Pe Tye Gin mo ma Onongo Twero Jukogi

Onongo yam tye laco mo ma langolo ma bedo i doggola me ot pa Lubanga kun lego cente. Otyeno mo acel, en oneno Petero ki Jon ka gidonyo i ot pa Lubanga. En owaco botgi ni: ‘Wumiya kong lim mo ba.’ Petero owaco ni: ‘Atye ki gin mo maber loyo cente ma atwero mini. I nying Yecu, a malo iwoti!’ Petero okonye me a malo, ci laco-ni ocako wot! Lwak gubedo ki yomcwiny madwong adada pi tango man mumiyo dano mapol gudoko luye.

Ento lulamdog ki Lucadukayo gukeco mada. Gumako lukwena, guterogi i lukiko pa Lujudaya ci kipenyogi ni: ‘Anga ma omiyowu teko me cango laco-ni?’ Petero ogamo ni: ‘Wanongo teko ki bot Yecu Kricito, ma wun wuneko-ni.’ Lupwonye dini gudange ni: ‘Wuwek tito lok i kom Yecu!’ Ento lukwena gudok iye ni: ‘Omyero walok i kome. Pe wabijuko lok i kome.’

Cutcut ma kigonyo Petero ki Jon, gin gucito bot lupwonnye mukene-ni ci gutito botgi gin mutimme. Gin gulego kacel, kun gikwayo Jehovah ni: ‘Konywa me bedo ki tekcwiny wek wamedde ki timo ticci.’ Jehovah omiyo botgi cwiny mere maleng, oweko gumedde ki tito kwena ki cango dano. Wel dano ma guye obedo ka medde ameda. Nyeko omako Lucadukayo matek mumiyo gumako lukwena dok gubologi i buc. Ento i dyewor, Jehovah ocwalo lamalaikane ma oyabo dog ot mabuc ci owaco bot lukwena ni: ‘Wudok cen i ot pa Lubanga, wumedde ki pwony kunnu.’

Orwone odiko con, kitito bot Lukiko pa Lujudaya ni: ‘Wanongo dog ot mabuc kiloro maber, ento co ma wumakogi laworo-ni gipe! Gitye i ot pa Lubanga ka pwonyo dano!’ Dok kimako lukwena ci kikelogi i nyim Lukiko. Lalamdog madit owaco ni: ‘Wan wacikowu matek ni pe wupwony lok i kom Yecu!’ Ento Petero ogamo ni: “Myero wawiny Lubanga makato dano.”

Kiniga omako lupwonye dini magi matek mumiyo onongo gimito neko lukwena woko. Ento Laparicayo mo ma nyinge Gamaliel oa malo ci owaco ni: ‘Wugwokke! Twero bedo ni Lubanga tye ki co-ni. Wun wumito lweny i kom Lubanga ce?’ Gujolo tamme. I nge goyo lukwena ki odoo, gucikogi doki ni gujuk tito kwena, ci dong guwekogi gucito. Ento meno pe ojuko tic pa lukwena. Gumedde ki tito kwena maber-ri ki tekcwiny, i ot pa Lubanga ki i paci pa dano.