Gedo Odi me Ker—Obedo But Tic Maleng ma Pire Tek
1. Tic me gero Odi me Ker dong kitiyo ma rom mene, ento ngo ma pud tye ka mitte me atima?
1 Nicakke ma yub man ocakke kwede i Sektemba mwaka 1999, kityeko dong gero Odi me Ker 555, kiroco 21, ka kiyubo ka muballe manok nok i odi 35 i Burundi, Kenya, Tanzania, ki Uganda. Wamiyo pwoc ki yomcwinywa bot jo ma gudyere me tiyo tic matek me gero Odi me Ker kacel ki jo ma gijalo karegi me konyo tic man. Kadi bed ni tic madit dong otyeko tine, ento Odi me Ker mukene mapol pud tye ka mitte me agera. Dong i yo ango ma wan ducu watwero ribo kwede cingwa me konyo ticwa man maleng bot Jehovah ma pire tek-ki?—Yabo. 7:15.
2. I yo ango ma wan watwero konyo kwede tic me gero Odi me Ker?
2 Bed ki Cwiny me Mine: Ka ce in latit kwena ma dong otyeko nongo batija, walegi ni imine me tic kacel ki jo ma gigero Odi me Ker. (Jab. 110:3) Jo ducu ma gimine me timo tic man myero gubed jo ma gitiyo labongo dic dok ma gitye ki cwiny me ribbe. (Jab. 133:1) Kadi bed ni pe itye ki ngec me gedo, ento pud itwero miyo kony mogo wek tic me gedo moni otum maber. Iromo bene nongo pwonnye ma weko kibitic kwedi tutwal i anyim.
3. I yo mukene mene ma watwero nyuto kwede ni wacwako yub me tic man?
3 Ka pe itwero dyere, ci iromo nyuto mitini ki cuko cwiny jo mukene ma gitwero timo tic man. Itwero miyo kony me timo tic ma nongo jo ma gucito i tic me gero Odi me Ker ka mukene gitimo i kacokke. Luelda giromo goyo pulan man con, wek yub me kacokke ducu owot maber ka jo mukene gucito i tic me gero Ot me Ker. Cwiny Jehovah bedo yom tutwal ka wan ducu waribo cingwa kacel me dongo tic me Ker-ri.—Ibru. 13:16.
4. Watwero jingo cwiny jo ma gidyere me timo tic me gero Odi me Ker nining?
4 Bed Ngat ma Cuko Cwiny: Gero kabedo me woro obedo tic matek dok tero kare. Pi meno, omyero wange ni jo ma kilwongogi me konyo tic man nongo giweko pacogi ki kacokkegi pi kare mogo. Dong omyero wamiyu pwoc kacel ki jingo cwiny bot jo magi ma gudyere me timo “tic man.”—Tic 6:3; Rom. 14:19.
5. Jo ma gidyere me timo tic me gedo omyero gutim ngo?
5 Bed ki Yub Maber: Tito pi kwena me Ker pa Lubanga aye obedo tic me acel i worowa. (Mar. 13:10) Pi meno, jo ma gitiyo tic me gero Odi me Ker omyero guket yub ma rwatte ma weko jo ma nongo gudyere-ni pe giweko kacokkegi nono nono. I kit yo acel-lu, gin jo ma gudyere-ni omyero guyelle matek me cobo tic mapol ma gitye kwede. Gin omyero gunen ni giyubo yub ma weko ka gipe ci jo mogo gutiyo tic ma gin gitimo i kacokke.
6. Jami ango ma cobbe ka jo ducu me kacokke guribbe kacel i tic me dongo woro me ada?
6 Lakwena Paulo oloko i kom jo ma i kacokke ni gin gitiyo kacel ‘miyo kom dongo maber i mar.’ (Ep. 4:16) Mar ma watye kwede i kom Jehovah ki pi woro me ada ribowa kacel weko waribo cingwa i tic me tito lok me kwena maber kacel ki tic me gero Odi me Ker.