“Wumarre Kekenwu”
“Amiyowu cik manyen, ni, wumarre kekenwu; wumarre kekenwu macalo ceng amarowu. Pi man dano ducu bingeyo ni wun lupwonnyena, ka mer tye i kinwu.”—JON 13:34, 35.
Man Gonye Ningo? Kricito owacci lulub kore myero gumarre i kingi kit ma emarogi kwede-ni. Yecu omarogi nining? En omaro dano ducu labongo paro pi lobone nyo bedo ki cwiny me apokapoka ma onongo kitye kwede i kom mon i karegi ca. (Jon 4:7-10) Mar aye omiyo Yecu ojalo karene, kerone, ki cawane me yweyo wek ekony jo mukene. (Marako 6:30-34) I agikkine, Kricito oyuto mar i yo ma pud dong dit loyo. En owaco ni: “An lakwat maber. Lakwat maber miyo kwone pi romi.”—Jon 10:11.
Lukricitayo Macon Gutimo Man Nining? I cencwari me acel, Lukricitayo gubedo ka lwonge i kingi ni ‘omego’ nyo ‘lamego.’ (Pilemon 1, 2) Jo me rok ducu onongo kijologi i kacokke pa Lukricitayo, pien onongo gingeyo ni “apokapoka mo pe i kin Lujudaya ki jo Grik; gin ducu Rwotgi acel.” (Jo Roma 10:11, 12) I nge Pentekote 33 K.M., lupwonnye ma i Jerucalem “gucato lonyogi ki jamigi ka gupoko ki jo ducu kit macalo mitte bot ngat acel acel.” Pingo gin gucato jamigi? Gutimo wek jo ma pud gunongo batija nyen-ni gumedde ki bedo i Jerucalem kun bene ‘gimine kengi ka winyo pwony pa lukwena.’ (Tic pa Lukwena 2:41-45) Ngo ma ocuko cwinygi me timo meno? Ma mwaki 200 peya okato i nge to pa lukwena, Tertullian ocoyo lok ma dano gubedo ka wacone i kom Lukricitayo ma lubbe ki “mar ma tye i kingi . . . ki dong kit ma gitye atera kwede me to pi luwotgi.”
Angagi ma Gilubo Man i Kare-ni? Buk me History of the Decline and Fall of the Roman Empire (1837) owaco ni pi cencwari mapol, jo ma gubedo ka timme ni gin Lukricitayo-ni “gubedo ka uno luwotgi malit adada, makato aunauna ma gunongo ki bot jo mukene ma bene giger adada-ni nyo lukamfiri.” Kwed mo ma kitimo i lobo Amerika nyuto ni jo mapol ma gitimme ni gin Lukricitayo bene gitye ki apokapoka me rangi del kom. Inongo bene ni jo me lobo moni wigi pe rwatte ki jo me lobo mukene kadi bed ni gitye i dini acel dok man weko gibedo ma gudolo cinggi woko ka luwotgi tye i peko.
I mwaka 2004, i kine ka dwe aryo keken ma lapiru nyo ajuru magwar otimme tyen angwen kulu i Florida i lobo Amerika, wonkom me Florida Emergency Operations Committee obedo ka tic matek me nenone ni jami ma gin gicwalo me konyo dano i kabedo man pe kipoko ma lubbe ki wadi or ki lurem. En owaco ni Lucaden pa Jehovah onongo gitye ma guyubbe loyo gurup mo keken, dok ocikke me miyo kony bot Lucaden i yo ducu. Con kong i mwaka 1997, gurup pa Lucaden pa Jehovah ma gimiyo kony gucito i Democratic Republic of Congo kun gucwalo yat, cam kacel ki bongi wek okony omegigi ki lumegigi kacel ki jo mogo ma gitye i peko. Lucaden luwotgi ma gitye i Ulaya gumiyo kony ma ka kiribo welle ducu ci romo milion acel kulu, cente pa lobo Amerika.