Kit me Gwoko Kuci Kinwu ki Wadiwu

Nyom cako te ot manyen. Kadi bed ni imaro dok iworo lunyodoni, luoti aye dong ngat ma pire tek loyo boti. Wadini mukene guromo nongo ni ye lok meno tek adada. Ento pwony me Baibul twero konyowu me bedo ki neno mupore, wek wugwok kuc i kinwu ki wadiwu kun wutiyo matek me dongo wat i kinwu calo luot.

1 WUBED KI NENO MUPORE I KOM WADIWU

GIN MA BAIBUL WACO: “Wor woru ki meni.” (Jo Epeco 6:2) Kadi bed itye ki mwaka adi, myero imedde ki woro lunyodoni. Nge ni luoti bene obedo latin pa ngat moni, dok bene myero omi woro bot lunyodone. “Mar pe lanyeko,” pi man nyeko myero pe omaki i kom wat ma tye i kin luoti ki lunyodone.​—1 Jo Korint 13:4; Jo Galatia 5:​26.

GIN MA ITWERO TIMONE:

• Pe ibed ka riyo tyen lok moni, calo “Jo ma gangwu kare ducu giloko marac i koma” nyo “Mama-ni pe maro gin mo keken ma atimo”

• Temme me neno jami kit ma luoti neno kwede

2 CUNG MATEK KA MITTE

GIN MA BAIBUL WACO: ‘Laco weko wonne ki minne, moko i kom dakone liking, gin aryo gidoko kom acel.’ (Acakki 2:​24) Ka inyomme lunyodoni guromo tamo ni pud itye i te gwokgi, dok ni gin aye myero gumok tam ma wulubo i nyomwu.

In kacel ki luoti aye myero wumok jami ma pe wumito ni gudony iye ci wutit botgi ki mar. Wutit tamwu ka maleng botgi ki mwolo. (Carolok 15:1) Mwolo, ber kit, ki diyo cwiny bikonyi me dongo lirem macok ki wadini, “kun ngat acel acel diyo cwinye i kom lawote ki mar.”​—Jo Epeco 4:2

GIN MA ITWERO TIMONE:

• Ka cwinyi tye ka cwer pi kit ma wadini gitye ka donyo kwede i nyomwu, ci nyam lok man kacel ki luoti ma wiwu opye mot

• Wunyam tam kacel wek wunen kit ma wuromo cobo lok man