Lubanga Nyikke Cok Boti

GIN MUMIYO JO MOGO GITYE KI AKALAKALA: Dano mapol ma giye i kom Lubanga gitamo ni gibor kwede. Christina, dako mo ma bedo i lobo Ireland dok woto i kanica i cabit ducu owaco ni, “Atere mere calo Lubanga ma ocweyo jami ducu. Ento pe angeye kulu. Pe tye nino mo acel ma awinyo ni atye cok kwede.”

GIN MA LOK PA LUBANGA PWONYO: Lubanga bimedde ki konyowa kadi bed watamo ni peko obwoyowa woko. Yecu oporo kit ma Lubanga paro piwa kun waco ni: “Ka ce dano mo tye ki romine miya acel, ka acel i kingi ocito orwenyo woko, pe biweko romi pyerabongwen wiye abongwen-ni i wi cere-gu, ci cito ka yenyo en murwenyo-ni?” Pwony ango ma wanongo? “Kit meno Wora ma tye i polo bene pe mito ni ngat mo acel i kin jo magi matino myero oto.”​—Matayo 18:12-14.

‘Ngat acel acel i kin jo magi matino-ni’ pire tek bot Lubanga. Lubanga “yenyo en murwenyo-ni” nining? Wang Baibul ma tye i acakki me pwony man-ni nyuto ni Jehovah nyiko dano cok bote.

Nen kong kit ma Lubanga onyiko bote jo mogo ma onongo gitye ki cwiny matir. I cencwari me acel K.M. (Kare Man), Lubanga ocwalo lapwonnye Pilipo me rwatte ki ladit mo me lobo Etiopia wek onyam kwede lok ma lanebi ocoyo ma onongo ladit-ti pe tye ka niang i kare ma tye ka kwanone. (Tic pa Lukwena 8:26-39) Lacen, Lubanga ooro lakwena Petero me limo ladit mo me Roma ma nyinge Kornelio, ma obedo ka lega dok tute me woro Lubanga. (Tic pa Lukwena 10:1-48) Lubanga bene ocwalo lakwena Paulo kacel ki luwote i dog kulu mo ma tye i nge gang me Pilipi. Ki kunnu gurwatte ki “dano ma woro Lubanga” ma nyinge Ludia, dok “Rwot [Jehovah] oyabo tamme omiyo oketo cwinye ka winyo lok.”​—Tic pa Lukwena 16:9-15.

Ma lubbe ki jami magi mutimme-ni, Jehovah oneno ni jo ma gitye ka mito ngeyo lok kome gubedo ki kare me ngeyone. I kareni, angagi ma gicito i gangi pa dano ki dok ka ma dano pol iye wek ginywak kwedgi lok madok i kom Lubanga? Pol pa dano giwaco ni, “Lucaden pa Jehovah.” Penye kekeni ni, ‘Tika romo bedo ni Lubanga tye ka tic kwedgi me nyikke cok bota?’ Wacuko cwinyi me lega bot Lubanga wek en onyikke boti.a