Nong Pwony Ki I Lok Pa Lubanga

Pingo Lubanga Tye ki Dul ma Mege?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Pingo Lubanga oketo yub pi Jo Icrael?

Lubanga oketo yub pi likwayo pa Abraim wek gudok rok ci omiyo botgi cik mapol adada. En olwongo rok meno ni Icrael ci omiyo gudoko jo ma gidoro woro me ada ki bene Lokke ma en aye Ginacoya Maleng. (Jabuli 147:19, 20) Pi meno, rok ducu gulimo iye mot.​—Kwan Acakki 22:18.

Lubanga oyero Jo Icrael ni gubed cadenne. Ka gulubo cik pa Lubanga, ci ginongo adwogi maber ki iye. (Nwoyo Cik 4:6) Ka wakwano jami ma kicoyogi wacon i kom Jo Icrael, man twero medo ngecwa i kom Lubanga me ada.​—Kwan Icaya 43:10, 12.

2. Pingo Lukricitayo me ada gitiyo macalo gurup?

Lacen, Luicrael gurwenyo cwak pa Lubanga dok bene Jehovah oleyo ka wanggi woko ki kacokke pa Lukricitayo. (Matayo 21:43; 23:37, 38) Con kong, Luicrael gubedo lucaden pa Lubanga. Ento i kare-ni, Lukricitayo me ada aye dong gitye Lucaden pa Jehovah​—Kwan Tic pa Lukwena 15:14, 17.

Yecu opwonyo lulub kore me miyo caden macalo gurup i kom Jehovah dok gulok jo me rok ducu gudok jo ma lubbe. (Matayo 10:7, 11; 24:14; 28:19, 20) Tic man dong cok gik. Pi tyen mukwongo, Jehovah oribo dano milion mapol ata dok ma gia ki i rok ducu i woro me ada. (Niyabo 7:9, 10) Lukricitayo me ada gitiyo macalo gurup wek gicuk cwiny luwotgi dok bene gikonygi. I wi lobo-ni lung, gilubo purogram acel me pwony ma a ki i Baibul i cawa me cokkegi.​—Kwan Jo Ibru 10:24, 25.

3. Lucaden pa Jehovah me kare-ni ocakke nining?

I kare-ni, Lucaden pa Jehovah ocakke i kine ka mwaka 1870 ki wiye. Gurup mo pa lutino kwan manok me Baibul gucako niang i kom lok ada mogo me Baibul ma onongo dong orweny woko. Gin onongo gingeyo ni Yecu oyubo kacokke pa Lukricitayo wek gutit kwena. Pi meno, gin gucako yubbe me tito kwena me Ker-ri i wi lobo ducu. I 1931 gucako tic ki nying man ni Lucaden pa Jehovah​—Kwan Tic pa Lukwena 1:8; 2:1, 4; 5:42.

4. Lucaden pa Jehovah gitye ma guyubbe i kare-ni nining?

I cencwari me acel, kacokke pa Lukricitayo i kabedo mapat pat onongo gilubo tam ma a ki bot lukiko madit ma gingeyo ni Yecu aye Latel wi kacokke. (Tic pa Lukwena 16:4, 5) I yo acel-lu bene, Lucaden pa Jehovah gingeyo ni Yecu aye Latelagi. (Matayo 23:9, 10) Kacokke makato 100,000 kulu ginongo tira ki cuko cwiny me Ginacoya ma a ki bot Lukiko Madit. I kacokke acel acel, co ma gupore gitiyo calo luelda nyo luneno. Co magi gitiyo ki mar pi romi pa Lubanga.​—Kwan 1 Petero 5:2, 3.

Lucaden pa Jehovah gitye ma guyubbe me tito kwena maber-ri ki bene me loko dano gudok lulub kor Yecu. Me konyo dano i kabedo ducu, gin gigonyo, gigoyo bukke dok gipoko jami akwana ma jenge i Baibul i leb makato 500 kulu. Gin bene gitito kwena i ot ki ot calo lukwena pa Yecu. (Tic pa Lukwena 20:20) Gumine me pwonyo lok ada me Baibul bot jo ma ginyuto miti. Pien jo pa Jehovah giketo cwinygi me yomo cwiny Lubanga ki dong konyo jo mukene, gin gitye dul pa jo ma cwinygi yom.​—Kwan Jabuli 33:12; Tic pa Lukwena 20:35, NW.

Pi ngec mukene, nen dul me 19 i buk, Baibul Mono Ada Pwonyo Gin Ango? ma Lucaden pa Jehovah aye gucoyo.