Bed Ki Pwoc Matut Pi Kit Pa Jehovah

1. (a) Kit mene ma Jehovah tye kwede ma Lakricitayo twero tam i komgi? (b) Adwogi mabeco ango ma wanongo ki i ngiyo kit pa Lubanga?

KA ITAMO i kom Jehovah, kite macalo mene ma bino i wii? Dano mapol gitamo i kom mar, ngolo kop atir, ryeko, ki dong teko. Ento, wangeyo ni Jehovah tye ki kite mapol mabeco. Ki lok ada, kiromo ryeyo kit pa Jehovah mapat pat makato 40 kulu, ma gin ducu dong kinyamogi i bukkewa. Tam kong kit ma itwero nongo ngec mapol madok i kom Jehovah ka itye ka kwano kite i kwan piri keni nyo kacel macalo jo me ot! Adwogi mabeco ango ma watwero nongone ki i kwano lok i kom kit pa Jehovah? Man romo dongo pwocwa pi Wonwa me polo. Macalo adwogine, wabibedo ki miti madit me nyikke cok bote ki dong me lubo lanenne.​—Yoc. 23:8; Jab. 73:28.

2. (a) Mi lapor ma nyuto kit ma watwero dongo kwede pwocwa pi kit pa Jehovah. (b) Gin ango ma wabineno?

² Ento, te lokke ngo me bedo ki “pwoc” pi gin moni? Kit ma wabitiyo ki nyig lok-ki i pwony eni, bedo ki pwoc kwako niang kit ma gin moni pire tek kwede. Bedo ki pwoc pi gin moni dongo motmot. Me lapore: Ket kong ni itye ka camo dek mo ma pud peya icamo. I acakkine, ingweyo kit ma ngwece mit kwede. I ngeye, ibilo ci inongo ni mit adada. Ka dong lacen, i tedo in kikomi. I yo acel-li, wadongo pwocwa pi kit mo acel pa Jehovah ka wamedo ngecwa i kom kit meno, walwodo lok iye, ka dong waketo i tic i kwowa. (Ep. 5:1) Pwony man ki dong aryo ma gilubo-ni kiyubogi me dongo pwocwa pi kit mogo pa Lubanga ma pe waketo tamwa tutwal i komgi ka iporo ki kite ma pigi tego. Ma lubbe ki kit acel acel, wabineno kit ma Jehovah nyuto kwede ki dok kit ma watwero lubo lanen pa Jehovah i nyuto kit meno.

LOK KI JEHOVAH YOT

3, 4. (a) Ngat ma lok kwede yot kite nongo tye nining? (b) Jehovah miniwa gen nining ni lok kwede yot?

³ Ngat ma lok kwede yot nongo kite tye nining? Itwero wacone ni, ‘Ngat meno lakica dok cawa weng nongo tye.’ Pol kare itwero niang ka lok ki ngat moni yot nyo tek ka iwinyo ngo ma en waco ki dok ka ineno kit ma en wito kwede ki cinge nyo timo ki wange.

⁴ Jehovah nyuto nining ni lok kwede yot? Kadi bed ni en Ocweyo polo ki lobo dok tye won twer ducu, Jehovah cuko cwinywa ni etye atera me winyo legawa wek ekonywa. (Kwan Jabuli 145:18; Icaya 30:18, 19.) Watwero lok ki Lubanga pi cawa malac dok i kabedo mo keken. Waromo lok kwede agonya, kun wangeyo ni en pe bikeco i komwa. (Jab. 65:2; Yak. 1:5) Baibul loko i kom Jehovah kun poro en ki dano wek wange ni emito ni walok kwede. Me lapore, Daudi ocoyo ni ‘Rwot [Jehovah] nenowa’ ki dok ni en ‘kwakowa woko maber ki cinge malacuc.’ (Jab. 34:15; 63:8) Lanebi Icaya oporo Jehovah ki lakwat, kun wacci: “[En] bitingo litino romine i bade, en bitingogi i kore.” (Ic. 40:11) Go kong! Jehovah mito ni wabed cok kwede macalo latin romo ma lakwat ma lakica otingo i kore. Ada, pud dong yot ya me lok ki Wonwa! Watwero lubo lanen pa Jehovah nining?

KIT MA PIRE TEK ADADA

5. Pingo pire tek ni luelda gubed jo ma lok kwedgi yot?

⁵ Macok cokki, Lucaden ma gitiyo ki mit kom i but lobo mapat pat kipenyogi ni: “Kodi kit ango ma pire tek loyo ma imito ni laelda myero obed kwede?” Polgi gugamo ni, “Bedo ngat ma lok kwede yot.” Tye kono ni Lakricitayo acel acel omyero odong kit man i yo matut, ento bene pire tek tutwalle ni luelda myero gubed jo ma lok kwedgi yot. (Ic. 32:1, 2) Laminwa mo acel oloko i kom gin mumiyo etamo ni kit man pire tek adada, kun wacci: “Ka laelda moni lok kwede yot, ci man biyabo yo me nongo adwogi maber ki i kite mukene mabeco ma en tye kwede.” Tika iniang ryeko ma tye i lok man? Ento gin ango ma weko lok ki ngat moni bedo yot?

6. Lagony me bedo ngat ma lok kwede yot obedo ngo?

⁶ Lagony me bedo ngat ma lok kwede yot aye nyuto miti me ada i kom jo mukene. Ka laelda paro pi jo mukene dok mine kene wek ekonygi, man biweko omegine ki lumegine, kadiwa lutino ginongo ni lok kwede yot. (Mar. 10:13-16) Carlos ma mwakane tye 12 owaco ni: “Amaro mada ka aneno luelda gibunyo kun ginyuto cwiny me kica i ot me ker.” Ngene gire kene ni pe romo ka laelda waco awaca ni en lok kwede yot, ento en myero onyut kit man i tic. (1 Jon 3:18) En twero timo man nining?

7. Pingo ruko baj me gure madit tugo miti pa dano me lok kwedwa, dok pwony ango ma wanongo?

⁷ Tam kong i kom lapor man. Macok cok-ki, ominwa mo oruko baj me gure madit i kare ma en tye ka dok paco kun tiyo ki dege i nge bedo i gure madit i lobo mukene. I kare ma latic i dege meno oneno baje ma tye ki lok ni “Wek Ker pa Lubanga Obin!,” en owaco bot ominwa-ni ni, “Ada, wek obin​—omyero wanyam lok man.” Lacen, guloko iye, ci latic-ci ogamo magajinwa ki yomcwiny. Pol pa wan dong kodi jami ma kit man otimme i komwa. Pingo baj me gure madit tugo miti pa dano me lok kwedwa? Pien waco ki dano ni: “Bed agonya me lok kweda. Penya ka ma abicito iye.” Baj obedo lanyut ma nen dok weko dano gingeyo ni watye atera me nywako niyewa kwedgi. I yo acel-li, jami ma luelda ma Lukricitayo myero gutim tye calo lanyut bot luye luwotgi ma waccigi ni “Bed agonya me lok kweda.” Luelda gitwero timo man nining?

8. Luelda ginyuto nining ni gitye ki miti i kom jo mukene, dok man gudo kacokke nining?

⁸ Tekwaro pe rom i lobe ducu, ento ka wabwunyo ki omegiwa ki lumegiwa ,wajologi ki yomcwiny kun wamoto cinggi, ci nongo watye ka nyutigi ni watye ki miti i komgi. Anga ma myero otel yo i timo man? Nen kong lanen ma Yecu oweko. Matayo ocoyo ni i cokke mo acel ki lupwonnyene, ‘Yecu obino ci oloko kwedgi.’ (Mat. 28:18) I kareni bene, luelda gitelo yo me bino bot luye luwotgi ci giloko kwedgi. Man twero gudo kacokke nining? Laminwa mo ma mwakane tye 88 dok tye painia owaco ni: “Ka luelda gibunyo kweda dok gicuko cwinya ki lokgi ka adonyo i Ot me Ker, man miyo amarogi ada.” Laminwa mukene ma lagen omedo ni: “Kitwero nenone calo gin matidi, ento ka laelda jola i cokke ki bwunyo, man gudo cwinya adada.”

KWANY KARE ME LOK KI OMEGE KI LUMEGE

9, 10. (a) Jehovah oweko lanen maber nining? (b) Luelda gitwero lubo lanen pa Jehovah nining?

⁹ Ngene kene ni dano pe gibedo ki kare me lok kwedwa ka nongowa tek. Ma lubbe ki man, Jehovah oweko lanen maber adada. “En pe tye cen ka mabor ki bot ngat acel acel i kinwa.” (Tic 17:27) Yo acel ma luelda gitwero lubo kwede lanen pa Jehovah aye ka gikwanyo cawa ma pud peya cokke ocake nyo ingeye me lok ki omegigi ki lumegigi, ma man bene kwako lutino ki jo muteggi. Omego mo ma tye painia owaco ni: “Ka laelda openya kit ma atye kwede ci otero ite me winyo lagamma, man miyo awinyo ni an bene kitamo pira.” Laminwa mo ma dong obedo ka tic pi Jehovah pi mwaki ma romo 50 owaco ni: “Luelda ma gikwanyo kare me lok kweda i nge cokke giweko atamo ni an bene pira tek i wanggi.”

¹⁰ Ada, lukwat ma Lukricitayo omyero bene gucob katalagi mukene ma gitye kwede. Kadi bed kumeno, pire tek ni omyero kong guket cwinygi i kom rommi me kacokke.

JEHOVAH PE POKO KIN DANO

11, 12. (a) Bedo labongo cwiny me apokapoka kwako ngo? (b) Jehovah tye lanen maber botwa ka odok i lok me bedo labongo cwiny me apokapoka nining?

¹¹ Kit mukene ma yomo cwinywa ma Jehovah tye kwede aye ni en pe poko kin dano. Te lokke ngo me bedo labongo cwiny me apokapoka? Man kwako ngolo kop atir nyo tero dano ducu marom aroma. Bedo labongo cwiny me apokapoka kwako jami aryo: tamwa ki dok ticwa. Pingo jami aryo magi gimitte? Pien ka ngat moni neno ni dano ducu girom, ci en biterogi labongo cwiny me apokapoka. I Ginacoya me leb Grik, lok man ni “pe poko kin dano[-ni]” te lokke ni watero dano weng ni pigi tek. (Tic 10:34) Pi meno, ngat ma pe poko kin dano pe keto cwinye i kom kit ma ngat moni nen kwede nyo kit me kwone, ento i kom kit ngat moni.

¹² Jehovah aye pud dong lanen maber adada pi ngat ma pe ki cwiny me apokapoka. Lokke waco ni en “pe poko kin dano” ki dok ni en “pe dworo kor dano mo.” (Kwan Tic pa Lukwena 10:34, 35; Nwoyo Cik 10:17.) Kong wanenu gin mo acel mutimme i kare pa Moses.

13, 14. (a) Anyira abic pa Jelopekad onongo gitye ki peko ango? (b) Jehovah onyuto nining ni pe epoko kin dano?

¹³ Ma dong Luicrael gicok donyo i Lobo ma Kiciko Pire-ni, lumege abic ma wigi nono, ma gia ki i ic acel, onongo gitye ki peko mo ma ocungo wigi woko. Peko man obedo ngo? Onongo gingeyo ni ka pe gin mo, ci omyero kipokigi dul lobo ma onongo kibimiyo bot wongi, calo i doggola mukene me Icrael. (Wel 26:52-55) Ento wongi Jelopekad, ma onongo a ki i doggola pa Manace-ni, onongo dong oto woko. Ma lubbe ki Cik, twero me leyo dul lobo onongo omyero obed pa lutino awobe pa Jelopekad, ento en onongo tye ki anyira keken. (Wel 26:33) Labongo latin awobi mo i doggolagi, tika onongo kibimiyo dul lobo man bot wadigi labongo weko ginaleya mo bot anyira-ni?

¹⁴ Lumege abic magi gubino bot Moses ci gupenye ni: “Pi lok ango miyo gikwanyo nying wonwa woko ki i kin doggolane? Ni, pi litino co ma pe onywalo-ni bo?” Gin gubako doggi kun giwacci: “Wuminiwa walim dul lobo mo i kin omegi wonwa.” Tika Moses ogamo lokgi ni, ‘Meno aye cik, pe tye gin mo ma aromo timone piwu’? Pe, en “otero lok me kokogi i nyim Rwot [Jehovah].” (Wel 27:2-5) Lok man kidok iye nining? Jehovah owacci Moses ni: “Lok pa anyira pa Jelopekad tye atir. Ibipoko lobo botgi i kin omego pa wongi obed me aleyagi, wek gule dul lobo ma myero obed pa wongi.” Jehovah omedde anyim ci oloko lok man odoko cik, kun ciko Moses ni: “Ka laco mo oto ma pe onywalo wode mo, ci wubimiyo ginaleyane bot nyare.” (Wel 27:6-8; Yoc. 17:1-6) Nicakke i kare meno, mon ma Luicrael ma onongo gitye i kodi peko eni olo to onongo gibinongo ginaleya.

15. (a) Jehovah tero jone nining, kadi wa jo ma ngat mo ma myero okonygi pe? (b) Mi labol mukene me Baibul ma ginyuto ni Jehovah pe poko kin dano.

¹⁵ Man pud dong obedo tam ma kimoko labongo cwiny me apokapoka! Jehovah otero mon magi ma onongo ngat mo pe ma konyogi-ni ki woro kit ma onongo tero kwede Luicrael mukene-ni. (Jab. 68:5) Man tye labol acel keken i kin mukene mapol ma gitye i Baibul ma ginyuto lok man me yomcwiny-nyi ni: Jehovah tero luticce ducu marom aroma.​—1 Cam. 16:1-13; Tic 10:30-35, 44-48.

WATWERO LUBO LANEN PA JEHOVAH

16. Ngo ma myero watim wek wadong cwiny me tero dano ducu marom aroma?

¹⁶ Watwero lubo lanen pa Jehovah nining i bedo ma pe wapoko kin dano? Po ni bedo ma pe wapoko kin dano kwako jami aryo. Ka watamo ni dano ducu girom aroma, ci wabitero jo mukene labongo cwiny me apokapoka. Ada, wan ducu wamaro nene kekenwa calo jo ma niang dok pe wapoko kin dano. Kadi bed kumeno, i kine mukene pe yot tutwal me niang kit ma itamo kwede i kom jo mukene. Pi meno, ngo ma itwero timone me niang ka ada in pe i poko kin dano? I kare ma Yecu onongo mito niang gin ma dano gitamo i kome, en openyo lureme ma en genogi ni: “Dano mono giwacci Wod pa dano en anga?” (Mat. 16:13, 14) Pingo pe ilub lanen pa Yecu? Itwero penyo laremi mo ma igeno wek otitti ka ce in itye ki cwiny me apokapoka. Gin ango ma myero itim ka ce en owacci ni olo to itye ki cwiny me apokapoka ma lubbe ki rangi del kom, rwom me kwan, nyo cente ma ngat moni tye kwede? Leg matek bot Jehovah, kun i kwaye ni okonyi me loko kit ma iwinyo kwede ki i cwinyi i kom jo mukene wek ilub lanenne me bedo ngat ma pe poko kin dano.​—Mat. 7:7; Kol. 3:10, 11.

17. I yo macalo mene ma watwero tero kwede jo mukene labongo cwiny me apokapoka?

¹⁷ I kacokke, wanyuto ni wamito lubo lanen pa Jehovah me bedo labongo cwiny me apokapoka ka watero omegiwa ki lumegiwa i yo me woro ki kica. Me lapore, ka odok i kom jolo wele i gangiwa, wamito ni walwong luye luwotwa ma gia ki i kwo mapat pat kadi wa lucan, lutino kic, nyo mon to. (Kwan Jo Galatia 2:10; Yakobo 1:27.) Medo i kom meno, ka watye ka tito kwena me Ker-ri, omyero wanywak kwena maber-ri ki jo ducu ma guwok ki i kwo mapat pat labongo apokapoka, kadi wa jo ma gia ki i lobbe mukene. Cwinywa dong yom adada ni watye ki bukke ma gijenge i Baibul i leb ma romo 600 kulu. Man nyuto atir ni wape ki cwiny me apokapoka!

18. In ibinyuto nining ni itye ki pwoc pi kit pa Jehovah me bedo ngat ma lok kwede yot ki dok ngat ma pe poko kin dano?

¹⁸ Ada, ka wakwanyo kare me lwodo lok i kom kit ma yot kwede me lok ki Jehovah ki kit ma en pe poko kwede kin dano, man bikonyowa me dongo pwocwa i kome. Bedo ki pwoc matut myero otug mitiwa me lubo kit pa Jehovah i yo matut, kun wanyuto i kit ma watero kwede luye luwotwa ki jo ma watito kwena botgi.