Ni Konfyans-lan Ki Jéhova Enmen’w

1. Pouki ou pwonmèt Jéhova pou sèvi’y pou lèwèstan lavi’w? (Gadé pòtwé-a osi.)

ÈS OU ka chonjé lè’w té pwédyé bay Jéhova èk ou té di’y ou té vlé sèvi’y pou lèwèstan lavi’w? Wi, ou fè disizyon sala paski ou té vin konnèt Jéhova èk ou té enmen’y. Ou pwonmèt Jéhova ki, ou kay mété’y pwèmyé an lavi’w, èk ou kay kontiné enmen’y épi tout tjè’w, tout lam ou, tout lidé’w, èk tout fòs ou. (Mak 12:30) Bon. Dépi tan sala, lanmityé’w pou Jéhova ha pwofité an chay. Alò, si an moun mandé’w, si’w vwéman enmen Jéhova, san pyès dout ou kay di: “Mé wi, la pa ni an lòt moun ében an lòt bagay mwen enmen pli pasé Jéhova!”

2-3. (a) Ki asiwans Jéhova vlé nou ni? (b) Kisa nou kay diskité an atik sala? (Jérémaya 31:3)

² Bon, menm si nou asiwé nou enmen Jéhova, pitèt nou pa asiwé Jéhova enmen nou. Èk pitèt nou ka santi nou pa bon asé pou Jéhova enmen nou. Pou ègzanp, yon sésé ki pa té èspéyansé lanmityé lè’y té an ti manmay di: “Mwen enmen Jéhova épi tout tjè mwen èk mwen asiwé sa. Mé, byen souvan mwen ka santi Jéhova pa enmen mwen.” Kanmenm, kisa ki sa édé’w ni asiwans-lan ki Jéhova vwéman enmen’w?

³ Bon. Jéhova vlé nou ni asiwans-lan ki, i vwéman enmen nou. (Li Jérémaya 31:3.) Wi, sé Jéhova ki halé’w vini jwenn li, konsa i vlé’w apwann pli konsèné’y, èk i vlé’w vini jan’y. Èk lè’w té dèdiké lavi’w bay Jéhova èk ou té batizé, Jéhova té ba’w an kado spésyal, èk kado sala sé lanmityé fidèl li. Sa vlé di Jéhova enmen’w ofon tjè’y, èk i pa kay janmen tounen do’y asou’w. Wi, paski Jéhova ni lanmityé fidèl pou sé sèvant fidèl li-a, i ka gadé yo kon an ‘byen spésyal’. (Mala. 3:17) Konsa, ou byen spésyal pou Jéhova, alò Jéhova enmen’w an chay. Anfen, Jéhova vlé’w santi menm kon zapòt Pòl té ka santi lè’y di an Ronm 8:38, 39: “Mwen asiwé, ni lanmò ében lavi, nanj ében lòt pouvwa an syèl anho-a, ni bagay ki ka fèt apwézan ében sa ki kay fèt pli ta, ni pouvwa, ni syèl-la ki anho-a ében sa ki anba-a, ni pyès bagay ki janmen fèt, pa kay sa janmen tiwé nou an lanmityé-a Bondyé sèvi Jézi Kwi Senyè nou pou ban nou-an.” Konsa an atik sala, nou kay diskité pouki nou ni pou fòtifyé konfyans nou ki Jéhova enmen nou, èk kisa asiwans sala ka édé nou fè.

POUKI I ENPÒTAN POU NOU NI ASIWANS-LAN KI JÉHOVA VWÉMAN ENMEN NOU?

4. Ki mansonj Satan vlé nou kwè, èk ki mannyè nou sa widjèkté mansonj sala?

⁴ Lè nou ni asiwans-lan ki Jéhova enmen nou, sa kay édé nou pou goumen kont Denmou-an épi “tout sé vyé plan’y-lan”. (Èfés. 6:11) Bon, Satan kay sèvi népòt bagay pou fè nou doubout sèvi Jéhova. Pou ègzanp, Satan ka simen mansonj-lan ki, Jéhova pa enmen nou. Osi, délè nou ka santi fèb ében dékouwajé pou lapéti èspéyans nou té ni an tan pasé, difikilté nou ka èspéyansé apwézan, ében paski nou ni tèt cho konsèné sa ki kay fèt an tan pou vini. Èvèk sé alè sala Satan ka ataké nou. (Pwov. 24:10) Wi, Satan ni èspwa, nou kay vini si tèlman fèb, nou kay doubout sèvi Jéhova. Anfen, Satan menm kon an lyon ki enmen ataké zannimo lè yo fèb, èk yo pa sa fè défans kò yo. Kanmenm, nou sa “goumen kont” Denmou-an èk sé vyé plan’y-lan, lè nou fè tout sa nou pé pou fòtifyé konfyans nou ki, Jéhova vwéman enmen nou.​—1 Pita 5:8, 9; Jémz 4:7.

5. Pouki i si tèlman enpòtan pou nou ni asiwans-lan ki, Jéhova enmen nou èk nou ni valè an zyé’y?

⁵ Si nou asiwé Jéhova enmen nou, sa kay édé nou pou vansé pli pwé’y. Bon. Pouki nou sa di sa? Ében Jéhova fè lézòm pou yo moutwé yonn a lòt lanmityé. Konsa, lè an moun moutwé nou lanmityé, sa ka pousé nou pou moutwé moun-lan lanmityé déviwé. Alò, lè nou ni asiwans-lan ki Jéhova enmen nou èk nou ni valè an zyé’y, nou kay enmen’y pli. (1 Jan 4:19) Èk pli nou enmen Jéhova sé pli Jéhova kay enmen nou. Anfen, Jémz 4:8 ka di: “Vini pwé Bondyé èk i menm kay vini pwéʼw.” Kanmenm, kisa nou sa fè pou nou sa ni konfyans-lan ki, Jéhova vwéman enmen nou?

KISA KI KAY ÉDÉ NOU POU NI ASIWANS-LAN KI JÉHOVA VWÉMAN ÉDÉ NOU?

6. Si nou pa asiwé Jéhova enmen nou, kisa nou sa fè?

⁶ Mandé Jéhova an lapwiyè pou édé’w wè pouki i enmen’w. (Louk 18:1; Ronm 12:12) Plizyè fwa pou jounen-an ou pé ni pou mandé Jéhova pou édé’w wè ki mannyè i ka santi konsèné’w. Sé vwé, délè tjè’w pé fè’y difisil pou’w kwè Jéhova enmen’w. Kanmenm, toujou chonjé, Jéhova konnèt pli pasé tjè’w. (1 Jan 3:19, 20) Anfen, i konnèt ou pli mèyè pasé ou konnèt kò’w. Èk i ka wè sé bèl kawaktè-a ou ni, menm si ou pa ka wè yo. (1 Sm 16:7; 2 Kw. 6:30) Konsa ‘ouvè tjè’w’ bay Jéhova èk di’y kouman ou ka santi. Èk mandé’y pou ba’w asiwans-lan ki, i vwéman enmen’w. (Sam 62:8) Bon. Annou diskité déotwa bagay nou ni pou fè apwé nou pwédyé bay Jéhova.

7-8. Ki mannyè sé Samz-lan ka ban nou asiwans-lan ki Jéhova enmen nou?

⁷ Mété konfyans an Pawòl Jéhova. Bon. Jéhova bay sé nonm-lan ki ékwi Bib-la lisentèspwi’y, alò nou sa konfyé sa yo té di konsèné Jéhova. Pou ègzanp, an Sam 34:18, David ékwi konsèné mannyè Jéhova mélé épi nou. I di: “Bondyé Senyè-a toujou pwé sé moun-an ki dékouwajé-a, èk i ka sové sé moun-an ki pèd èspwa-a.” Alò lè’w twis ében dékouwajé, èk ou ka santi pyèsonn pa sa kopwann mannyè ou ka santi ében édé’w, toujou chonjé Jéhova la pou édé’w, paski i ka wè ou vwéman bizwen èd li. Osi, an Sam 56:8 tann sa David di Jéhova: ‘Souplé, anmasé tout lam dlo zyé mwen, èk mété’y an boutèy ou.’ Wi, Jéhova ka wè lè’w twis èk lè’w an penn. Osi, i mélé épi’w èk i pa kontan lè’w ka soufè. Anfen, sé konmsi i ka anmasé tout lam dlo zyé’w èk i ka chéwi’y, menm kon an moun ki ka voyajé adan an savan sèk ka chéwi dlo-a ki adan boutèy li. An plis di sa, an Sam 139:3 David ékwi konsèné Jéhova, i di: “Ou konnèt tout sa mwen ka fè.” Wi, magwé Jéhova konnèt tout sa ou ka fè, i ka fiksé asou sé bon bagay-la ou ka fè. (Hib. 6:10) Èk poutji i ka fè sa? Sé paski i ka apwésyé tout sa ou ka fè pou plè’y.a

⁸ Wi, Jéhova mété bèl lévanjil kon sa an Bib-la, pou fè’w konnèt i mélé épi’w èk i enmen’w an chay. Kanmenm, kon nou té apwann pli bonnè-a, Satan vlé’w kwè Jéhova pa enmen’w. Alò, si délè ou pa asiwé Jéhova enmen’w, mandé kò’w kwèsyon sala: ‘Ès mwen sipozè kwè Satan, “papa tout mantè”, èben Jéhova, ‘Dyé lavéwité-a’?’​—Jan 8:44; Sam 31:5.

9. Kisa Jéhova ka pwonmèt moun ki enmen’y? (Ègzodòs 20:5, 6)

⁹ Katjilé asou mannyè Jéhova ka santi konsèné moun ki enmen’y. Ann konsidiwé sa Jéhova té di Moziz èk sé jan Izwayèl-la. (Li Ègzodòs 20:5, 6.) Wi, Jéhova ka pwonmèt nou ki, i kay kontiné moutwé moun ki enmen’y lanmityé fidèl. Alò, paski Jéhova fidèl, nou sa asiwé i kay toujou enmen moun ki enmen’y. (Néhi. 1:5) Konsa si délè ou ka santi Jéhova pa enmen’w, mandé kò’w kwèsyon sala: ‘Ès mwen enmen Jéhova?’ Èk si wépons ou sé ‘wi’ èk ou ka fè pli mèyè’w pou plè’y, ou sa ni asiwans-lan ki, i enmen’w an chay. (Dann. 9:4; 1 Kòr. 8:3) Ében nou sa mété’y kon sa: ‘Si’w asiwé ou enmen Jéhova, poutji ou ni dout Jéhova enmen’w?’ Wi, ou sa ni asiwans-lan ki, Jéhova kay toujou enmen’w èk i pa kay janmen tounen do’y asou’w

10-11. Kisa Jéhova vlé’w chonjé konsèné wanson-an? (Galécha 2:20)

¹⁰ Fè tan pou katjilé asou wanson-an. Wanson-an sé pli bèl kado-a Jéhova ha janmen bay lézòm. (Jan 3:16) Mé ès Jéhova té voyé gason’y pou mò ba ou? Absoliman! Bon. Annou konsidiwé èspéyans zapòt Pòl. Chonjé Pòl té fè bagay ki té byen mové avan i té vini an Kwityen, èk apwé i vini an Kwityen, i té ni pou kontiné goumen épi sé fèblès li-a. (Ronm 7:24, 25; 1 Tim. 1:12-14) Kanmenm, silon Galécha 2:20 zapòt Pòl té asiwé Bondyé té bay gason’y kon an kado pou li. (Li Galécha 2:20.) Bon chonjé, sé Jéhova ki fè Pòl ékwi sé pawòl sala, alò, Jéhova vlé nou apwann hòd sa zapòt Pòl ékwi-a. (Ronm 15:4) Èk i vlé’w ni asiwans-lan ki, sakwifis Jézi sé an kado i ba’w. Konsa, lè’w katjilé asou bèlté kado sala, èk ou chonjé Jéhova ba ou kado sala, ou kay ni asiwans-lan ki, Jéhova vwéman enmen’w.

¹¹ Wi, nou ka wimèsyé Jéhova, paski i voyé Jézi asou latè-a pou mò ban nou. Mé nou osi vlé chonjé, an lòt wézon Jézi vini asou latè-a, sété pou enstwi nou lavéwité-a konsèné Papa’y. (Jan 18:37) Èk osi, pou enswti nou lavéwité-a konsèné ki otan Jéhova enmen nou, sé ich li-a.

JÉZI SA ÉDÉ’W NI ASIWANS-LAN KI JÉHOVA ENMEM’W

12. Pouki nou sa kwè sa Jézi té di konsèné Jéhova?

¹² Bon. Lè Jézi té asou latè-a, i té enmen di moun konsèné ki kalté moun Jéhova yé. (Louk 10:22) Èk nou sa kwè sa Jézi té di konsèné Jéhova, paski Jézi té épi papa’y Jéhova an syèl pou konmen bilyon lanné avan i vini asou latè-a. (Kòl. 1:15) Alò, Jézi konnèt ki otan papa’y enmen’y, èk i osi konnèt ki otan papa’y enmen sé nanj-lan, èk tout sé ich fidèl li-a ki asou latè-a. Bon, ki mannyè Jézi ka édé nou ni asiwans-lan ki, Jéhova enmen nou?

13. Kisa Jézi vlé nou konpwann konsèné Jéhova?

¹³ Jézi vlé nou konpwann, ki otan Jéhova vwéman enmen nou. Pou ègzanp, an sé liv-la, Mafyou, Mak, Louk èk Jan, Jézi sèvi èspwèsyon-an “Papa” plizyè fwa lè’y té ka palé konsèné Jéhova. Èk lè’y té ka palé bay sé disip li-a, i sèvi sé èspwèsyon-an “Papa’w” ében “Papa’w ki an syèl”. (Maf. 5:16; 6:26) Sa vlé di, Jézi té vlé sé disip li-a konnèt Jéhova sé Papa yo. Bon, avan Jézi té vini asou latè-a, sèvant fidèl Jéhova té ka sèvi diféwan èspwèsyon lè yo té ka palé bay Bondyé; tèl kon, ‘Dyé Toupisan’, ‘Moun-lan Ki Pli Ho-a’ èk ‘Gwan Kwéyatè’. Mé byen souvan, lè lè Jézi té ka palé konsèné Jéhova i sèvi èspwèsyon-an, ‘Papa Nou’. Èvèk èspwèsyon sala ka moutwé, Jéhova vlé sé sèvant li-a vini pwé’y, menm kon an ti manmay ka santi pwé papa’y. Alò i a klè, Jézi té ka enstwi nou ki, Jéhova enmen nou menm kon an papa enmen ich li. Bon, annou ègzanminé, dé koté Jézi sèvi èspwèsyon-an “Papa”, lè’y té ka palé konsèné Jéhova.

14. Ki mannyè Jézi moutwé nou chak ni an chay valè an zyé Jéhova? (Mafyou 10:29-31) (Gadé pòtwé-a osi.)

¹⁴ Pwèmyéman, annou konsidiwé sa Jézi té di an Mafyou 10:29-31. (Li’y. ) Bon katjilé asou sa, yon jibyé pa sa enmen ében adowé Bondyé, mé Jézi di, Papa nou konnèt ègzaktiman ki koté chak jibyé yé. Alò si an ti jibyé ni tèlman valè an zyé Jéhova, nou sa asiwé, nou ni otan pli valè an zyé’y, paski nou enmen’y èk nou ka adowé’y. Jézi osi di: “Papa nou konnèt konmen bwanch chivé ki an tèt nou.” Bon, si Jéhova konnèt jis sé piti bagay sala konsèné nou, nou sa asiwé i mélé épi chak di nou. Wi, i a klè, Jézi vlé nou ni asiwans-lan ki, nou chak ni an chay valè an zyé Papa nou Jéhova.

15. Kisa pawòl Jézi an Jan 6:44 ka di nou konsèné Papa nou ki an syèl?

¹⁵ An lòt koté Jézi sèvi èspwèsyon-an “Papa”, sé an Jan 6:44. (Li’y.) Wi sé Papa’w ki an syèl ki édé’w vini konnèt li èk enmen’y. Èk pouki i fè sa? Èben sa sé paski, i té wè ou té ni bèl kawaktè. (Twav. 13:48) Bon, lè Jézi di sé pawòl-la an Jan 6:44, pitèt i té ni an lidé, Jérémaya 31:3, koté Jéhova té di pèp li: ‘Sé lanmityé fidèl sala ki fè mwen halé’w vini jwenn mwen.’ (Gadé osi Hozéya 11:4.) Wi, Papa’w an syèl ni lanmityé fidèl pou ou, alò i ka halé’w vini jwenn li. Èvèk sa sé paski, i ka wè sé bèl kawaktè-a an ou, ou pitèt pa menm wéyalizé ou ni.

16. (a) Kisa Jézi ha enstwi nou, èk pouki nou sipozé kwè’y? (b) Ki mannyè nou sa fòtifyé asiwans nou ki, Jéhova sé pli mèyè Papa-a? (Osi, gadé bwèt-la: “Jéhova Sé Pli Mèyè Papa-a.”)

¹⁶ Bon, lè Jézi sèvi èspwèsyon-an Papa nou, sé akonmsi i ka di nou: “Jéhova sé pa sèlman Papa mwen, i sé Papa’w tou. Èk mwen ka ba’w asiwans-lan ki, i enmen’w èk i mélé épi’w.” Konsa, si délè ou ka santi Jéhova pa enmen’w, mandé kò’w: ‘Ès mwen pa sipozé konfyé pawòl Gason Bondyé, ki konnèt Papa’y pli mèyè pasé tout moun, èk i ka toujou palé lavéwité-a?’​—1 Pita 2:22.

KONTINÉ FÒTIFYÉ ASIWANS OU KI JÉHOVA ENMEN’W

17. Pouki nou ni pou kontiné fòtifyé asiwans nou ki, Jéhova enmen nou?

¹⁷ Nou ni pou kontiné fè tout sa nou pé pou fòtifyé asiwans nou ki, Jéhova enmen nou. Chonjé, Satan ka fè tout sa i pé pou anpéché nou sèvi Jéhova. Alò, i kay kontiné éséyé pou fè nou kwè Jéhova pa enmen nou. Mé nou pa janmen vlé kwè mansonj Satan!​—Jòb 27:5.

18. Kisa ou sa fè pou kontiné fòtifyé konfyans ou ki, Jéhova enmen’w?

¹⁸ Bon, an atik sala ou ha apwann diféwan bagay ou sa fè pou ou kontiné fòtifyé konfyans ou ki, Jéhova enmen’w. Alò annou wivizé: (1) Ou sa pwédyé bay Jéhova èk mandé’y pou édé’w wè sé bèl kawaktè-a i ka wè an ou. (2) Katjilé asou lévanjil ki ka di’w ki otan Jéhova mélé épi moun ki enmen’y. (3) Toujou chonjé Jéhova kay toujou enmen moun ki enmen’y. (4) Jéhova voyé Jézi pou mò ba ou. Èk (5), toujou ni asiwans-lan ki, Jéhova sé Papa’w menm kon Jézi di. Bon, si’w fè sé bagay sala èk yon moun mandé’w si’w asiwé Jéhova enmen’w, ou kay sa wéponn èk konfyans èk di’y: “Absoliman! Jéhova enmen mwen, èvèk touléjou mwen ka fè tout sa mwen pé pou moutwé Jéhova mwen enmen’y!”