Tika Onongo Ingeyo?

Kacokke pa Lujudaya ocakke nining?

LOK ma kigonyo i Baibul me leb Acholi ni “kacokke pa Lujudaya” a ki i leb Grik ni “synagogue” ma te lokke ni “gure” nyo “cokke kacel.” Nying man rwatte pien Lujudaya onongo gigure i kabedo magi pi winyo pwony ki woro Lubanga nicakke wa con. Ginacoya me leb Ibru pe loko i kom kabedo magi atir atir, ento nen woko ka maleng ki i Ginacoya me leb Grik ni ot cokke magi onongo dong gitye wa con ma peya cencwari me acel K.M. ocakke.

Lukwed lok mapol gitamo ni kacokke magi nyo synagogue ocakke i kare ma Lujudaya gitye i opii i Babilon. Buk ma tito tekwaro pa Lujudaya, Encyclopaedia Judaica owaco ni: “Opii magi onongo pe gitwero o i Ot me Woro Lubanga, gitye i lobo pa lurok, dok gimito kwe cwiny pi pekki ma gitye ka wok ki i iye, pi meno onongo gicokke kacel kare ki kare, gwok nyo i nino me Cabat, ci gikwano Ginacoya.” I kare ma kigonyogi ki i opii, nen calo Lujudaya gumedde ki cokke kacel pi lega ki kwano Ginacoya, dok onongo gigero ot cokke i kabedo ducu ma gibedo iye.

I cencwari me acel K.M., onongo dong odi magi gudoko kabedo ma kwo me nino ducu lwore iye pi gurup pa Lujudaya ma guket i dog nam me Mediterranean, i kin lobe me Middle East, ki dong i Icrael kikome. Professor Lee Levine ma obedo lagol piny dok okwano tekwaro pa Lujudaya owaco ni: “Odi magi onongo tiyo calo ot kwan, ka cam i nino Cabat, ot kot, ka gwoko cente pa lutedero, ka namo, ki kabedo me cokke pa luwibye.” En omedo ni: “Ngene kene ni, gin ma pire tek loyo ma onongo kitimo kunnu aye cokke me woro Lubanga.” Dong pe tye me ur ni Yecu kare ki kare onongo cito i kacokke pa Lujudaya. (Mar. 1:21; 6:2; Luka 4:16) En opwonyo, otiro, dok ocuko cwiny jo ma onongogi kunu. I kare ma dong dini pa Lukricitayo ocakke, lakwena Paulo bene obedo ka tito kwena i kacokke pa Lujudaya. Jo ma gitye ki miti i kom jami me cwiny onongo gimaro cito i ot cokke, dong ka Paulo odonyo i boma moni, en pol kare onongo kong cito i kacokke pa Lujudaya ci tito kwena kunnu.—Tic 17:1, 2; 18:4.