Poko Karatac me Lwongo pi Nipo Cakke i April 2
1. I mwaka-ni wabipoko karatac me lwongo pi Nipo awene, dok rwec man pire tek mwaka ki mwaka pingo?
1 Nicakke i April 2 me o i April 17, wabipoko karatac me lwongo pi yub ma pire tek loyo i mwaka—Nipo me to pa Kricito. I kare mukato angec, jo mapol guye lwongo man ma bedo mwaka ki mwaka-ni. Me labolle, i nino me Nipo, dako mo ogoyo cim i jang gang kal kun wacci: “Pud adwogo paco adwoga ci anongo karatac me lwongo i te doggolana. Amito cito iye ento pe angeyo cawane.” Omego ma ogamo cim-mi otito bote ka ma en twero nongo iye cawa ki i karatac me lwongo. Dako-ni ogiko lokke ki cikke ni, “Otyeno-ni abibedo i yub man!”
2. Gin ango ma waromo wacone ka watye ka miyo karatac me lwongo man?
2 Kit me Miyone: Kit macalo watye ki kare manok me cobo wang ticwa-ni, bedo ber tutwal ka waloko macek cek. Waromo wacci: “Wabino ka lwongo in ki jo me odi me bedo tye i kwer mo ma pire tek ma timme mwaka ki mwaka i lobo ducu ma bibedo i Ceng Cabit me April 17. [Mi karatac me lwongo bot rwod ot.] Nino dwe man aye kibikwero iye Nipo me to pa Yecu. Kibimiyo pwony me Baibul labongo cul mo ma kibitito iye adwogi maber ma wanongo ki i ginkok pa Kricito. Karatac me lwongo man nyutu cawa ki kabedo ma yub man bitimme iye i kabedowa.”
3. Watwero lwongo dano mapol nining?
3 Ka kacokkewu tye ki wang tic malac, ci luelda giromo miniwu tam me weko karatac me lwongo man ka ma pe nen ki woko i odi ma danone gipe gang. Nen ni ilwongo jo ma idok cen ka limogi, lutino kwanni me Baibul, lutic luwoti, lutino kwan luwoti, wadini, jiranini, ki dong jo mukene ma ingeyogi. Ka wutye ka poko karatac me lwongo i tum pa cabit, wuromo miyo magajin bene ka twere. Tika itwero tic macalo painia pi tutunu i dwe me April wek inong mit me rwec man?
4. Pingo wamito ni jo ma gunyutu miti gubed tye i kwer me Nipo?
4 Jo manyen pud dong gibinongo caden ma pire tek atika! Gibiwinyo lok i kom mar madit pa Jehovah mumiyo en omiyo ginkok. (Jon 3:16) Gibiniang bene kit ma Ker pa Jehovah bikelo adwogi maber bot dano. (Ic. 65:21-23) Kibicuko cwinygi me lok bot lajol welle mo keken ka gimito nongo ngec ki penyo ni kikwan Baibul kwedgi. Walego ni jo ma cwinygi atir guye lwongo man wek waribbe kacel kwedgi i kwer me Nipo!