Lapeny Pa Lukwan Bukkewa . . .

Tika lobo-ni kibityekone woko?

▪ Jo mogo gubedo ki tam ni onongo kibityeko lobo i Oktoba 21, 2011. Ento man pe otimme. Pi meno lok pa Harold Camping lanebi ma lagoba, lador purogram i redio citecen mo me U.S. obedo goba ma tere otuc. En obyeko ni Nino me Ngolo kop onongo bitimme i Mai 21, 2011​—oyengyeng matek adada biyenge ngolo lobo arii, dok lacen i nge dwe abic, i Oktoba 21, lobo-ni kibityekone woko.

Lobo kono, i ada pe kibityekone wacel. Lacwec pe biye wacel ni kityek lobo. Lokke wacci: “Icibo lobo ocung matek i kabedone.”​—Jabuli 119:90.

Jo mogo ma gikwano Baibul gitwero ye ni kibityeko lobo ni ki mac. Lokgi jenge i 2 Petero 3:7, 10 ma waco ni: “Pi lok pa Lubanga acel-lu bene, polo ki lobo me kare man dong gikano pi kuro mac; ma gitye ka gwokone nio ka nino me ngolo kop ki tyeko dano ma pe gilworo Lubanga oromo. . . . Ento nino pa Rwot [Jehovah] bibino macalo lakwo, ka dong polo birwenyo woko ki mor madwong, lakalatwe bileny woko i mac, lobo ki jami ducu ma tye iye biwang woko.” Itamo ni myero waniang lok pa lakwena Petero kit ma en oloko kwede-ni kumeno?

Pe myero waniang kumeno. Pingo? Pien tyen lok me tyeng magi myero orwatte ki lok murumo nget tyeng man ki bene bukke mukene me Baibul. Ka watero lok meno kit ma tye kwede-ni, te lokke ni polo ki lobo​—lakalatwe bilion mapol ata ki jami mukene-ni ducu​—kibityekone ki mac pien dano maraco gitye i lobo. Itamo ni iromo wango pwul (amaido) gutiya acel kulu pien ni nyig pwul acel keken otop ki iye? Man pe nyuto niango wacel! Kumeno bene Jehovah pe bityeko polo ki lobo medo ki jami ducu ma tye i igi kun jemo ocakke ki i lobo kany.

Kadi kumeno, kodi tam ma kit man pe rwatte ki lok ma Yecu Kricito owaco ni: “Gitye ki gum [mot] jo ma mwol, pien gibileyo lobo doko megi.” (Matayo 5:5; Jabuli 37:29) Tika itamo ni wego ma lamar romo gero ot mamwonya pi lupacone ci dok wango woko? (Jabuli 115:16) Meno pe timme wacel! Jehovah pe tye Lacwec keken ento Wego ma lamar.​—Jabuli 103:13; 1 Jon 4:8.

Petero otiyo ki nyig lok ni “lobo” calo carolok, kun loko i kom dano ma gikwo i lobo​—jo maraco. Nge ni Petero ocoyo kun poro ki Pii Aluka ma otimme i kare pa Nua. (2 Petero 3:5, 6) I kare meno, jo maraco keken aye pii otyekogi ento lobo, Nua ma kite atir-ri ki lupacone gubwot. I yo acel-li bene, Petero otiyo ki nyig lok ni “polo” kun loko i kom luloc ma kitgi raco. Jo ma kitgi raco ki luloc ma gukwero weko timo tim maraco kibityekogi woko, ci jo ma kitgi atir gibileyo lobo i te gamente me polo nyo Ker-ri.​—Daniel 2:44.

Kit ma waneno kwede-ni, tika kibityeko lobo ki jami ma iye ducu? Pe. Gin ma kibityekone aye jo ma gitimo jami maraco. Lobo ki jo ma kitgi atir gibibedo pi naka.​—Carolok 2:21, 22.