Édé Moun ‘Ki Ka Chaché Pou Konnèt Bondyé’

1. Lè moun tann Bon Nouvèl-la pou pwèmyé fwa-a, kisa yo pé fè? (Hib. 11:6; Twavay 16:​14, 15)

AN CHAY moun an pwèmyé syèk-la aksèpté lavéwité-a, kon yo tann Bon Nouvèl-la konsèné Jézi. (Li Hibrou 11:6; Twavay 16:​14, 15.) An menm mannyè-a, jòdi jou an chay moun ka kontan pou tann Bon Nouvèl-la pou pwèmyé fwa-a. La ni lézòt ki pa antéwésé an lavéwité-a an koumansman-an, mé pli ta yo pé aksèpté’y. Konsa, lè nou jwenn moun ki ka vwéman chaché pou konnèt Bondyé, kisa nou sipozé fè?

2. Pouki nou sa konpawé twavay pwèchman-an, épi twavay-la on moun ka fè an jaden yo?

² Nou sa konpawé twavay-la nou ka fè an minis-la épi twavay-la on moun ka fè an jaden yo. Pou ki wézon nou sa di sa? Ében sé pa tout pwodwi an jaden-an ki ka matwité a menm lè-a. Konsa, mèt jaden-an ka wékòlté sa ki matwité, mé an menm di tan-an i ka kontiné otjipé sé pwodwi-a ki p’òkò bon. An menm mannyè-a, lè nou jwenn on moun ki antéwésé an lavéwité-a, nou ni pou fè tout sa nou pé pou édé moun-lan vini on disip Jézi. Èk nou bizwen fè sa pli vit ki posib. Mé, la ni lòt moun ki p’òkò apwésyé lavéwité-a, magwé yo ni on ti lantéwé andan’y. Konsa, paditan nou ka édé moun ki ka vwéman chaché pou Jéhova, nou pa ka obliyé sa ki p’òkò pawé. (Jan 4:​35, 36) Si nou konnèt diféwans-lan ant on moun ki pawé pou aksèpté lavéwité-a, èk on moun ki p’òkò pawé, i kay pli alèz pou nou édé yo. An atik sala, nou kay apwann kisa nou sa fè pwèmyé fwa-a nou ka palé épi on moun ki antéwésé an lavéwité-a. Èk nou kay wè mannyè nou sa édé yo kontiné fè pwogwé pou yo sa vini disip Jézi.

MANNYÈ POU ÉDÉ MOUN KI ANTÉWÉSÉ AN BON NOUVÈL-LA

3. Lè nou jwenn moun ki antéwésé an lavéwité-a kisa nou sa fè? (1 Kòrint 9:26)

³ Lè nou jwenn moun ki antéwésé an lavéwité-a, nou ni pou fè tout sa nou pé pou édé yo apwann konsèné Jéhova, èk dévlopé on bon wilasyon épi’y. Konsa, pa fè dèyè pou’w ofè moun-lan on létid Bib. Èk ou sa envité moun-lan pou atandé sé mitin-lan la menm, menm si sé pwèmyé fwa-a ou ka palé épi’y.—Li 1 Kòrint 9:26.

4. Kisa ou apwann an ègzanp-lan ki an paragraf sala?

⁴ Ofè moun-lan on létid Bib. Bon, la ni moun nou ka palé épi, èk la menm yo pawé pou étidyé Bib-la. Pou ègzanp, yon jou Jédi, on jenn madanm an Canada pasé bò kat-la nou ka sèvi pou pwéché-a, èk i aksèpté ti liv-la Ou Sa Ni On Bon Lavi Pou Tout Tan! Sésé-a ki té bò kat-la di madanm-lan, nou ka sèvi ti liv sala pou étidyé Bib-la épi moun, èk yo pa ni pou péyé anyen. Madanm-lan dakò pou étidyé Bib-la, èk i bay sésé-a limowo’y. Pli ta menm jou-a, madanm-lan voyé sésé-a on tèks konsèné létid Bib-la. Konsa sésé-a di’y, i kay vini étidyé épi’y an finisman simenn-lan. Mé madanm-lan di’y: “Ès ou sa vini denmen? Mwen kay lakay mwen.” Ében, yo koumansé létid-la li denmen, Vandwédi-a. Madanm-lan atandé pwèmyé mitin li, li Dimanch-la, èk i ka kontiné fè bon pwogwé an lavéwité-a.

5. Menm si on moun pa aksèpté on létid Bib la menm, kisa nou sa fè? (Gadé sé pòtwé-a osi.)

⁵ Kanmenm nou sav, sé pa tout moun ki ka fè menm kon madanm-lan nou mansyonnen-an an paragraf kat «4». La ni moun ki bizwen pli tan pou yo apwésyé lavéwité-a. Konsa si on moun pa aksèpté on létid Bib la menm, pitèt nou sa éséyé pou palé épi’y asou on sijé i antéwésé adan. Osi, si nou ni on atitid ki pozitiv, nou kay kontiné moutwé lantéwé an moun-lan, èk sa pé ankouwajé’y pou koumansé étidyé Bib-la épi nou. Bon kisa nou sa di, pou ofè on moun on létid Bib? Ében, nou mandé yonndé fwè èk sè kwèstyon sala. Konsa, annou gadé wépons yo.

6. Kisa nou sa di on moun, pou édé’y wè mannyè Bib-la sa édé’y?

⁶ Sé fwè èk sè-a nou mandé kwèstyon-an konsèné pli mèyè mannyè-a pou koumansé on létid Bib di, an sèten péyi i pli mèyè pou’w pa di moun, ou vlé étidyé Bib-la épi yo. Yo di kon sa, i pli mèyè pou’w di moun-lan, ou vlé ni on ti konmézasyon épi’y asou Bib-la. Èk, pou édé moun-lan wè mannyè Bib-la sa édé’y, ou sa di’y: “Bib-la sé pa sèlman on bon liv. I ka osi ban nou bon konsèy ki ka édé nou an tout fason an lavi nou.” Osi, ou sa di’y: “I pa ka pwan djè tan non plis. Dis «10» ében kenz «15» minit asé, pou’w apwann on bèl ti pwen ou kay sa sèvi pou édé’w an lavi’w.” Ou pa menm ni pou di moun-lan zòt kay diskité Bib-la chak simenn.

7. Souvan, kisa ki ka édé moun pou apwésyé lavéwité-a èk fè pwogwé? (1 Kòrint 14:​23-25)

⁷ Envité moun-lan pou atandé mitin. An tan zapòt Pòl, la té ni moun ki té ka tann Bon Nouvèl-la, mé sé lè yo koumansé atandé mitin, yo wéyalizé sa yo té ka tann-lan sé lavéwité-a. (Li 1 Kòrint 14:​23-25.) Èk sé menm bagay-la ki ka fèt jòdi jou. Souvan, lè on moun koumansé atandé mitin, sé lè sala i ka fè pli pwogwé èk i ka vansé pli pwé Jéhova. Konsa, ki lè ki bon pou nou envité on moun pou atandé mitin? Ében, la ni on envitasyon an chapit 10 an liv-la Ou Sa Ni On Bon Lavi Pou Tout Tan! Mé ou pa oblijé èspéyé jistan ou wivé an chapit 10 épi moun-lan pou’w envité’y. Dépi pwèmyé fwa-a ou palé épi on moun, ou sa envité’y pou atandé mitin-lan nou ka ni an finisman simenn-lan. Ou sa di’y sijé-a pou diskou piblik-la, ében ou sa di’y on ti pwen an sa nou kay diskité an létid Gad-la pou simenn sala.

8. Lè nou ka envité moun mitin, kisa nou sa di yo? (Jan 6:45)

⁸ Lè nou ka envité moun mitin, i bon pou nou di yo kisa ki ka fèt an sé mitin-lan. Paskè, an chay moun pa konnèt, sa ki ka fèt an lòt wilizyon sé pa menm bagay-la ki ka fèt an mitin nou. Pou ègzanp, pwèmyé fwa-a yon étidyan Bib tann mannyè fwè-a ki ka kondwi létid Gad-la ka kwiyé tout moun pa non yo, i mandé sè-a ki té ka étidyé épi’y-la, “Ès fwè-a ki ka kondwi-a konnèt non tout moun?” Lè sala sésé-a édé’y pou konpwann, kongwigasyon-an menm kon on bèl fanmi. Konsa menm kon nou konnèt tout moun an fanmi nou, sé kon sa nou konnèt tout sé fwè èk sè-a ki an kongwigasyon-an. Étidyan-an twapé sa té byen dwòl paskè i di, pwèskè tout moun an légliz li pa konnèt non yonn a lòt. Bon chonjé, an chay moun pa konnèt pouki nou ka vini ansanm an sé mitin-lan. (Li Jan 6:45.) Konsa nou sa di yo, nou ka vini ansanm an sé mitin-lan pou adowé Jéhova, pou apwann sa i ka enstwi nou, èk pou ankouwajé yonn a lòt. (Hib. 2:12; 10:​24, 25) Sé sa ki fè, sé mitin nou-an byen ògannizé. Tout bagay ka fèt annòd, èk nou pa ka swiv twadisyon nonm. (1 Kòr. 14:40) Osi nou ka tjenn mitin nou adan on plas ki senp èk pwòp, paskè nou la pou apwann. Èk lè’y vini pou pòlitiks, nou pa pou ni yonn ni lòt. Konsa nou pa ka diskité pyès zafè pòlitiks an sé mitin nou-an. Avan étidyan Bib ou atandé mitin pou pwèmyé fwa-a, i kay bon pou’w moutwé yo vidéyo-a Ki Sa Ki Ka Pwan Kou An Sé Mitin Nou-an? Lè sala moun-lan kay sav kisa ki ka fèt lè’y vini mitin.

9-10. Lè nou ka envité moun pou vini mitin, kisa nou sa di yo pou fè yo santi pli alèz? (Gadé pòtwé-a osi.)

⁹ Bon la ni moun ki pa ka santi konfòtab pou vini mitin. Mé la ni sèten bagay nou sa di yo, pou fè yo santi pli alèz. Pou ègzanp, adan moun ka kwè, dépi yo koumansé vini mitin nou kay fòsé yo pou vini Tèmwen Jéhova. Konsa lè’w ka envité moun, ba yo asiwans-lan ki, nou ka byen kontan lè moun vini mitin. Mé sèl sa yo ni pou fè, sé kouté. Yo pa oblijé di, ében fè anyen. Di yo, nou ka byen vini tout moun, ni gwan ni piti. Pawan sa asid ansanm épi ich yo, èk nou tout ka kouté menm enfòmasyon-an. (Dito. 31:12) Osi ou sa di yo, nou pa ka anmasé latjèt, èk nou pa ka bay moun anvlòp pou yo mété lajan non plis. Paskè, kon Bib-la ka di: ‘sé pa pou nou bay paskè an moun ka fòsé nou.’ (2 Kòr. 9:7) La ni lòt moun ki pa vlé vini mitin paskè yo ka kwè, had yo pa bon asé. Konsa, lè’w ka envité moun mitin, fè yo konnèt yo pa bizwen pyès had spésyal pou yo atandé. Chonjé, Jéhova antéwésé an sa ki andidan tjè on moun, pa lapawans yo. Konsa, dépi had yo nèt èk wèspèktab, i bon.—1 Sm 16:7.

¹⁰ Èk lè on moun vini mitin, fè tout sa’w pé pou’w fè yo santi konfòtab. Fè yo konnèt yonndé an sé ansyen-an, èk adan sé fwè èk sè-a. Lè fwè-a ki ka kondwi-a kwiyé on lévanjil, kité moun-lan swiv lévanjil-la an Bib ou épi’w. Ében si’y ni on Bib, édé’y pou twapé lévanjil-la an Bib li. Si moun-lan santi kò’y konfòtab pwèmyé fwa-a i vini mitin, i kay vlé viwé ankò.

MANNYÈ OU SA ÉDÉ ON MOUN KI KA ÉTIDYÉ BIB-LA

11. Lè’w ka étidyé Bib-la épi on moun, ki mannyè ou sa moutwé wèspé pou tan’y?

¹¹ Bon, lè nou ka étidyé Bib-la épi on moun, kisa nou ni pou chonjé? Ében, i bon pou nou moutwé wèspé pou tan moun-lan. Konsa, lè’w di moun-lan ou kay vini a sèten lè pou fè létid-la, fè asiwé ou wivé a lè-a. Osi, i kay bon pou’w pa fè pwèmyé ti létid-la twò lonng. Anfen, an chay fwè èk sè ki ni èspéyans ka di, menm si moun-lan vlé tann pli, i bon pou’w fini pwèmyé létid-la bonnè. Èk pa palé twòp. Bay moun-lan chans-lan pou’y di’w sa ki asou lidé’y.—Pwov. 10:19.

12. Lè’w ka étidyé Bib-la épi on moun kisa ou ni pou fè, èk ki mannyè ou sa fè sa?

¹² Lè’w ka étidyé Bib-la épi on moun, sa ou ni pou fè sé édé’y konnèt Jéhova épi Jézi, pou’y sa dévlopé lanmityé pou yo. Konsa, dépi an pwèmyé létid-la, pito ou fè moun-lan kwè ou ka ba yo enfòmasyon pa di bonn tèt ou, édé yo pou konpwann, sé Pawòl Bondyé ou ka sèvi pou enstwi yo. (Twav. 10:​25, 26) Zapòt Pòl kité on bèl ègzanp ban nou lè’y vini pou sa. Paskè, lè i té ka enstwi moun, i té ka édé yo pou fiksé asou Jézi Kwi, moun-lan Jéhova voyé asou latè-a, pou édé nou konnèt li èk enmen’y. (1 Kòr. 2:​1, 2) Zapòt Pòl osi édé nou pou wè, mannyè i enpòtan pou nou édé étidyan Bib dévlopé bèl kawaktè Kwityen tèl kon lafwa, lasajès, lakonpwann, èk wèspé pou Bondyé. (Sam 19:​9, 10; Pwov. 3:​13-15; 1 Pita 1:7) Sé bèl kawaktè sala si tèlman enpòtan, nou sa konpawé yo épi bagay ki byen valowab, tèl kon lò épi dajan. (1 Kòr. 3:​11-15) Konsa, annou imité ègzanp zapòt Pòl, kon nou ka édé étidyan Bib pou bati lafwa ki fò, èk pou ni on bon wilasyon épi Jéhova.—2 Kòr. 1:24.

13. Ki mannyè nou sa swiv ègzanp Jézi lè nou ka enstwi moun? (2 Kòrint 10:​4, 5) (Gadé pòtwé-a osi.)

¹³ La pa ni pyès dout ki, pli mèyè ègzanp-lan nou sa swiv lè nou ka étidyé Bib-la épi moun, sé ègzanp Jézi. Pou ègzanp, Jézi té ni pasyans épi moun, èk i té ka konpwann sitiwasyon yo. Konsa, ki mannyè nou sa swiv ègzanp Jézi? Ében, pa mandé moun-lan pyès kwèstyon ki sa fè’y santi hont, ében jennen. Èk si la ni on pwen moun-lan p’òkò konpwann, pito ou fòsé’y pou aksèpté pwen-an la menm, pwan pasyans épi’y. Ou sa diskité sijé-a pli ta, konsa ba’y on ti chans. Lè’y pawé, lavéwité-a kay touché tjè’y. (Jan 16:12; Kòl. 2:​6, 7) Paskè délè, i ka byen wèd pou on moun kité bagay i té ka kwè adan pou konmen tan. Anfen, Bib-la ka moutwé, lè nou ka éséyé pou édé on moun doubout kwè adan on fò enstwiksyon, sé akwèdi nou adan on batay èk nou ka goumen épi fèman. (Li 2 Kòrint 10:​4, 5) Èk vwéman, sé Jéhova ki sa édé moun pou chanjé katjil yo. Konsa, pito ou fòsé moun-lan pou kité tout sa’y té ka kwè adan la menm, édé’y pou mété tout konfyans li an Jéhova. Lè sala, i kay vlé fè sé chanjman-an ki nésésè pou’y sa plè Bondyé.—Sam 91:9.

MANNYÈ POU ÉDÉ MOUN KI VINI MITIN

14. Ki mannyè Jéhova vlé nou twété tout moun?

¹⁴ Jéhova vlé nou twété tout moun épi jantiyès, lanmityé èk wèspé, ki yo wich ében yo pòv. (Jémz 2:​1-4, 9) Konsa, ki mannyè nou sa moutwé moun ki vini mitin lanmityé?

15-16. Kisa nou sa fè pou édé moun santi pli konfòtab lè yo vini mitin?

¹⁵ Bon, la ni moun ki ka vini mitin senpliman paski, yo vlé konnèt kisa ki ka fèt an sé mitin nou-an. Èk la ni lézòt ki ka vini paskè on moun ankouwajé yo pou atandé. Konsa, lè ou wè on moun vini mitin, palé épi yo. Byen vini yo, moutwé yo lanmityé épi jantiyès, èk pwan pokosyon pou’w pa fè anyen ki kay fè yo santi jennen. Ou sa envité moun-lan pou asid bò’w, èk ou sa ba yo on Bib épi piblikasyon-an nou ka sèvi pou mitin-lan. Ében, ou sa kité yo swiv épi’w an Bib ou èk piblikasyon’w. Osi, gadé pou wè kisa ankò ou sa fè, pou’w fè moun-lan santi pli konfòtab. Pou ègzanp, lè on nonm atandé mitin nou pou pwèmyé fwa-a, i di fwè-a ki byen vini’y-la i té ka santi jennen paskè pou li, had li pa té bon asé. Fwè-a édé nonm-lan pou konpwann sa pa anyen, paskè Tèmwen Jéhova sé moun òdinè. Èk sa fè nonm-lan santi pli konfòtab. Apwé on tan, nonm-lan vini on sèvant Jéhova. Mé, i pa janmen obliyé mannyè fwè-a té fè’y santi alèz. Konsa toujou byen vini moun ki vini mitin, èk fè tout sa’w pé pou’w fè yo santi pli konfòtab. Mé pwan bon pokosyon pou’w pa fouyé kò’w twò fon an zafè moun-lan.—1 Pita 4:15.

¹⁶ On lòt bagay ki ka édé moun ki vini mitin pou santi pli konfòtab, sé lè nou moutwé yo wèspé an pawòl nou. Sa vlé di, lè nou ka bay on wépons ében on pa an mitin-lan, èk nou ka palé konsèné on fo enstwiksyon, ében nou ka palé konsèné moun ki pa Témwen Jéhova, nou ni pou fè sa adan on mannyè ki wèspèktab. Sé pa pou nou di anyen ki sa ofwansé moun. (Titòs 2:8; 3:2) Èk nou pa sipozé kwititjé moun pou sa yo ka kwè adan. (2 Kòr. 6:3) Sé fwè-a ki ka bay diskou piblik-la ni pou pwan bon pokosyon épi sa. I osi bon pou yo chonjé, la ni sèten mò pawòl èk èkspwèsyon nou ka sèvi, mé moun ki pa Témwen Jéhova pé pa konnèt kisa sé bagay sala vlé di. Konsa, si yo ka sèvi sé èkspwèsyon sala an diskou yo, i kay bon pou yo èspliké’y. Lè sala, tout moun ki an mitin-lan kay sa konpwann enfòmasyon-an.

17. Lè’w jwenn on moun ki ka ‘chaché pou konnèt Bondyé,’ kisa ou kay fè?

¹⁷ Chak jou ki pasé, i ka vini pli enpòtan pou nou bay kò nou ganm an twavay pwèchman-an. Èk nou ka kontiné jwenn moun ‘ki ka chaché pou konnèt Bondyé.’ (Hib. 11:6) Konsa lè nou jwenn yo, sé pa pou nou fè kòlonng pou ofè yo on létid Bib, ében pou envité yo mitin. Wi, annou twavay wèd an minis nou, pou nou sa édé moun ki ka chaché pou konnèt Jéhova, koumansé maché asou chimen “lavi étonnèl-la.”—Maf. 7:14.