Lubanga Tika Tamo Piri?

Tika onongo pore pi Daudi me bedo ki gen ni Lubanga tamo pire? Lubanga tika tamo piri? Dano mapol ginongo ni tek me ye ni Lubanga won twer ducu tamo pigi. Pingo?

Tyen lok me acel aye ni rwom pa Lubanga dit adada ma pe pore ki pa dano adana-ni. Ka waporo ki rwomme, rok ducu gitye calo ‘pii ma oton kicel ki i baket, dok gikwanogi macalo apwa ma tye i mijan.’ (Icaya 40:15) Lacoc mo acel owaco ni “obedo twon bwola ma tere otuc ni Lubanga mo tye ma paro piri dok keto cwinye i jami ma itimo.”

Ki tungcel, jo mogo gitamo ni jami ma gitimo aye weko Lubanga pe tamo pigi. Me lapore, laco mo ma nyinge Jim owaco ni: “Alego kare ducu pi kuc kacel ki cwiny me jukke-ken, ento onongo akeco woko i nge kare manok keken. I agikkine, aniang ni an kara kita rac ma konye pe ki dok ni Lubanga pe twero konya.”

Lubanga tika tye ka mabor ma weko en pe tamo piwa? En mono neno dano ma gitye ki roc nining? Pe tye ngat mo ma romo lok pi Lubanga nyo gamo lapeny magi kono do ka Lubanga aye otitte lok madok i kome. Lokke ma obedo Baibul-li cuko cwinywa ni Lubanga pe tye ka mabor kwedwa ento nyuto ni en tamo pi ngat acel acel. Baibul waco ni, “en pe tye cen ka mabor ki bot ngat acel acel i kinwa.” (Tic pa Lukwena 17:27) I pwony angwen ma gilubo man, wabinyamo kit ma Lubanga tamo kwede pi dano ki dong yo ma en onyuto kwede ni etamo pi dano adana calo in.