PWONY ME 44
Kwer Ducu Mono Yomo Cwiny Lubanga?
Jehovah mito ni wanong mit pa kwo dok wakwer kwer mogo. Ento tika kwer ducu ki nino madongo ducu giyomo cwinye? Watwero nyuto marwa pi Jehovah nining ka odok i kom lok man?
1. Pingo kwer mapol pe yomo cwiny Jehovah?
Itwero bedo ki ur me pwonyo ni kwer mapol jenge i tam ma pe rwatte ki gin ma Baibul pwonyo nyo oa ki i dini goba. Twero bedo ni gikubbe ki tim jokjok nyo pwony ni dano tye ki gin mo i kome ma pe to. Kwer mogo jenge i kom tim me kwiya piny nyo tam ni timo gin moni kelo gum. (Icaya 65:11) Jehovah ociko jo ma wore ni: “Wupokke woko . . . pe wugud gin mo ma kome ki keni.”—2 Jo Korint 6:17.a
2. Jehovah winyo nining i kom kwer ma miyo deyo mukato kare woko bot dano?
Jehovah ocikowa pe me ‘keto genwa i kom dano.’ (Kwan Jeremia 17:5.) Nino madongo mogo miyo deyo bot luloc nyo lumony. Nino mukene tye me kwero lanyut me lobo moni nyo loc ken. (1 Jon 5:21) Dok i nino madongo mukene, dano gikwero pati me wibye nyo dul mukene. Jehovah biwinyo nining ka wamiyo deyo mukato kare woko bot dano nyo dul mo, tutwalle ma cuko cwiny dano me lubo tam ma pe rwatte ki miti pa Lubanga?
3. Tim macalo mene ma weko kwer mogo bedo ma pe opore?
Baibul kwero jami calo “mero, karama me woro cam ki tuko marac.” (1 Petero 4:3) I kwer mogo, dano pe ginyuto cwiny me jukke ken dok gidonyo i tim me tarwang. Wek wamedde ki bedo lurem Jehovah, mitte ni wagwokke adada ki tim carocaro ma kit meno.
NONG NGEC MATUT
Nen kit ma itwero yomo kwede cwiny Jehovah ki moko tam me ryeko madok i kom kwero nino madongo.
4. Pe inywak i kwer ma pe kelo deyo bot Jehovah
Kwan Jo Epeco 5:10, ci wunyam lapeny magi:
Gin ango ma omyero watem niang iye ka watye ka moko tamwa ka ce omyero wakwer nino mo madit?
Nino madongo mene ma dano maro kwerone i kabedowu?
Tika itamo ni kwer magi giyomo cwiny Jehovah?
Me labolle, tika dong ipennye kekeni gin ma Lubanga tamo i kom kwero nino me nywal? Baibul pe oloko i kom latic pa Jehovah mo keken ma okwero nino nywalle, ento loko i kom nino nywal aryo mapatpat ma jo ma pe gitiyo pire gukwero. Kwan Acakki 40:20-22 ki Matayo 14:6-10. I nge meno, wunyam lapeny magi:
Gin ango marom aroma ma otimme i kare me kwero nino nywal aryo magi?
Ma lubbe ki lok ma kicoyo i Baibul-li, itamo ni Jehovah winyo nining i kom kwero nino me nywal?
Ento, pud itwero bedo ki lapeny ni, ‘Tika Jehovah paro ka anywako i kwero nino nywal nyo kwer mo mukene ma pe rwatte ki Ginacoya?’ Kwan Nia 32:1-8. I nge meno, tuk VIDIO ci wunyam lapeny ma lubo-ni.
Pingo omyero watem niang gin ma yomo cwiny Jehovah?
Waromo timo meno nining?
Kit me ngeyo ka kwer moni pe yomo cwiny Lubanga
Tika kwer man jenge i kom pwony ma pe tye i ginacoya? Me niang man, tim kwed wek inge ka ma kwer man oa ki iye.
Tika kwer man miyo deyo mukato kare woko bot dano, dul mo, nyo lanyut me lobo moni? Wamiyo deyo bot Jehovah makato dok wageno ni en aye bicobo pekki ducu ma i lobo.
Tika jami ma kitimo i kare me kwer man pe rwatte ki cik me Baibul? Mitte ni wagwokke ki tim carocaro.
5. Kony jo mukene me woro niyeni
Twero bedo tek adada me kwerone ka jo mukene gitye ka ketowa i lyeto me nywako i kwer ma pe yomo cwiny Jehovah. Ki diro, tittigi tam ma imoko kun bene idiyo cwinyi. Me neno kit ma itwero timo kwede man, tuk VIDIO.
Kwan Matayo 7:12, ci wunyam lapeny magi:
Ma lubbe ki tyeng man, tika opore piri me waco ki wadini ma pe gin Lucaden ni omyero pe gukwer nino madit mo?
Gin ango ma itwero timo me cuko cwiny wadini ni kadi bed pe ibinywako i kwer man kwedgi, ento pud imarogi dok iparo pigi?
6. Jehovah mito ni wabed ki yomcwiny
Jehovah mito ni wanong mit pa kwo kacel ki wadiwa ki luremwa. Kwan Latitlok 8:15, ci wunyam lapeny man:
Tyeng man nyuto nining ni Jehovah mito ni wabed ki yomcwiny?
Jehovah mito ni jone gubed ki yomcwiny dok gunong mit pa kwo kacel. Tuk VIDIO wek inen kit ma man nen kwede ka maleng i gurewa ma kwako lobe mapol.
Kwan Jo Galatia 6:10, ci wunyam lapeny magi:
Tika mitte ni wakwer nino madongo ka wek “watiyu gin maber” bot jo mukene?
Gin ango ma biyomo cwinyi makato: Ka tye macalo cik ni omyero imi mic pi kwero nino madit mo nyo ka imiyo pien oa ki i cwinyi?
Lucaden mapol i kare mogo giyubo kwer mo pi lutinogi dok giminigi mic bene. Ka itye ki lutino, jami mabeco ango ma itwero timo pigi?
JO MOGO GIWACO NI: “Kit ma kwer moni ocakke kwede pire pe tek. Gin ma pire tek aye me bedo kacel ki wadini ki luremi i kare me kwer meno.”
In iromo gamone ningo?
WOT WIYE WIYE
Jehovah mito ni wanong mit pa kwo kacel ki wadiwa ki luremwa. Ento en bene mito ni wagwokke ki kwer mogo ma pe yomo cwinye.
Ngo ma ipwonyo?
Lapeny mene ma watwero pennye kwede ka wamito moko ka ce kwer moni pe yomo cwiny Jehovah?
Watwero konyo wadiwa ki luremwa nining me niang tam ma wamoko madok i kom kwero nino madongo?
Wangeyo nining ni Jehovah mito ni cwinywa obed yom dok wacam kwo?
TIM KWED
Nen kong kwer mogo ma Lukricitayo pe gikwero.
“Pingo Lucaden pa Jehovah Pe Gikwero Nino Madito Mogo?” (Pwony ma tye i jw.org)
Nen kong tyen lok angwen mumiyo wamoko ni kwero nino nywal pe yomo cwiny Lubanga.
“Pingo Lucaden pa Jehovah Pe Gikwero Nino Nywal?” (Pwony ma tye i jw.org)
Nen kit ma lutino ma gimaro Jehovah gitwero yomo kwede cwinye i kare me Karama.
Lukricitayo milion mapol guyero pe me kwero Karama. Giwinyo nining pi tam ma gumoko-ni?
a Nen Lok me Giko Buk Man me 5 wek ipwony gin ma myero itim ka jo mukene gitye ka kwero nino mo madit.