PWONY ME 17

Yecu Obedo Ngat ma Nining?

Kit ma Nen Kwede i Buk Kikome

Ka wapwonyo jami ma Yecu owaco dok otimo i lobo kany, waniang kite mabeco ma tugo mitiwa me bedo lureme ki lurem Wonne Jehovah. Kite mabeco calo mene? Dok watwero lubo lanen pa Yecu i kwowa nining?

1. I yo ma nining ma Yecu tye calo Wonne?

Ki i polo, Yecu obedo ka neno Wonne dok onongo pwony ki bote pi mwaki bilion mapol ata. Macalo adwogine, en tamo dok timo jami calo Jehovah. (Kwan Jon 5:19.) Ki lok ada, en onongo lubo kit pa Wonne macok adada ma oweko en onongo twero waco ni: “Ngat ma oneno an dong oneno Won.” (Jon 14:9) Ka imedde ki pwonyo kit pa Yecu, ci man bikonyi me ngeyo Jehovah maber. Me labolle, kica ma Yecu onongo nyuto bot dano, nyuto bene kit ma Jehovah winyo kwede i komi.

2. Yecu onyuto nining ni emaro Jehovah?

Yecu owaco ni: “Wek lobo onge ni, an amaro Won, atiyo macalo Won ocika.” (Jon 14:31) I kare ma Yecu tye i lobo, en onyuto ni emaro Wonne ki bedo lawiny kadi wa i kare ma timone tek. Dok bene, pien en onongo maro Wonne matek, en onongo tito ki jo mukene lok i kom Wonne dok konyogi me dongo wat macok ki Jehovah.—Jon 14:23.

3. Yecu onyuto nining ni emaro dano?

Baibul waco ni Yecu ‘cwinye yom i kom litino pa dano.’ (Carolok 8:31) En onyuto mar meno ki cuko cwiny jo mukene kun mine kene me konyogi. En otimo tango pe me nyuto tekone keken ento bene me nyuto kicane. (Marako 1:40-42) En onongo tero dano ki kica dok pe poko kin dano. Lokke onongo miyo kwe cwiny ki gen bot jo ducu ma cwinygi atir ma giwinyo lokke. Yecu onongo tye atera me deno can wa i to pi mar madit ma en tye kwede pi dano. Ento jo ma en maro loyo gubedo jo ma gilubo pwonye.—Kwan Jon 15:13, 14.

NONG NGEC MATUT

Pwony lok mapol madok i kom kit pa Yecu. Dok inen kit me nyuto mar kacel ki yot cing kit ma en otimo kwede.

4. Yecu maro Wonne

Lanen pa Yecu pwonyowa kit me nyuto marwa pi Lubanga. Kwan Luka 6:12 ki Jon 15:10; 17:26. I nge kwano ginacoya acel acel, wunyam lapeny man:

Watwero lubo lanen pa Yecu nining wek wanyut ni wamaro Jehovah?

Yecu tye ka lega. — Yecu onongo maro Wonne me polo dok loko kwede kare ki kare i lega

5. Kica omako Yecu i kom lupeko

Yecu onongo keto pi miti pa jo mukene bedo mukwongo loyo mege. Kadi wa i kare ma en onongo ool, en otiyo ki cawane kacel ki kerone me konyo dano. Kwan Marako 6:30-44, ci wunyam lapeny magi:

I tyeng magi, Yecu onyuto kica i yo mapatpat ango bot jo mukene?—Nen tyeng me 31, 34, 41, ki 42.
Gin ango ma otugo cwiny Yecu me konyo dano?—Nen tyeng me 34.
Kit macalo Yecu lubo kit pa Jehovah, jami magi gipwonyi gin ango i kom Jehovah?
I yo mapatpat ango ma watwero lubo kwede kica pa Yecu pi jo mukene?

Yecu opito dano alip mapol ki timo tango kun loko mugati abic ki rec aryo. Lupwonnyene gupoko cam magi bot co, mon, ki lutino.

6. Yecu cinge yot

Yecu onongo cinge yot kadi bed en onongo pe ki jami me kom mapol, dok en bene ocuko cwinywa me bedo jo ma cinggi yot. Kwan Tic pa Lukwena 20:35, ci wunyam lapeny man:

Ma lubbe ki gin ma Yecu opwonyo, watwero bedo ki yomcwiny nining?

Tuk VIDIO, ci wunyam lapeny ma lubo.

VIDIO: ‘Miyo Mot Kelo Yomcwiny’—Bute Manok (4:00)

I yo mapatpat ango ma watwero miyo kwede mic, kadi bed pe watye ki jami me kom mapol?

Tika onongo ingeyo?

Baibul pwonyowa me lega bot Jehovah i nying Yecu. (Kwan Jon 16:23, 24.) Ka walego i yo meno, wanyuto ni watye ki pwoc pi gin ma Yecu otimo me konyowa me doko lurem Jehovah.

JO MOGO GIWACO NI: “Dano deno can pien nongo Lubanga aye tye ka temme.”