Pwony Lutinoni me Pako Jehovah
1. Lutino matino mono gitwero pako Jehovah?
1 Jabuli 148:12, 13 cuko cwiny awobe ki anyira me ‘pako nying Jehovah.’ Ginacoya tye ki labol mapol pa lutino ma gutimo man. Me labolle, ‘Camuel obedo ka tic i nyim Jehovah ma onongo en pud tidi.’ (1 Cam. 2:18) “Latin nyako mo” aye owaco bot dako pa Naaman ni lanebi mo pa Jehovah tye i Icrael ma twero cango two dobo pa Naaman. (2 Luker 5:1-3) I kare ma Yecu odonyo i ot pa Lubanga kun tiyo tic madito me aura, “lutino” gubedo ka dange ni: “Ojana, wupak lakwar Daudi!” (Mat. 21:15) Lunyodo gitwero pwonyo lutinogi wek gupak Jehovah nining?
2. Pingo pire tek ni lunyodo omyero gunyut labol maber bot lutinogi?
2 Labol: Kitito bot lunyodo me Icrael ni, ma peya gin gucako pwonyo lutinogi ki lok me ada, gin omyero kong gumar Jehovah dok gugwok cikke i cwinygi. (Nwo. 6:5-9) Ka iloko lok mabeco i kom tic me pwony dok iweko bedo but yubbi pi cabit ducu, ci lutinoni bidongo ki cwiny me neno tic me pwony calo gin ma pire tek ma kelo yomcwiny.
3. Lamego mo acel onongo adwogi maber ki lubo labol pa lunyodone nining?
3 Lamego mo acel ma wiye po owacci: “I kare ma pud adongo adonga, tic mukene ma onongo watimo macalo jo me ot kare ducu obedo nywako i tic me pwony i tum pa cabit ducu. Omiyo aniang ni lunyodona onongo gimaro tic me pwony mada. Wadongo kun waneno tic me pwony calo gin ma kelo yomcwiny.” Lamego man odoko latit kwena ma peya onongo batija ki mwaka abiro keken dok kombeddi en dong orii i tic me pwony pi mwaka 33 kulu.
4. Pwonyo lutino mot mot te lokke ngo?
4 Pwonygi Mot Mot: Wek lutinoni otim gin mo ka wutye i tic me pwony. Iromo weko gidwongo doggola, gimiyo trak bot rwod ot, nyo gikwano ginacoya mo. Man twero medo yomcwinygi dok konyogi me bedo ki gen i kom kerogi me nywako kwena me Ker-ri. Ka giwoto ki doko dito, ticgi me pwony myero omedde. Pi meno, konygi wek gudong kun nongo gitamo pi bedo ki yub me cwiny.
5. Ngo ma mitte wek latin moni opore me doko latit kwena ma peya onongo batija?
5 Lok bot luelda cut teke ineno ni lutinoni dong gupore dok ginyutu miti me doko lutit kwena ma peya kibatijagi. Doko latit kwena konyogi me neno ni pako Jehovah obedo tic ma tye i wigi. Nge ni latin pe myero kong obed ki ngec matut calo dano madit ma dong onongo batija ka wek obed mupore. Latinni dong mono tye ki ngec ma pigi tego i kom gin ma Baibul pwonyo? Tika en lubo cik me Baibul me bedo ki kit matir? En tika tye ki miti me nywako i tic me pwony ma weko kinene calo Lacaden pa Jehovah? Ka ce tye kumeno, ci luelda gitwero mokone ni en dong tye ma opore me doko latit kwena ma peya onongo batija.—Nen Organized to Do Jehovah’s Will, pot 79-82.
6. Pingo pore mada pi lunyodo me pwonyo lutinogi?
6 Pwonyo lutino wek gupak Jehovah ki cwinygi ducu mito tic matek. Ento kono, neno ka lutinogi dongo i yo me cwiny kelo yomcwiny madit bot lunyodo loyo jami mapol ma twero keligi yomcwiny. Makato ducu Jehovah cwinye bedo yom ka lutino gitito pi ticce me aura.