ bọ? (Prov. 19:11; Efẹ. 4:32) Loor iduọn yira kotue bọ ni ootughiạn ibadị imạ araraạr dị oye phọ maḍighi, pọ kidughanhaan ni iyira ogbuurogh osighẹ opiomạn phọ odị opọ phọ. Imạ araraạr phọ oye phọ aḍighi bọ kụ edị ewạ mọ oseerian siphẹ olhoghi phọ ayira oḅilhẹ osereghiạn.

EPHIGH PHỌ YIRA OKẠR BỌ OMHOGHI EPHOMHOGHIẠN RODON

18. Eeghe iphigh araraạr kụ edị yira motuughạ ilọ ephomhoghiạn siẹn emhuoghaạph phọ ephẹn phọ?

18 Uḍighi ika kụ ewạ bọ dị yira kokparamhị ephomhoghiạn phọ ayira esi oniin atum nyoniin? Idiphọ yira motuughạ bọ, yira roḍeenhaan ghan mọ yira opomoghiạn aZihova mem dị yira oḍeenhaan ephomhoghiạn bumor r’abumaranhi phọ. Ika kụ edị yira kotue oḍeenhaan ephomhoghiạn buẹn r’ayira oḅọph bọ omheeraam mọ? Eniin eten pọ oodereghị ghan abidị. Yira kotue ni okị ghisigh oodereghị ghan oniin atum nyoniin eḍighi maạr dị yira omhoọgh igbiririph. Ika kụ edị yira kotue okparamhị ephomhoghiạn phọ yira omhoọgh bọ oghị esi abunhọn? Esi oḍighi ghan oomo ipẹ yira kotue bọ osạr ghan owilhenhaạn asipiomạn abunhọn.

19. Uḍighi ika kụ ekạr bọ emhoghi oḍeenhaan ephomhoghiạn bumor r’abumaranhi phọ ḍio arodon?

19 Uḍighi ika kụ ekạr bọ emhoghi rodon dị oniin kaḍeenhaan ghan nyoniin ephomhoghiạn? Lọgh elhegh ephigh phọ aPita angọ bọ: “Eekuronom oomo araraạr mekpulạn. Esi iduọn phọ, . . . oniin amoọgh ephomhoghiạn dị eḍiinyan aghị esi ophoriphọ.” (1 Pit. 4:7, 8 NWT) Yira kogon omhiịn eeghe, siẹn okarạph aḅirinhi phọ ophọn phọ eekunha phọ metuman bọ siẹn? Idị egbolhomaam bumatuạn phọ odị, aZizọs aghaạph mọ: “Awe oomo areeIhe kiIọgh ni inyina ḍien Ioor emụ phọ amị.” (Mat. 24:9) Orue omherenyạn amulhọgh ḍien phọ, yira omoghi omhoọgh amuḅọph. Yira oḍighi iduọn phọ, aSetan ka/tue alọgh madia siẹn igbo phọ ayira, loor esi dị ephomhoghiạn phọ rengọ ghan bọ “oomo araraạr oḅọph onhụ dị amunughan” kụ iphạm iyira eḅophoghị.—Kọl. 3:14; Fil. 2:1, 2.

NẠ KAPAGHARANHAẠN IKA?

  • Yira utụ eeghe kụ kopomoghiạn bọ bumor r’abumaranhi phọ ayira?

  • Ika kụ edị yira kotue oḍeenhaan ephomhoghiạn buẹn r’ayira oḅọph bọ omheeraam mọ?

  • Uḍighi ika kụ osạr ghan owilhenhaạn eḍighi bọ eten oḍeenhaan ephomhoghiạn?

AḌUỌR PHỌ 130 Osạr Ghan Owilhenhaan

a Ekạr ikpaariọm iyira rodon oḍeenhaan abumor r’abumaranhi phọ ephomhoghiạn. Eeghe kụ iḍighi? Ika kụ edị yira kotue oḍeenhaan ephomhoghiạn oniin atum nyoniin?

    Abua Publications (2001-2025)
    Log Out
    Log In
    • Abua
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share