“Lok Man me Kwena Maber me Ker pa Lubanga Gibitito[-ne]”
“Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”—MATAYO 24:14.
Man Gonye Ningo? Luka ma ocoyo Jiri-ni owacci “Yecu owoto i kin gangi madongo ki matino kun tito dok nyuto lok me kwena maber i kom ker pa Lubanga.” (Luka 8:1) Yecu bene owaco ni: “Myero atit lok me kwena maber me ker pa Lubanga i gang mukene bene, pien giora pi lok man.” (Luka 4:43) En ocwalo lulub kore me tito kwena maber-ri i gangi madito ki matino ka lacen ocikogi ni: “Wubibedo lucadenna . . . wa i agikki lobo ducu.”—Tic pa Lukwena 1:8; Luka 10:1.
Lukricitayo Macon Gutimo Man Nining? Lupwonnye pa Yecu pe gubalo kare mo keken ento gutimo gin ma Yecu ocikogi kwede-ni. “Dok nino ducu pe guweko pwonyo dano ki tito lok me kwena maber ni Yecu en aye Kricito.” (Tic pa Lukwena 5:42) Tito kwena onongo pe kijalo i wi jo manok ma giryek. Neander, laco mo ma ngeyo lok me tekwaro owacci “Celsus, laco mo ma okwongo coyo lok marac i kom Lukricitayo ocoyo ki cac ni jo ma ginyaro yer romo, lukwo war, jo ma gitiyo i kom lar lee, jo ma pe gukwano dok gitye lukin gang mogo ata aye gutito jiri ki arima ma pe wacce.” I buk-ke me Early Centuries of the Church, Jean Bernardi ocoyo ni: “[Lukricitayo] omyero gucit ka lok ki dano i kabedo ducu. I gudu ki gangi madongo, i dye lwak ki dong i ot ki ot. Kadi kijologi nyo pe. . . . Gicito wa i agikki me lobo.”
Angagi ma Gilubo Man i Kare-ni? Latela mo acel me dini Purutanti, Daudi Watson ocoyo ni: “Gin mumiyo kwo pa dano tye marac adada i yo me cwiny i kare-ni aye ni, pien pwonyo dano kacel ki tito kwena ongayo wang kanica woko, pe gitero ni man gin ma pire tek.” I buk-ke me Why Are the Catholics Leaving? José Luis Pérez Guadalupe ocoyo lok i kom tic me pwony pa kanica me Adventists ki dong mukene mapat pat, ci owaco ni “gin pe gicito ka pwonyo dano i ot ki ot.” Ento madok i kom Lucaden pa Jehovah, en ocoyo ni: “Giwoto kore ki kore dok i ot ki ot.”
Laco mo ma nyinge Jonathan Turley, i lokke ma lubbe ki gin ma en oneno maber tye nonge i buk me Cato Supreme Court Review, 2001-2002, en owaco ni: “Tek mere iwaco ni Lucaden pa Jehovah, pol pa dano gitugi tamo cut i kom lutit kwena ma gilimo gangi kun nongo pe kilwongogi. Lucaden pa Jehovah pe ginongo keken ni myero gicit ka pwonyo dano i ot ki ot wek niyegi odong, ento meno aye niyegi kikome.”
[Bok i pot karatac 7]
Tika Dong Ingeyo Gin ma Nyuto Lukricitayo me Ada?
Ma lubbe ki kit ma Ginacoya oryeyo kwede jami mapol i pwony magi ma gilubbe aluba-ni, angagi ma itamo ni i kare-ni gitye ki lanyut pa Lukricitayo me ada? Kadi bed tye gurup pa ludini alip mapol ata ma gitimme ni gitye Lukricitayo, omyero wi pe owil i kom gin ma Yecu owaco ki lulub kore ni: “Pe dano ducu ma gilwonga ni, ‘Rwot, Rwot’ aye gibidonyo i ker me polo, ento ngat ma tiyo gin ma Wora ma i polo mito.” (Matayo 7:21) Nongo jo ma gitye ka timo miti pa Won—jo ma gitye ki lanyut pa Lukricitayo me ada—kun inywako kacel kwedgi twero miyo inongo mot ma pe tum i te Ker pa Lubanga. Wakwayi me penyo Lucaden pa Jehovah, jo ma gumini magajin eni pi ngec mukene madok i kom Ker pa Lubanga ki dong mot mapol ma ker-ri bikelone.—Luka 4:43.