Tika Tye Dini Mo ma Omyero Igen?

Ka ce dini mo acel ocwero cwinyi, iromo nongo ni tek tutwal me geno dini mo keken. Ento bed kun ingeyo ni tye dini acel keken ma iromo genone. I kare ma Yecu pud tye i lobo, en oguro kacel lulub kore ma gin lugen ci opwonyogi me kwo i yo matir ma Lubanga mito. Jo ma gilubo kor Kricito dok bene gitute me kwo i yo ma Lukricitayo myero gukwo kwede pud gitye. Ka kwene ma iromo nongogi iye?

Estelle, ma kiloko i kome i pwony mo acel mukato-ni, owacci: “Acako pwonyo lok me ada i kare ma acako kwano Baibul ki Lucaden pa Jehovah. Atero kare manok keken me niang Jon 8:32, ma wacci: ‘wubingeyo lok me ada, lok me ada bigonyowu.’”

Ray, ma bene kiloko i kome-ni, owacci: “I kare ma acako kwano Baibul ki Lucaden pa Jehovah, aniang ni Lubanga aye kara pe tye ka kelo can ma dano tye ka denone-ni. Cwinya yom me niang ni kadi bed Lubanga tye ki tyen lok matir me weko jami maraco gutimme i kare-ni, en ocikke me jwayone woko cokcok-ki.”

Ngene kene ni tek tutwal me timo gin matir ka pol pa dano gitimo jami maraco. Ento twere me timo gin matir. Dano mapol gimito kony wek giniang dok giket cik me Baibul i tic. Meno aye gin mumiyo Lucaden pa Jehovah gitye ka kwano Baibul ki dano milion mapol i twok lobo ducu. I cabit ducu, dano mapol gitye ka niang gin ma Baibul ada pwonyo, gitye ka nyikke cok bot Lacwecgi, dok gitye ka kwo ma cwinygi yom.a

Ka nino mukene irwatte ki Lucaden pa Jehovah, pingo pe ipenygi gin mumiyo gigeno dinigi? Wacuko cwinyi me kwedo ka ada Lucaden pa Jehovah gikwo kit ma Lukricitayo myero gukwo kwede. Ci mok tammi ka ce dini mo tye ma itwero genone.