Nạ Maakolhobian Ni Ilọ Igbogh Iiḅaghamhị Phọ?

1. Uḍighi ika kụ eḍighi bọ osụ olhoghi ookolhobian ilọ iiḅaghamhị?

OOKOLHOBIAN ilọ iyaạr repẹl ghan sighuḍum. Esi omaạm, mem dị ekperenhom iyaạr emite, redughanhaan ghan buphẹ mookolhobian bọ okpetenhaan ḅilhẹ r’olhoghonhaạn aḍighaạgh bunhọn. Ookpomhoghan dị rologhonhaạn ghan we ḍighaạgh dị iiḅaghamhị emitenhaan epẹ Europe, uḅẹm mọ: “Okuamhị ookolhobian katue ni apẹl sighuḍum.”

2. Uḍighi ika kụ ewạ bọ dị yira kookolhobian ilọ igbogh iiḅaghamhị phọ? (Matiu 24:44)

² Igbogh “iminimiịn” kemite ni ekperenhom. (Mat. 24:21) Ekperenhom iiḅaghamhị remite ghan ni keteẹny we, kuolọ igbogh iiḅaghamhị phọ ke/ḍighi idiphọ loor esi dị yira olegheri ni mọ kemite ni. Dị remạn ni 2,000 asiạ epẹ omhạn, aZizọs aphụr ri rurụ bumatuạn phọ odị ookolhobian ilọ aḍio phọ aḍiphẹ phọ. (Bạl Matiu 24:44.) Eḍighi maạr dị yira ookolhobian, kidughanhaan ni iyira omhughị oḅeẹny amugbagarạ amem mọ amuphẹ phọ ḅilhẹ r’olhoghonhaạn aḍighaạgh bunhọn oḍighi aani igina phọ.—Luk 21:36.

3. Ika kụ idị oḍeenhaan ghan okparạm, igbiririph, ḅilhẹ r’ephomhoghiạn kilhoghonhaạn iyira ḍighaạgh ookolhobian ilọ igbogh iiḅaghamhị phọ?

³ Miịn iraạr odọ araagharạ dị kilhoghonhaạn iyira ḍighaạgh ookolhobian ilọ igbogh iiḅaghamhị phọ. Yira komegheron ika eḍighi maạr dị urom iyira ogbeelhom aḍigbagarạ adom ooruẹn, kụ abuọ e/meera phọ usophoghom iyira? (Ogan. 16:21) Kemoghi ni okparạm orue onhaghanhạn aZihova, kụ oḍuom olhoghi mọ odị kughoph ni iyira. Yira koḍighi ika eḍighi maạr dị abumor phọ ayira oroph iniin obobọ oomo araraạr emhoọgh abidị? (Hab. 3:17, 18) Kemoghi omhoọgh eegharạ igbiririph pidị inyu iyira ongọ abidị olhoghonhaạn aḍighaạgh. Yira kozọ ika eḍighi maạr lọ izuoghom ookpomhoghan aḍita areelhe phọ ekọm idị yira r’abumor r’abumaranhi phọ ayira orugh eniin esi, esi ekulha amem? (Ezek. 38:10-12) Kemoghi ni dị yira komoọgh ephomhoghiạn dị ekpạr okị esi abidị obọ yira orue okaran mem mọ amuphẹ phọ.

4. Ika kụ idị aBaibul phọ amạ amiteom mọ yira omoọgh oghiọm aghisigh oḍeenhaan ghan okparạm, igbiririph, ḅilhẹ r’ephomhoghiạn?

⁴ Ekpo Onhụ phọ Enhaạn iromha iyira oghiọm aghisigh omhoọgh okparạm, igbiririph, ḅilhẹ r’ephomhoghiạn. Luk 21:19 eḅẹm mọ: “Esi okparạm kụ edị nyina kemoọgh ghuḍum mọ anyina.” Kolosị 3:12 eḅẹm mọ: “Imoọgh . . . igbiririph.” Kụ 1 Tesalonikạ 4:9, 10 aḅẹm mọ: “Enaạn mitughemị ni inyina ilọ oniin kaphomoghiạn ghan nyoniin. . . . Kụ yoor rolọm ni mọ iḍighi ni epuemi siẹn.” Oomo phọ ikpo onhụ phọ iphẹn phọ ugẹ oghiọmaạn we dị moḍeenhaan ghan ni okparạm, igbiririph, ḅilhẹ r’ephomhoghiạn. Ghalhamọ r’iduọn phọ ni, iwạ mọ bidị oghiọm ghisigh oḍeenhaan ghan. Yira omoọgh oḍighi aani igina phọ. Orue omhoọgh olhoghonhaạn aḍighaạgh, yira kooḅeghiọn ipẹ abuḅẹl aKristẹn phọ oḍeenhaan ghan bọ raagharạ phọ iphẹn phọ. Ipẹ reten, kụ yira omiịn ipẹ yira kotue bọ otuughaạny bumatuạn phọ abuphẹ phọ, dị epẹ eekunha phọ keḍeenhaan mọ yira rookolhobian ni ilọ igbogh iiḅaghamhị phọ.

BUGHẸ OKPARẠM MỌ ANẠ

5. Ika kụ idị abuḅẹl aKristẹn phọ orue okparạm odẹgh ophogh?

⁵ Ikạr kụ emhoghi dị abuḅẹl aKristẹn phọ komoọgh okparạm. (Hib. 10:36) Etigheri iduọn bidị osoman bọ iiḅaghamhị dị omhạr awe rosoman ghan, bidị usoman ni inhọn iiḅaghamhị. Ibadị abidị u/soman ikpuuroghọm ḍighaạgh abuḍiemhiom aruukụ iiḅereghị abuọ aJu phọ ḅilhẹ r’abuọ itooghị aRom mọ bịn, kuolọ bidị usoman kẹn ḍighaạgh ikạr arughunotu abidị. (Mat. 10:21) Kụ siphẹ okạr ookpomhoghan phọ, eeni amem bidị eenhan ghan ni itughemhị okpẹ abuphẹ momheel bọ oḍuạ siẹn igey phọ kụ rokparaghạ bọ okọm amadia. (Iiḍighi 20:29, 30) Kuolọ toroboiperolbọ, aKristẹn phọ abuphẹ phọ ukparạm ni. (Ogan. 2:3) Ika? Bidị ugbirima ilọ imạ areḍeenhaan okparạm, idiphọ aJob. (Jems. 5:10, 11) Bidị uuḅereghị ni olhọm inyaạm. (Iiḍighi 4:29-31) Kụ ogbon imạ phọ ipẹ keḍuạ bọ emite esi okparạm mọ abidị.—Iiḍighi 5:41.

6. Eeghe kụ edị yira otuughạ esi eten phọ epẹ aMerita akparạm bọ isophoghom?

⁶ Yira kotue kẹn ni okparạm eḍighi iyaạr dị yira ogbor ghan otuughạ kụ oḅilhẹ ogbirima ilọ areḍeenhaan okparạm mọ edi bọ siphẹ Ekpo Onhụ phọ Enhaạn r’arinyạ ookpomhoghan phọ. Oḍighi ghan ipẹ phọ ilhoghonhaạn ni ḍighaạgh umaranhi phọ Merita epẹ Albania, orue okparạm igbogh isophoghom dị odị asoman siphẹ eghunotu phọ odị. Odị aḅẹm mọ: “Ipẹ aBaibul phọ aghaạph bọ mọ imitenhaan Job, ikạr kụ itir imhị. AJob akạr kụ amhiinhọm—kụ ghalhamọ r’iduọn odị u/legheri bọ oye phọ akọm bọ imhinhimhiịn phọ odị—odị aghị ni ghisigh aḅẹm mọ: ‘Mị kapamanhạm ni ḍimheerạ phọ amhị, tutụ mị amhugh!’ (Job 27:5) Kụ mị ramiịn ghan ni idị imhinhimhiịn phọ amhị eghom mem dị mị asighẹ atomaạm ipẹ emitenhaan bọ Job. Mị alegheri kẹn oye phọ rakọm bọ imhinhimhiịn phọ amhị, olhegheri iyaạr dị aJob u/moọgh.”

7. Ghalhamọ yira u/soman ni ogbagarạ odẹgh ophogh nyiidiphọ, eeghe kụ edị ewạ mọ oḍighi?

⁷ Yira kotue kẹn ni okị ghisigh okparạm ghan eḍighi maạr dị yira ogbor ghan oḅenhị aZihova oomo ooḅaghamhiạn aloor lọ yira omhoọgh. (Fil. 4:6; 1 Tẹs. 5:17) Eeni nạ o/soman igbogh iiḅaghamhị nyiidiphọ. Kuolọ ghalhamọ r’iduọn phọ ni bịn, nạ amoghi ni iiḅakiọm aZihova torobọ amem dị iyaạr repin esi anạ, ḅilhẹ mem dị iyaạr emite kụ nạ u/kạr unaghanhạn obobọ u/kạr ulegheri ilọ oḍighi? Yira ogbor ghan olhọm olhoghonhaạn aḍighaạgh aZihova, ghalhamọ r’ilọ ibạm araraạr, pọ yira kokiọm ni ghisigh oḍighi ghan iduọn phọ mem dị yira osoman igbogh ipaanhaạn. Ḅilhẹ okuphom owol mọ aZihova alegheri ni mem dị ekasiạn, r’ilọ oḍighi kụ olhoghonhaạn ayira ḍighaạgh.—Ps. 27:1, 3.

8. Ika kụ edị okparạm mọ aMira aḍeenhaan mọ omhoọgh okparạm nyiidiphọ ketue ni ilhoghonhaạn iyira ḍighaạgh ghisigh? (Jems 1:2-4) (Miịn kẹn afoto phọ.)

⁸ Kidughanhaan iyira okparạm mem igbogh iiḅaghamhị phọ, eḍighi maạr lọ yira omhoọgh okparạm nyiidiphọ. (Rom. 5:3) Uḍighi ika kụ yira oḅẹm bọ iduọn phọ? Ibadị abumor momhiịn mọ torobọ odẹgh ophogh dị bidị okparạm ranyaamhị ghan bidị omherenyạn ipaanhaạn ghisigh. Okparạm kụ ranighemhị ghan kaḅilhẹ akparamhị omheeraam mọ abidị mọ aZihova anyạ ni olhoghonhaạn abidị ḍighaạgh. Omheeraam ḍieriphọ aḍighaạgh phọ, kaloghonhaạn bidị ḍighaạgh okparạm odẹgh ophogh dị bidị kosoman epẹ ghisigh. (Bạl Jems 1:2-4.) AMira, okọy eten epẹ Albania, aru ni alhọgh elhegh mọ araraạr phọ odị makparạm bọ melhoghonhaạn nyodị ḍighaạgh oghiọm aghisigh okparạm ghan. Odị aḅẹm mọ eeni amem odị raatughiạn ghan mọ odị bịn kụ oginha oye dị amhoọgh iiḅaghamhị. Kuolọ mem dị odị aatughiạn idị aZihova malhoghonhaạn nyodị ḍighaạgh esi 20 asiạ epẹ omhạn, odị raḅenhị ghan ni loor odị mọ: ‘Pạm omheeraam mọ anạ. Ka/meera mọ oomo phọ asiạ phọ ipẹ aZihova malhoghonhaạn bọ nyinhạ ḍighaạgh okparạm ephe oopho.’ Nạ kẹn katue ni agbirima idị aZihova malhoghonhaạn aani nyinhạ ḍighaạgh okparạm. Kụ akuphom owol mọ odị ralọgh ghan ni elhegh okparạm mọ anạ kụ kasẹph ni nyinhạ. (Mat. 5:10-12) Kụ mem dị igbogh iiḅaghamhị phọ kemiịgh bọ, bịn nạ matuughạ aḅilhẹ anyạ oghị aghisigh okparạm ghan.

ḌEENHAAN IGBIRIRIPH

9. Ika kụ edị ookpomhoghan phọ Antiọk oḍeenhaan igbiririph?

⁹ Ooḅeghiọn idị emite mem mọ aKristẹn phọ orọl bọ Judia osoman bọ ilhom igbakurọ phọ. Okạr oghaạph, mem mọ ookpomhoghan phọ Antiọk onhaghạn bọ ilọ igbakurọ phọ, bidị umhoọgh ni igbiririph oghị esi abumor phọ abidị epẹ Judia. Kụ iphẹn phọ enyu bidị oḍighi iyaạr omiteom olhoghonhaạn aḍighaạgh bumor r’abumaranhi phọ abidị. Kụ bidị “oguanaan mọ torobọ onyọ abunọ kasogh ghan ni onhụ ikpoki Iọ aḍighaạgh odị emạn okiomaạn buọ asiosị phọ aJudia.” (Iiḍighi 11:27-30) Kụ ghalhamọ r’iduọn abumor phọ abuẹn osoman bọ igbakurọ phọ okelhạn bọ ni bidị, Abumor phọ epẹ Antiọk uḍighi ni oomo ipẹ bidị kotue bọ olhoghonhaạn abidị ḍighaạgh.—1 Jọn 3:17, 18.

10. Ighẹn kụ areten dị yira kotue oḍeenhaan igbiririph bumor r’abumaranhi dị ekperenhom iiḅaghamhị emitenhaan? (Miịn kẹn afoto phọ.)

¹⁰ Rodon yira kotue ni kẹn oḍeenhaan igbiririph bumor r’abumaranhi phọ mem dị bidị osoman ekperenhom iiḅaghamhị. Yira romegheron ghan ni egina amem—eeni esi opuru ikumor awe phọ mughumọ yira kotue ni ologhonhaạn ḍighaạgh oselemhi otu abidị. Yira kotue kẹn ni osogh aani ikpoki, obobọ ooḅereghinhaạn bidị.b (Prov. 17:17) Esi omaạm, lhạ phọ 2020, umạ ni Ekụ Abulọgh Ḍighaạgh Mem Ekperenhom Iiḅaghamhị dị ropel li 950 siẹn oomo aḅirinhi phọ, dị kologhonhaạn ḍighaạgh buphẹ ezẹgh aKOVID-19 phọ eteẹny bọ. Yira okạr kụ rosẹph bumor r’abumaranhi phọ abuẹn phọ omiteom bọ loor oḍighi iphẹn phọ. Loor iduọn bidị omhoọgh bọ igbiririph abumor r’abumaranhi phọ, bidị ulhoghonhaạn ni ḍighaạgh osighẹ oghiomaạn araraạr phọ bidị omhoghi bọ, okparamhị bidị eten aruwaloor, buniin bidị uselhemhinhaan obobọ olhoghonhaạn ruutu ḅilhẹ r’ariisi iiseeny phọ ayira.—Poghom 2 Korịnt 8:1-4.

11. Ika kụ idị oḍeenhaan igbiririph rekuenhi ghan Odẹ k’akẹ phọ ayira?

¹¹ Awe romiịn ghan ni rikiạ phọ yira ropinyọn ghan bọ oḍeenhaan igbiririph. Esi omaạm, lhạ phọ 2019, oghim dị oghol mọ Hurricane Dorian aphueghị ni Kindọm Họl epẹ Bahamas. Mem mọ abumor phọ roḅilhẹ bọ kolhọgh Kindọm Họl phọ, bidị uteẹny ni oniin oye dị u/ḍighi onyọ Ogbaanhaạn dị kaḅenhị bidị ikpoki dị kemạn oḍighi iniin iiḍighi dị bidị owạ mọ odị aḍighinhaan bidị. Oye phọ ophọn phọ aḅenhị bidị mọ: “Mị inyinha ikpoki ki/boọr omiteom . . . awe oḍighi phọ, ḅilhẹ r’araraạr phọ koḍighinhom bọ. . . . Mị rawạ bịn oḍighinhaan ookpomhoghan phọ anyinha. Ogbolhomaam mọ [nyinha] emhoọgh bọ eghị esi arighirị phọ anyinha kụ ikạr bọ itir imhị.” Ogbogh opol awe siẹn aḅirinhi phọ u/legheri aZihova. Kuolọ ibadị abidị romiịn ni ipẹ Abugbaanhaạn AZihova roḍighi bọ. P’eeghe idị edụgh olhegheri mọ ipẹ yira roḍighi bọ oḍeenhaan abunhọn igbiririph ketue ni ekọm idị awe kolegheri aZihova phọ amhoọgh bọ igbiririph dị ‘ephughạn’!—Efẹ. 2:4.

12. Ika kụ idị omhoọgh igbiririph rodon riikolhobian ghan iyira ilọ igbogh iiḅaghamhị phọ? (Ogananami 13:16, 17)

¹² Uḍighi ika kụ kemoghi bọ oḍeenhaan igbiririph mem igbogh iiḅaghamhị phọ? ABaibul phọ aḍeenhaan mọ abuphẹ u/bakị bọ itooghị aḅirinhi phọ ophọn phọ kosoman ni ipaanhaạn—nyiidiphọ ḅilhẹ r’amem igbogh iiḅaghamhị phọ. (Bạl Ogananami 13:16, 17.) Abumor r’abumaranhi eeni komoghi olhoghonhaạn aḍighaạgh ayira ongọ abidị raraạr dị bidị omhoghi. Mem dị Uw-emhạ phọ ayira Zizọs Kraist aru oogbo iiruẹn phọ odị, eḍighi idị odị kamiịn ni dị yira roḍeenhaan igbiririph kụ uḅenhị iyira mọ “ile erua Omạr” phọ.—Mat. 25:34-40.

KPARAMHỊ EPHOMHOGHIẠN PHỌ ANẠ

13. Odaphạn Rom 15:7, ika kụ idị abuḅẹl aKristẹn phọ okparamhị ogọ ephomhoghiạn phọ abidị?

¹³ Ephomhoghiạn kụ iḍighi elhegh abuḅẹl aKristẹn phọ. Kuolọ idughanhaan ghan ni bidị oomo amem oḍeenhaan ephomhoghiạn ḍughụm? Kirokirọ awe kụ urọl ghan ookpomhoghan phọ arọl bọ epẹ Rom. Buniin abuọ aJu, buniin aruuruen dị u/legheri Olhogh phọ AMozis. Buniin aKristẹn phọ eeni uḍighi rebenhẹ—eeni kẹn abuniin ukạr omhoọgh rebenhẹ. Ika kụ idị aKristẹn phọ abuẹn phọ kotue okiọm ghisigh oḍeenhaan ghan ephomhoghiạn etigheri odọ awe phọ bidị oru bọ? Otelhedom mọ Pọl aromha bidị mọ “oniin aIoghomạ nyoniin.” (Bạl Rom 15:7.) Ikpo onhụ phọ aPọl ipẹ phọ remạ ghan eeghe? Ekpo onhụ phọ ‘ologhomạ’ remạ ghan oghuraam obobọ okọ igoni, omhạgh oye oru k’anạ obobọ oḍighom aani egu arighirị. Esi omaạm, aPọl aromha ni Failimọn idị odị kalọgh otu ebenhẹ phọ odị, Onisimọs, aghiil bọ asuma mọ: “Ḅilẹ ni aloghomạ nyodị.” (Fail. 17) APrisiIiạ r’AkuiIạ ulhoghomạ ni Apolọs, odị o/kạr olhegheri ilọ aKristẹn ooleeny bidị kuolọ bidị “usighẹ ni nyodị oIọghomạ.” (Iiḍighi 18:26) Ghalhamọ r’iduọn asidọl phọ abidị egbaranhaạn bọ ni, aKristẹn phọ abuẹn phọ ulhọgh ni ophophe muḅọph siphẹ igbogh phọ abidị oḅilhẹ olhoghomạ ghan nyoniin.

14. Ika kụ idị Anna r’olom odị oḍeenhaan ephomhoghiạn?

¹⁴ Yira kotue ni oḍeenhaan aani ephomhoghiạn bumor r’abumaranhi ayira esi osighẹ abidị righirị. Ḍieriphọ aḍighaạgh phọ, bidị kuḍeenhaan aani iyira ephomhoghiạn. (2 Kọr. 6:11-13) Ooḅeghiọn eḍeenhaan Anna r’olom odị. Mem mọ osighẹ bọ bidị oghị epẹ West Africa okumuan idiphọ amisonarị, i/bia bịn ezẹgh aKOVID-19 emhiigh. Idiphọ abumhoom awe, bidị u/tue uteẹny bumor r’abumaranhi phọ siphẹ aKindọm Họl phọ loor aKOVID-19 phọ. Ika kụ idị olom r’anhịr phọ abuẹn phọ koḍeenhaan ephomhoghiạn phọ abidị? Bidị usighẹ vidio kụ omhaghạm ghan bumor r’abumaranhi phọ ḅilhẹ r’oḅenhị abidị idị bidị rowạ okuamhị olhegheri abidị. Ephomhoghiạn phọ olom r’anhịr phọ abuẹn phọ oḍeenhaan bọ ikạr kụ etir rughunotu phọ kụ bidị omhạgh ghan oḅilhẹ ogẹ ghan dom oghiọm bidị. Uḍighi ika kụ amisonarị phọ abuẹn phọ okparaghạ bọ olhegheri abumor phọ? Anna aḅẹm mọ: “Iiḍighi ephomhoghiạn phọ uḍeenhaan ghan bọ imhị r’eghunotu phọ amhị simem dị enhighẹ r’asimem dị i/nighẹ edi ni siphẹ ekpom mọ amhị, kụ minyu imhị oḍeenhaan aani ephomhoghiạn.”

15. Eḍeenhaan phọ Vanessa etughemhị nyinhạ eeghe ilọ oḍeenhaan ghan ephomhoghiạn oomo abumor r’abumaranhi phọ? (Miịn kẹn afoto phọ.)

¹⁵ Ibadị ayira uḍuạ rookpomhoghan dị abumor r’abumaranhi asidọl kirokirọ kụ odi r’araagharạ dị egbaranhaạn. Yira kotue ni okparamhị ephomhoghiạn phọ ayira esi oomo abidị, esi ogbon ghan imạ araagharạ phọ abidị. Ikparanhaạn ghan ni umaranhi dị oghol mọ Vanessa, dị rakumuan ghan epẹ New Zealand, ooḍikuan r’abuniin awe siphẹ ookpomhoghan phọ odị. Kuolọ odị asopha ni mọ kparipẹ r’oḍuraan oḍuạ esi abuphẹ araagharạ phọ abidị i/ḅeraạn bọ nyodị, m’onọ ghụn kalọgh muboom amem atuman bidị. Iphẹn phọ odị aḍighi bọ ilhoghonhaạn nyodị ḍighaạgh omhiịn iyaạr dị edi loor abidị dị aZihova aphomhoghiạn. AVanessa aḅẹm mọ: “Loor iduọn olom amhị aḍighi bọ opoghom eghir, yoor urọl ghan igbo ibadị abumor r’abumaranhi dị omhoọgh raagharạ dị egbaranhaạn, kụ idughanhaan ni imhị ooḅughonhaan abidị. Nyiidiphọ iḅeraạn imhị iduọn abumor r’abumaranhi phọ ogbaranhaạn bọ esi araagharạ. Eegholhaan ni mọ eḅeraạn aani kẹn aZihova, loor esi dị awe phọ odị aḍur bọ ooḅereghị odị ogbaranhaạn ni.” Mem dị yira omhiịn ghan bunhọn idiphọ aZihova ramiịn bọ, pọ yira roḍeenhaan ghan mọ yira opomhoghiạn ni bidị.—2 Kọr. 8:24.

16. Uḍighi ika kụ ephomhoghiạn kemạn bọ maạr mem igbogh iiḅaghamhị phọ? (Miịn kẹn afoto phọ.)

¹⁶ Kekạr kụ emoghi dị yira koḍeenhaan ephomhoghiạn mem igbogh iiḅaghamhị phọ. Mem dị igbogh iiḅaghamhị phọ emhiigh, yira komoọgh ḍighen oghoph? Tuutughiạn itọ phọ aZihova angọ bọ we phọ odị mem mọ ozuoghom bọ Babilọn iḍiodi phọ: “Weye amhị, iḍiku iloghi aruutu anyina, eghughiom siloor anyina. Ibooghiạn moọny ekulha amem tutụ oghạgh olhoghi phọ Enhaạn aagbenyenụ.” (Isa. 26:20) Ekịgh mudị ikpo onhụ phọ iphẹn phọ igbolhomaam aani ni iyira phọ abuẹn kosoman bọ igbogh iiḅaghamhị phọ. “Iloghi aruutu” phọ etue ni eḍighi rookpomhoghan phọ ayira. AZihova aguanhaan ni oghoph ayira mem igbogh iiḅaghamhị phọ, eḍighi maạr dị yira oghị ghisigh oḅophoghạn orolạn r’abumor r’abumaranhi phọ ayira. Esi iduọn phọ, yira omoọgh olhọgh ikuph nyiidiphọ orọl r’eephọ r’abumor r’abumaranhi phọ ayira kụ oḅilhẹ ophomhoghiạn abidị. Iphẹn phọ emạn maạr agey lọ yira rowạ ni okpetenhaan!

KOOKOLHOBIAN NYIIDIPHỌ

17. Eeghe kụ edị yira kotue oḍighi mem igbogh iiḅaghamhị phọ eḍighi maạr dị yira ookolhobian nyiidiphọ phọ?

¹⁷ “Aḍigbogh aḍio phọ aZihova” keḍighi ni mugbagarạ amem esi omhạr awe. (Zeph. 1:14, 15) Awe phọ aZihova kosoman aani kẹn ni ḍikparamhinheẹn. Kuolọ eḍighi iyaạr dị yira ookolhobian nyiidiphọ, pọ yira kotue ni opoomị loor oḅilhẹ ologhonhaạn ḍighaạgh bunhọn. Yira kokparạm ni torobọ ipaanhaạn dị yira kosoman. Mem dị abumor r’abumaranhi phọ ayira romiinhọm, yira koḍighi ni oomo ipẹ yira kotue bọ olhoghonhaạn abidị ḍighaạgh, oḍeenhaan abidị igbiririph r’ongọ abidị raraạr dị bidị omhoghi. Kụ eḍighi maạr dị yira otuughạ ophomhoghiạn abumor r’abumaranhi phọ ayira nyiidiphọ, pọ ghisigh yira kopomoghiạn ni bidị. Bịn aZihova kukpẹ ni iyira iikpiạ aghuḍum k’agee-pọ, aḅirinhi dị kobulha oomo iiḅaghamhị ḅilhẹ r’iimhinhimhiịn.—Isa. 65:17.