Ti ki Keroni Ducu —Kit me Nongo Cawa ka Ticci Pol
1. Pingo jo mogo gitye ki akalakala pi cako kwan ki lutino kwan me Baibul?
1 Jo mukene gilworo cako kwano Baibul ki dano pien ni gitye ki tic mapol me atima. Konyo latin kwan me Baibul cwalo kare malac. Cawa mitte me yubo buk, kwan ki latin kwan, ki me konye ki lweny ki pekkine. Lakwena Paulo owacci emiyo kwone me pi konyo jo Tecalonika wek gunge Jehovah. (1 Tec. 2:7, 8) Waromo cako kwan ki latin kwan me Baibul kadi bed watye ki tic mapol nining?
2. Marwa pi Jehovah gudo kit ma watiyo kwede ki cawa nining?
2 Tic pi Jehovah Tero Cawa: Ki lok ada, tic pi Jehovah mito cawa muromo. Me labolle, kare ki kare watiyo ki cawawa me cito i cokke, nywako i tic me pwony, kwano Baibul, ki lega. Ngat munyomme kadi bed tye ki tic mapol pud kwanyo kare me bedo kacel ki luote. Dong omyero ‘wati ki kare ma tye maber’ me timo tic pa Jehovah pien wamare. (Ep. 5:15-17; 1 Jon 5:3) Ma lubbe ki lok pa Yecu tic me tito kwena obedo but worowa ma pire tek adada. (Mat. 28:19, 20) Ka walwodo lok man ci pe wabidok cen ki ngewa ki i tic me pwonyo lutino kwan ki Baibul.
3. Waromo kwan ki lutino kwanwa me Baibul labongo keng nining?
3 Ento ka pe watwero cobo yubwa pien watye ki dog tic ma camo cawawa, two ma pe cang, nyo tic mukene ma kwako woro Lubanga kono? Lutit kwena mogo ma kare mukene giwoto ka tic ka mabor, gikwano ki lutino kwangi kun gikubbe ki cim nyo kompiuta. Jo ma gitye ki two ma pe cang giketo yub pi latin kwan me bino ka kwan ki gang botgi. Jo mukene giketo yub ki latit kwena mo ma twero, me konyogi ka guwoto i cafari.
4. Mot ango ma walimo ka wanywako i kwano Baibul ki dano?
4 Lakwena Paulo onongo yomcwiny pi miyo karene, cawane ki kerone, pi konyo jo mukene wek gunge lok me ada. (Tic. 20:35) Tam i kom adwogi maber ma obino ki i ticce i Tecalonika, omiyo Paulo opwoyo Jehovah i lega. (1 Tec. 1:2) Yomcwiny ki yengowa bimedde ka pe waweko tic mukene otero cawawa ducu ki i ticwa me kwano Baibul ki dano.