Wupwony Lutinowu me Doko Lutit Kwena
1. Jabuli 148:12, 13 cuko cwiny lunyodo ma Lukricitayo me timo ngo?
1 Jehovah lwongo jo ma gitino wek gupak en. (Jab. 148:12, 13) Pi man, lunyodo ma gin Lukricitayo, pe gipwonyo lutinogi ki lok ada me Baibul ki dok cik pa Lubanga keken. Gipwonyogi bene me doko lutit kwena maber-ri. Waromo pwonyogi kore ki kore nining?
2. Lanen maber pa lunyodo gudo kwo pa lutinogi nining?
2 Lanen Maber: Langolkop Gideon owaco bot jone 300 ni: “Wunena ci wun bene wutim kit ma an atimo.” (Lungol. 7:17) Lutino gineno dok giporo gin ma lunyodogi timo. Wego mo acel tiyo i dyewor, ento ka en odwogo paco i Ceng Abicel odiko, ma ka cito ka yweyo, en tero lutinone i tic me pwony kadi bedo en ool mada. Labongo waco lok mo, en tye ka pwonyogi ni myero guket tic me pwony obed mukwongo. (Mat. 6:33) Lutinoni mono gineno ka itimo ticci me woro Lubanga calo lega, kwano Baibul, miyo lagam i cokke, ki tito lok me kwena ma cwinyi yom? Adada, pe itwero bedo lanen ma pe ki roc. Ento lutinoni gibibedo ki miti me lubo pwony ma ipwonyogi kwede me woro Jehovah, ka gineno kit ma itute kwede i timo ticce.—Nwo. 6:6, 7; Rom. 2:21, 22.
3. Yub me cwiny ango ma lunyodo myero gukony lutinogi me keto ki cobo kore ki kore?
3 Cobo Yubwu Kore ki Kore: Labongo olo lunyodo gipwonyo lutinogi me wot, lok, rukke ki jami mukene mapol. Kiromo keto yub manyen pi lutino ka giwoto ki dongo. Ka lunyodo gubedo Lukricitayo, gin gikonyo lutinogi me keto ki dok cobo yub me cwiny ma lubbe ki mwaka kacel ki dirogi. (1 Kor. 9:26) In mono itye ka pwonyo lutinoni me miyo lagam ma a ki i cwinygi i kare me cokke dok me yubo pwony pigi kengi i Cukul me Tiokraci? (Jab. 35:18) Mono itye ka pwonyogi me nywako yo mapat pat me ticwa me pwony? Itye ka keto i nyimgi yub me nongo batija ki donyo i tic pi kare malac? Mono itye ka konyogi me mako lirem ki lutit kwena ma komgi mit wek gicuk cwinygi?—Car. 13:20.
4. Ka lunyodo gupwonyo lutinogi ki tic me pwony cakke ki i tinogi, adwogi maber ango ma ginongo?
4 Laco Jabuli owacci: “Ai Lubanga, ibedo ka pwonya cakke ka tinona, pi meno pud atuco pi ticci me aura ducu ma itiyo.” (Jab. 71:17) Cak pwonyo lutinoni ma pud gitino me doko lutit kwena. Te gutti matek ma iketo pigi i yo me cwiny bikelo adwogi maber ka dong gudoko dito!—Car. 22:6.