Tika Dong Inyutu Kit ma Wakwano Kwede Baibul ki Dano i Acakki me Rwattewu?
Wegi odi mukene giwacci gipe ki miti nyo ni gin gikwano Baibul ki i kanicagi ka ce wamito cako kwano Baibul kwedgi. Pien pe giniang ni yo ma wakwano kwede ki Baibul pat ki pa gurup me dini mukene-ni, pe gingeyo ni man romo yabo wanggi dok kelo yomcwiny. Pi meno, ma ka waco awaca ni wakwano Baibul ki dano, pingo pe ikwany dakika mo me nyutu yub me kwano Baibul ki dano i acakki me rwattewu? Me laporre: Ka in latedo, pe iwac bot dano awaca ni in ingeyo tedo maber ento ibikeligi cam lacen; ma ka meno, mi wek gubil cut. Man aye kit ma iromo timone kwede i dakika manok keken, kun itiyo ki tam ma tye i pot karatac 6 i Ticwa me Ker me Januari 2006:
“In itamo ni kare mo bibino ma nongo lok magi dong cobbe? [Kwan Icaya 33:24, ci imine kare wek ogam.] Wek kong anyutti gin mo me yomcwiny ki i pwony man.” Mi bot rwod ot buk me Baibul Pwonyo, ci nyutte paragraf 22 i pot karatac 36. Kwan lapeny ma tye i agikki me pot karatac meno, ci kwa rwod ot me yenyo lagamme ka nongo ikwano paragraf 22. I nge kwano, nwo lapeny meno, ci winy lagam pa rwod ot. Wukwan ginacoya mukene ma kicimogi kacel. Peny lapeny mo ma ibigamo ka idok ka lim i nino mukene, dok iket yub me dok cen. Man nongo dong icako kwano Baibul ki dano!