Kit me Pwonyo Jo Manyen me Tito Kwena
1. Iwinyo nining tyen mukwongo ma iwoto i tic me pwony?
1 Wi mono pud po tyen mukwongo ma icako kwede pwony i ot ki ot? Myero obed ni kong ibedo ki lworo tutwal. Ka onongo itye ka tic kacel ki lapwony-nyi me Baibul nyo latit kwena mukene, labongo akalakala mo cwinyi obedo yom pi kony ma en obedo ka mini. Kombeddi dong idoko lapwony ma tye ki ngec muromo, itye ki tic me pwonyo jo manyen me tito kwena.
2. Ngo ma mitte ni lutit kwena manyen gupwony?
2 Lutit kwena manyen myero gupwony kit me cako lok ki rwod ot, tic ki Baibul i doggola, dok cen ka lim, ki cako kwano Baibul ki dano. Myero gupwony bene yo mapat pat me nywako i tito lok me kwena calo lok ki dano i teng gudu ki cito ka ma dano mapol gitimo iye biacara. Itwero konyogi me dongo ngecgi i yo magi ki lanen nyo tam ma in imiyo botgi.
3. Watwero konyo jo mukene me tic ki lanenwa maber nining?
3 Pwonygi ki Lanen: Yecu pe oloko aloka keken bot lukwenane ento en onyutu botgi kit me tito kwena. (Luka 8:1; 1 Pet. 2:21) Ka iyubbe me tic ki latit kwena manyen, yub pwony mo ma latit kwena-ni romo tic kwede, iromo tic ki pwony mogo ma gitye i bukkewa. Mukwongo in aye icak tic i doggola me acel nyo ki bene me aryone wek latit kwena-ni owiny gin ma ibiloko. Inge meno, iromo penyo latit kwena-ni wek otit ngo ma en oneno i pwony ma ibedo ka miyone. Man bikonye me ngeyo kit ma pire tek kwede me nywako i tic me pwony kacel ki dano dok bibedo yot bote me lubu tam mo keken ma in ibimiyo ka en omiyo pwony.
4. I nge winyo pwony pa latit kwena manyen, watwero bedo me kony bote nining?
4 Mi Tam: Yecu bene omiyo tam ma lukwenane myero guti kwede me tito kwena. (Mat. 10:5-14) In bene itwero konyo latit kwena manyen i yo ma kit man. Ka en tye ka lok, ter iti ka winyo lokke. Ka wutyeko lokwu i doggola meno, mi pwoc mupore pi gin ma en oloko maber, kadi bed ineno kabedo mo ma mitte ni en myero oyubbi. Ma peya imiyo bote tam, iromo mine kare wek inen ka ce en oyubo kit me lokke i doggola mukene. Oromo bedo ni en nongo tye ki lworo. Po bene ni lutit kwena ducu pe gitye ki ngec marom, dok bene tye yo mapol me timo gin acel moni maber.—1 Kor. 12:4-7.
5. Gin ango ma waromo lokone ka wan aye wamine me miyo tam?
5 I kare mukene latit kwena romo penyi pi tam mo. Ento ka en pe openyo tam, in aye myero itute me konye. Itwero timo man ki ryeko nining? Lutit kwena mukene ma gitye ki ngec muromo gipenyo lapeny calo, “Tika atwero mini tam?” nyo ni, “Pwonywa owoto nining?” Gin mukene ma waromo timone aye me wacce ni, “I kare ma an pud latit kwena manyen onongo obedo tek bota me . . . , ento gin ma okonya mada aye. . . . ” I kare mukene wutwero neno kacel tam tye i buk me Reasoning. Pe idur lok mapol bote, mi bote tam i gin acel keken ma lubbe ki pwony ma en omiyo.
6. Ma lubbe ki tic me pwony, i yo ma nining ma ‘nyonyo pako nyonyo’ lawote?
6 Nyonyo Pako Nyonyo Lawote: Paulo ocuko cwiny Temceo, lapwony me Baibul ma onongo tye ki ngec matut me miyo karene me pwony ki me medde ki dongo. (1 Tem. 4:13, 15) Kadi bed mwaki mapol dong okato i nge tyen me acel-li me cako pwony, medde ki dongo dironi. Pwony ki bot lutit kwena ma itiyo kwedgi, kadi wa lutit kwena ma pe gitye ki ngec matut i tic me pwony, dok ki mwolo bed atera me konyogi, tutwal-le jo ma pud ginyen, wek gudok lupwonye ma gitye ki ngec matut me tito lok me kwena maber-ri.—Car. 27:17.