Lubanga Nyinge Anga?

Ka watye ka tute me ngeyo ngat mo maber, gin me acel ma ibicako ki penyo aye, “In nying anga?” Ka ni ipeny Lubanga lapeny meno, ci en onongo bigamo nining

“An a Jehovah. Meno aye nyinga.”—Icaya 42:8, NWT.

Tika nying meno nyen boti? Twero bedo kit meno, pien pol pa jo ma gigonyo Baibul i leb mapatpat pe gimaro tic ki nying Lubanga, dok i kine mukene pe gitiyo kwede kulu. Pol kare gileyo kakare ki nying me dog tic calo “Rwot.” Kadi bed kit meno, nying Lubanga tye i coc macon me Baibul tyen makato 7,000 kulu. I leb Ibru, nying Lubanga onongo kicoyo ki nukuta angwen, dok nukuta magi obedo YHWH nyo JHVH, ma pi kare malac dong kicoyo ni “Jehovah” i leb Muno.

Dead Sea Psalms Scroll: Courtesy of the Israel Antiquities Authorit

TYEN LOK MA OMIYO NYING LUBANGA PIRE TEK

Nying meno pire tek bot Lubanga. Ngat mo pe omiyo nying meno ki Lubanga, en Lubanga aye ma oyero. Jehovah kikome otito ni: “Man aye nyinga matwal, wubipo i koma, wun ki likwayowu ducu, kit man.” (Nia 3:15) I Baibul, nying Lubanga nonge tyen mapol makato nying me dog ticce mo keken calo, Won Twer Ducu, Wonwa, Rwot, Lubanga, nyo nying calo Abraim, Moses, Daudi, nyo Yecu. Madong pire tek loyo, obedo miti pa Jehovah ni dano gunge nyinge. Baibul wacciwa ni: “Wek gunge ni, in keni aye ma nyingi Jehovah, in aye Ngat Mamalo Twal ma loyo wi lobo-ni ducu.”—Jabuli 83:18, NWT.

Nying meno pire tek bot Yecu. I lega ma kilwongo ni Wonwa me Polo, Yecu opwonyo lulub kore ni guleg Lubanga ni: ‘Giwor nyingi maleng.’ (Matayo 6:9) Yecu kikome bene olego bot Lubanga ni: ‘Abana, ket deyo i kom nyingi.’ (Jon 12:28) Yecu oweko pi nying Lubanga obedo mukwongo i kwone dok pi meno en owaco ni: “Amiyo nyingi ongene botgi, dok abimiyo ngene.”—Jon 17:26.

Nying man pire tek bot jo ma gingeyo Lubanga. Jo pa Lubanga ma i kare mukato onongo gingeyo ni gwoko kwogi kacel ki larregi jenge i nying Lubanga. “Nying Rwot [Jehovah] obedo calo cel matek ka ma dano ma kite atir ringo iye ci laro kwone.” (Carolok 18:10) “Jo ducu ma gilwongo nying Rwot [Jehovah] gibilarogi.” (Joel 2:32) Baibul nyuto ni nying Lubanga biweko kingeyo jo mene ma gitye ka tic pire kikome. ‘Pien rok ducu gibiwot kun ngat acel acel woto i nying lubangane, ento wan wabiworo Jehovah Lubangawa nakanaka.’—Mika 4:5; Tic pa Lukwena 15:14.

GIN MA NYING LUBANGA NYUTIWA

Nying meno pat adada dok tye pi Lubanga keken. Lucoc mapol giye ni nying man ni Jehovah tyen lokke tye ni “En Miyo Timme.” Lubanga Jehovah otito tyen lok me nyinge maber i kare ma oloko i kome kekene bot Moses ni: “Atye ma Atye.” (Nia 3:14) Nyig lok me leb Ibru ma kigonyo i tyeng man bene kitwero gonyo ni “Atwero Doko Gin Mo Keken ma Amito.” Pi meno, nying Lubanga pe nyuto ticce ma calo Lacwec keken ma omiyo jami ducu tye. Nyinge meno nyutiwa ni en twero doko gin mo keken dok twero weko cwecce doko gin ma mitte me cobo yubbe. Kadi bed ni nying me dog tic pa Lubanga konyowa me ngeyo, twerone, ki tekone, ento nying Jehovah keken aye ma twero konyowa me ngeyo anga ma en obedo ki gin ma en twero bedo.  

Nying Lubanga nyuto mitine i komwa. Tyen lok me nyinge nyuto wat macok ma tye i kin en ki cwecce, ma wan bene watye iye. Kit macalo Lubanga oweko nyinge ongene-ni, man nyuto ni en mito ni wangeye. Medo i kom meno, en aye ocako nyuto miti me tito nyinge botwa ma wan bene onongo pud pe wapenyo. Onen ka maleng ni, Lubanga pe mito ni wanene macalo cwiny mo ma kite pe niango dano dok tye ka mabor, ento macalo Ngat ma tye ada ma bene watwero nyikke cok bote.—Jabuli 73:28.

Tic ki nying Lubanga nyuto mitiwa i kome. Me labolle, iromo waco ki ngat mo ma imito ni odok laremi ni olwongi ki nyingi. Ibiwinyo nining ka ngat meno okwero tic ki nyingi woko? Iromo cako pennye kekeni ka ngat meno ada mito bedo laremi. Meno bene rom ki gin ma Lubanga otimo. Jehovah otitiwa nyinge, dok cuko cwinywa me tic kwede. Ka watiyo kwede, wanyuto bot Jehovah ni wamito bedo cok kwede. Tye kit meno pien en neno wa jo ma “gitamo pi nyinge”!—Malaki 3:16.

Pwonyo nying Lubanga obedo gin mukwongo ma pire tek wek wange Lubanga. Ento pe omyero wagik kenyo keken. Omyero wange jami mapol i kom Ngat meno ma kato ngeyo nyinge keken. Omyero wapwony kite maber adada.