Lanmityé-a Jéhova Ni Pou Nou Ka Diwé Pou Tout Tan

1-2. Lè nou ka èspéyansé on gwo pwoblenm, ki mannyè nou pé santi?

IMAJINÉ on batiman asou lanmè-a diwan on mové tan. Èk i ka mouté désann kon gwo lanm ka fwapé’y. Si yo pa ladjé lank-lan, i pa kay sa janmen wèsté an plas, paskè sé lanm-lan kay pousé’y an tout diféwan diwèksyon.

² Lè’w ka èspéyansé on gwo pwoblenm, délè ou pé santi menm kon on batiman ki pa sa wèsté an plas diwan on mové tan. Yon jou ou ka santi kò’w byen kam, paskè ou asiwé Jéhova enmen’w èk i la ka sipòté’w. Mé tan pou lòt jou-a, ou twakasé paskè lidé’w ka di’w pitèt Jéhova pa menm mélé épi’w. (Sam 10:1; 13:1) Ében pitèt on moun ba’w on ti ankouwajman, èk sa soulajé’w pou mouman-an. (Pwov. 17:17; 25:11) Mé touswit apwé sa, ou twakasé ankò. Èk sé kon sa santiman’w ka mouté désann. Ou pé jis koumansé kwè, Jéhova tounen do’y anlè’w. Konsa lè’w ka èspéyansé pwoblenm, ki mannyè ou sa kontiné ni konfyans ki, Jéhova enmen’w, èk i kay toujou la pou sipòté’w?

3. Ki kalité lanmityé Jéhova ni pou nou, èk ki mannyè sa kay édé nou? (Gadé pòtwé-a osi.)

³ Yon bagay ki kay édé’w pou tjébé fò lè’w ka èspéyansé on pwoblenm, sé lè’w chonjé kalité lanmityé-a Jéhova ni pou nou. (Li Sam 51:1; 100:5.) Lévanjil-la ka sèvi èkspwèsyon-an, “i enmen nou pou tout tan.” Sa vlé di, Jéhova ni on lanmityé ki byen fò pou nou, èk i pa kay janmen doubout enmen nou. Anfen, Bib-la ka di kon sa, Jéhova plen lanmityé fidèl. (Ègz. 34:6, 7) Èk i ka di ankò: ‘Jéhova ni an chay lanmityé fidèl pou tout moun ki ka kwiyé asou’y.’ (Sam 86:5) Ès ou ka konpwann kisa sa vlé di? Sé lévanjil sala ka moutwé a klè, Jéhova pa kay janmen abandonnen sèvant fidèl li. Konsa, lè’w ka èspéyansé on pwoblenm, chonjé bèl ti pwen sala. Èk sa kay édé’w pou kontiné tjébé fò.​—Sam 23:4.

CHONJÉ, SÉ BIB-LA KI KA DI JÉHOVA ENMEN NOU

4. Mansyonnen yonndé bagay ou ja apwann an Bib-la, èk di nou pouki ou ka kwè sé bagay sala.

⁴ On lòt bagay ki sa édé’w pou tjébé fò anba difikilté sé lè’w chonjé, sé Bib-la ki ka di, Jéhova enmen’w. Ki mannyè sa kay édé’w? Ében annou katjilé asou yonndé bèl bagay ou ja apwann an Bib-la. Ou apwann, non Bondyé sé Jéhova, Jézi sé Gason Bondyé, lé mò pa konnèt anyen èk yo pa sa fè anyen. Ou osi apwann, nou kay viv pou tout tan an pawadi asou latè-a. (Sam 83:18; Éklé. 9:5; Jan 3:16; Wév. 21:3, 4) Apwé ou apwann sé bèl bagay sala, pyèsonn pa té sa chanjé lidé’w asou sa, paskè ou sav sé Bib-la ki ka di sé bagay sala. Ében Bib-la ka osi di, Jéhova enmen nou. Konsa, ou sa ni menm asiwans-lan lè’y vini pou lanmityé Bondyé pou ou. Mé annou wè ki mannyè katjil sala sa édé’w pou ni konfyans ki, Jéhova ka wè tout sa’w ka èspéyansé, èk i mélé épi’w.

5. Ki mannyè on moun sa apwann pou widjèkté fo enstwiksyon?

⁵ Lè ou koumansé étidyé Bib-la, kisa ki édé’w pou widjèkté fo enstwiksyon? San dout, ou konpawé sa ou té ka kwè, épi sa Bib-la ka enstwi. Annou pwan yon ègzanp: Annou di ou té ka kwè, Jézi sé Bondyé. Kon’w té ka étidyé Bib-la pitèt ou té ka di an lidé’w, ès sav wè? Ès Jézi sé Bondyé? Mé apwé ou ègzanminé sa Bib-la ka di, ou vini konnèt wépons-lan. Konsa, ou doubout kwè fo enstwiksyon-an, èk ou aksèpté sa Bib-la ka di: Jézi sé “pwèmyé Gason Bondyé,” èk i sé “sèl Gason bondyé.” (Kòl. 1:15; Jan 3:18) Bon, kon nou sav, lè on moun ka kwè on fo enstwiksyon, i pa ézé pou’y ladjé’y. (2 Kòr. 10:4, 5) Mé épi èd Jéhova ou kité fò enstwiksyon, èk ou pa janmen koumansé kwè sé bagay sala ankò.​—Filip. 3:13.

6. Pou ki ou sa asiwé, lanmityé Jéhova ka diwé pou tout tan?

⁶ Ében, ou sa fè menm bagay-la lè’y vini pou sa Bib-la ka di konsèné lanmityé Jéhova. Konsa, lè’w ka èspéyansé on difikilté, èk lidé’w ka di’w Jéhova pa mélé épi’w, mandé kò’w kwèstyon sala: ‘Ès sa mwen ka kwè-a sé lavéwité?’ Èk konpawé sa lidé’w ka di’w-la, épi sa Bib-la ka di an lévanjil-la atik sala bazé asou-a. Sa vlé di, Sam 100:5. Pouki ou kwè Jéhova ka di, i enmen nou pou tout tan? Èk pouki Bib-la ka di nou plizyè fwa, Jéhova ni lanmityé fidèl? Kon nou ja wè, sé Bib-la ki ka di nou kalité lanmityé-a Jéhova ni pou pèp li. Konsa, ou sa aksèpté enstwiksyon sala, menm kon’w ka aksèpté lòt bagay ki an Pawòl Bondyé. Sé pa pou’w janmen kwè Jéhova pa enmen’w, ében ou pa ni valè pou li, paskè sa sé mansonj. Widjèkté vyé katjil sala menm kon’w ka widjèkté tout fò enstwiksyon.

7. Mansyonnen yonndé lévanjil ki ka moutwé, Jéhova enmen nou.

⁷ La ni plizyè lévanjil ki ka moutwé, Jéhova enmen nou. Pou ègzanp, Jézi té di sé disip li-a: “[Zòt] ni pli valè pasé an chay jibyé.” (Maf. 10:31) Èk Jéhova té di pèp li: ‘Mwen kay fòtifyé’w, wi, mwen kay édé’w. Mwen kay vwéman tjenbé’w byen wèd épi lanmen dwèt mwen, pou mennen’w an chimen-an ki dwèt-la.’ (Izay. 41:10) Òbzòvé, Jézi pa té di, ‘pitèt ou ni pli valè,’ èk Jéhova pa té di, ‘pitèt mwen kay édé’w.’ Non. Jézi di, “Ou ni pli valè” èk Jéhova di, “mwen kay édé’w.” Sé lévanjil sala ka édé’w pou konnèt a klè, Jéhova enmen’w. Konsa, si’w ni pyès dout konsèné lanmityé Jéhova pou ou, pwédyé èk katjilé asou sé lévanjil sala. Lè sala ou kay “konnèt épi [ou kay kwè], lanmityé-a Bondyé ni pou nou-an.”—1 Jan 4:16.a

8. Si délè ou ka santi Jéhova pa enmen’w, kisa ou sa fè?

⁸ Bon, ou konnèt sa Bib-la ka di konsèné lanmityé-a Jéhova ni pou ou. Mé wannman, délè ou pé santi Jéhova pa enmen’w. Kisa ou sa fè? Ében, konpawé sa lidé’w ka di’w-la épi sa ou konnèt konsèné Jéhova. Paskè, sa lidé’w ka di’w-la sa chanjé, mé sa Bib-la ka di nou konsèné lanmityé Jéhova sé on bagay ki pa sa janmen chanjé. Wi, Bondyé sé lanmityé. Konsa si’w pa ka kwè i ni lanmityé pou ou, sa vlé di ou p’òkò konnèt Bondyé.​—1 Jan 4:8.

TOUJOU CHONJÉ, ‘JÉHOVA ENMEN’W’

9-10. Konsèné kisa Jézi té ka palé lè’y té di sé disip li-a, ‘Papa-a enmen zòt?’ (Gadé pòtwé-a osi.)

⁹ Nou sa apwann pli konsèné lanmityé Bondyé, lè nou konsidiwé on bagay Jézi té di sé disip li-a. I té di yo: “Papa-a menm enmen zòt.” (Li Jan 16:26, 27.) Yonndé vèwsé avan sa ka moutwé, Jézi té ka palé konsèné lapwiyè, lè’y té di sé disip-la sé pawòl sala.

¹⁰ Jézi té fini di yo, yo té ni pou pwédyé an non’y. Mé, yo pa té sipozé adwésé li Jézi, an lapwiyè yo. (Jan 16:23, 24) Èk sa sété on bagay ki té byen enpòtan pou yo konnèt. Paskè chonjé, Jézi sété jan yo, èk i té ni an chay lanmityé pou yo. Konsa pitèt sé disip-la té sa kwè, lè Jézi viwé an syèl yo té kay sa adwésé’y an lapwiyè, èk Jézi té kay mennen lapwiyè yo bay Papa-a. Mé Jézi di yo pou pa kwè sa, paskè “Papa-a menm, enmen [yo].” Konsa, yo té sipozé adwésé Jéhova an lapwiyè èk yo té sa ni konfyans i té kay kouté yo paskè, i enmen yo. Èk lè’y vini pou lapwiyè, sé sa menm Bib-la ka di. Katjilé asou kisa sa vlé di pou ou: Kon’w ka étidyé Bib-la, ou vini konnèt Jézi byen èk ou ni an chay lanmityé pou li. (Jan 14:21) Mé ou pa ni pou adwésé Jézi an lapwiyè’w. Menm kon sé disip-la an pwèmyé syèk-la, ou ni pou adwésé Bondyé an lapwiyè’w èk ou sa ni konfyans i kay kouté’w paskè, Jéhova enmen’w. Chak fwa ou palé épi Jéhova an lapwiyè, ou ka moutwé ou ni konfyans an sé pawòl sala.​—1 Jan 5:14.

KISA KI PÉ ANNÉKÒZ NOU POU KWÈ JÉHOVA PA ENMEN NOU?

11. Si nou ka kwè Jéhova pa enmen nou, ki moun ki kay kontan sa, èk pouki?

¹¹ Si on moun mandé’w, kisa ki ka annékòz nou pou kwè Jéhova pa enmen nou, pitèt ou kay di sé Satan ki ka fè sa. Èk sa vwé, paskè Bib-la ka di nou, Satan menm kon ‘on lyon ki danjéwé, èk i ka gadé pou dévowé nou.’ (1 Pita 5:8) Chonjé, Jéhova voyé Jézi pou sové nou anba péché épi lanmò paskè i enmen nou. (Hib. 2:9) Mé Satan pa vlé nou kwè sa paskè i sav, si nou pa ka kwè Jéhova enmen nou, nou pa kay sa tjébé fò anba difikilté. Èk sé sa i té kay kontan. Sé sa ki fè i ka éséyé pou fè nou kwè, nou pa bon asé pou Jéhova enmen nou. Annèk katjilé asou sa: Sé Satan, Jéhova pa enmen. Mé Satan tèlman kwennad, i vlé fè nou kwè Jéhova pa enmen nou, èk la pa ni pyès èspwa pou nou. (Èfés. 6:11) Wi, Satan sé lèlmi nou, èk lè nou byen konpwann kisa i ka éséyé pou fè, nou kay sa fòtifyé détèminasyon nou pou kontiné goumen kont li.​—Jémz 4:7.

12-13. Ki mannyè péché-a nou éwityé hòd Adanm ka afèkté nou?

¹² Péché-a nou éwityé hòd Adanm, sé on lòt bagay ki ka annékòz nou pou kwè, Jéhova pa enmen nou. (Sam 51:5; Ronm 5:12) Wi, péché Adanm mennen an chay mové wézilta ban nou. Pwèmyéman, i donmajé wilasyon-an ant Bondyé épi lézòm. Èk i donmajé katjil nou, santiman nou, épi santé nou.

¹³ Wi, péché ka afèkté imosyon nou adan on mannyè ki négativ. I ka fè nou santi koupab, antjèt, hont, èk i ka osi annékòz nou pou santi nou pa sòv. Èk nou ka èspéyansé sé santiman sala lè nou fè on péché. Mé délè, nou ka santi kon sa senpliman paski nou sav, nou sé péchè. Jéhova pa té fè nou pou viv épi sé santiman sala. (Ronm 8:20, 21) Lè on machin ni on taya ki “flat,” sa ka anpéché’y kouwi byen. An menm mannyè-a, péché-a nou éwityé hòd Adanm ka anpéché nou katjilé byen. Sé sa ki fè délè, lidé nou ka di nou Jéhova pa enmen nou. Mé si sé kon sa ou ka santi, i bon pou’w chonjé, Papa nou Jéhova ‘Sé Dyé-a ki gwan. I méwité tout wèspé. Èk i ka moutwé lanmityé fidèl pou moun ki enmen’y, èk pou moun ki ka obéyi koumandman’y.’​—Néhi. 1:5.

14. Ki mannyè sakwifis Jézi ka bay pwèv ki, Jéhova enmen nou an chay? (Ronm 5:8) (Osi, gadé enfòmasyon-an ki anba sijé-a “Pa Bay Péché Chans Pou Kwennen Zòt.”)

¹⁴ Tanzantan, nou pé santi nou pa méwité lanmityé-a Jéhova ni pou nou. Èk vwéman, nou pa méwité’y. Mé sé sa menm ki ka fè lanmityé-a Jéhova ni pou nou tèlman èstòdinè. Paskè, Jéhova enmen nou si tèlman, i ban nou Gason’y kon on sakwifis pou nou sa twapé pawdonnasyon pou péché nou. Èk i fè sa paditan nou té an péché nou toujou. (1 Jan 4:10) Chonjé, Jézi bay lavi’y pou’y sové péchè, pa pou sové moun ki pawfé. (Li Ronm 5:8.) Wi, Jéhova ka konpwann nou pa pawfé. Èk lè nou konpwann mannyè péché-a nou éwityé hòd Adanm ka fè nou kwè Jéhova pa enmen nou, nou sa fòtifyé détèminasyon nou pou nou pa kité vyé katjil sala kwennen nou.​—Ronm 7:24, 25.

FÈ LIDÉ’W POU’W WÈSTÉ FIDÈL POU JÉHOVA

15-16. Si nou wèsté fidèl pou Jéhova ki asiwans nou sa ni, èk pouki? (Sam 37:28)

¹⁵ Jéhova vlé nou wèsté fidèl pou li. (Dito. 30:19, 20) Si nou fè sa, nou sa asiwé i pa kay abandonnen nou. (Li Sam 37:28.) Wi, dépi nou wèsté fidèl pou Jéhova, nou sa dépan asou’y pou édé nou tjébé fò anba népòt sitiwasyon.

¹⁶ Atik sala édé nou pou wè, nou sa tjébé fò anba difikilté paskè nou asiwé Jéhova enmen nou, èk i kay sipòté nou. Sé sa Bib-la ka enstwi nou. Konsa, si lidé nou janmen di nou, Jéhova pa enmen nou, pito nou fiksé asou katjil nou, annou éséyé pou chonjé sa nou konnèt, konsèné kalité lanmityé-a Jéhova ni pou nou. Wi, annou kontiné ni konfyans ki, lanmityé-a Jéhova ni pou nou kay diwé pou tout tan.