Man Ma ‘Dong Wangeyo Lubanga-ni’​—ngo Dok Ma Mitte?

1. Pingo ladwo dege roto jami ma kiryeyogi piny ma pud peya dege otuk?

TEKE ludwo dege gimito tuk ki dege, gin myero kong gurot jami makato 30 ma kiryeyogi piny me neno ka dege meno pe ki bal. Ka pe guroto jami magi kare ki kare ma pud peya gutuk, ci man twero medo kero me nongo awano. Tika ingeyo anga ma tutwalle kicuko cwinye ki i kin ludwo dege me roto jami magi cawa ducu? En aye ladwo dege ma dong odwoyo dege pi mwaki malac dok tye ki ngec muromo! Ladwo dege meno twero tamo ni pien etye ki ngec muromo, man miyo en pe roto jami ducu ma kiryeyogi piny ma dege peya otuk.

2. Jami mene ma kiryeyogi ma myero Lukricitayo guroti?

² Calo ladwo dege ma gwokke, in bene itwero tic ki jami ma kiryeyogi piny me nenone ni niyeni pe odoko goro tutwalle i kare ma itye i atematema. Kono inongo batija cokcok-ki nyo dong itiyo pi Lubanga pi mwaki mapol, pire tek ni myero irot kare ki kare ka niyeni ki mar-ri pi Lubanga Jehovah tye matek. Ka pe itimo man kare ki kare dok ki cwinyi ducu, itwero balo wati ki Jehovah. Baibul cikowa ni: “Ngat mo ma tamo ni etwero cung myero ogwokke wek pe opoti.”​—1 Kor. 10:12.

3. Gin ango ma Lukricitayo ma i Galatia onongo myero gutim?

³ Lukricitayo ma i Galatia onongo myero gurot ka niyegi tek ki dok gubed ki pwoc pi bedo agonya i yo me cwiny. Ginkok pa Yecu onongo dong oyabo yo bot jo ma gitye ki niye i kome me ngeyo Lubanga i yo manyen​—onongo gitwero doko lutino pa Lubanga! (Gal. 4:9) Me medde ki bedo ki wat man maber loyo-ni, onongo mitte ni jo Galatia gukwer pwony pa jo mogo ma i kacokke ma gubedo ka waccigi ni gulub Cik ma kimiyo bot Moses. Kun inongo ni Lurok ma i kacokke onongo pe kilirogi dok peya gubedo i te Cik ma kimiyo bot Moses-ni! Onongo mitte ni Lujudaya kacel ki Lurok gudong i yo me cwiny. Man onongo kwako yeni pe gitwero nongo kit ma atir ka gilubo Cik ma kimiyo bot Moses.

JAMI MA WATIMOGI ME NGEYO LUBANGA

4, 5. Tira ango ma Paulo omiyo bot jo Galatia, dok pire tek botwa nining?

⁴ Tira ma lakwena Paulo omiyo bot jo Galatia ni kigwoko pi tyen lok: wek Lukricitayo ma gikwo i kare mo keken pe gulok ngegi i kom lonyo me lok me ada ma tye i Baibul kun pe gidok cen i jami ma guweko angec. Jehovah otiyo ki lakwena Paulo me cuko cwiny jo ma gitye i kacokke mapat pat i Galatia kacel ki jo ducu ma Giwore me cung matek i niye.

⁵ Wan ducu myero wiwa opo i kom kit ma kigonyowa kwede ki i opii i yo me cwiny ci wadoko Lucaden pa Jehovah. Me timo meno, tam kong i kom lapeny aryo magi: Tika wii po i kom jami ma itimogi wek ibed mupore me nongo batija? Tika wii po kit ma icako ngeyo kwede Lubanga ki dok kit ma iwinyo kwede i kare ma Lubanga ongeyo in ci icako winyo agonya i yo me cwiny?

6. Jami abongwen mene ma wabinyamogi?

⁶ Tye jami abongwen ma watimogi i kare ma wajolo lok me ada. Jami magi kiryeyogi i bok ma wi lokke tye ni “Jami ma Myero Itim Wek Inong Batija Kun Imedde ki Dongo i Yo Me Cwiny.” Bedo ka poyo wiwa kare ki kare i kom jami abongwen magi bijingowa pe me dok cen i jami me lobo. Kit ma ladwo dege ma dong odwoyo dege pi kare malac medde ki roto jami ma kiryeyogi piny ma peya en otuk ki dege wek pe enong awano-ni, wan bene myero wamedde ki roto jami abongwen magi wek wati pi Lubanga kun wagenne.

JO MA LUBANGA NGEYOGI GIMEDDE KI DONGO I YO ME CWINY

7. Omyero walub lanen mene, dok pingo?

⁷ Jami ma kiryeyogi piny poyo wi ladwo dege ni tye jami mogo ma myero en orotgi ki diro nino ducu ma peya otuk ki dege. Wan bene myero wangine kekenwa kare ki kare ka odok i kom jami ma watimogi nino ducu nicakke ma wanong ki batija. Paulo ocoyo bot Temceo ni: “Lanenni me aluba myero obed lok me ada ma yam iwinyo ki bota, kun ilubo kwede niye ki mar ma tye i Kricito Yecu.” (2 Tem. 1:13) “Lok ada” magi gitye i Lok pa Lubanga. (1 Tem. 6:3) Kit macalo cal ma kigoyo konyowa me niang kit ma gin moni nen kwede, ‘lanen me lok ada’ konyowa me niang ki dok keto i tic gin ma Jehovah mito ki botwa. Pi meno, kong dong wanyamu jami ma watimogi ma pud peya onongo wanongo batija wek wanen ka ce watye ka lubo lanen me lok ada.

8, 9. (a) Pingo omyero wamedde ki dongo ngecwa ki niyewa? (b) Mi lapor ma nyuto adwogi maber ma bino pi dongo i yo me cwiny ki dok pingo omyero wamedde ki dongo.

⁸ Gin mukwongo ma watimo aye obedo nongo ngec. I ngeye, wadongo niyewa. Ento, omyero wamedde ki nongo ngec kun wajingo niyewa. (2 Tec. 1:3) Dongo kwako alokaloka mapol ma bedo ka timme motmot. “Dongo” te lokke ni gin moni medde ki doko dit. Pi meno, i nge nongo batija, omyero wamedde ki dongo watwa ki Lubanga pi naka.

⁹ Watwero poro dongowa i yo me cwiny ki dongo pa yat. Yat twero dongo madit adada ka lwite odonyo matut i ngom. Me lapore, yadi cedar mabeco me Lebanon gitwero dongo o wa i futi 120 dok lwitgi tego kun donyo ma matut i ngom ki dok korgi dit romo futi 40. (Wer. 5:15) Yat dongo oyotoyot i acakkine. Mwaka ki mwaka, kore medde doko dit dok lwite donyo matut kun jany i ngom ma weko yat-te doko tek. Lacen, pe yot tutwal me neno ka yat-te medde ki dongo. Man bene rom aroma ki dongo pa Lakricitayo i yo me cwiny. Watwero dongo oyotoyot i yo me cwiny i kare ma nongo pud wacako kwano Baibul akwana ci ingeye wanongo batija. Jo me kacokke cwinygi bedo yom ka gineno kit ma watye ka dongo kwede. Watwero bene nongo mot me tic macalo painia nyo tic mukene i kacokke. Ka kare woto ki kato, dongowa i yo me cwiny pe twero nen atir atir. Kadi bed kumeno, myero wadong niyewa kacel ki ngecwa “nio ka wadoko dano mucwiny, ma wadongo warom ki Kricito, ma en aye jami ducu opong iye.” (Ep. 4:13) Calo yat matidi ma dongo nio ka odoko yat muteggi, wan bene myero wadong nio ka wadoko Lukricitayo muteggi i yo me cwiny.

10. Pingo mitte ni kadiwa Lukricitayo muteggi myero gumedde ki dongo i yo me cwiny?

¹⁰ Ento, dongowa pe myero ogik kenyo. Omyero ngecwa omedde ki dok niyewa ojing matek. Meno miyo wacung matek i Lok pa Lubanga calo lwit yat mudonyo matut i ngom. (Car. 12:3) I kacokke pa Lukricitayo, omege ki lumege mapol dong gutimo kumeno. Me lapore, omego mo acel ma dong obedo laelda pi mwaki makato 30 kulu owaco ni pud etye ka dongo i yo me cwiny. En wacci: “Pwoc-ca pi Baibul pud dong odongo madit adada. Pol kare, anongo yo manyen me keto i tic cik me Baibul. Pwoc ma atye kwede pi ticwa me pwony-nyi bene medde ki dongo.”

DONG WATTI KI LUBANGA

11. Ka kare woto ki kato, wan watwero ngeyo Jehovah maber nining?

¹¹ Dongo i yo me cwiny bene kwako nyikke cok bot Jehovah macalo Laremwa ki Wonwa. En mito ni wange ni eparo piwa. En mito ni wange ni emarowa dok egwokowa kit ma latin winyo kwede ka lanyodone otinge nyo kit ma wawinyo kwede ka watye kacel ki laremwa ma wapoko kwede pyer ngwen. Kit ma ingeyo kwede, nyikke cok bot Jehovah pe timme i dyewor acel. Kare myero okati wek wange dok wamarre. Pi meno, wek inge Jehovah maber, mok tammi me kwano Lokke nino ducu. Ki dok kwan Wi Lubele ki Awake! kacel ki bukke ma gijenge i Baibul.

12. Ngo ma myero watim wek Jehovah ongewa?

¹² Lurem Lubanga gidongo i yo me cwiny ka ce gilego ki cwiny me ada dok gikwo ki lurem mabeco. (Kwan Malaki 3:16.) Jehovah “ciko ite, winyo legagi.” (1 Pet. 3:12) Calo lanyodo ma lamar, Jehovah tero ite ka wakok bote pi kony. Pi meno, omyero ‘wadiyu cwinywa i lega.’ (Rom. 12:12) Pe watwero bedo Lakricitayo muteggi ka pe Lubanga aye okonyowa. Lyeto me lobo-ni tek tutwal pien romo turo cwinywa nyo miyo wabedo ki atematema me timo bal. Ka wagiko diyo cwinywa i lega, ci pe wabimedde ki nongo teko ma Lubanga twero miniwa dok bene tye atera me miyone. Tika dong iyeng ki rwom me legani kece mito ayuba?​—Jer. 16:19.

13. Pingo pire tek ni wabed kacel ki Lukricitayo luwotwa wek wamedde ki dongo i yo me cwiny?

¹³ Jehovah cwinye yom i kom jo ducu ma ‘giringo gilaro bote’; pi meno, kadi bed dong wangeyo Lubanga, omyero kare ki kare wamedde ki bino i cokke. (Nak. 1:7) I lobo man ma cwiny dano tur cawa ducu-ni, omyero wanyut ryeko kun wabedo kacel ki omegiwa ki lumegiwa wek gucuk cwinywa. Adwogi mabeco ango ma wanongo? Ibinongo i kacokke dano ma gibitugo cwinyi “i mar ki i tiyo tic mabeco.” (Ibru 10:24, 25) Mar ma Paulo ocoyo pire bot jo Ibru-ni mito note kacel macalo utmege ma giworo Lubanga i kacokke. Nyuto kodi mar ma kit man kwako lok ki Lukricitayo mukene. Nen ni kare ducu ibedo tye i cokke kun bene imiyo lagam.

14. I yo ango ma ngut kacel ki lokke pe gitimo kicel keken?

¹⁴ Ma peya wadoko Lakricitayo onongo mitte ni wanguti ki dok walokke. Ento, ngut pe obedo gin ma timme kicel keken. Macalo jo ma gitye ki roc, yot tutwal botwa me timo bal pien bal tye calo twol ma tye atera me tongowa. (Rom. 3:9, 10; 6:12-14) Omyero wabed ma wangwa bit dok pe waca balwa. Tye me yomcwiny ni Jehovah diyo cwinye i komwa ka walwenyo matek ki gorowa kun watimo alokaloka ma mitte i kwowa. (Pil. 2:12; 2 Pet. 3:9) Gin ma bikonyowa aye ka watiyo ki cawawa kacel ki jami ma watye kwede i yo maber kun pe wayenyo jami me cobo mitiwa keken. Lamego mo acel ocoyo ni: “Adongo i ada, ento onongo aneno Jehovah i yo mapat ka iporo ki jo mukene. Onongo alwore adada, ki dok onongo atamo ni pe atwero yomo cwinye.” Lacen, lamego man ocako “doko goro i yo me cwiny” pi bal mogo ma en otimo. En medde ni,“man pe otimme pienni onongo pe amaro Jehovah ento onongo pe angeye maber. Kadi bed kumeno, alego tyen mapol ki cwinya ducu, ci acako loko kwona.” En omedo ni: “Anongo ni Jehovah opeya calo latin, kun konya me cobo pekona ki acel acel ki dok nyutta ki mwolo gin ma myero atim.”

15. Gin ango ma Yecu kacel ki Wonne gineno?

¹⁵ ‘Wumedde ki tito bot dano’ lok me kwena maber-ri. Lamalaika pa Lubanga owaco lok man bot Petero ki lukwena mukene-ni i nge gonyogi ki i ot buc i yo me tango. (Tic 5:19-21) Ada, wot i ticwa me pwony cabit ki cabit tye i kin jami ma kiryeyogi ma myero wangigi. Yecu kacel ki Wonne gineno teko pa niyewa ki dok ticwa me pwony. (Yabo 2:19) Laelda ma kiloko i kome i paragraf mukato angec-ci owaco ni: “Ticwa me pwony obedo but kwowa ma pire tek adada.”

16. Pingo pire tek ni itam matut i kom dyereni bot Jehovah?

¹⁶ Tam matut i kom dyereni. Gin ma pud dong pire tek loyo botwa aye watwa ki Jehovah. En ngeyo jone. (Kwan Icaya 44:5.) Ngi wati ki Jehovah dok ileg ni okonyi me gwokone wek obed matek. Ma kubbe ki meno, wii myero pe owil i kom nino dwe ma inongo iye batija. Meno bene bikonyi me poyo wii ni batijani tye lanyut me tam ma pud dong pire tek loyo ma imoko.

BED COK KI JEHOVAH KUN ICIRO ATEMATEMA

17. Pingo omyero wacir atematema wek wabed cok ki Jehovah?

¹⁷ I waragane ma ocoyo bot jo Galatia, Paulo otittigi ni pire tek me ciro atematema. (Gal. 6:9) Man bene pire tek bot Lakricitayo i kareni. Ibirwatte ki atematema mapol ento Jehovah bikonyi. Medde ki lega pi cwiny maleng. Ibiwinyo ni itye agonya ka en leyo kaka kumo ki yomcwiny, tur cwiny ki kuc. (Mat. 7:7-11) Tam kong i kom lok man: Ka Jehovah paro pi winyi, watwero bedo ki gen ni en paro piwa adada pien wamarre dok wamine kenwa bote. (Mat. 10:29-31) Kadi bed irwatte ki lyeto ma rom mene, pe iil cingi. Watye ki lonyo madit adada pien Jehovah ngeyowa!

18. Kit ma ‘dong ingeyo Lubanga-ni,’ gin ango ma imito timone?

¹⁸ Pi meno, omyero dong itim ngo ka ce ingeyo Lubanga cokcok-ki ci inongo batija? Medde ki ngeyo Jehovah maber ki dok dongo i yo me cwiny nio ka i doko Lakricitayo muteggi. Ngo dok ma mitte ka inongo batija mwaki mapol mukato angec? In bene myero i medde ki dongo ngecci i kom Jehovah. Pe myero water watwa kwede calo gin ma konye pe. Ma ka meno, kare ki kare omyero wawotu wiye wiye i jami ma wanyamogi i pwony man wek wamedde ki dongo watwa ki Wonwa, Laremwa, ki dok Lubangawa ma lamar​—Jehovah.​—Kwan 2 Jo Korint 13:5, 6.