Bed Lagen bot Luoti

Jehovah mito ni wabed “jo ma lugen.” (Jabuli 18:25) Man obedo gin ma pire tek i nyom, pien ka in pe lagen, pe bene itwero geno lawoti. Gen obedo gin ma pire tek wek mar omedde ki dongo.

I kare-ni, gwoko genne i nyom dong odoko tek adada. Me gwoko nyommi, myero imok tammi me timo jami aryo.

1 WEK NYOMI OBED MUKWONGO

GIN MA BAIBUL WACO: “Wupwo gin maber makato.” (Jo Pilipi 1:​10) Nyommi tye i kin jami ma pigi tego loyo i kwoni. Myero iket obed mukwongo.

Jehovah mito ni iket cwinyi i kom luoti dok wubed ki “yomcwiny kacel.” (Latitlok 9:9) En waco ka maleng ni pe myero wi owil i kom luoti, ma ka meno myero wuyeny yo me bedo ma cwinywu yom. (1 Jo Korint 10:24) Wek luoti owiny ni pire tek dok imare.

GIN MA ITWERO TIMONE:

• Nen ni wunongo cawa me bedo kacel kare ki kare, kun nongo iketo tammi tutwalle i kom luoti

• Wek tammi obed pi “wan” ento pe “an”

2 GWOK CWINYI

GIN MA BAIBUL WACO: “Dano mo ma neno dako ce paro ni ebed kwede, meno nongo dong otimo abor woko kwede ki i cwinye.” (Matayo 5:​28) Ka ngat moni bedo ka lwodo tim tarwang, nongo rom ki ngat ma dong oturo gennene bot luote woko.

Jehovah owaco ni myero ‘igwok cwinyi.’ (Carolok 4:​23; Jeremia 17:9) Me timo man, myero bene igwok wangi. (Matayo 5:​29, 30) Myero walub lanen pa Yubu, ma omoko gicikke ki wange pe me neno dako mukene ki miti marac. (Yubu 31:1) Mok tammi pe me neno cal ma tugo miti me buto. Gwokke pe me nyuto miti i kom ngat mukene mapat ki luoti.

GIN MA ITWERO TIMONE:

• Wek dano ducu gunge ni in itye lagen bot luoti

• Par pi kit ma luoti winyo kwede, dok igwokke ki lirem mo keken ma miyo luoti winyo marac